Песнь 1

Ирмос: Моря чермную пучину невлажными стопами древний пешешествовав Израиль, крестообразныма Моисеовыма рукама Амаликову силу в пустыни победил есть.

Троицы единоначалие, святии, Богославяще честно, многоначалия нестоянную мглу удобно разрушисте, востока, многосветлии, якоже звезды возсиявше.

Трие исповедницы, благодатию просвещаеми Начальныя Троицы явственно, лесть многобожную, терпеливно противление являюще, истребиша.

Вас, убо сыноположив, славнии, любовию Естественный Сын, ныне Ему наследию, даему яве, яко Благоутробен снаследники показа и Царствия сопричастники.

Богородичен: Мудрости премудростныя скиния была еси, Всенепорочная, Свой бо храм от Твоих пречистых кровей, Чистая, создати благоволи на спасение душ наших.

Песнь 3

Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.

Тело мукам волею и лютым ранам Христовы предаша исповедницы и угодницы.

Избавится от лютых греховных помысл, святии, вашу память верою совершающим умолите.

На древе терпеливно воздвижени, честнии свидетелие всеблагочестно невредно исповедание соблюдоша.

Богородичен: Целений Тя источник в Твою утробу Вшедый показа, Мати Божия, Пречистая, мою убо душу исцели.

Седален, глас 8

Крестом вооружившеся Христовым, в нем мучителей всю крепость мужески низложисте, яко веры поборницы; безбожие все идольское обличисте и Троицу, святии, усердно проповедавше. Тем достойно от Нея венцы победы приясте, яко законно пострадавшие, страстотерпцы всеславнии, молите Христа Бога грехов оставление подати празднующим любовию святую память вашу.

Песнь 4

Ирмос: Вознесена Тя видевши Церковь на Кресте, Солнце праведное, ста в чине своем, достойно взывающи: слава силе Твоей, Господи.

Троицы равночисленнии венечницы трисиянною свещею ныне совершающия память всесвященную тех озаряют, всем исцеления подающе.

С благоговением притецем к светоносней и светозарней, Богомудрии, раце мученик, точит бо врачевания верою зовущим: слава силе Твоей, Господи.

Исповедающе Божественное строение и паче ума таинство, Богословными языки все безбожие мучителей Божественнии и всемудрии исповедницы попраша.

Богородичен: Паче ума родила еси, о Дево! и по рождестве явилася еси, девствующи паки. Тем немолчными гласы, радуйся, Тебе, Владычице, верою несомненною вопием.

Песнь 5

Ирмос: Ты, Господи, мой свет, в мир пришел еси, Свет Святый, обращаяй из мрачна неведения верою воспевающия Тя.

Светлостию яве подвигов сияюще, посрамиша мучителей свирепый нрав веры поборницы.

Во вся явственно вселенныя концы чудеса мученик проповедашася и вся верою утвердиша.

Якоже земля благая, благодати семена приемши, житием трудолюбно богатство блаженнии содеяша.

Богородичен: Един Благий, пучиною благостыни всяческая, Богомати, содержай, Твоими объятии держатися сподоби.

Песнь 6

Ирмос: Пожру Ти, со гласом хваления, Господи, Церковь вопиет Ти, от бесовския крове очищшися, ради милости от ребр Твоих истекшею Кровию.

Законно, яко добрии воини, Богомудрии, удержавше вся и ясно веру соблюдше, Божественныя правды приясте венцы.

Прежде убо Аввакум высоце возвышается Владычним повелением, чрез вас же отроковица мучима, Богоглаголивии, к воспитавшей возвратися.

Сияет рака мученик чудесы и реки источает исцелений всем, приходящим верою и тех терпению дивящимся.

Богородичен: Тя едину посреде терния обрет, яко чистейший крин и во удолиих цвет, о, Богомати, Жених умный в Тя вселися.

Кондак, глас 2

С высоты, мудрии, благодать приемше, сущим во искушениих предстоите, всехвальнии. Темже отроковицу, святии, от смерти горькия избависте, вы бо воистину есте Едесу слава и миру радость.

Икос

Вражия мя работы избави, Иисусе Жизнодавче, Твоих страдалец мольбами умоляемь, яко да непорабощенну стяжав от страстей душу мою и тело, восхвалю тех скорейшую помощь, якоже во гробе затвореная мужа лукавствием, и сию скоро предваривше, от смерти избавиша, зовущу: Едесу слава и миру радость.

Песнь 7

Ирмос: В пещи Авраамстии отроцы персидстей любовию благочестия паче, нежели пламенем, опаляеми, взываху: благословен еси в храме славы Твоея, Господи.

Авраамския в пещи дети избавивый, Сый и странную отроковицу лютаго обстояния спасе ходатайством ныне святых угодник, яко Благоутробен.

Суровейшаго безчеловечия муку давый, всех зол абие истязан убийца злоименитый судом праведным Твоим, Слове Божий, мудросте и сила.

Укрепляема к вам надеждею, славнии, отроковица, заключенная во гробе с мертвыми, чаяния не погреши, зовущи: благословен еси, Господи Боже отец наших.

Богородичен: Яко новосмешеное и светозарное пущая зерцало, Зарю Божественнаго, Дево, сияния, приложившуюся Тебе, вместила еси. Благословена Ты в женах, Всенепорочная Владычице.

Песнь 8

Ирмос: Руце распростер Даниил, львов зияния в рове затче; огненную же силу угасиша, добродетелию препоясавшеся, благочестия рачители, отроцы, взывающе: благословите вся дела Господня Господа.

Всемирный днесь нам наста праздник мученик Христовых, озаряющ благодатию чудес приходящия верою и радостию духовною и любовию зовущия: благословите вся дела Господня Господа.

Удобно исповедницы Твоего Божества все упраздниша безбожие, Владыко, мучителей не убоявшеся прещений злоумных, верою укрепляеми, взывающе: благословите вся дела Господня Господа.

Всемудрии исповедницы, предстояще Божественному повелению, врагов полки побеждающи, мечем закалаеми, победу преславно яве и пресиящу показаша, падающе бо, противныя победиша.

Богородичен: Естествы видимаго двема, Христа родила еси, едину носяща яве Ипостась сложну Божества и человечества, стекшуся естественному истинно по соединению: тем Тя благословим, Марие Богоневестная.

Песнь 9

Ирмос: Камень нерукосечный от несекомыя горы, Тебе, Дево, краеугольный отсечеся, Христос, совокупивый разстоящаяся естества, Тем, веселящеся, Тя, Богородице, величаем.

Словесем последующе Божественным и Богодухновенным Христовым, исповедницы Богосветлии, крест на рамена, радующеся, взясте, жизноносным стопам последующе, достославнии.

Всему свету Троицы с веселием доблии исповедницы вмещшеся, подвигов чести воспринимают, Безплотных чинов сподобльшеся соводворения.

Ныне не в зерцале зрите блаженных надежды, исповедницы Спасовы; истины же паче, всемудрии, доброту зрите, венценосцы всечестнии.

Яко Пребожественныя Троицы яве равночисленнии явльшеся исповедницы, Богоглаголивии, Тоя зарями просвещаетеся, яко Тоя ради пострадавше, Жизни нетленныя ныне улучиша.

Богородичен: Плотию приити восхотев, украсивый вся, Слово в Тя вселися, Едину святейшу всех обрет, и Богородицу воистину яви, Мати Дево.

Светилен

Иже от гроба отроковицу избавльше древле, Гурие, и Самоне, и Авиве, мученицы Христовы, предварите, яко от гроба прегрешений ны избавляюще.

Кондак 1

Избранный воеводо воинов духовных, наставниче монашествующих и пастырю предивный, писании отеческими души наша напитавый и святостию жития просиявый, многи обители иноческия обновивый и подвиги твоими Церковь Христову озаривый, преподобне отче Паисие, восхваляем тя с любовию, заступника нашего. Ты же, яко имеяй дерзновение ко Господу, от всяких нас бед свободи молитвами твоими, да зовем ти: Радуйся, преподобне отче Паисие, старче благодатный и наставниче монахов богомудрый.

Икос 1

Ангела земнаго и человека небеснаго воздвиже тя, отче Паисие, десница Божия в пределех страны Российския, да вострубиши трубою добротолюбия в землях Молдовлахии, на Святей Горе Афонстей и во всех странах словенских, и собереши разсеянныя пустыннолюбцы народов христианских, и сим оплот православнаго братства во обителех мнозех утвердиши. Темже мы, любовию к тебе подвизаемии, взываем сице: Радуйся, благочестиваго иерейскаго корене отрасле пречестная; радуйся, любве ради ко Господу дом матере твоей и отечество оставивый. Радуйся, ангельскаго жития подражателю; радуйся, заповедей Божиих усердный хранителю. Радуйся, на жатву духовную Господом посланный; радуйся, в вертограде Божия Матере — Святей Горе Афонстей Богу послуживый. Радуйся, многих на путь иноческаго жития наставивый; радуйся, обителей монашеских добрый строителю. Радуйся, светом боговедения просвещеный; радуйся, плоды богомудрых писаний твоих множество иночествующих напитавый. Радуйся, душеспасительную книгу Добротолюбия народом словенским даровавый; радуйся, к преподобных лику сопричтенный. Радуйся, преподобне отче Паисие, старче благодатный и наставниче монахов богомудрый.

Кондак 2

Ведый Господь велика тя быти светильника Православия и монашеския жизни обновителя, благоволи рождению твоему от благочестивых родителей — священника Иоанна и супруги его Ирины во граде Полтаве. Темже по смерти родителя и старшаго брата иерея преосвященный Киевский Рафаил повеле взяти тя на учение книжное, да обучен будеши к восприятию священнаго сана. Ты же усердие, благонравие и ревность в учении явил еси, воспевая Богу песнь: Аллилуиа.

Икос 2

Разумом Божественным просвещен, блаженне, утвердился еси в непреложнем своем намерении в монашестве пожити и, душею к странствованию разжигаем, оставил еси учение и изшел еси из Киева, якоже нищий и странный, ища духовнаго руководства, и Богом наставляем, пришел еси во обитель святителя Николая, идеже игумен с любовию прият тя в послушание и облече тя в рясофор с именем Платон. Сего ради и мы, взирающе на ревность твою о Господе, со умилением зовем ти: Радуйся, в день памяти святителя Киевскаго Петра родивыйся; радуйся, в крещении именем его нареченный. Радуйся, родителей благочестивых чадо благословенное; радуйся, от юности на служение Богу призванный. Радуйся, измлада в вере истинней воспитанный; радуйся, во учении книжнем прилежание усердное показавый. Радуйся, Господа ради путь тесный и скорбный избравый; радуйся, нищету телесную и духовную возлюбивый. Радуйся, во обитель святителя Николая спасения ради пришедый; радуйся, монашеское житие достойне восприявый. Радуйся, иноческих подвигов ревнителю; радуйся, добрый странниче к Отечеству Небесному. Радуйся, преподобне отче Паисие, старче благодатный и наставниче монахов богомудрый.

Кондак 3

Сила свыше укрепи тя, отче преподобне, егда Божиим попущением наста гонение на веру православную от латинян и бысть великое смущение во обители, яко церковь стояше запечатана врагами Православия. Тогда по Божию смотрению идоша гонимии иноцы в Киев, и ты, отче, достиг еси с ними матере градов русских и жительство восприял еси в лице иноков Киево-Печерския Лавры, благодарно воспевая Христу Богу: Аллилуиа.

Икос 3

Имеяй в сердце своем огнь любве Божественныя, ревностно подвизался еси о спасении души твоея во обители Печерстей, отче богомудре. Мати же твоя неутешно плакаше о сыне, из дому ушедшем, и умысли ни ясти ниже пити, дондеже умрет. Тогда увиде множество бесов мрачных и начат молитися ко Пресвятей Богородице, и посем узре Ангела Божия, иже обличи ю и рече: «Веждь, яко сын твой, благодати Божией споспешествующей, непременно будет монах. Подобает и тебе отрещися от мира и быти монахинею, такова бо есть воля Божия». И абие бесы исчезоша, Ангел же Господень, радуяся, взыде на небо. Послежде мати твоя в монастырь девичий вниде, постригшися с именем Иулиании, и, пребывши в монашестве десять лет, преставися ко Господу. Темже, яко избранника Божия, ублажаем тя песньми сими: Радуйся, суету мира сего оставивый; радуйся, во обитель Киево-Печерскую пришедый. Радуйся, юность твою непорочностию жития украсивый; радуйся, в скорбех и искушениих надежду на промысл Божий хранивый. Радуйся, славу и богатство ни во чтоже вменивый; радуйся, житию нестяжательному во обители научивыйся. Радуйся, во славу Христову потрудивыйся; радуйся, на высоту добродетелей возшедый. Радуйся, града твоего Полтавы крепкий заступниче; радуйся, обители Киево-Печерския усердный молитвенниче. Радуйся, яко матерь градов русских Киев тобою хвалится; радуйся, яко тебе ради и вся Русская земля веселится. Радуйся, преподобне отче Паисие, старче благодатный и наставниче монахов богомудрый.

Кондак 4

Бури житейских волнений в тихом пристанищи обители Печерския избегл еси, отче, и благословением отцев Киево-Печерских стезям подвижников последовал еси. Того ради любовию Божиею распаляем, отечества удалился еси, направив стопы твоя в Молдовлахию, и тамо сретил еси старца Василия, учителя и наставника монашескаго жития, иже многими душеполезными словесы братию свою наставляше. Ты же, блаженне, слышал еси глаголы сия с неизреченною радостию и со слезами прославлял еси Бога, воспевая Ему: Аллилуиа.

Икос 4

Слышав от братий многих и отец-подвижников в скитах Молдовлахии, яко обилие благодати Божия пребывает на Святей Горе Афонстей, просил еси их благословения на путь, хотя пожити в вертограде Божия Матере. Онии же отцы не хотяху сподвижника своего лишитися, удивляющеся о благодати Божией, на тебе почивающей, и юным старцем тя нарицаху, обаче не могуще удержати тя, благословиша и отпустиша с миром. Мы же, любовию подвизаемии, дерзаем воспевати тебе таковая: Радуйся, от земли отечествия твоего в Молдовлахию стопы твоя направивый; радуйся, с посохом странника скиты и обители иноческия тамо обшедый. Радуйся, в неустанней молитве дни и нощи проводивый; радуйся, имя Господа Иисуса Христа неусыпно возносивый. Радуйся, благое иго Христово на себе возложивый; радуйся, талант, врученный ти, умноживый. Радуйся, к подвижническому житию призванный; радуйся, яко с плотию на земли безплотное житие показал еси. Радуйся, постническим подвигом себе укрепивый; радуйся, в юности твоей старческую мудрость явивый. Радуйся, благодатию Святаго Духа просвещенный; радуйся духом премудрости и ведения обогащенный. Радуйся, преподобне отче Паисие, старче благодатный и наставниче монахов богомудрый.

Кондак 5

Боготечней звезде уподобился еси, угодниче Божий, егда пришел еси на Святую Гору Афонскую, благодаря Пречистую Матерь Христа Бога нашего, яко сподоби тя приити в святый Ея Жребий, и вселися тамо един в каливу, обучаяся истинному монашескому безмолвию, внимая же прилежно молитве и чтению отеческих писаний. И тако восходя благодатию Божиею от силы в силу достигл еси в мужа совершенна, украсившагося даровании Святаго Духа. Тогда прииде во Святую Гору старец Василий от Молдовлахии и облече тя в мантию с именем Паисий. Ты же, блаженне, безмолвии келейнем пребывал еси, поя Богу песнь хвалы и благодарения: Аллилуиа.

Икос 5

Видевше братия Святыя Горы и приходящии от мира дивное и подвижническое житие твое, отче преподобне, начаша убеждати тя прияти их в послушание. Ты же многа лета отрицался еси сего, послежде же начал еси приимати братий, упование на Бога возлагая; и собрася дванадесять братий, иже начаша молити тя прияти священство и духовничество. Тогда рекл еси: «Буди воля Божия», и приял еси священство послушания ради, во еже наставляти словесное твое стадо ко спасению. И бысть радость велия всем чадом твоим духовным, благодарне взывающим ти тако: Радуйся, Святыя Афонския Горы Божиим изволением благополучно достигнувый; радуйся, многих тамо любомудрым твоим житием удививый. Радуйся, сладость пустыннаго жительства возлюбивый; радуйся, уединенно в богомыслии и слезах нощи проводивый. Радуйся, великих пустынножителей верный подражателю; радуйся, подвигом богоносных афонских отец последователю. Радуйся, яко тело твое постом и бдением смирил еси; радуйся, яко душу твою молитвою и ума чистотою просветил еси. Радуйся, посещением наставника твоего старца Василия обрадованный; радуйся, благословением и молитвою его освященный. Радуйся, пустынным житием в подвизе иночестем себе утвердивый; радуйся, скорби многи благодушно претерпевый. Радуйся, преподобне отче Паисие, старче благодатный и наставниче монахов богомудрый.

Кондак 6

Проповедник покаяния и подвижническаго жития учитель показался еси, отче Паисие, во Святей Горе Афонстей. Егда же умножися братия, тобою собранная, испроси ветху келию, купно и благословение Святейшаго Патриарха Серафима на преселение в келию сию и создал еси тамо скит во имя святаго пророка Илии. Темже мнози святогорцы, увидевше благочиние в скиту, смирение, тихость, между братиями любовь и сердечный мир, и отсечение своей воли, и к тебе, яко благодатному старцу, благоговение и послушание, прославляху тя, яко руководителя и наставника ко спасению, воспевающе Богу благодарственную песнь: Аллилуиа.

Икос 6

Возсия слава твоя, отче преподобне, между братиями Святыя Горы, иже дивляхуся даровании твоими, яко был еси многим отцем духовник и самому Святейшему Патриарху Серафиму, иже часто приходя в скит, и в сладости о душеспасительных таинствех, подвизех и дарованиих беседовал еси с тобою. Ты же, отче Паисие, пребывал еси в скиту во дни трудяся на послушаниих, в нощи же писал еси книги отеческия, преводя я из греческаго на словенский язык, да вси сынове словенстии, книжнаго учения возжелевше, словом Божиим и учением святых отец просвещают разум и благодатию да утверждают сердца. Сего ради благодарственно вопием ти: Радуйся, в иноческих подвизех и трудех великим старцем Святыя Горы поревновавый; радуйся, древо добродетелей, в вертограде Пресвятыя Богородицы насажденное. Радуйся, Преблагословенныя Игумении Афона верный послушниче; радуйся, на милость и любовь Ея упование свое возложивый. Радуйся, яко в вертограде Божия Матере множество ученик обрел еси во спасение; радуйся, яко с теми прилежно Господеви поработал еси. Радуйся, пустынную келию во обитель иноческую претворивый; радуйся, братиею обители твоея возлюбленный. Радуйся, тобою собраных иноков к свету истиннаго боговедения наставивый; радуйся, всем подвизающимся в иночестве помощниче благодатный. Радуйся, постников и монахов богомудрый учителю; радуйся, вождю благоискусный воинов духовных. Радуйся, преподобне отче Паисие, старче благодатный и наставниче монахов богомудрый.

Кондак 7

Хотяй представите Господу чад твоих в люди избранны, отче Паисие, потщался еси собрати чающих подвига иноческаго от всех концев народов словенских и эллинския страны. Темже яко пчела люботрудная, от стражи утренния до нощи подвизался еси, да сокровищем истинным, светом Евангельския истины, напоиши братий твоих, о всех болезнуя и душею своею объемля, ихже поучал еси присным призыванием имене Иисусова побеждати невидимыя супостаты и сим всемощным оружием низпровергати их коварства, ум к Богу возводя и сердцем к Нему взывая: «Господи Иисусе Христе, Сыне Божий, помилуй мя, грешнаго», купно и воспевая Спасителю и Подвигоположнику нашему ангельскую песнь: Аллилуиа.

Икос 7

Новаго тя Моисея познахом, страстей победителя, якоже бо той древле Амалика победив, люди изведе из рабства, ты же, отче Паисие, множество монашествующих в землю обетованную райскую привел еси. Темже был еси старец дивный и многих чад исцелил еси благими и кроткими словесы, возжигая светильники мудро текущих в сретение Жениху Христу, попаляя терние вселукавых страстей молитвою Иисусовою, насаждая в сердцах чад твоих семена Божественныя любве, да принесут плоды сторичныя, с нимиже и мы вопием тебе сице: Радуйся, чтение Божественных писаний возлюбивый; радуйся, сокровенный их смысл добре и право уразумевый. Радуйся, проповедниче, вещавый глаголы жизни вечныя: радуйся, отче святый, чадом твоим путь ко спасению указавый. Радуйся, молитву Иисусову непрестанно творивый; радуйся, умно-сердечныя молитвы учителю предивный. Радуйся, яко словеса святых писаний в назидание многим собрал еси; радуйся, яко тех советы на скрижалех сердца твоего написал еси. Радуйся, престола Божия верный и благоговейный служителю; радуйся, о вечном спасении братии твоея ко Господу взывавый. Радуйся, Христовы любве и мира небеснаго благовестниче; радуйся, вертограда Афонскаго благодатное украшение. Радуйся, преподобне отче Паисие, старче благодатный и наставниче монахов богомудрый.

Кондак 8

Странника и пришельца на земли себе помышляя, ничесоже от тленных вещей мира сего стяжати не возжелел еси, но воды живыя испив в вертограде Божия Матере, кладезь добротолюбия явился еси, преподобне, и многих жаждущих правды Божия, любовию ко Господу воспламенив, к ревности ангельскаго жития направил еси. Егда же уразумел еси, отче блаженне, яко таковому собору иноков несть удобства во Святей Горе, совет сотвори с братиею, и вси единодушно начаша готовитися изыти в Молдовлахию. И благослови Святейший Патриарх Серафим исход сей, ты же, отче, пал еси на нозе Патриарха и той плакаше и со многим сожалением отпусти тя, Богу же дивному в рабех Своих, воспевая: Аллилуиа.

Икос 8

Весь в Бозе быв, упование крепкое на Бога возложил еси, отче преподобне, и вкупе с братиею пришел еси в Молдовлахию, идеже прият тя митрополит Гавриил и благословением господаря Григория Калимаха дарова тебе в жительство монастырь Святаго Духа, именуемый Драгомирна. Ты же, отче, вселился еси тамо со всею братиею, благодаря Бога о неизреченном Его милосердии. По мале времени прииде во обитель старец Алексий и облече тя в схиму, и бе всему собору братий радость велия. Темже и мы, радующеся и прославляюще тя, взываем сице: Радуйся, седмьнадесять лет во Святей Горе непреткновенно поживый; радуйся, образ и правило жития иноческаго тамо показавый. Радуйся, от Афона в земли Молдовлахии пришедый; радуйся, многих чад Божиих на подвиг иноческий призвавый. Радуйся, монашескаго и постническаго общежительнаго жития законоположителю; радуйся, отеческих богодухновенных преданий верный хранителю. Радуйся, победе в мысленней брани многих научивый; радуйся, проповедниче слова Божия благодатный. Радуйся, древняго благочестия насадителю; радуйся, яко тобою монахов множество в подвизех своих укрепляются. Радуйся, равноангельное житие до конца возлюбивый; радуйся, паки и в схиме Паисий нареченный. Радуйся, преподобне отче Паисие, старче благодатный и наставниче монахов богомудрый.

Кондак 9

Всяких скорбей и искушений житие твое бысть исполнено, преподобне. Тако прииде пагуба, мор и глад во времена воинския брани России и Оттоманския Порты, и мнози пустыннолюбцы за веру православную гонимии, спасахуся во обители, любовию твоею согреваемии. Егда же отдаша монастырь Драгомирну под власть римскаго папы, тогда благослови господарь Григорий дати братии твоей монастырь Усекновения главы святаго Иоанна Предтечи, именуемый Секул. Ты же, пришед в новую обитель, возрадовался еси зело, яко место тихое, безмолвное, ревнителем по Бозе удобное обрел еси, и начал еси житие зде устрояти по чину, якоже бе в Драгомирне, со слезами благодарения воспевая Богу песнь: Аллилуиа.

Икос 9

Витий премудрых превзошел еси благодатным действом словес твоих, отче преподобне, яко собрал еси цветы райския от писаний отеческих и зело прилежал еси к преложению их с греческаго на словенский язык, да вси монаси и мирстии, чающий спасения и подвига духовнаго, паче же из них истиннии по внутреннему человеку подвижницы, не точию православнаго отечества нашего, но и всех словенских народов, чтения их сподобляются. Темже светом Божественным озарив сердце твое, отче Паисие, якоже сокровище духовное оставил еси Церкви Христовой множество писаний твоих, имиже просвещаеши всех чтущих тя и вопиющих тако: Радуйся, во обители Секул радостно и мирно водворивыйся; радуйся, земли Молдовлахии молитвою твоею облагоухавый. Радуйся, единодушие и любовь в братии обителей твоих насадивый; радуйся, немощи немощных братии любвеобильно носивый. Радуйся, книжным научением слова Божия себе напитавый; радуйся, аки богомудрая пчела мед от отеческих писаний собравый. Радуйся, дни и нощи без сна трудов ради книжных проводивый; радуйся, святых отец писания на глаголы словенския преложивый. Радуйся, словесы отеческими жаждущих напоивый; радуйся, звездо, греховную тьму светом учения твоего прогоняющая. Радуйся, яко и во отечество твое иноцы учение сие принесоша; радуйся, многих духоносных отцев и старцев земли Российския духовный наставниче. Радуйся, преподобне отче Паисие, старче благодатный и наставниче монахов богомудрый.

Кондак 10

Спасти хотя души многих людей, благочестивый воевода князь Константин Мурузу повеле тебе, отче наш Паисие, сотворити послушание и преселитися в Нямецкий монастырь, да будет он во образ инем обителем, подвизая на ревность иноческаго жития. Ты же, сотворив крестное знамение, поклонился еси иконе Пречистыя Богоматере и рекл еси: «Буди воля Божия, идем и не хотяще», и дав всем оставшимся братиям благословение, утешил еси их, глаголя: «Да всяк невозбранно во всякой скорби и нужде душевней же и телесней, ко мне да приходит». Пришед же в Нямец, отче преподобне, пред чудотворною иконою Божия Матере молился еси, вручая себе и братию заступлению и хранению Ея, воспевая укрепившему тя Господу: Аллилуиа.

Икос 10

Стена и прибежище спасения был еси братии твоей, отче наш Паисие, наставляя их царским путем житие свое проводити, душу едину, и сердце едино, и мысль едину имети, и вся к достоянию своей жизни имети обща, духом горяще, преуспевающе в совершением смирении и любви друг ко другу с соблюдением святых заповедей Божиих. Темже молимся тебе, отче преподобне, избави нас от всех искушений, бед, скорбей и напастей, да вси тебе, яко человеколюбиваго отца, воспеваем тако: Радуйся, апостольскаго духа исполненный; радуйся, яко во всю землю изыде вещание словес твоих. Радуйся, яко твоими молитвами обитель Нямецкая паки прославися; радуйся, яко о ней весь народ Молдовлахии возвеселися. Радуйся, обителей молдовлахийских освящение; радуйся, вся службы во обителех твоих по чину монастырей афонских уставивый. Радуйся, древо благосеннолиственное, имже обители твоя покрываются; радуйся, твердое ограждение и прибежище усердно в них подвизающихся. Радуйся, обитель Нямецкую дом призрения бедных и нищих учинивый; радуйся, иноков ея радование и утешение. Радуйся, светом добродетелей твоих мир озаривый; радуйся, образ совершенства духовнаго в себе явивый. Радуйся, преподобне отче Паисие, старче благодатный и наставниче монахов богомудрый. .

Кондак 11

Пение всеумиленное приносим ти, преподобне отче Паисие, на месте трудов и упокоения твоего во обители Нямецстей, идеже ты, великим отцем преподобным подобяся, был еси пастырь и наставник всем последующим равноангельному житию твоему. Темже тихо и мирно предал еси душу твою Богу и от земных к небесным возсиял еси, ныне же со Ангелы на Небеси Христу в веселии предстоиши и молитвы о мире принося, поеши Ему: Аллилуиа.

Икос 11

Светильник веры православный и столп благочестия явился еси в Церкви Вселенстей, отче преподобне. Сего ради яко светом Божественным словеса твоя от восток солнца до запад сияют к просвещению людей, ибо Дух Святый содела тя добротолюбия списателя и правил монашескаго жития начертания вложи во уста твоя, да богодухновенных писаний твоих чтением просветятся многии чающии спасения и подвига духовнаго и да воспоют тебе похвалы сия: Радуйся, блаженною кончиною праведное житие твое запечатлевый; радуйся, преселивыйся от земных обителей во обители Небесныя. Радуйся, дух твой с веселием в руце Господа предавый; радуйся, блаженство райское со святыми унаследивый. Радуйся, светильниче, елеем дарований Духа Святаго возжженный; радуйся, вертограда Божия Матере, Святыя Горы Афонския, преславное светило. Радуйся, земли Молдовлахии красото неувядаемая; радуйся, мощи твоя святыя ей в наследие оставивый. Радуйся, светом писаний отеческих народы словенския озаривый; радуйся, Церкве Христовы звездо новая и многосветлая. Радуйся, яко и во успении твоем нас не оставляеши; радуйся, яко о прощении грехов наших Господа умоляеши. Радуйся, преподобне отче Паисие, старче благодатный и наставниче монахов богомудрый.

Кондак 12

Благодатию Божественною осеняем, просиял еси в житии твоем, богоносне отче Паисие, якоже солнце пресветлое, и ныне с верою и любовию к мощем твоим притекающих не оставляеши. Темже молим тя, просвети души наша к разумению спасительных истин веры Христовы и к научению добротолюбивых писаний святых отец, на путь спасения наставляющих всех, да и мы, поминающе тя, яко дивнаго наставника и пастыря, укрепляющего нас на пути подвига духовнаго, в радости сердечней воспеваем Богу благодарственную песнь: Аллилуиа.

Икос 12

Поющи дивное и праведное житие твое, преподобне отче Паисие, веселится ныне обитель Нямецкая, хранящая великое сокровище-святыя мощи твоя, и Драгомирна и Секуло яко учителя своего и духовнаго отца тя почитают. Земля же Полтавская, Киево-Печерская Лавра, такожде и Святая Гора Афонская и вся страна Российская подвигом твоим утешаются, имуще о себе молитвенника предивна. Темже монахов множество наставника тя почитают и вси людие земли нашея имя твое призывающе, радости исполняются, воспевающе тебе похвалы сицевыя: Радуйся, наставниче монахов и собеседниче Ангелов; радуйся, всех святых Божиих сонаследниче. Радуйся, яко со апостолы в райских обителех пребываеши; радуйся, яко с лики преподобных о душах наших ходатайствуеши. Радуйся, яко с Пресвятою Девою Богородицею о мире и благословении всех монашествующих Христа умоляеши; радуйся, яко молитвами твоими ныне мнози монастыри устрояются. Радуйся, обители иноческия, яко благоплодный сад, насадивый; радуйся, многих иноков собравый и к Пастыреначальнику Христу приведый. Радуйся, мощами твоими Российскую землю с землею Молдовы духовно соединивый; радуйся, всем притекающим к ним на поклонение дары целебныя щедро подаваяй. Радуйся, российскаго иночества и старчества насадителю; радуйся, яко имя твое по всей стране нашей прославляется. Радуйся, преподобне отче Паисие, старче благодатный и наставниче монахов богомудрый.

Кондак 13

О, преподобне и богоносне отче наш Паисие, великий подвижниче и угодниче Христов. Приими сие малое приносимое ти хваление и умоли Господа, да избавит нас от всяких бед, скорбей, враг видимых же и невидимых, нечаянныя смерти и вечныя муки, да сподобимся вкупе с тобою радости святых вечно воспевати Спасителю нашему: Аллилуиа, Аллилуиа, Аллилуиа.

(Этот кондак читается трижды, затем икос 1 и кондак 1)

Молитва преподобному старцу Паисию Величковскому

О, великий наставниче, ревнителю и учителю премудрый всех чающих спасения и подвига духовнаго, преподобне отче наш Паисие! Услыши нас, грешных, тебе верою и любовию призывающих, и вонми прошением нашим. Ты от юности любве ради Божия оставил еси отечество твое и в иных странах безмолвия ища, во Святей Горе Афонстей и обителех иноческих Молдовлахии небесное богатство стяжал еси. Ты великим воздержанием, в трудех, теснотах и крайнем лишении плоть твою духови покорив, стяжал еси сокрушение сердечное, трезвение, истинное безстрастие, молитву сердечную и сим обновитель древняго иночества и столп Православия показался еси; темже десница Божия учителя, наставника и чадолюбиваго отца возведе тя и благоволи собрати священный вертоград ученик твоих, иже простре отрасли своя во вся концы Российския земли.

Умоли всещедраго Бога, да сохранит святую Церковь Русскую и вся святыя Церкви Православныя в союзе единомыслия веры, мира и братския любве, паче же от расколов пагубных, междоусобных нестроений и сеющих раздоры избавит и в непоколебимем благостоянии утвердит, во спасение всех истинно исповедающих пресвятое имя Его. Испроси, угодниче Божий, отечеству и народу нашему мира и благоденствия, изобилия плодов земных и благоустроения весей и градов наших, обителем же иноческим жития богоугоднаго, да славится в них пресвятое имя Господа и Бога и обретают в них вечное спасение любящия Его.

Помози нам, в суетнем и грешнем мире сем странствующим, отче преподобне, и умоли Господа даровати нам оставление всех прегрешений и во исходе душ наших избавити нас воздушных мытарств и вечнаго мучения, да молитвами твоими, узревше неизреченную славу Христа Бога нашего, возблагодарим тя, заступника и предстателя за всех любящих и чтущих имя твое, и прославим Безначальную Единосущную и Нераздельную Троицу, Отца, и Сына, и Святаго Духа, ныне, и присно, и во веки веков. Аминь.