[spoiler]

Кондак 1

Возбранной Воеводе, пренепорочней Деве Богородице, земли Калужския избавительнице, хвалебныя песни приносим Ти, раби Твои, яко иконы Твоея явлением даровавшей нам стража неусыпна. Ты же моления нашего, пред иконою Твоею возносимаго, не отвержи, но защити ны, Владычице от всех врагов видимых и невидимых и избави ны от всяких болезней душевных и телесных, да во умилении сердца зовем Ти:

Радуйся, Владычице, милость Свою нам и заступление являющая.

Икос 1

Ангелов множество славят Тя, Царицу всех и Богородицу, Ты бо исполнила еси радости сердца наша явлением нам чудотворныя иконы Твоея в Тинкове и чудесы во храме имене Рождества Твоего в веси Калужке; сей убо иконе Твоей поклоняющеся, Тебе, богоизбранная Дево, моление возносим, со страхом и любовию глаголюще:

Радуйся, от патриархов прообразованная и от пророков предвозвещенная; радуйся, рождшая Агнца, вземшего грехи мира.

Радуйся, Адама и Еву от древняго проклятия свободившая; радуйся, чудотворною иконою Твоею всю землю Калужскую озаряющая.

Радуйся, икону Твою во знамение милости нам давшая; радуйся, яко на икону Твою взирающе, Самой Тебе, истинней Богородице, покланяемся.

Радуйся, Владычице, милость Свою нам и заступление являющая.

Кондак 2

Видяще начертание лика Твоего, девица Евдокия в развращении сердца своего дерзновенно оплеванием поругася ему, не ведущи, яко сей Твой лик есть, Пресвятая Дево; Ты же вразумления ради наказала еси ю разслаблением всего телесе, смягчением руку и ногу, ослеплением очию и отъятием языка, и сим показала еси, яко начертание лика сего есть икона Твоя чудотворная, да вси людие вопиют к рождшемуся от Тебе Богу Слову: Аллилуиа.

Икос 2

Разум человеческий не может постигнути великаго Твоего милосердия, Пресвятая Богородице, яко искреннее покаяние болящия девицы прияла еси и совершенное исцеление ей даровала еси, да молитву приносит пред иконою Твоею, взывающи сице:

Радуйся, лествице небесная, Иаковом предвиденная; радуйся, тайну воплощения Божия, от веков в Бозе сокровенную, открывшая.

Радуйся, ведущим брань противу мира и диавола добрая споспешнице; радуйся, от грехопадений наших, имже несть числа, избавляющая.

Радуйся, яко призывающии имя Твое от падения страстнаго восташа; радуйся, благодатное безстрастие ищущим его усердно подающая.

Радуйся, Владычице, милость Свою нам и заступление являющая.

Кондак 3

Силою, данною Ти свыше, чудотворную Твою икону, Пречистая Богородице, даровала еси нам в знамение милости Твоея, являющися родителем тоя девицы, и рекла еси им: Буду ходатайствовати о граде Калуге и о всех людех страны сея. Мы же, взирающе на икону Твою и множество чудес, от нея изливающихся, видяще, с радостию к ней припадаем и из глубины сердца благодарим Тя, дивную заступницу, взывающе Богу: Аллилуиа.

Икос 3

Имущи о Церкви Христовой попечение и видевши, яко посреде обителей земли Калужския живут людие неции, святыя Христовы Церкве отвергшиися, Пресвятая Богородице, непременное желание изрекла еси, да вси чтут Православную Церковь. Родителем же тоя девицы повелела еси, да совершено будет молебствие пред Твоею иконою со освящением воды и да окропит иерей ею дщерь их, болезнию пораженную, яко да исцелеет от недуга своего. Нас же спаси, Госпоже Богородице, верою и любовию воспевающих Ти:

Радуйся, в защиту Церкве Православныя чудеса показующая; радуйся, хулителей православныя веры невидимо наказующая.

Радуйся, православныя веры ограждение и утверждение; радуйся, крепкая стено Церкве Православныя.

Радуйся, святителей веселие и благоговейных иереев похвало; радуйся, иноков и инокинь благочестивых изрядная покровительнице и обителей их неусыпная блюстительнице.

Радуйся, Владычице, милость Свою нам и заступление являющая.

Кондак 4

Бурю напастей провидя, угрожавших краю нашему от озлобления Наполеона, устремившагося на землю Калужскую, святитель Евлампий моляшеся пред Твоею иконою, Богородице, о избавлении града Калуги и всея ея области от врагов, весть же прием, яко войско вражие поражено бысть на реце Чернушце, благодарственно Спасу Христу возопи: Аллилуиа.

Икос 4

Слышавше милость Твою, Богородице, чрез Твою икону на поле брани близ веси Тарутина нам низпосланную, егда явила еси ю на воздусе иноплеменником, якоже свидетельствоваша плененнии от них, и тако даровала еси победу воем российским, радуемся о Твоей, Владычице, помощи и со упованием воспеваем Ти сице:

Радуйся, купино неопалимая, боговидцем Моисеем предзримая; радуйся, от потопа греховнаго нас спасшая.

Радуйся, кадильнице златая, яко фимиам благоуханный, молитвы Твоя к Богу, Сыну Твоему, присно возносящая; радуйся, праведно движимый гнев Божий на ны молением Своим скоро утоляющая.

Радуйся, яко явлением на воздусе иконы Твоея страх и трепет нападе на враги иноплеменныя; радуйся, яко явлением иконы Твоея во время брани победу российской рати подала еси.

Радуйся, Владычице, милость Свою нам и заступление являющая.

Кондак 5

Боготечная звезда явилася еси нам, Богородице, смыслы наша озаряющая и на путь спасительный наставляющая, врагом же нашим была еси, яко молния, устрашающая их и отражающи от нас, егда Наполеон, поразив близ града Малоярославца рать нашу, понуди ю отыти ко граду Калуге, сам же, услышав сие по Твоему милостивому, Заступнице, повелению, неверным же неведомыя ради вины, вместо еже ко граду Калуге ити, иде по пути, егоже сам разори и опустоши, ко граду Гжатску, и тако рать свою погуби. Сего ради, Твое крепкое заступление ведуще, со умилением глаголем Богу: Аллилуиа.

Икос 5

Проявивши велию любовь к людем, живущим в стране Калужстей, Пресвятая Богородице, землю нашу сохранила еси и множество врагов, обышедших ю, далече от нея отгнала еси, сии же врази наши уведеша, коль крепка есть помощь Божия Матере. Мы же, Твое всемощное заступление, нам бывшее, добре ведуще, в радости сердца воспеваем Ти сице:

Радуйся, клеще таинственная, Исаием провиденная; радуйся, примирение наше с Богом соделавшая.

Радуйся, Спасителя падшему человечеству рождшая; радуйся, в годину брани помощию Твоею уповающих на Тя не оставляющая.

Радуйся, всемощным заступлением Твоим от меча иноплеменных нас избавляющая; радуйся, без пролития крове одоление православным воем даровавшая.

Радуйся, Владычице, милость Свою нам и заступление являющая.

Кондак 6

Проповедница богознаменитаго чудесе явися некая жена во граде Боровске, юже врачеве никакоже возмогоша исцелити, и рекоша, яко надлежит ей не по мнозе времени умрети. Она же, веру имущи, яко сила Божия всемогущая есть, не закосне просити, да в веси Калужке пред Твоею, Богородице, иконою совершено будет о здравии ея молебствие, и по вере своей абие от недуга своего исцелена бысть. Темже и мы, благодарственно прославляюще Бога, вопием Ему: Аллилуиа.

Икос 6

Возсияла еси икона Твоя, Богородице, чудеснаго исцеления ради жены, живущия во граде Боровске, даже и посреде жителей его, в расколе пребывающих, сего ради и синклит градский, в немже по преизбыточеству бяху людие, в расколе упорствующии, устави, да будет совершено на стогнах града молебное пение пред Твоею иконою, яже принесена бысть во град сей, прежде же николиже в онь бяше приносима. Темже, яко благая Владычица, научи ны разумети промышление Божие о спасении людей, да взываем Ти радостно:

Радуйся, двере, Иезекиилем прореченная; радуйся, вочеловечению Единаго от Святыя Троицы непорочно послужившая.

Радуйся, рождением Сына Твоего спасение миру являющая; радуйся, с верою имя Твое призывающих от смерти спасающая.

Радуйся, раскольников на путь благий обращающая; радуйся, яко божественную веру прославила еси, прелесть же раскола посрамила еси.

Радуйся, Владычице, милость Свою нам и заступление являющая.

Кондак 7

Хотящи возгрети в сердцах людей страны Калужския любовь к иконе Твоей, Заступнице наша, токи чудес изливаеши от Твоея иконы: молитвою бо, к Тебе возносимою, глухому внезапу слух даровася, ослепшему зрение открыся, разслабленному крепость во удесех его возвратися, здравие душею страждущей и бесом одержимей дадеся, люте болящей и врачми оставленней житие во здравии на многая лета продолжися; темже и мы, с любовию к иконе Твоей припадающе и прославляюще Бога, вопием Ему: Аллилуиа.

Икос 7

Необоримая еси ограда, охраняющая ны от всяких болезней душевных и телесных, Пресвятая Богородице, и заступающая всех, к Тебе прибегающих с молитвою. Темже и мы, припадающе к иконе Твоей, молим Тя, Владычице: от всяких болезней душевных и телесных избави ны, вопиющия Ти из глубины сердца:

Радуйся, солнце селения Христова, Псалмопевцем предъявленное; радуйся, рождшая Избавителя, беззакония наша туне очищающаго.

Радуйся, стамно пресвятая, в нейже алчущим правды соблюдается Хлеб жизни вечныя; радуйся, яко всякия болезни душевныя и телесныя милостивно врачуеши с верою к чудотворней Твоей иконе приходящих.

Радуйся, болезнующих, оставленных врачми, от смерти избавляющая; радуйся, яко молитвами Твоими престают тлетворнии ветри и смертносныя язвы.

Радуйся, Владычице, милость Свою нам и заступление являющая.

Кондак 8

Великое и уму человеческому неудобопостижимое чудо явила еси, Владычице мира, егда внезапу исцелила и укрепила еси в трезвенном житии некую жену, в области града Жиздры живущую, яже пиянству предана бе; совестию своею терзашеся, яко страстию порока порабощена бысть, и сея ради вины обратися с верою к Тебе, Владычице, молящися пред Твоею иконою и от Тебе исцеление желающи получити. Сего ради и мы, на милость Твою уповающе, восхваляем Твое милосердие, взывающе Богу: Аллилуиа.

Икос 8

Видят и слышат жители Калужския земли новую купель Силоамскую, паче оныя древния явльшуюся, Пресвятая Богородице, в храме Рождества Твоего в веси Калужке, в немже покланяются чудотворней иконе Твоей; не единожды бо в лето и не точию первее входяй здравие приемлет, но выну всяк недуг врачуеши всех с верою к Тебе прибегающих. Сего ради вопием Ти:

Радуйся, Еяже ради ад стенет и дуси злобы трепещут; радуйся, Еяже ради врата рая всем нам отверзаются.

Радуйся, помощь Твою святую благовременно подающая всякой душе, верно Тебе молящейся; радуйся, от страсти к пиянству обратившихся к Тебе с молитвою избавляющая.

Радуйся, от рова погибельнаго безнадежных извлачающая; радуйся, притекающих к покрову Твоему сладкое успокоение.

Радуйся, Владычице, милость Свою нам и заступление являющая.

Кондак 9

Вси гордынею одержимии страх Божий скоро забывают. Сице две жене, в стране Калужстей живущии, гордынею преисполненнеи, ясно являста сомнение свое, яко икона Твоя цельбоносна есть, Владычице, и сим толико прогневаста Бога, яко праведным судом Его тяжкими недуги наказание прияша. Мы же, таковое вразумление видяще, с любовию покланяемся Твоему образу, взывающе Богу: Аллилуиа.

Икос 9

Витии века сего отрицают поклонение иконе Твоей, Пречистая Дево, не разумеют бо в своем суемудрии, яко честь, иконе воздаваемая, на первообразное восходит. Мы же, не токмо сие ведуще, но и благодеяния, иконою Твоею нам являемая, видевше, душею радующеся, Тебе, Богородице, глаголем:

Радуйся, стамно всезлатая, в нейже плоть и кровь божественнаго Агнца уготовашася; радуйся, трапезо святая, хлебом жизни нас питающая.

Радуйся, суетную мудрость нечестивых витий посрамляющая и ослепленных ею на путь правый наставляющая; радуйся, яко по благостыне Своей угашаеши в нас огнь нечестия пламенем огня божественнаго.

Радуйся, вразумляющая знаменьми и чудесы колеблемых в вере; радуйся, Богоблагодатная, страх Божий и смирение в сердца наша вселяющая.

Радуйся, Владычице, милость Свою нам и заступление являющая.

Кондак 10

Спасти хотящи люди, покланяющияся Твоей иконе, от бед, благоволила еси, Богородице, явитися некоей девице, в Лужецком, близ града Можайска, монастыре жительствовавшей, и предварити, да не имать общения с женою развращенною, и тем сохранила еси ю от грядущия беды. Темже и мы прославляем Господа Бога, давшего благодать таковую иконе Твоей, и вопием Ему: Аллилуиа.

Икос 10

Стена еси крепкая, ограждающая род человеческий от бед, Пресвятая Богородице, и скорую помощь являеши от Твоея иконы всем чтущим ю во градех, весех и обителех. Сего ради и мы, осеняемии Твоим, Богомати, заступлением, на Твой взирающе пречистый образ, молим Тя, да избавиши ны от всяких клевет, бед и скорбей, вопиющих Ти:

Радуйся, явльшая миру обетованнаго Сокрушителя главы змиевы; радуйся, радость вечную, Спасителя миру, рождшая.

Радуйся, рождением Сына Божия двери царствия Христова нам отверзшая; радуйся, казнь Божию за беззакония наша от глав наших отклоняющая.

Радуйся, любящих и чтущих Тя от всяких бед и скорбей избавляющая; радуйся, радосте всего мира, Еюже слезы скорбящих отъемлются.

Радуйся, Владычице, милость Свою нам и заступление являющая.

Кондак 11

Пение непрестанно приношаше Ти, Пресвятая Богородице, некий житель Жиздринския веси, с верою пред Твоею иконою моляше, да даруеши ему дщерь. Ты же, Богородице, благоволила еси вняти мольбам его и даровала еси ю ему. Мы же, зряще на Твою икону и видяще токи чудес, от нея изливаемыя, благая Богородительнице, из глубины сердца благодарим Тя, Царицу нашу дивную, воспевающе Богу: Аллилуиа.

Икос 11

Светлыми лучами чудес икона Твоя сияет, Богомати Пречистая, и прогоняет всякое вражие действо силою Божиею, от нея исходящею; темже и мы, грешнии, имуще таковое знамение Твоего к нам благоволения, радуемся, глаголюще: О Пресвятая Богородице! Умоли Господа, да спасет ны имиже весть судьбами, да не погибнем в нераскаянии о наших грехопадениих, и услыши похвалы сия, Тебе возносимыя:

Радуйся, Творца небесе и земли безсеменно воплотившая; радуйся, осенением святыя иконы Твоея всякое вражие действо от нас отгоняющая.

Радуйся, прошения наша на пользу исполняющая; радуйся, неоскудеваемый источниче благословений и милостей Божиих к людем Твоим.

Радуйся, благочестивых супружеств незримое ограждение; радуйся, молитв ради усердных плод безчадным низпосылающая.

Радуйся, Владычице, милость Свою нам и заступление являющая.

Кондак 12

Благодать умиления молитвеннаго от Твоея, Владычице, иконы источаемая, да исполнит души наша, аще грех ради в безчувствие впадаем. Пробуди наше душевное усыпление, да не погибнем люте без покаяния, и приими нас в вечныя кровы, Богородительнице, да, радующеся, поем Богу, Тобою нас спасающему: Аллилуиа.

Икос 12

Поюще чудеса, являемая от Твоея иконы, Мати Христа Бога нашего, и припадающе к ней, молим Тя, Владычице: буди нам защищение в день кончины нашея, егда имамы предстати на суд пред страшным престолом славы Сына Твоего, Господа нашего, да вопием Ти:

Радуйся, от власти лютаго миродержца уповающих на Тя избавляющая; радуйся, гнев Божий от рода православнаго отводящая.

Радуйся, благую христианскую кончину ублажающим Тя подающая; радуйся, славящих Тя на воздушных мытарствах заступающая.

Радуйся, заступнице усердная рода православнаго и крепкая надеждо вечнаго его спасения; радуйся, отверзающая райския двери православному роду, присно Тя блажащему.

Радуйся, Владычице, милость Свою нам и заступление являющая.

Кондак 13

О всепетая Мати Христа Бога нашего! Приими милостивно сие моление наше, еже принесохом пред Твоею иконою, и в час смертный явися нам Сама, Пречистая, простирающи руку помощи, отгоняющи духи злобы, ищущия поглотити души наша при разлучении от телесе, и умоли приснопокланяемую Троицу избавити ны мучения вечнаго, да предстательством Твоим наследуем Царствие Небесное и сподобимся со святыми пети Богу: Аллилуиа.

Этот кондак читается трижды, затем 1-й икос «Ангелов множество …» и 1-й кондак «Возбранной Воеводе …».

Молитва

О Пресвятая Дево, Мати Христа Бога нашего, дивная Царице небесе и земли! Вонми многоболезненному воздыханию сердец наших; призри с высоты святыя Твоея на нас, с верою и любовию предстоящих пред чудотворною Твоею иконою и со умилением молящихся Тебе, Владычице! Не предаждь умалению Церковь Православную, помози нам, Пресвятая Богородице, святоотеческую православную веру до конца дней наших непорочно сохранити, во всех заповедех Господних неуклонно ходити и избави ны от пагубных душевредных учений.

На Твою, дивная Царице небесе и земли, милость уповаем раби Твои: очисти умы наша от греховных помыслов, душевнаго разслабления, обуревания страстей, от искушений, соблазнов и грехопадений; Ты бо еси, Владычице, крепкое прибежище грешников кающихся. Воздвигни нас из глубины греховныя и истинным покаянием ороси изсохшая сердца наша, просвети сердечная очи наша к зрению спасения и прельщенных бесовскою прелестию на путь правый настави; всякое дело злое и богопротивное разруши, всякому же благому и богоугодному делу научи и споспешествуй; вложи, Владычице, в сердца наша дух страха Божия, дух благочестия, дух кротости, смирения, терпения, незлобия; умягчи злая сердца наша и злыя благи сотвори, низпосли нам ревность о спасении ближних.

Вразуми и научи ны, о Всемилостивая Заступнице наша, како безгрешно ходити по пути земнаго сего жития, яко Ты, Пресвятая, веси и веру нашу, и упование наше видиши, Владычице мира! Скорбящих утеши, бедствующим помози; сохрани от молниеноснаго грома, тлетворных ветр, лютых болезней, смертоносныя язвы, междоусобныя брани, нашествия врагов иноплеменных.

Пресвятая Богородице! Избави ны от внезапныя и насильственныя смерти; всем нам даруй обращение на путь истинный и христианскую кончину живота нашего, безболезненну, непостыдну, мирну, Святых Таин причастну. Во время исхода нашего предстани нам, Дево Богородице, и избави ны от власти бесовския, воздушных горьких мытарств и огня вечнаго. Скончавшимся внезапною смертию милостива быти Сына Твоего умоли и о всех усопших, иже не имут сродников, о упокоении их Сына Твоего умоляющих, Сама буди непрестанная и теплая молитвенница и ходатаица. Преставльшияся же в вере и покаянии от временнаго жития сего отцы, братию и сестры наша сподоби Твоим ходатайством вселитися во обителех небесных со ангелы и со всеми святыми, идеже не престают гласи празднующих и радостно славящих Пресвятую Троицу, Отца и Сына и Святаго Духа, ныне и присно и во веки веков. Аминь.

[/spoiler]

[spoiler]

Кондак 1

Избранной от всех родов преблагословенной Деве похвальное приносим Ти пение, яко Мати сущи Бога. Земнородным явилася еси милосердая Матерь, страждущим подающи отраду, болящим различными недугами исцеление и от наветов вражиих защиту, всем же молящимся Тебе скорое услышание. Темже в радости и умилении вопием Ти: Радуйся, радосте наша, избави нас от всякия нужды и печали.

Икос 1

Архангелов и ангелов лики на небеси и человеков множество на земли славят Тя, Царицу всех и Богородицу, яко даровала еси нам велию радость и утешение: образ Твой святый, пред нимже благоговейно предстояще, умиленно Тебе зовем: Радуйся от века предусмотренная Господом и Царем славы; Радуйся, предочищенная чрез роды и роды праведников. Радуйся, святейшая Дево, самим Богом избранная в Матерь Сыну Божию; Радуйся, достойный плод безгрешных Твоих родителей Иоакима и Анны. Радуйся, Невесте Божия, воспитанная в земном доме Царя Небесного; Радуйся, обрадованная благовестием архангела Божия Гавриила. Радуйся, возвеличенная паче всех жен рождением от Тебе Спасителя миру; Радуйся, радосте наша, избави нас от всякия нужды и печали.

Кондак 2

Честние херувимы и славнейшие серафимы, окружающии вседержавный престол Пресвятыя Троицы, в благоговении пламенне взирают на Тя, яко в славе тамо предстоящи, моляся милосердому Богу за род христианский. Мы же зде на земли предстояще Твоей святей иконе, всем сердцем радующеся благоговейно взываем ко Всевышнему: Аллилуиа.

Икос 2

Проразумеша духом Божиим апостоли Христовы, коль вожделенно будет для верующих начертание на деке святейшего лика Пречистой Девы Богоматери, избраша из среды себе божественного Луку, яко живописца предивна. И той, испроси Матернее от Тебе благословение, подкрепляемый постом и молитвою, написа первую икону Тебе Владычеце, к ней же Сама рекла еси: С Тобою будут благодать Моя и сила. Сего ради со умилением зовем Ти: Радуйся, яко не токмо не возбранила, но Сама благоизволила еси, да изображен будет на деке лик Твой Пречистый; Радуйся, яко восходя к небеси, начертание лика Твоего в залог любви Твоей нам оставила еси. Радуйся, яко по отшествии Твоем на небо, образ Твой святый истинное утешение бысть всем верующим; Радуйся, яко христиане вси стекахуся в Гефсиманию образу Твоему, яко живей Ти сущей, поклонитися. Радуйся, яко взиравший тогда на образ Твой облегчение в скорбех душевных обретаху; Радуйся, яко со слезами молившиися пред иконою Твоею исцеление в болезнех приимаху. Радуйся, яко и ныне вси молящиися пред Пречистым образом Твоим исполнение прошений приемлют; Радуйся, радосте наша, избави нас от всякия нужды и печали.

Кондак 3

Сила благодатная, Тобою дарованная первописанной иконе Твоей, такожде проявися и в инех многих подобиях Ея, егда преданная чада Твоя моляху апостолов, да умножат им иконы Твоя, да вси имут их кийждо в дому своем, и радуяся и благоговея, прославляют Тя, святейшую Матерь всесильнаго Бога, вопиюще ему: Аллилуиа.

Икос 3

Имущи безмерную любовь к богодарованным Ти чадам Божиим, благословила еси святых апостолов содеяти даже до тридесяти начертаний лика Твоего Пречистаго, на утешение и радость словесных овец стада святейшаго Сына Твоего. Темже вседушно благоговея, зовем Ти: Радуйся, ангелами хвалимая и воспеваемая от серафимов; Радуйся, яко Тобою вся вселенная радости и веселия исполняется. Радуйся, яко иконы Твоя на молитвенное с Тобою общение нам даровала еси; Радуйся, яко чрез них благодеяния различны миру всему источаеши. Радуйся, яко силу Твою благодатную и сей иконе обильно пресуществила еси; Радуйся, яко облистая нас святою иконою Твоею, Сама невидимо среди нас пребываеши. Радуйся, предстояще славней иконе Твоей, Самой Тебе истенней Матери Божией поклоняемся; Радуйся, радосте наша, избави нас от всякия нужды и печали.

Кондак 4

Треволнениями житейскими обуреваемии и соблазны греховными соодолеваемии, смиреннии и грешнии раби Твои, под Твой милостивый покров прибегающе, яко в тихое и безмолвное пристанище, прилежно молим Тя: пролей невидимо живительную благодать Твою в души наша и умиротвори удрученная сердца наша, до чистым умом и нескверными устами вопием всегда: Аллилуиа.

Икос 4

Слышав царь Лев греческий, яко чудес великое множество и благодеяния неисчетная исходят от иконы Богоматерни, якоже во Иерусалиме, восхоте имети ю во стране своей, и егда принесена 6ысть во святый Царьград, источи великия чудеса. Людие же видевши таковую милость к ним Божию, в несказанной радости взываху к Благословенней: Радуйся, Прерадованная, страну нашу осенившая твоим пришествием; Радуйся, благодатная Дево, христианом всех стран сердобольная Мати. Радуйся, яко от всякой души христианской всяко прошение приемлеши; Радуйся, яко вси гласы, призывающая Тя, отвсюду во вселенной слышиши. Радуйся, яко покровом Твоим весь род христианский покрываеши; Радуйся, яко благодать Твою и милости Твоя на всех ближних и дальних простираеши. Радуйся, яко всем вся благая в жизни сей подаеши милостиво; Радуйся, радосте наша, избави нас от всякия нужды и печали.

Кондак 5

Взирая на образ Твой и чуя близость Твою к чадам Твоим, вси искупленнии кровию Сына Твоего спешно текут к Тебе, поведая кийждо нужды своя и потребы. Овии убо молят Тя утолити скорби их душевныя и телесныя, инии же в начало путей своих благословение и благопоспешество в делех своих прияти от Тебе чают, друзии мира семейного, согласия и любви даровати им просят. Угнетаемии же от злых человеков защиты и покрова у Тебе ищут, и вся сия приемлюще, радостно вопиют: Аллилуиа.

Икос 5

Видеша людие страны греческия, яко икона Твоя не токмо пучина чудес и неисчерпаемый источник им бысть, но и мощное одоление на супостатов, многажды изношаху ю пред полчища вражия, и тии бяху побеждаемии и разбегахуся, такожде и скифов до конца победи. Людие же благочестивии видевши сие, в радостном трепете восклицаху: Радуйся, взбранная Воеводо, враги побеждающая; Радуйся, яко безоружным нам на всеоружных победу подаеши. Радуйся, ужас и устрашение на неверных иконою Твоею наводящая; Радуйся, непобедимая Воеводо ратий христианских в брани на врагов. Радуйся, иконою Твоею, яко стеною нерушимою, люди Твоя ограждающая; Радуйся, от бед, всяких зол и напастей многоразличных нас спасающая. Радуйся, яко и бесноватии пред иконою Твоею от демонского удручения свобождаются; Радуйся, радосте наша, избави нас от всякия нужды и печали.

Кондак 6

Проповедницы богоноснии, святии апостоли, обстояще пречистый образ Твой, прославляют Тя, всех Царицу и Владычицу, и от Тебе рождшемуся Христу Богу нашему вкупе с вои святых мучеников, невидимых сподвижников Твоих в деле ратном, непрестанно вопиют: Аллилуиа.

Икос 6

Возсия пречудная икона Матери Божия и всей земли русской, егда могучий князь русский Владимир, с великою ратью, вниде в пределы греческия, но не хотя пролития крови христианской, точию же грехи своя омыти святым крещением, прият веру Православную, греческую, и вси спутницы его. Тогда дадеся ему оная святая икона Иерусалимская, дар безценен, и принесе ю в стольный град свой Киев. Людие же российстии, светом Христовым просвещеннии, Царице Небесной во умилении взываху: Радуйся, Честнейшая херувим и Превосходящая без сравнения вся небесныя силы; Радуйся, горе превознесенная и долу смиренно живущым человеком всегда радушно внемлющая. Радуйся, всем хотящая спастися, к нам иконою Твоею спасти нас пришла еси; Радуйся, яко нас во тме греховней седящих на Своя всемощныя попечения и материнския заботы прияла еси. Радуйся, светом Божественным от иконы Твоея всех нас просвещающая; Радуйся, ко Христу Бога всех нас приводящая. Радуйся, райския двери всем нам отверзающая; Радуйся, радосте наша, избави нас от всякия нужды и печали.

Кондак 7

Вседушно восхотев привлещи ко Христу вся люди, сущии в державе Его, и вся отдаленныя концы земли русской просветити светом истинного боговедения, благоверный князь Владимир повеле, святую икону Иерусалимскую перенести из града Киева в великий Новгород, и бе тамо икона сия лета многа, донележе принесена бысть в град Москву, да источает чудеса в сердце России и в пределах московских, и оттоле люди православнии милостей и благодати Богоматери исполненнии, хвалебную песнь Богу воспевают: Аллилуиа.

Икос 7

Удивил еси на нас милости Твоя, Господи, умножив чудотворныя иконы Пречистыя Твоея Матери в отечествии нашем, ихже яко звезды небесныя разсеял еси по всему лицу земли русской, подавая чрез них великия и неисчислимые благодеяния благочестивым насельником Ея. Темже благоговея пред величеством славы Твоея и преклоняя колена сердца пред Пречистым образом Преблагославенной Матери Твоей, умильно вопием Ей: Радуйся, Владычице, страну российскую в жребий и достояние Себе избравшая; Радуйся, окрестность нашу тако возлюбившая. Радуйся, икону Твою чудодейственную в наследие неоцененное нам от лет древних даровавшая; Радуйся, яко сею иконою обтекая грады и веси, аки облаком, благодатию и милостию всех покрываеши. Радуйся, яко принесением иконы Твоея всяко место освящается и люди обновляются; Радуйся, яко от иконы Твоея источники чудес всюду источаются. Радуйся, яко и мы, грешнии, избавляемся от бед и напастей чрез Твою святую икону; Радуйся, Радосте наша, избави нас от всякия нужды и печали.

Кондак 8

Странно есть уму человеческому, но дивно сердцу верующему, еже како совершися явление сея иконы Богоматери, како от доски сухия, на нейже изображен бяше лик Твой Пречистый, паче естественная начаша совершатися, сила бо многа от иконы Твоея исходяща, долгонедужным и расслабленным стягнув исцели, вси же видевше чудеса сии, в Божественном восторге вкупе с исцелевшими, радостно восклицаху хвалу Богу: Аллилуиа.

Икос 8

Ко всем сострадание имущи и всем благотворя чтущым Тя, благоволила еси прославити икону Твою в день лют чумной смертности, воньже страхом велиим сердца всех одержими бяху. Темже вси в покаянии тогда приходившии и умиленно молившиися Тебе во храме Твоем и в домах своих принесенней убо бывшей к ним сей иконе Твоей, внезапной смерти избегаху, и в радостном трепете взываху Тебе благодарственная пения таковая: Радуйся, теплая о нас ходатаице пред милосердым Богом; Радуйся, яко Твоими Матерними молитвами гнев Божий на нас утоляется. Радуйся, яко Тобою кающымся грешником прощение подается; Радуйся, обращающая на путь истинный закоснелых грешников. Радуйся, гордых склоняющая к смирению и жестокосердых приводящая во умиление; Радуйся, в грозный день гнева Божия Материнскую любовь и крайнее снисхождение нам являющая. Радуйся, радосте наша, избави нас от всякия нужды и печали.

Кондак 9

Вся окрестность наша под осенением честныя иконы Твоея пребывающая и сильным предстательством Твоим хранима, непрестанно молим Тя, благую Матерь, да сохраниши всем нам мир и тишину, да избавиши нас от волнений и смут, от крамол и междоусобных браней, и от всяких смертоносных язв, да вси в благочестии пребывающе, в тихом и безмолвном житии благодушно хвалу Богови воспевают: Аллилуиа.

Икос 9

Кий мудрец возможет изглаголати силу благодати, Тобою иконе сей дарованную, кая ли песнь сладкопевца достойна будет восхвалити вся чудеса Твоя, яко принесением иконы Твоея во всяко место благодеяния различны источаются: идеже жар, засуха, тамо дожди обильны проливаются, а идеже пагубное безведрие, тамо солнце возсияет, но и поветрия зловредны изменяются, человецы же Тобою тако помилованнии и облагодетельствованнии из глубины души взывают Ти: Радуйся, пренепорочная Юница, крайним смирением Твоим небеса долу приклонившая к схождению в Тя Сына Божия; Радуйся, Царице небеси и земли, ейже суша и море повинуются. Радуйся, Владычице, яко Тобою дожди благовременны и благорастворения воздуха нам ниспосылаются; Радуйся, теплая Предстательнице наша, пагубныя удары грома и молнии от нас отводящая. Радуйся, яко огнь, поядающий домы и пажити людския, росою молитв Твоих угашающая; Радуйся, яко принесением сея иконы Твоея заразы смертныя люди избегают. Радуйся, радосте наша, избави нас от всякия нужды и печали.

Кондак 10

Спасительное пристанище верным среди бурь и волнений моря житейскаго, паказующее всем нам добрый путь ко пристанищу вечному небесному, помоги нам безпорочно пройти путь жизни сей временней, соверши нас во всякой добродетели и соблюди всех в чистоте и святости, приведи нас в блаженное царствие Сына Твоего, да и мы Тобою спасеннии, возможем тамо со ангелы и лики святых вечно воспевати хвалебную песнь: Аллилуиа.

Икос 10

Непреложно веруем, Владычице, яко невидимым Твоим предстательством, аки стеною крепкою, ограждаеши всех нас от искушений и бед, и всяких злокозненных действий врагов наших видимых и невидимых. Сего ради со слезами вопием Ти: Радуйся, Хранительнице наша, от злобы бесовской невидимо нас ограждающая; Радуйся, зависть и коварство на нас злых человек премудро разрушающая. Радуйся, на всех стезях жизни нашея милостиво нас оберегающая; Радуйся, вся наша мысли от злых приражений и суетных мечтаний бдительно охраняющая. Радуйся, вся наша желания во благо и спасение всегда направляющая; Радуйся, яко добро точию творити во славу Божию тайно нас наставляющая. Радуйся, Жизневодительнице наша, к небесам нас во блаженное отечество руководящая; Радуйся, радосте наша, избави нас от всякия нужды и печали.

Кондак 11

Пение хвалебное немолчно воспеваем Ти, Богородительнице, яко молитвами Твоими к Сыну Твоему и Богу нашему, грады и веси от злых обстояний сохраняеши, мир и изобилие и вся благая в жизни всем чтущым Тя подаеши, всяк возраст на путь спасения наставляеши, и всех вразумляеши воспевати милосердому Человеколюбцу Богу: Аллилуиа.

Икос 11

Божественным светом пречистой души Твоей всю вселенную просвещаешь и сею иконою Твоею сердца всех веселия и радости исполняеши, благодать ею всюду вносящи. Сего ради и старии и младии, и юницы и дети, в чувствах глубочайшаго благоговения согласно Тебе зовут: Радуйся, людям престарелым отраду утешение в сердца их проливающая; Радуйся, яко младенцем благое воспитание и преуспеяние разума к восприятию полезных учений подаеши. Радуйся, юных наставляющая целомудрию, в девственной чистоте душы их соблюдающая; Радуйся, благословенное совершение христианских супружеств. Радуйся, добрым земледельцем плодородие у Бога испрашивающая; Радуйся, Тя призывающым путником и по морю плавающым милостиво спутствующая. Радуйся, радосте наша, избави нас от всякия нужды и печали.

Кондак 12

Благодать велия дана Ти есть от Бога, Преблагословенная Мати Божия, еже убогия назирати, болящыя исцеляти, такожде помогати бедствующим, утешати скорбящыя и всех заблуждающихся на путь спасения обращати. Темже вси труждающиися и обремененнии имея в Тебе благую Матерь, и чрез Тебе неизлаголанныя милости приемлюще, умильно вопиют: Аллилуиа.

Икос 12

Поюще чудеса Твоя, Богородительнице, имиже являеши нам многую любовь Твою и милосердие, восхваляем чудодейственную силу Твою, всемощная Владычице наша, и предстояще Пречистому образу Твоему, молим Тя: утоли наша печали и избави нас от всякаго зла, да всегда молитвами Твоими в любви Твоей пребывающе, во умилении сердечным зовем Ти: Радуйся, всем скорбящим и обремененным приносящая утешение и радость; Радуйся, Скоропослушнице наша, сущым нам в бедах и напастех, быструю помощь посылающая. Радуйся, в болезнех призывающым Тя целебую силу Твою и скорое выздоровление подающая; Радуйся, всепрощающую любовь Твою на место гнева и ненависти всюду вводящая и ожесточенно враждующих примиряющая. Радуйся, незримая Воспитательнице малых сирот и бездомным вдовицам неизменная Покровительнице; Радуйся, единая наша надежда, отрада и утешение в томительный час смерти. Радуйся, теплая и по смерти нашей Ходатаица о нас грешных у престола Всевышняго; Радуйся, радосте наша, избави нас от всякия нужды и печали.

Кондак 13

О, Всепетая Мати, Царица небесная, рождшая Христа Сына Божия и Спасителя миру всему. Приими ныне от всего сердца нашего сие приносимое Тебе моление и всесильным Твоим предстательством сохрани нас от всяких бед и напастей в жизни сей, и сподоби нас в блаженстве вечном со всеми святыми хвалу Богу воспевати: Аллилуиа.

(Этот кондак читается трижды, затем икос 1 и кондак 1)

Молитва первая

О, Пресвятая и Преблагословенная Мати Господа и Спаса нашего Иисуса Христа Пречистая Приснодево Богородице Марие, Покровительнице и Заступнице наша! Припадаем и поклоняемся Тебе пред святою и чудотворною Иерусалимскою иконою и смиренно молимся Тебе, вонми гласу молитв наших от души приносимых Ти, виждь скорби и искушения наша, и яко воистинну любвеобильная Матерь потщися помощи нам безпомощным, унылым, во многия грехи впадающым и присно прогневляющым Господа и Создателя нашего. Егоже умоли, Владычице, да не погубит нас со беззаконии нашими, но ради Твоего предстательства явит нам человеколюбную Свою милость, испроси нам, Всеблагая, здравие душевное и телесное, покаяние во гресех совершенное, преспеяние в добродетелех христианских, благодатное, мирное и благочестное житие, земли плодоносие, воздуха благорастворение, дожди благовременны и благословение свыше на вся благая дела и начинания наша. Сохрани и соблюди ны в мире и благоустроении, и споспеши всем нести иго Христово благое и легкое в терпении и смирении, во спасение душ наших, ограждая нас Матерним покровом Твоим от искушений диавольских и всякого зла. О, Царице всепетая, Мати Божия всеблагая! Простри богоноснии руце Твои на умоление к возлюбленному Сыну Твоему, Господу нашему Иисусу Христу и приемь сомолитвенники к Нему, вкупе с Тобою на иконе Твоей изображенная, праведныя родители Твоя, Иоакима и Анну, с ними умоли Его помиловати нас и избавити от погибели вечныя, и якоже иногда в скорби велицей пред сею иконою Твоею молившемуся Нилу утешение и обетование благое даровала еси, тако и ныне нас смиренных и грешных молящихся, услыши и яви нам великия Твоя щедроты: болящий исцели, скорбящыя утеши, бедствующыя от бед избави, путешествующыя и мореплавающыя невредими сохрани, и вся ны сподоби благочестно житие наше земное скончати, благую христианскую кончину получити, Святых Тайн причастницы быти, и небесное царствие унаследовати: да во свете и радости святых поем и величаем милосердие Твое и Рождшагося от Тебе Господа нашего Иисуса Христа. Емуже со безначальным его Отцем и Пресвятым Духом подобает всякая слава, честь и поклонение, во веки веков. Аминь.

Молитва вторая

Пресвятая Госпоже, Владычице Богородице, упование всех уповающих на Тя, Заступнице печальных, прибежище отчаянных, вдов и сирот Питательнице! Услыши и помилуй ны, грешныя и недостойныя рабы Твоя, со умилением ко пречистому Твоему образу припадающия: умоли, Милосердая Владычице, Сына Твоего и Господа нашего Иисуса Христа, да отвратит от нас праведный гнев Свой, да простит грехи и беззакония наша, яко да сподобимся благостию Его скончати житие наше в покаянии и получити милость Его со всеми избранными Его, яко благословена и препрославлена еси во веки веков. Аминь.

[/spoiler]