Кондак 1

Во образ Святыя Троицы купно со Иоакимом и Анною явилася еси, Богородице, сиянием Лика Твоего в Кресте, светом Божественным блистающася. Отонудуже непрестанно подаеши богатыя милости поклоняющимся Честному Кресту и с любовию взирающим на Образ Твой Святый, темже вопием Ти:
Радуйся, в Кресте образом Явившаяся, и уповающих на Тя не оставляющая.

Икос 1

Ликуй земле Пинская! Радуйтеся и веселитеся православнии людие! Се бо является Чудная Икона Богоматере, светом неизреченным сияющи, яже и в явлении отроковицу Анну удиви, и прочее лучами милости Своея озаряти люди Купятицстии избра. Темже, людие, приидите прославим Владычицу и Богородицу, глаголюще:
Радуйся, Ангелов Царице;
Радуйся, всего мира Владычице.
Радуйся, на Небеси присно славимая;
Радуйся, и на земли величаемая.
Радуйся, благодать Твою Иконе сей даровавшая;
Радуйся, на спасение людей тую поставившая.
Радуйся, благости Божия скорая Подательнице;
Радуйся, молений наших Усердная Послушнице.
Радуйся, в Кресте образом Явившаяся, и уповающих на Тя не оставляющая.

Кондак 2

Видевши Волю Твою, Пресвятая Дево, и многая чудесы от иконы Твоея, вернии людие Купятицстии воздвигоша церковь Честному Кресту; сице и мы с любовию покланяемся Пречистаго Лика Твоего изображению, зовуще Сыну Твоему Христу Богу: Аллилуиа.

Икос 2

Церкви воздвигшейся, вси людие Купятицстии видеша велие чудо: яко явися милость Твоя со слепым, молящим Тебе, Богородице, послати здравие и силу. Сего убо исцеливши, Владычице, не отрини и нас глаголющих Ти:
Радуйся, икону Твою чудесы украсившая;
Радуйся, немощнаго слепотнаго исцелившая.
Радуйся, моления наши не отвергающая;
Радуйся, надежды благия приемлющая.
Радуйся, матерния щедроты Твоя на нас изливающая;
Радуйся, образом Твоим в Кресте нам благодеющая.
Радуйся, о нас грешных к Сыну Твоему Ходатаице;
Радуйся, от всяких бед и искушений Избавительнице.
Радуйся, в Кресте образом Явившаяся, и уповающих на Тя не оставляющая.

Кондак 3

Чудотворная Твоя икона, Богородице Дева, источник бе неоскудевающь утешений страждущим от нашествия татарскаго, земли Пинския разорившаго, Сама убо, Всемилостивая, благоволила еси возстати весем и градом от разрушения, да видяще явленную Тобою милость, со умилением вопием Богу: Аллилуиа.

Икос 3

О, Мати Благая, Богородице Дево, Источниче душевных утешений, в час тяжких испытаний ограждаеши яко Мати чада Твоя честным Твоим омофором от всяких бед и напастей. Темже и мы, благодаряще за милости Твоя к людем, вопием Ти:
Радуйся, Жизнь Вечную мирови явльшая;
Радуйся, главы змиевой Сокрушителя рождшая.
Радуйся, плененным Забрало;
Радуйся, всем человеком Надеждо.
Радуйся, угнетенным Заступнице;
Радуйся, о сирых пред Богом Молитвеннице.
Радуйся, ко Отцу Небесному приводящая;
Радуйся, матернию любовь всем простирающая.
Радуйся, в Кресте образом Явившаяся, и уповающих на Тя не оставляющая.

Кондак 4

Бурю смущений и скорбей по нашествии татар утолити хотяще, благовернии людие взываху к Богу: «Яви нам Твой дар, егоже человеколюбне Купятицем послал еси нескрываемое сокровище!» Мы же душевную печаль нашу в радость претворити надеющеся, Матерь Его молим: «Отри слезы и утиши рыдания» и, улучивше желаемое, вопием Ему: Аллилуиа.

Икос 4

Положи Господь в сердце паломнику Иоакиму посетити обители Пинския, и егда идяше близ веси Купятицкия, узре свет велий и Честный Крест со образом Богоматере на месте церкве, татары сожженыя. И абие преклонь колена, прослави Бога и Пресвятую Матерь Его, глаголя:
Радуйся, сподобившая мя видети образ Твой Святый;
Радуйся, светом Божественым украсившая его.
Радуйся, мене недостойнаго явления Твоего удостоившая;
Радуйся, волею Сына Твоего на место сие приведшая.
Радуйся, светильник веры Православныя паки возжегшая;
Радуйся, удела Твоего никакоже оставившая.
Радуйся, слезы и скорби в радость претворившая;
Радуйся, источник милостей Божиих открывшая.
Радуйся, в Кресте образом Явившаяся, и уповающих на Тя не оставляющая.

Кондак 5

Великую милость показа Господь по скорбех многих паки явлением Купятицкаго образа Матере Своея в Кресте, скорбящия радостию осиявающаго, заблудшия же на путь делания заповедей Сына Своего наставляющаго. Мы же, православно сию чтуще, вопием Богу: Аллилуиа.

Икос 5

Исходяй Иоаким путем своим и плаваяй по реце Ясельде, в воду низпаде и, чудне спасен быв, возратися в Купятицы, идеже спящу ему предста Пречистая Дева и рече: «Неотступно бех Аз с тобою в путех твоих, молящи Сына и Бога Моего хранити тя от всяких бед. Ныне убо повелеваю ти послужити Мне на месте сем». Пребысть же Иоаким при возставленней церкви, волю Владычицы исполняя, да со всеми вопиет Ей:
Радуйся, лучами Солнца Правды верных осиявшая;
Радуйся, явлением иконы Твоея вся озарившая.
Радуйся, Спасительнице людей во гресех утопающих;
Радуйся, из пучины греховныя на брег Истины износящая.
Радуйся, в мори житейстем Путеводительнице;
Радуйся, на служении Богу Наставительнице.
Радуйся, укрепление благочестия и веры Православныя;
Радуйся, даре несокрушимаго в скорбех терпения.
Радуйся, в Кресте образом Явившаяся, и уповающих на Тя не оставляющая.

Кондак 6

Многими чудесы прослави Господь церковь Купятицкую Твоею иконою, Богородице. Всем бо предстательствуеши, Благая, прибегающим с верою в священный Твой покров. Инаго убо не имуще грешнии в бедах и скорбех приснаго избавления, обременнии грехми многими, разве Тебе, Мати Бога Вышняго, вопием Ему: Аллилуиа.

Икос 6

Княжна некая умирающи, заповеда чадом своим погребсти ю в церкви Купятицстей пред Чудотворною иконою. Явившися же Пресвятая Иоакиму, повеле ему: «Иди, праведниче, и рцы Волю Мою священнику, да не попустит погребати в церкви княжну ту». Преслушану же бывше повелению, извергошася останки ея от гроба. Тем убо помози нам, Благая, творити Волю Твою, вопиющим Ти сице:
Радуйся, гордых вразумление;
Радуйся, смиренных благословение.
Радуйся, молние, души просвещающая;
Радуйся, громе, соблазняющияся устрашаяй.
Радуйся, окаменение сердечное умягчающая;
Радуйся, хладность душевную благодатию согревающая.
Радуйся, на стези спасения верных наставляющая;
Радуйся, претыкающихся от путей погибельных устраняющая.
Радуйся, в Кресте образом Явившаяся, и уповающих на Тя не оставляющая.

Кондак 7

Хотящи всем показати велию любовь Твою к людем православным, Богородице, предрекла еси Иоакиму святыя обители Купятицкия создание, яко да возмогут вси страстьми обореваемии обрести под покровом Чудотворнаго Образа Твоего тихое пристанище ко спасению, и Тобою вспомоществуеми сподобятся наследия Небеснаго и пения со Святыми ко Пресвятей Троице: Аллилуиа.

Икос 7

В чуднем явлении Иоакиму яви Пресвятая хотение Свое: «Зане преслушаша Волю Мою о княжне, отныне вземлется на лет сто милость Моя и чудеса от церкве сия. Обаче приидет время, и послю иныя делатели в виноградник Мой, иже непорочным житием, послушанием, постом и молитвою паки испросят церкви Купятицстей милость исцеления». В нейже благоговейно чтуще Лика Твоего в Кресте изображение, вси Тебе вопием:
Радуйся, праведником Волю Твою открывшая;
Радуйся, за грехи наши милостию нам воздавшая.
Радуйся, Всемилостивая Мати наша, нас не забывающая;
Радуйся, верным скорая Надеждо, всякия скорби избавляющая.
Радуйся, непослушныя в послушание приведшая;
Радуйся, согрешившия вечныя муки изменившая.
Радуйся, Заступнице и Утешение христиан;
Радуйся, Прибежище всех чтущих Тя.
Радуйся, в Кресте образом Явившаяся, и уповающих на Тя не оставляющая.

Кондак 8

Новая обитель православная, яко светильник в купинах Пинских созидается и сиянием Чудотворныя Купятицкия иконы Богоматере украшается, темже и твердыня и прибежище угнетенным от латин людем православным бывает, да познают вси, яко с нами Бог, Ему же поем: Аллилуиа.

Икос 8

Се вложи Господь в сердце благочестивыя Аполлонии мысль купити весь Купятицкую и воздвигнути монастырь при церкви Введения Пречистыя во храм, идеже посылаются великия милости Господа Бога Честным Крестом со образом Царицы Небесныя. И притекоша мнози иноцы в вертоград Пречистыя, яко да трудом, постом, нестяжанием и молитвами прославляют Владычицу, поя Ей таковая:
Радуйся, многих иноков призвавшая;
Радуйся, их подвигами всех удивившая.
Радуйся, дар милости исцеления возвратившая;
Радуйся, Православную Веру укрепившая.
Радуйся, Ангелов Радосте и человеков Славо;
Радуйся, верных Надеждо и обуреваемых Пристанище.
Радуйся, греховныя помыслы всемощно отгоняющая;
Радуйся, братолюбием темную злобу побеждати повелевающая.
Радуйся, в Кресте образом Явившаяся, и уповающих на Тя не оставляющая.

Кондак 9

Спасти хотящи многия люди от обдержащих их скорбей и болезней и веру Православную утвердити, всесильное заступление Твое, Владычице, во многих градех и весех на западе Руси явила еси и силу чудотворения образу Святаго Лика Твоего в Кресте даровала еси, да вси, видяще милость Твою, вопиют со умилением Богу: Аллилуиа.

Икос 9

Новый источник чудес в землех Западныя Руси явися икона Твоя Купятицкая, Владычице, точащи исцеления всем с верою притекающим: слепии бо прозирают, немии благоглаголиви бывают, глусии слышат, разслаблении возстают, различными недуги и одержимии здрави бывают, беснии демонов свобождаются. Темже славяще Тя, вопием:
Радуйся, в день нарочитый в Купятицех язву укротившая;
Радуйся, от смертоносныя проказы Фому исцелившая.
Радуйся, церковь Твою чудно осветившая;
Радуйся, Ангельское пение в ней благословившая.
Радуйся, едину Марину милостивно возвратившая;
Радуйся, другую Марину от беса свободившая.
Радуйся, от Тимофея недуг отвратившая;
Радуйся, благодарити Бога всех научившая.
Радуйся, в Кресте образом Явившаяся, и уповающих на Тя не оставляющая.

Кондак 10

Молитвами Пречистыя Богоматере ко Святей Троице явися обитель Купятицкая столп Веры Православныя, яко щитом чудотворною Твоею иконою, Владычице, от гордых латин ограждающи, многия иноки на одоление лютых напастей еретических наставила еси. Да видяще являемую Тобою милость, вопиют вси со умилением Богу: Аллилуиа.

Икос 10

Видящи Богомати токи слез и воздыхания людей Русских, от Польских князей притесненных, и осмеяние святынь православных, явилася еси Афанасию, иноку Купятицкия обители, иже со слезами моля Тя о помощи и заступлении. Ты же, Владычице, рекла еси ему: «Иди во град Москву, и тамо будет ти защита и поможение». Удивися же Афанасий и возопи: «О, Пречистая Богородице, буди со мною!» Ты же: «Иди, и Аз с тобою буду». Темже и мы благодарне вопием Ти:
Радуйся, Афанасия от людей Пинских в Москву пославшая;
Радуйся, неотступно его со диаконом Неемиею провождавшая.
Радуйся, иноков от притеснения избавившая;
Радуйся, явлением Креста Купятицкаго путь указавшая.
Радуйся, силою от иконы Твоея отрока исцелившая;
Радуйся, Наставнице и Споспешнице иноков верных.
Радуйся, Москву Твоим образом в Кресте осенившая;
Радуйся, люди Русския на защиту братий благословившая.
Радуйся, в Кресте образом Явившаяся, и уповающих на Тя не оставляющая.

Кондак 11

Богородице, христианом Ты еси милостивая Услышательница, от конец земли возносящим молитвенныя гласы: немощныя бо укрепляеши, печальныя утешаеши, страждущия посещаеши, гонимыя укрепляеши, верным дерзновение подаваеши; всех притекающих под сень Креста со образом Твоим ко спасению приводиши, и следуют Искупителю Богу, вопиюще песнь: Аллилуиа.

Икос 11

Столп огненный, Владычице, игумена обители Брестския Афанасия явила еси, укрепляюще его на защищение Православия от безумнаго прельщения латинскаго, иже и лютыя мучения за веру Православную претерпев, кровию своею землю веси Гершонския обагри. Сего ради не умолкают молитвенныя воздыхания зовущих Ти:
Радуйся, многия иноки в горниле подвигов возрастившая;
Радуйся, игумена Афанасия в час мучения укрепившая.
Радуйся, мученика сего венцем славы украсившая;
Радуйся, в Каневе мученика Макария прославившая.
Радуйся, Богородице, всех верных твердое упование;
Радуйся, Пресвятая, от напастей избавление.
Радуйся, к Сыну Твоему и Богу нашему молитвы верных возносящая;
Радуйся, о всем роде христианстем ходатайствующая.
Радуйся, в Кресте образом Явившаяся, и уповающих на Тя не оставляющая.

Кондак 12

Благодать Твою не отыми от нас, милости Источниче, якоже во дни тяжких испытаний от лютых агарян и гордых латинян услышала еси стенание и вопль православных людей Западныя Руси и благословила еси верных делателей виноградника Твоего Афанасия и Макария на защиту веры Православныя, под омофор Твой воедино землю Русскую совокупившая. Да избавленнии Тобою, воспоим Богу: Аллилуиа.

Икос 12

Видяще великия милости Твоя от лет древних и доныне не оскудевающия, хвалим Тя, Пречистая, яко непрестанную Молитвенницу и Заступницу пред Сыном Твоим и Богом, и Матернюю любовь Твою к право Тя чтущим знающе, со умилением взираем на святый образ Твой в Кресте Купятицкий, и вопием Ти:
Радуйся, в огнезрачнем свете в Купятицех явленная;
Радуйся, многими чудесы прославленная.
Радуйся, люди Русския возлюбившая;
Радуйся, веру Истинную в них сохранившая.
Радуйся, церковь Купятицкую и ныне благоукрасившая;
Радуйся, всю Церковь Российскую доныне соблюдшая.
Радуйся, неоскудно и ныне милости Твоя низпосылающая;
Радуйся, всех к Тебе прибегающих с любовию приемлющая.
Радуйся, в Кресте образом Явившаяся, и уповающих на Тя не оставляющая.

Кондак 13

О, Всепетая Мати, в Купятицех святою иконою Твоею пребывающая, приими милостивно сие малое моление наше, еже усердно принесохом Ти с верою и любовию, и умоли приснопоклоняемую Троицу помиловати страну нашу, святую же Церковь Православную в единстве сохранити, и от всяких бед рабы Твоя избавити, о Тебе вопиющия: Аллилуиа.

Этот кондак читается трижды, затем икос 1-й и кондак 1-й

Молитва ко Пресвятой Богородице пред иконою Ея «Купятицкая»

О, Преблагословенная Владычице, всемощная Заступнице, непостыдное наше Упование! Приими хвалебное и благодарственное пение нас, недостойных раб Твоих, и вознеси молитвы наша ко Престолу Сына и Бога Твоего, да милостив будет неправдам нашим, пробавит благость Свою чтущим Всечестное Имя Твое и с верою и любовию поклоняющимся чудотворному образу Твоему. Сохрани землю нашу от всякия беды, посли мир людем на земли, собери вся христианы во едино стадо право славящих Бога в Троице Единаго. Утверди нас всех в Вере Христове и в усердии к Церкве Православней. Вложи в сердца наша дух страха Божия, благочестия и смирения. В напастех терпение нам подаждь, во благоденствии воздержание, к ближним любовь, ко врагам всепрощение, в добрых делех преуспеяние. Избави нас от всякаго искушения и от окамененнаго нечувствия. В страшный день Суда сподоби нас ходатайством Твоим стати одесную Сына Твоего Христа Бога нашего. Емуже подобает всякая слава, честь и поклонение со Отцем и Святым Духом, ныне и присно и во веки веков. Аминь.

Кондак 1

Взбранной Воеводе и Заступнице Всемилостивой, заступающей нас от враг видимых и невидимых; ведущей вся тайныя души нашей и покрывающей немощи наша благоуханием милосердия Сына Своего, благодарственное приносим пение. Ты же, о, Мати Света, не остави нас, погибающих, из глубины греховней зовущих: Радуйся, Мати Божия, Цвете Благоуханный!

Икос 1

Архангел Гавриил послан бысть к праведней Анне, егда та в скорби неплодства своего возопи ко Господу из глубины сердечныя, и благовести ей радость велию, глаголюще: «Ус­лышана молитва твоя, слезы же твои пред Богом внидоша, и се родиши Дщерь, о Нейже возблагословятся вся колена земная». Сему радостному обетованию чудящеся, возопием Преблагословенней:
Радуйся, благоуханием чудеснаго рождества Твоего осененная;
Радуйся, от царскаго корене Иоакимом произращенная;
Радуйся, от архиерейскаго рода Анною рожденная;
Радуйся, прародителей наших от тли смертныя свободившая;
Радуйся, поношение безчадства разрешившая;
Радуйся, слезы матери Твоея в радость претворившая;
Радуйся, рождеством Своим отраду в дом отчий принесшая;
Радуйся, великое рождшим Тя утешение;
Радуйся, всему миру наслаждение;
Радуйся, исполнительница Отцева обетования;
Радуйся, падшаго Адама воззвание;
Радуйся, слез Евиных избавление;
Радуйся, Мати Божия, Цвете Благоуханный.

Кондак 2

Видяще праведнии родители Твоя, яко три лета исполнишася от рождества Твоего, восхотеста совершити делом обетование свое Богу, да принесут Тя в дар Ему. Сего ради созваша в Назарет вся сродницы своя от царскаго и архиерейскаго рода, пригласиша же и лик чистых дев, да со свещи горящими провождают Тя, яко же предрече Писание: «Приведутся Царю девы в след Ея, приведутся в веселии и радовании, введутся в храм Царев». И тако молишеся вси о Тебе Богу, воспеша Ему: Аллилуиа.

Икос 2

Разум Небесный открывая, Богоотроковице, благоволила еси, преодеяна быти еси со славою и красотою многою, да исполнится на Тебе Давида праотца Твоего предречение: «Предста Царица одесную Тебе, в ризах позлащенных одеяна, приукрашена «. Егда же, яко Невеста Божия одеяна была еси и вся ко всечестному введению Твоему достойно устроишася, поведоста Тя родители Твоя, яко трехлетнюю агницу, во Иерусалим, воспевши Тебе тако:
Радуйся, Пречистый храм Спасов, ко храму законному стопы Своя направившая;
Радуйся, преодеянная в рясны златыя девства и чистоты;
Радуйся, преукрашенная во вся доброты небесныя ;
Радуйся, дщи Царева, всю славу девственную внутрь Себе имущая;
Радуйся, дочернюю радость всему миру несущая;
Радуйся, сосуде, Богом избранный и освященный;
Радуйся, чистоту смиреннаго сердца к горнему устремившая;
Радуйся, вместилище и храме духа Божия;
Радуйся, невесто Божия, предстати одесную Небесному Жениху грядущая;
Радуйся, с девственными лики ко Господу приведенная;
Радуйся, с горящими светильники ко храму препровожденная;
Радуйся, благодатная, Господь с тобою;
Радуйся, Мати Божия, Цвете Благоуханный.

Кондак 3

Силою Божественною укрепляемый, с небесных высот великий архангел во град Назарет прииде, и обрете Святую Деву в молитве и чтении книжнем пребывающую, со страхом велиим рече: «Радуйся, Благодатная, Господь с Тобою! … и се зачнеши и родиши Сына, наречеши имя ему – Иисус! И будет Великий и Сын Всевышнего наречется!». Ты же, смиренная рабо Господня, прием с кротостию обетование Божие, рекла к бесплотному: «Да будет ми по глаголу твоему!». Мы же, недостойнии, зрящие велие таинство совершаемое, во умилении взываем о Тебе Богу нашему: Аллилуиа.

Икос 3

Имущи богоприятную Дева утробу, востече во град Иудов к южице своей. Елисавет же исполнися Духа Свята, возопи гласом велиим, глаголя: «Откуда мне сие, да прииде мати Господа моего ко мне?». О, Пречистая, Духом Святым освященная, посети и нас немощных и убогих, вознеси молитвы наша, яко дым кадильный ко престолу Бога-Сына твоего, да преисполнены благодати Его речем Ти:
Радуйся, благоухание Христова смирения;
Радуйся, Пречистая Дево, всех дев чистейшая;
Радуйся, чистото недосягаемая и кротосте неизреченная;
Радуйся, во смирении Своем возвеличенная;
Радуйся, яко призре Господь на смирение твое;
Радуйся, благодатная, ликуй ныне и веселися, яко Господь с Тобою;
Радуйся, благословенная, слыши ныне и приклони ухо Твое;
Радуйся, обрадованная, яко благословенна Ты в женах;
Радуйся, препрославленная, яко велия слава Твоя на небесах;
Радуйся, кроткая агнице, яко возве­селится о Тебе весь собор ангельский;
Радуйся, богоизбранная отроковице, яко спасется Тобою весь род человеческий;
Радуйся, боготканную порфиру от пречистыя плоти Твоея Слову Божию исткавшая;
Радуйся, Мати Божия, Цвете Благоуханный.

Кондак 4

Буря суетных помышлений людских не возможет поколебати тишины душевней Чистой Девы, в вертепе, посреде твари безсловесной ожидающей явления обетованного Богомладенца. Мы же, сорадуяся с Нею имеющему быти и зрящи таковое исполнение предреченнаго, в умилении сердечнем поем Богу: Аллилуиа.

Икос 4

Слышаша пастырие ангелов, поющих плотское Христово пришествие, и текше, яко к Пастырю, видят Сего, яко агнца непорочна, и поклонишася Ему, и принесоша дары своя яко Владыце и Богу. Пренепорочней же поюще, реша:
Радуйся, благоуханием рождества Сына Божия осиянная;
Радуйся, храме Бога Живаго;
Радуйся, жилище Духа Святаго;
Радуйся, Спасителя мира рождшая;
Радуйся, вскормившая Силу Божию, во плоти явленную;
Радуйся, Агнца и Пастыря Мати;
Радуйся, видимых врагов устрашение;
Радуйся, неви­димых врагов мучение;
Радуйся, райских дверей отверзение;
Радуйся, твердое веры утверж­дение;
Радуйся, светлое благодати познание;
Радуйся, от всех бед скорое избавление;
Радуйся, Мати Божия, Цвете Благоуханный.

Кондак 5

Богосветлая звезда возсия, егда прииде Духом в Церковь святый старец Симеон, и исполнися духа пророческаго, многая рече о Божественнем Младенце. И, обратив взор к Марии, Матери Его, рече: «Се, лежит Сей на падение и на возстание многим во Израиле, и в знамение пререкаемое. И Тебе Самой оружие печали пройдет душу, егда узриши Сына Твоего на Кресте пригвождена». Мы же, с трепетом взирая на кротость и смирение Божией Матери, зовем о ней Богу: Аллилуиа.

Икос 5

Видя Тя Сын Твой и Бог, при Кресте стоящу с воз­любленным учеником Своим, глаголаше: «Жено, се сын Твой», и ученику: «се, Мати твоя», всыновляя Тебе вся верующия в Него. Мы же, яко общницы скорби и страданий Сына Твоего, имуще в Тебе благую заступницу, на Тя все упо­вание возлагающе, вопием Ти:
Радуйся, благодатная Дево, у креста Сына Своего страдавшая;
Радуйся, агнице, рождшая Агнца, вземшаго грехи мира;
Радуйся, Мати Бога нашего, величайшую скорбь о Сыне претерпевшая;
Радуйся, кроткая, се Сын Твой возстанет тридневен, поправ жало смерти;
Радуйся, подательнице Божественной благодати верующим в Сына Твоего;
Радуйся, душ наших спасение и телес наших исцеление;
Радуйся, усыновившая нас при Кресте Сына Своего по слову Его;
Радуйся, нежности матерния вечный кладезю;
Радуйся, возлюбившая искупленных Кровию рожденнаго от крови Твоей;
Радуйся, Твоим предстательством вся благая желания наша скоро исполняющая;
Радуйся, Твоими молитвами пред Богом нас заступающая;
Радуйся, грешных споручнице, неотступно о них пред Богом предстательствующая;
Радуйся, Мати Божия, Цвете Благоуханный.

Кондак 6

Проповеданный пророками Крест Господень явися яко лествица, небес достигающая, возводя всех от земли на высоту небесную, да тамо обитати нам вкупе с лики ангельскими. О Тебе же, Владычица, сей Страшной Тайне послужившей, благодарным сердцем вопием Богу: Аллилуиа.

Икос 6

Возсиял еси свет Воскресшего Сына Твоего, о, Пресветлая Мати, и во мрачных удолиах ада, и на грешней земле, и по всей вселенней, прощение, и избавление благовествуя, подавая надежду спасаемым, благодарно взывающим тако:
Радуйся, благоухание Божественныя Тайны;
Радуйся, вместившая Невместимаго;
Радуйся, родившая плоть Богом рожденнаго;
Радуйся, Богородице, о восстании Рождества Твоего;
Радуйся, молитвами Своими преклоняющая волю Его к прошениям нашим;
Радуйся, радость всему миру приносящая;
Радуйся, крепкое восстание падшим;
Радуйся, матернею Своею любовью покрывающая немощи наша;
Радуйся, молитвами Твоими нас спасающая и от скорбей избавляющая;
Радуйся, козни бесовские противу нас разрушающая;
Радуйся, хранительнице верным и утверждение;
Радуйся, помощнице наша и похвало;
Радуйся, Мати Божия, Цвете Благоуханный.

Кондак 7

Хотя прославити образ Твой, Богородице Дево, Сын Твой и Бог наш, воочию всех излил от него неисчерпаемое чудес море, в нем же вси, погружающиися с верою и упованием, приемлют благодать исцелений и, благодарящее Господа, со страхом и любовию умиленно вопиют Ему: Аллилуиа.

ИКОС 7

Дивна показа Господь дела Своя в Пречистей Матери Своей. Сего ради, хотя прославити святую икону Твою «Благоуханный Цвет» во граде Измаиле, благоволи в день Царственных страстотерпцев возвратити вспять чудодейственный образ Твой, сохраненный верными в суровые дни гонений на святую Церковь, да вси зрящие чудо сие благодарным сердцем вопиют Ти таковая:
Радуйся, благоухание заступления Твоего чрез икону Свою нам явившая;
Радуйся, тою паче надеяния милосердие Свое нам подающая;
Радуйся, образом Твоим чудеса преизобильно источающая;
Радуйся, явлением Твоея иконы вся люди просвещающая;
Радуйся, тою новое знамение благодати в Церкви Христовой являющая;
Радуйся, яко на икону Твою взирающее, истинней Бого­родице покланяемся;
Радуйся, гонимых и обидимых скорая заступнице;
Радуйся, печали наша утоляющая и от всякой болезни нас исцеляющая;
Радуйся, миро благовонное, от иконы Твоея излиянное;
Радуйся, вретище скорби нашея растерзающая;
Радуйся, вечною радостию нас одевающая;
Радуйся, яко сохра­няемся Твоим благоволением;
Радуйся, Мати Божия, Цвете Благоуханный.

Кондак 8

Странно и сумнительно неверующим слышати, о, преславная Мати Царя Небесного, како на Твой образ вернии людие очима своима взирающе, от скорбей избавляются и от бед сохраняются. Буди же нам Всеблагая Ходатаица о спасении нашем, да вечно славим Тя со всеми святыми, вопиюще Богу: Аллилуиа.

Икос 8

Весь путь наш житейский слезами горести исполненый, искушений несть числа. Изнемогаем, Владычице, под грузом грехов наших. Ты же умилосердись над нами, Дево Пренепорочная, от пути тяжкого изнемогающими и упокоения в тихой пристани чающими, да славословим Тя, Всемилостивую Заступницу нашу, зовуще:
Радуйся, мира Христова благоухание;
Радуйся, Дево, сияющая светом Божественным;
Радуйся, радосте, просвещающая благодатию души верных;
Радуйся, утолительнице печалей;
Радуйся, утешение скорбящих;
Радуйся, питательнице алчущих;
Радуйся, нагих одеяние;
Радуйся, земли нашей освящение;
Радуйся, вдов защитительнице;
Радуйся, сирот покровительнице;
Радуйся, бедствующим помощнице;
Радуйся, болящих целительнице;
Радуйся, Мати Божия, Цвете Благоуханный.

Кондак 9

Всякое естество ангельское восхваляет Тя, Богородице, у престола Бога Сына Твоего предстоящую и за вся христианы молящуюся. Мы же, людие Твои, молитв действо разумеюще, к чудотворному образу Твоему с любовию притекаем и Богу прилежно вопием: Аллилуиа.

Икос 9

Ветии многовещании недоумевают познати Божественную тайну Твоего Приснодевства, Богородице, ниже могут изъяснити силу чудотворную, от икон святых Твоих проистекающую во исцеление недужных и на всякую пользу душевную и телесную человеком изрядную. Мы же, благочестно Приснодеву Тя исповедающе, достойно хвалим славный, Владычице, иконы Твоея праздник, верно покланяемся образу Твоему святому и с любовию вопием:
Радуйся, благоухание целомудрия нам показавшая;
Радуйся, богоневесто, Свет рождшая божественный и превечный;
Радуйся, Мати и Дево Преблагословенная;
Радуйся, сиянием пречистыя души Твоея всю землю просветившая;
Радуйся, чистотою телесе Твоего вся небеса возвеселившая;
Радуйся, матерей присное радование;
Радуйся, едина Преблагословенная в женах;
Радуйся, ангелов славо, столп и утверждение православия;
Радуйся, небесных непрестанное удивление;
Радуйся, земных всерадостное поклонение;
Радуйся, неувядаемый цвете духовныя чистоты и святости;
Радуйся, заступнице наша всемилостивая ;
Радуйся, Мати Божия, Цвете Благоуханный.

Кондак 10

Спасения залог даровася нам святая и всечестная икона Твоя, ибо издревле и доныне, яко прорекла еси евангелисту Луце, со всяким образом Твоим сила Божия благодатно пребывает, чудесы преславными веру в нас утверждает, недужныя безмездно врачует и на путь спасения души наша приводит; да зовем прославльшему имя Твое во всей вселенней Царю Небесе и земли: Аллилуиа.

Икос 10

Стена необоримая и покров буди нам, о, всепетая Мати, сопротив ополчений враг видимых и невидимых, ризою Твоею нас защити от всяких бед и болезней. Сего ради, припадающе к чудотворному образу Твоему, на тебе едину по Бозе надежду спасения возлагаем и зовем Ти сице:
Радуйся, благоуханием молитв Твоих нас осеняющая;
Радуйся, от путей погибельных нас удаляющая;
Радуйся, на всякую истину верных наставляющая;
Радуйся, духа болезни и уныния отгнание;
Радуйся, духа разума и крепости стяжание;
Радуйся, врагов силою Божиею посрамляющая;
Радуйся, советы нечестивых разоряющая;
Радуйся, вся лютыя недуги врачующая;
Радуйся, от смерти духовныя нас избавляющая;
Радуйся, слезами Твоими грехи наша омывающая;
Радуйся, радостию духовною нас дивно насыщающая;
Радуйся, милости неиссякаемый источниче;
Радуйся, Мати Божия, Цвете Благоуханный.

Кондак 11

Пение наше смиренное, от полноты любви и усердия Тебе приносимое, не презри, Чистая, и не отврати от нас лика Твоего, но помози, заступи и помилуй искупленных кровию Сына Твоего, да зовем спасающему нас Тобою Богу: Аллилуйа.

Икос 11

Светозарною лучею благодатного упования явися в земли Бессарабии честный образ Твой, именуемый верными «Благоуханный Цвет». Егда же времена смутныя и безбожныя наста в стране нашей, и отступиша мнози от Бога и Церкви Его, верни же в напасти сей сущии, молящиися пред иконою Твоею, Владычице, велие утешение и отраду светлую обретаху, в надежде укрепляемии, яко привременнии дни сии лукавии. Егда же чаяние сие исполнишася, людие с веселием воспеша Ти хвалу сицевую:
Радуйся, Церкви Христовой пресветлое украшение;
Радуйся, православия в стране нашей утверждение;
Радуйся, верных отрадо и всему миру утешение;
Радуйся, неверных вразумление и просвещение;
Радуйся, отчаянных надеждо и всех скорбящих радосте;
Радуйся, печалей наших утоление и болезней наших исцеление;
Радуйся, иноков наставнице и в миру живущим путиводительнице;
Радуйся, всеблагая о нас пред Богом заступнице;
Радуйся, яко молитвами Твоими спасаемся;
Радуйся, яко покровом Твоим от всякой напасти избавляемся;
Радуйся, молитвы наша во благо исполняющая;
Радуйся, скорби наша в радость претворяющая;
Радуйся, Мати Божия, Цвете Благоуханный.

Кондак 12

Благодать Божия, присуще иконе Твоей, Благоуханным Цветом нареченной, влечет к ней всех скорбящих и обремененных, яко не тщетны отходят от сего источника Твоих милостей и щедрот, в скорбех отраду, в напастех защиту и в болезнях цельбу неоскудно обретающе от Чудотворного Образа Твоего, вопиют благих подателю Богу : Аллилуиа.

Икос 12

Поюще чудеса Твоя, Богородице, проповедуем милости , прославляем щедроты Твоя неисчетныя и, припадая к чудотворному образу Твоему, молим Тя, Владычице, лика Своего от страны нашея не отврати и всем приходящим к чудотворному образу и милости от Тебе ожидающим во благое вся прошения исполни, да вси воспоем Ти сице:
Радуйся, благоухание Божиих щедрот и милости;
Радуйся, радосте наша Пресвятая;
Радуйся, Царице наша Преблагая;
Радуйся, купино неопалимая;
Радуйся, лествице небесная;
Радуйся, Царица горних и дольних;
Радуйся, Владычице ангелов и человеков;
Радуйся, Мати Света Невечерняго;
Радуйся, свеще неугасимая;
Радуйся, звездо незаходимая;
Радуйся, сияющая Божественною Славою;
Радуйся, грешных споручнице;
Радуйся, Мати Божия, Цвете Благоуханный.

Кондак 13

О, Всепетая Мати, Божественная славо и красото небесе и земли, неисчерпаемое чудес море, заступнице рода христианского и покрове обители нашея. Прими недостойное, от сокрушенного сердца возносимое к Тебе моление; яви нам до конца Твое милосердие: в скорби и напасти не остави нас сирых, и в час смертный Твоим теплым предстательством причастники вечного блаженства сотвори, да спасении Тобою, с лики ангельскими вопием Богу: Аллилуиа.

(Сей кондак читается трижды, затем икос 1 и кондак 1)

Молитва первая

О, Пресвятая Госпоже Владычице Богородице! Вышши еси всех ангел и архангел, и всея твари честнейшая, помощница еси обидемых, ненадеющихся надеяние, убогих заступнице, печальных утешение, алчущих кормительнице, нагих одеяние, больных исцеление, грешных спасение, христиан всех поможение и заступление! О, Всемилостивая Госпоже, Дево Богородице Владычице, милостию Твоею спаси и помилуй богохранимую страну нашу, власти и воинство ея, и вся православные христианы, ризою Твоею честною защити: и умоли, Госпоже, из Тебе без семене воплотившегося Христа Бога нашего, да препояшет нас силою Своею свыше на невидимые и видимые враги наша. О, Всемилостивая Госпоже, Влыдычице Богородице, воздвигни нас из глубины греховныя и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от напрасныя смерти, и от нападения вражия, и от тлетворных ветр, и от смертоносныя язвы, и от всякого зла. Подаждь, Госпоже, мир и здравие рабом Твоим, всем православным христианам, и просвети им ум и очи сердечнии, еже ко спасению: и сподоби ны, грешныя рабы Твоя, царствия Сына Твоего, Христа Бога нашего: яко держава Его благословенна, и препрославлена, со Безначальным Его Отцем, и с Пресвятым, и Благим, и Животворящим Его Духом, ныне и присно, и во веки веков, Аминь.

Молитва вторая

О, Пресвятая Дево – Мати Господа, Царице небесе и земли, вонми многоболезному воздыханию душ наших, призри с высоты святыя Твоея на нас с верою и любовью поклоняющихся пречистому образу Твоему, се бо грехми погружаемии и скорбми обуреваемии, взирая на Твой образ, яко живей Ти, сущей с нами, приносим смиренныя моления наша. Не имамы бо ни иныя помощи, ни инаго предстательства, ни утешения, токмо Тебе, о, Мати всех скобящих и обремененных. Помози нам, немощным, утоли скорбь нашу, настави на путь правый нас заблуждающих, уврачуй и спаси безнадежных, даруй нам прочее время живота нашего в мире и тишине проводити. Подаждь христианскую кончину и на Страшнем Суде Сына Твоего явися нам милосердая Заступница, да всегда поем, величаем и славим Тя, яко благую заступницу рода христианскаго со всеми угодившими Богу. Аминь.