Кондак 1

Из­бра́н­ный чу­до­тво́р­че и пре­ди́в­ный уго́д­ни­че Хрис­то́в, преподо́бне о́т­че Са́вво, ми́­ру пра­во­сла́в­но­му све­ти́ль­ни­че и те́п­лый о нас пред Бо́­гом мо­ли́т­вен­ни­че! Ве­ли­ча́­ем просла́вльшаго тя Го́с­по­да, восхваля́юще лю­бо́­вию равноа́нгельное жи­тие́ твое́. Ты же, я́ко име́яй ве́­лие дерз­но­ве́­ние ко Го́с­по­ду, от вся́­ких нас бед сво­бо­ди́, да с ра́­дос­тию зо­ве́м ти: Ра́­дуй­ся, пре­све́т­лая мо­на́­хов по­хва­ло́, Са́вво преподо́бне.

Икос 1

А́н­ге­лов Тво­ре́ц и всея́ тва́­ри Соде́тель избра́ тя от младе́нства, преподо́бне, просла́вити трисия́тельное и́мя Его́: ты бо, осмиле́тен сый, вся кра́с­ная ми́­ра тле́н­на­го пре­зре́в, во оби́­тель свя­ту́ю прите́кл еси́, иде́­же я́ко а́н­гел зем­ны́й богоуго́дно под­ви­за́л­ся еси́. Те́м­же и все­ли́­ся в тя бла­го­да́ть Пре­свя­та́­го Ду́­ха, Его́­же де́йством све́т­ло украша́яся, ангелоподо́бное жи­тие́ показа́л еси́. Мы же, зря́ще ве́лия исправле́ния твоя́, с лю­бо́­вию во­пи­е́м те­бе́ си́­це:

Ра́­дуй­ся, роди́телей бла­го­чес­ти́­вых благослове́нный пло́де.

Ра́­дуй­ся, Каппадоки́йския стра­ны́ свято́е укра­ше́­ние.

Ра́­дуй­ся, Палести́нския зем­ли́ и гра́­да Иерусали́ма све­ти́ль­ни­че.

Ра́­дуй­ся, во Иорда́нстей пусты́ни со а́н­ге­лы все­ли́­вый­ся.

Ра́­дуй­ся, я́ко от младе́нства Хри­ста́ возлюби́л еси́.

Ра́­дуй­ся, я́ко же́ртву живу́ю се­бе́ Го́сподеви прине́сл еси́.

Ра́­дуй­ся, Ева́нгелия Хри­сто́­ва усе́рдный после́дователю.

Ра́­дуй­ся, за́­по­ве­дей Гос­по́д­них ве́р­ный блюсти́телю.

Ра́­дуй­ся, я́ко от ю́нос­ти и́гу Христо́ву се­бе́ порабо́тил еси́.

Ра́­дуй­ся, я́ко красоту́ тле́нную и мирску́ю сла́­дость ни во что́же вме­ни́л еси́.

Ра́­дуй­ся, Бо́­жия ра́­зу­ма ис­по́л­нен­ный.

Ра́­дуй­ся, бла­го­да́­тию Ду́­ха Свя­та́­го приосене́нный.

Ра́­дуй­ся, пре­све́т­лая мо­на́­хов по­хва­ло́, Са́вво преподо́бне.

Кондак 2

Ви́­дев Всеве́дец Гос­по́дь благо́е ду́­ши твоея́ произволе́ние, е́же рабо́тати Ему́ усе́рд­но вся дни жи­во­та́ тво­его́, еще́ во ю́нос­ти просла́ви тя Бо­же́­ствен­ною Свое́ю си́­лою: люб­ве́ бо ра́­ди бра́тския в разжже́нную пещь вступи́в и оде́жды твоя́ неопале́нны сохрани́в, бла­го­да́­тию Бо́­жиею не­вреж­де́н от ог­ня́ пребы́л еси́. Се­го́ ра́­ди про­слав­ля́ю­ще Ца­ря́ сла́­вы Хри­ста́, про­слав­ля́ю­ща­го свя­ты́я Своя́, во­пи­е́м Ему́: Алли­лу́иа.

Икос 2

Ра́­зум про­све­ще́н от Бо́­га име́я, преподо́бне о́т­че Са́вво, диа́вольския искуше́ния при́с­но разумева́л еси́: ег­да́ бо преле́стник ро́­да че­ло­ве́­чес­ка­го искуси́ тя взя́ти плод дре́ва пре́ж­де ста́рческаго благослове́ния, а́бие помяну́л еси́ прароди́тели, и́же сне́дию дре́ва в раи́ прельсти́шася. Те́м­же пове́рг плод на зе́м­лю; нога́ми сей попра́л еси́, запове́дав се­бе́ до сме́р­ти не вкуси́ти плода́ се­го́, гла­ву́ дре́в­ня­го зми́я со­кру­ша́я. Се­го́ ра́­ди при­ими́ от нас похвалы́ сия́:

Ра́­дуй­ся, от ю́нос­ти по́стническое жи­тие́ показа́вый.

Ра́­дуй­ся, на вы­со­ту́ доб­ро­де́­те­лей возше́дый.

Ра́­дуй­ся, мона́шескаго жи­тия́ и уста́ва и́стовое пра́­ви­ло.

Ра́­дуй­ся, ре́в­ност­ный исполни́телю оте́ческих пре­да́­ний.

Ра́­дуй­ся, я́ко люб­ве́ ра́­ди бра́та в пе́щный пла́мень вшел еси́.

Ра́­дуй­ся, я́ко си́­лою бла­го­да́­ти Хри­сто́­вы от ог­ня́ не опале́н изше́л еси́.

Ра́­дуй­ся, всеце́лое послуша́ние Го́с­по­ду Бо́­гу соверши́вый.

Ра́­дуй­ся, гла­ву́ дре́в­ня­го запина́теля сокруши́вый.

Ра́­дуй­ся, на вы­со­ту́ без­стра́с­тия возше́дый.

Ра́­дуй­ся, ко́з­ни де́монския до кон­ца́ по­бе­ди́­вый.

Ра́­дуй­ся, благо́е и́го Хрис­то́­во на рамена́ твоя́ восприя́вый.

Ра́­дуй­ся, зако́на Бо́­жия от всея́ ду́­ши взыска́вый.

Ра́­дуй­ся, пре­све́т­лая мо­на́­хов по­хва­ло́, Са́вво преподо́бне.

Кондак 3

Си́­ла Вы́ш­ня­го, про­све­ща́ю­щая вся́­ка­го че­ло­ве́­ка, гряду́щаго в мир, и показу́ющая пу­ти́ пра́­выя, наста́ви тя, преподо́бне о́т­че Са́вво, дости́гнути свя­та́­го гра́­да Иерусали́ма, иде́­же поклони́лся еси́ Живоно́сному Гро́бу Воскре́сшаго Хри­ста́, и со сле­за́­ми облобыза́в, бла­го­да́р­ствен­но воспе́л еси́ Ему́ песнь: Алли­лу́иа.

Икос 3

Име́я ве́­лию ре́в­ность о по́двизе мона́шескаго равноапо́стольнаго жи­тия́, преподо́бне, потща́лся еси́ идти́ во Иорда́нскую пус­ты́­ню, иде́­же наста́вника се­бе́ об­ре́т вели́каго Евфи́мия и того́ жи­тию досто́йно поревнова́в, свя­то́­му Крести́телю Христо́ву Иоа́нну в по́двизех тво­и́х упо­до́­бил­ся еси́. Мы же, ди­вя́­ще­ся бо­га́т­ству доб­ро­де́­те­лей тво­и́х, усе́рд­но во­пи­е́м ти:

Ра́­дуй­ся, жи­тию безпло́тных поревнова́вый.

Ра́­дуй­ся, по́двигом дре́в­них свя­ты́х оте́ц досто́йно подража́вый.

Ра́­дуй­ся, пусты́ни Иорда́нския благода́тное прозябе́ние.

Ра́­дуй­ся, свя­та́­го жи­тия́ бла­го­уха́­ние.

Ра́­дуй­ся, бла­го­да́­ти Хри­сто́­вы со­су́­де из­бра́н­ный.

Ра́­дуй­ся, пусты́нное жи­тие́ па́­че всего́ воз­лю­би́­вый.

Ра́­дуй­ся, страс­те́й те́рния усе́рд­но исторга́вый.

Ра́­дуй­ся, во ю́ном воз­рас­те́ му́дростию Хри­сто́­вою про­све­ще́н­ный.

Ра́­дуй­ся, чис­то­ты́ ду­ше́в­ныя и те­ле́с­ныя усе́рдный рев­ни́­те­лю.

Ра́­дуй­ся, у́мнаго трезве́ния не­усы́п­ный хра­ни́­те­лю.

Ра́­дуй­ся, ле́ствицею доб­ро­де́­те­лей к не­бе́с­ным оби́телем возше́дый.

Ра́­дуй­ся, я́ко фи́никс в пусты́ни процветы́й.

Ра́­дуй­ся, пре­све́т­лая мо­на́­хов по­хва­ло́, Са́вво преподо́бне.

Кондак 4

Бу́­рю внутрь по­мыс­ло́в и страс­те́й во́л­ны безбе́дно пре­ше́д, преподо́бне о́т­че Са́вво, об­ре́л еси́ ти́­хое при­ста́­ни­ще Хри­ста́, Ему́­же не­ле́­ност­но во мно́­зе дол­го­тер­пе́­нии порабо́тал еси́; от­ню́­ду­же Бо­же́­ствен­ною бла­го­да́­тию Хри­сто́­вою вос­хо­дя́ от си́­лы в си́­лу, от дея́ния к боговиде́нию, не­бе́с­на­го Сио́на до­сти́гл еси́, иде́­же со А́н­ге­лы пое́ши Тро́­ице Свя­те́й песнь: Алли­лу́иа.

Икос 4

Слы́­ша­ще ди́в­ная твоя́ наставле́ния, я́же не то́­чию в словесе́х, но и в по́двизех тво­и́х явля́л еси́, при­хож­да́­ху к те­бе́ из­да­ле́­ча жа́ж­ду­щии спа­се́­ния, подража́ти доброде́телем тво­и́м хотя́щее. Ты же, преподо́бне о́т­че, му́дро назида́я и к Небе́сному Ца́рствию управля́я всех, ве́­рою при­те­ка́ю­щих к те­бе́, свети́льник Пра­во­сла́­вия соде́лался еси́. Се­го́ ра́­ди с лю­бо́­вию во­пи­е́м ти:

Ра́­дуй­ся, на­ста́в­ни­че мо­на́­хов Бо­го­му́дрый.

Ра́­дуй­ся, ове́ц хри­сто́­вых до́б­рый па́­сты­рю.

Ра́­дуй­ся, ко спа­се́­нию ве́р­ный путеводи́телю.

Ра́­дуй­ся, по́ст­ни­ков ди́вный учи́­те­лю.

Ра́­дуй­ся, кре́п­кое па́дающих возведе́ние.

Ра́­дуй­ся, правостоя́щих утвер­жде́­ние.

Ра́­дуй­ся, Ева́нгелия Хри­сто́­ва усе́рдный по­слу́­ша­те­лю.

Ра́­дуй­ся, и́но­чес­ка­го жи­тия́ до́б­рый на­ста́в­ни­че.

Ра́­дуй­ся, я́ко огне́м мо­ли́т­вы стре́лы вра́­жия попали́л еси́.

Ра́­дуй­ся, я́ко еще́ во пло́­ти сый, ра́йскую сла́­дость предвкуси́л еси́.

Ра́­дуй­ся, пусты́нный жи́телю и в те­ле­си́ а́н­ге­ле.

Ра́­дуй­ся, вселе́нныя све­ти́ль­ни­че.

Ра́­дуй­ся, пре­све́т­лая мо­на́­хов по­хва­ло́, Са́вво преподо́бне.

Кондак 5

Бо­го­те́ч­ней звез­де́ упо­до́­бил­ся еси́, блаже́нне Са́вво, смире́нием возвыша́емый и в го́рняя черто́ги востеки́й, на­уча́я всех го́рняя му́дрствовати, а не зем­на́я, от страс­те́й отреша́тися, со Хри­сто́м жи́ти и от серд­ца́ вос­пе­ва́­ти Ему́: Алли­лу́иа.

Икос 5

Ви́­дев­ше тя ученицы́ твои́ наста́вника прему́дра и зна́мением не­бе́с­ныя бла­го­да́­ти сия́юща, дивля́хуся, тща́щеся тво­ему́ жи­тию подража́ти; я́ко бо лу­ча́ све́тлаго со́лн­ца пра́в­ды, просвети́ся жи­тие́ твое́. Се­го́ ра́­ди слы́­ши­ши от всех по­хва́ль­ная пе́­ния та­ко­ва́я:

Ра́­дуй­ся, восто́чная звез­до́ златоза́рнейшая.

Ра́­дуй­ся, а́н­ге­лов со­бе­се́д­ни­че.

Ра́­дуй­ся, по́ст­ни­ков по­хва­ло́.

Ра́­дуй­ся, безмо́лвствующих сла́­во.

Ра́­дуй­ся, учи́­те­лю сми­ре́­ния и це­ло­му́д­рия.

Ра́­дуй­ся, о́б­ра­зе кро́­тос­ти и по­слу­ша́­ния.

Ра́­дуй­ся, я́ко во глу­би­ны́ ни­ще­ты́ ду­хо́в­ныя при­ни́кл еси́.

Ра́­дуй­ся, я́ко на вы­со­ту́ доб­ро­де́­те­лей воз­ше́л еси́.

Ра́­дуй­ся, я́ко путь к животу́ ве́ч­но­му об­ре́л еси́.

Ра́­дуй­ся, я́ко ис­прав­ле­́нии тво­и́ми безпло́тныя удиви́л еси́.

Ра́­дуй­ся, мно́­жест­во душ уне­ве́сти­вый Хри­сту́.

Ра́­дуй­ся, ку́п­но с ни́­ми пре­бы­ва́яй в ра́­дос­ти Го́с­по­да тво­его́.

Ра́­дуй­ся, пре­све́т­лая мо­на́­хов по­хва­ло́, Са́вво преподо́бне.

Кондак 6

Про­по­ве́д­ник и исполни́тель Ева́н­гель­ских сло­ве́с, е́же не скры­ва́­ти се­бе́ сокро́вищ на зем­ли́, яви́л­ся еси́, преподо́бне о́т­че Са́вво. Се­го́ ра́­ди и ча́­да твоя́ ду­хо́в­ная на­став­ля́л еси́, е́же Еди́­на­го Го́с­по­да иска́ти во вся дни жи́з­ни своея́, всем се́рд­цем Тому́ прилепля́тися и непреста́нно пе́­ти Ему́: Алли­лу́иа.

Икос 6

Воз­сия́ свет Бо­же́ст­вен­ный, в нощи́ моля́щуся те­бе́, преподо́бне, показу́я столпо́м о́гненным пеще́ру нерукотворе́ну, ю́же храм соде́лал еси́, и та́­мо вели́кую ла́вру устро́ив, богоуго́дныя по́д­ви­ги и моли́твенныя тру­ды́ показа́л еси́. Мы же, вели́чию бла­го­да́­ти Вы́ш­ня­го, на те­бе́ почи́вшия, ди­вя́­ще­ся, умиле́нно взы­ва́­ем:

Ра́­дуй­ся, я́ко виде́ния пренебе́снаго све́­та спо­до́­бил­ся еси́.

Ра́­дуй­ся, я́ко бла­го­во­ле́­ни­ем Бо́­жи­им вели́кую ла́вру устро́ил еси́ и в ню мно́­жест­во и́ноков собра́л еси́.

Ра́­дуй­ся, ду­хо́в­ныя о́в­цы к го́рнему ца́рствию до́б­ре упра́вивый.

Ра́­дуй­ся, мно́гая чу­де­са́ бла­го­да́­тию Свя­та́­го Ду́­ха сотвори́вый.

Ра́­дуй­ся, лени́выя подви́гнувый ре́вностными по́д­ви­ги тво­его́ жи­тия́ Хри­сто­лю­би́­ва­го.

Ра́­дуй­ся, пе­ча́ль­ных ско́­рое уте­ше́­ние.

Ра́­дуй­ся, Ева́нгелия Хри­сто́­ва бо­го­му́дрый учи́­те­лю.

Ра́­дуй­ся, про­воз­ве́ст­ни­че путе́й Гос­по́д­них.

Ра́­дуй­ся, вся во уме́ты вмени́вый, да Хри­ста́ при­об­ря́­ще­ши.

Ра́­дуй­ся, Хри­сту́ не­воз­вра́т­но по­сле́­до­ва­вый.

Ра́­дуй­ся, бла­ги́й и ве́р­ный ра́­бе Хрис­то́в.

Ра́­дуй­ся, до́б­рый де́­ла­те­лю виногра́да Хри­сто́­ва.

Ра́­дуй­ся, пре­све́т­лая мо­на́­хов по­хва­ло́, Са́вво преподо́бне.

Кондак 7

Хо­тя́ ве́рен бы­ти до кон­ца́ Иису́­су Хри­сту́, Сы́­ну Бо́­жию, взе́мшему гре­хи́ ми́­ра, кро́тость, не­зло́­бие, сми­ре́­ние в се́рд­це тво­е́м до́б­ре насади́л еси́, богоно́се о́т­че Са́вво, и вся́­кия ско́р­би, укоре́ния и досажде́ния ра́­дост­но пре­тер­пе́л еси́, ве́дая, я́ко мно́­ги­ми скорбьми́ по­до­ба́­ет вни́ти в Ца́рст­вие Не­бе́с­ное. Се­го́ ра́­ди, несе́нием крес­та́ Хри­сто́­ва и тер­пе́­ни­ем скор­бе́й, еще́ на зем­ли́ ду́­шу твою́ во оби́­тель Пре­свя­ты́я Тро́ицы устро́ил еси́, Е́йже ны́­не пред­стои­ши со А́н­ге­лы и вопие́ши а́нгельскую песнь: Алли­лу́иа.

Икос 7

Ди́вный вои́стину победоно́сец по­ка­за́л­ся еси́ на стра́с­ти плотски́я, богоблаже́нне; вся бо разжже́нныя стре́лы лу­ка́­ва­го пос­то́м, бде́­ни­ем и сле́зными мо­ли́т­ва­ми угаси́л еси́. Те́м­же во­пи­е́м те­бе́ си­це­ва́я:

Ра́­дуй­ся, крест Хрис­то́в на рамена́ твоя́ восприе́мый.

Ра́­дуй­ся, кресто́м сим я́ко ле́ствицею на не́­бо возше́дый.

Ра́­дуй­ся, терпе́ния и незло́бия рачи́телю.

Ра́­дуй­ся, и́ноков до́б­ре подвиза́ющихся моли́твенный пред Бо́­гом пред­ста́­те­лю.

Ра́­дуй­ся, ве́­ры Пра­во­сла́вныя мо́щный за­щи́т­ни­че.

Ра́­дуй­ся, Не­бе́с­на­го Ца́рст­вия нас­ле́д­ни­че.

Ра́­дуй­ся, бла­го­да́­тию Бо́­жиею приосене́нный.

Ра́­дуй­ся, я́ко о́б­раз страс­те́й Хри­сто́­вых в се́рд­це тво­е́м предписа́л еси́.

Ра́­дуй­ся, све́­том трисо́лнечным Свя­ты́я Тро́ицы озаре́нный.

Ра́­дуй­ся, я́ко душе́вныма очи́­ма при́с­но Го́с­по­да созерца́л еси́.

Ра́­дуй­ся, я́ко бла­го­да́­тию Бо́­жиею вся прови́дел еси́.

Ра́­дуй­ся, благода́тными чу­де­сы́ жи­тие́ твое́ озари́вый.

Ра́­дуй­ся, пре­све́т­лая мо­на́­хов по­хва­ло́, Са́вво преподо́бне.

Кондак 8

Стра́нника и прише́льца помышля́л еси́ в се­бе́ бы­ти в ми́­ре сем, пре­бла­же́н­не о́т­че Са́вво; те́м­же гряду́щаго гра́­да Иерусали́ма Не­бе́с­на­го взыску́я, вся помышле́ния твоя́ к не­бе­си́ непреста́нно возноси́л еси́, и, я́ко в тимпа́не, во умерщвле́ннем те­ле­си́, сла́дце воспева́л еси́ побе́дную песнь Хри­сту́ Бо́­гу: Алли­лу́иа.

Икос 8

Весь обле́клся еси́ во ору́жия Бо́­жия, преподо́бне; те́м­же возмо́гл еси́ всю си́­лу диа́волю низложи́ти. Помози́ у́бо и нам, пре­бла­же́н­не о́т­че, мо­ли́т­ва­ми тво­и́ми избы́ти сете́й вра́жиих, да бла­го­да́р­ствен­но зо­ве́м те­бе́ си́­це:

Ра́­дуй­ся, сто́л­пе не­пре­кло́н­ный терпе́ния.

Ра́­дуй­ся, рев­ни́­те­лю от ми́­ра удале́ния.

Ра́­дуй­ся, я́ко держа́вно плотски́я стра́с­ти низложи́л еси́.

Ра́­дуй­ся, я́ко плоть твою́ ду́хови покори́л еси́.

Ра́­дуй­ся, я́ко во бде́нных мо­ли́т­вах неосла́бно пребыва́л еси́.

Ра́­дуй­ся, я́ко умерщвле́нием пло́­ти безстра́стие стя­жа́л еси́.

Ра́­дуй­ся, я́ко вся́­кое наслажде́ние земно́е возненави́дел еси́.

Ра́­дуй­ся, я́ко те́сным и приско́рбным пу­те́м ходи́л еси́.

Ра́­дуй­ся, я́ко я́з­вы Го́с­по­да Иису́­са Хри­ста́ на те́ле тво­е́м носи́л еси́.

Ра́­дуй­ся, я́ко си́­лою крес­та́ Гос­по́д­ня де́монския ко́з­ни сокруши́л еси́.

Ра́­дуй­ся, вы́ш­них иде́­же Хрис­то́с се́де одесну́ю От­ца́ при́с­но иска́вый.

Ра́­дуй­ся, мы́сленным о́ком к невече́рнему све́­ту Хри­сту́ непреста́нно взира́вый.

Ра́­дуй­ся, пре­све́т­лая мо­на́­хов по­хва­ло́, Са́вво преподо́бне.

Кондак 9

Вся́­кое ес­тес­тво́ а́н­гель­ское просла́ви тя и Це́р­ковь восхвали́, преподо́бне о́т­че Са́вво; ты бо ца­ря́ неправому́дрствующа и Севи́ровы ересенача́льники проти́вящияся Правосла́вней Це́рк­ви небоя́зненно обличи́л еси́ и, все духо́вное во́инство Пра­во­сла́­вия совокупи́в, е́ресь в ко­не́ц низложи́л еси́, нас же всех во правове́рии утверди́в, научи́л еси́ единогла́сно вос­пе­ва́­ти Триеди́ному Бо́­гу: Алли­лу́иа.

Икос 9

Ве­ти́я мно­го­ве­ща́н­ныя не­до­уме́­ют досто́йно вос­хва­ли́­ти тя, пре­бла­же́н­не; па́­че бо ес­тест­ва́ че­ло­ве́­чес­ка­го под­ви­за́л­ся еси́ во вся дни жи­во­та́ тво­его́. Те́м­же чу­де­сы́ Хрис­то́с Бог те­бе́ обогати́, я́ко и зве́рие ди́вии повинова́хуся и служа́ху те­бе́, во дни же гла́­да мо­ли́т­вою твое́ю не́­бо дождь даде́ на зе́м­лю су́ху. Се­го́ ра́­ди, лю­бо́­вию подвиза́емии, во­пи­е́м те­бе́ та­ко­ва́я:

Ра́­дуй­ся, Це́рк­ве Пра­во­сла́вныя по­хва­ло́.

Ра́­дуй­ся, еретико́в и всех проти́вников правове́рия обличи́телю.

Ра́­дуй­ся, я́ко лю­де́й увеща́ти о и́стине Пра­во­сла́­вия потща́лся еси́.

Ра́­дуй­ся, за и́с­ти­ну Пра­во­сла́­вия мно́­гия тру­ды́ и по́д­ви­ги подъе́мый.

Ра́­дуй­ся, Пра­во­сла́вныя ве́­ры све­ти́­ло и утвер­жде́­ние.

Ра́­дуй­ся, проро́ком, апо́с­то­лом и святи́телем сопричте́нный.

Ра́­дуй­ся, ца­ре́й пра­во­сла́в­ных по­кро́­ве и за­щи́­ще­ние.

Ра́­дуй­ся, хри­сти­а́н правове́рных моли́твенное ог­раж­де́­ние.

Ра́­дуй­ся, ерети́ческих уче́­ний разори́телю.

Ра́­дуй­ся, пра­во­сла́в­ных догма́тов уясни́телю.

Ра́­дуй­ся, всем подвиза́ющимся о Правосла́вии по­мо́щ­ни­че.

Ра́­дуй­ся, па́стырей Пра­во­сла́вныя Це́рк­ве споспе́шниче.

Ра́­дуй­ся, пре­све́т­лая мо­на́­хов по­хва­ло́, Са́вво преподо́бне.

Кондак 10

Спас­ти́ хо­тя́ мно́­жест­во лю­де́й тво­и́м попече́нием, пре­ми­ло­се́р­дый Гос­по́дь досто́йна тя наста́вника избра́, пре­бла­же́н­не о́т­че Са́вво; мно́­зи бо то­бо́ю на путь спа­се́­ния наста́влени бы́ша, и мно́ги оби́­те­ли тво­и́м тща́нием устро́ишася, в ни́х­же науча́л еси́ немо́лчно вос­пе­ва́­ти Еди́­но­му Бо́­гу: Алли­лу́иа.

Икос 10

Сте­на́ тве́р­дая и кре́п­кое ог­раж­де́­ние пра­во­сла́в­ных яви́л­ся еси́, преподо́бне, хо­да́­тай­ством бо тво­и́м мир Це́рк­ви Бо­жией да­ро­ва́­ся. Те́м­же мо́­лим тя, пре­бла­же́н­не, бу́­ди помо́щник во всех ско́р­бех и на­па́с­тех и нам, к зас­туп­ле­нию тво­ему́ при­бе­га́ю­щим, да со уми­ле́­нием во­пи­е́м ти си́­це:

Ра́­дуй­ся, пусты́нниче, мирску́ю суету́ возненави́девый и Еди́­на­го Бо́­га иска́вый.

Ра́­дуй­ся, алтаря́ Гос­по́д­ня слу­жи́­те­лю бла­го­го­ве́й­ный.

Ра́­дуй­ся, со вся́ким тща́нием Го́с­по­ду благоугожда́вый.

Ра́­дуй­ся, пла́менную лю­бо́вь ко Хри­сту́ яви́­вый.

Ра́­дуй­ся, мно́­гия оби́­те­ли созида́вый.

Ра́­дуй­ся, мно́­жест­во чад духо́вных внутрь собра́вый.

Ра́­дуй­ся, во оскуде́ниих и лише́ниих на Бо́­га упова́вый.

Ра́­дуй­ся, ве́­рою и упова́нием изо­би́­лие пло­до́в зем­ны́х при­е́мый.

Ра́­дуй­ся, тезоимени́тыя те­бе́ оби́­те­ли стра́­же не­усы́п­ный.

Ра́­дуй­ся, в бе­да́х, на­па́с­тех и ско́р­бех по­мо́щ­ни­че неотсту́пный.

Ра́­дуй­ся, и́ноков ко спа­се́­нию до́б­рый путеводи́телю.

Ра́­дуй­ся, многомо́щный мо­ли́т­вен­ни­че о ду­ша́х на́­ших.

Ра́­дуй­ся, пре­све́т­лая мо­на́­хов по­хва­ло́, Са́вво преподо́бне.

Кондак 11

Пе́­ние хва­ле́б­ное при­но́­сим те­бе́, преподо́бне о́т­че Са́вво, и с лю­бо́­вию при­па́­даю­ще ко изображе́нию честна́го ли́­ка тво­его́, вос­хва­ля́­ем ангелоподо́бное жи­тие́ твое́. Ты же, пред­стоя́ пре­сто́­лу Пре­свя­ты́я Тро́ицы, не пре­стай моля́ся о нас, ублажа́ющих тя, да спо­до́­бим­ся не­бе́с­на­го се­ле́­ния дости́гнути и гла́сом ра́дования воспе́ти Бо́­гу а́нгельскую песнь: Алли­лу́иа.

Икос 11

Све­то­за́р­ный свети́льник Бо́­жия бла­го­да́­ти был еси́, пре­бла­же́н­не, се­го́ ра́­ди в сме́рт­нем успе́нии тво­е́м душа́ твоя́, я́ко со́лн­це сия́ющая, вознесе́на бысть свя­ты́­ми а́н­ге­лы в не­бе́с­ныя оби́­те­ли. Мы же, помина́юще твою́ блаже́нную кон­чи́­ну и на не­бе­си́ прославле́ние, ра́­дост­но во­пи­е́м ти:

Ра́­дуй­ся, уго́д­ни­че Бо́­жий, те­че́­ние твоея́ жи́з­ни бла­го­че́ст­но скон­ча́­вый.

Ра́­дуй­ся, ве́­ру, на­де́ж­ду и лю­бо́вь до кон­ца́ сохрани́вый.

Ра́­дуй­ся, я́ко ца́рст­во и сла́­ву ве́ч­ную на­сле́­до­вал еси́.

Ра́­дуй­ся, я́ко по труде́х жи­тия́ зем­на́­го в не­бе́с­ных селе́ниих водвори́лся еси́.

Ра́­дуй­ся, нетле́нным вен­це́м сла́­вы не­бе́с­ныя от ру́­ки Вседержи́теля увенча́нный.

Ра́­дуй­ся, бла­же́н­ство ра́йское со все́­ми свя­ты́­ми восприе́мый.

Ра́­дуй­ся, а́н­ге­ле зем­ны́й и че­ло­ве́­че не­бе́с­ный.

Ра́­дуй­ся, на не­бе­си́ и на зем­ли́ от Го́с­по­да про­сла́в­лен­ный.

Ра́­дуй­ся, жи­во­но́с­ный ис­то́ч­ни­че, бла­го­да́ть ис­це­ле́­ния из­ли­ва́­яй.

Ра́­дуй­ся, одержи́мых не­ду́­ги бла­го­да́­тию Бо́­жиею исцеля́яй.

Ра́­дуй­ся, я́ко с вы­со­ты́ не­бе́с­ныя на нас (и оби́­тель твою́) при­зи­ра́е­ши.

Ра́­дуй­ся, я́ко всех нас от на­па́с­тей сохраня́еши.

Ра́­дуй­ся, пре­све́т­лая мо­на́­хов по­хва­ло́, Са́вво преподо́бне.

Кондак 12

Бла­го­да́ть и ве́­лие твое́ дерз­но­ве́­ние пред Бо́­гом ве́­ду­ще, богоно́сне о́т­че Са́вво, усе́рд­но во­пи­е́м те­бе́: не пре­стай моля́ся те́п­ле ко Го́с­по­ду, да со­хра­ни́т свя­ту́ю Це́р­ковь Свою́ непозы́блему от не­ве́­рия, ере­се́й и рас­ко́­ла, да из­ба́­вит нас от бед и лю́­тых об­стоя́­ний и приведе́т в Ца́рст­вие Свое́ Не­бе́с­ное, я́ко да по­е́м со благодаре́нием то­бо́ю благоде́ющему нам ди́в­но­му во свя­ты́х Бо́­гу: Алли­лу́иа.

Икос 12

Пою́­ще просла́вльшаго тя Го́с­по­да и убла­жа́­юще тя, пре­бла­же́н­не о́т­че, приле́жно мо́­лим­ся те­бе́, е́же спо­до́­би­ти­ся и нам хо­да́­тай­ством тво­и́м не­осуж­де́н­но пред­ста́­ти Стра́шному Суди́щу Христо́ву, да с ра́­дос­тию и лю­бо́­вию воспомина́юще твое́ моли́твенное о нас пред Бо́­гом предста́тельство, благохва́льно зо­ве́м те­бе́ си́­це:

Ра́­дуй­ся, пре­чест­но́е се­ле́­ние Пре­свя­ты́я Тро́ицы.

Ра́­дуй­ся, избра́нное Свя­та́­го Ду́­ха жи­ли́­ще.

Ра́­дуй­ся, сия́ние незаходи́маго Со́лн­ца.

Ра́­дуй­ся, лу­ча́­ми подвиго́в тво­и́х мона́шеское жи­тие́ озаря́яй.

Ра́­дуй­ся, до­сто́й­ный А́н­ге­лов со­бе­се́д­ни­че.

Ра́­дуй­ся, му́­че­ни­ков и пре­по­до́б­ных на не­бе­си́ сожи́телю.

Ра́­дуй­ся, я́ко мзда твоя́ мно́га на не­бе­си́.

Ра́­дуй­ся, Це́рк­ви Пра­во­сла́вныя укра­ше́­ние.

Ра́­дуй­ся, в бе­да́х су́­щим ско́­рое вспоможе́ние.

Ра́­дуй­ся, те́п­лый пред Го́с­по­дем о нас мо­ли́т­вен­ни­че.

Ра́­дуй­ся, при́сный и́ноков по­мо́щ­ни­че и зас­ту́п­ни­че.

Ра́­дуй­ся, пре­све́т­лая мо­на́­хов по­хва­ло́, Са́вво преподо́бне.

Кондак 13

О ве­ли́­кий и ди́вный уго́д­ни­че Хрис­то́в, преподо́бне о́т­че Са́вво! При­ими́ ми́лостивно сие́ ма́­лое мо­ле́­ние, от усе́рдия на́­ше­го в по­хва­лу́ те­бе́ при­но­си́­мое, и тво­и́м моли́твенным пред­ста́­тель­ством у пре­сто́­ла Ца­ря́ Не­бе́с­на­го ис­про­си́ нам, е́же из­ба­ви­ти­ся в жи́з­ни сей от всех бед и на­па́с­тей, в сме́рт­нем же успе́нии на́­шем благу́ю часть спа­се́­ния и насле́дие ве́ч­ных благ получи́ти, я́ко да спо­до́­бим­ся с то­бо́ю и со все́­ми свя­ты́­ми в ра́­дос­ти ве́чней во ве́­ки вос­пе­ва́­ти Хри­сту́ Бо́­гу Спа­си́­те­лю на́­ше­му: Алли­лу́иа.

(Этот кондак чи­та­ет­ся трижды, за­те́м икос 1 и кондак 1).

Мо­ли́т­ва

О пре­ди́в­ный и всехва́льный уго́д­ни­че Бо́­жий, преподо́бне о́т­че Са́вво! Днесь (во святе́м хра́­ме тво­е́м) бла­го­го­ве́й­но пред­стоя́­ще пред свя­тою ико́­ною твое́ю и ра́­дост­но соверша́юще пресве́тлую па́­мять твою́, убла­жа́­ем тя за­сту́п­ни­ка на́­ше­го. Почита́юще же твое́ ве́­лие дерз­но­ве́­ние пред Го́с­по­дем, смире́нно мо́­лим тя, пре­бла­же́н­не: при­ими́ ми́лостивно от нас хва­ле́б­ное пе́­ние сие́, от люб­ве́ и усе́рдия те­бе́ при­но­си́­мое. И, я́ко име́яй ве́­лие дерз­но­ве́­ние ко Го́с­по­ду, потщи́ся бо­го­приятным тво­и́м хо­да́­тай­ством испроси́ти у Ца­ря́ ца́рст­вую­щих и Го́с­по­да госпо́дствующих, я́ко да проба́вит ве­ли́­кия и бо­га́­тыя ми́­лос­ти Своя́ на нас гре́ш­ных, да по­да́ст нам дух пра́­выя ве́­ры, дух ве́­де­ния и люб­ве́, дух ми́­ра и ра́­дос­ти о Ду́­се Свя́­те, да из­ба́­вит от бед и на­па́с­тей, да низ­по́с­лет вся по­ле́з­ная ко спа­се́­нию душ на́­ших. Всем же правосла́вным да низ­по́с­лет мир, ти­ши­ну́, без­мя­те́­жие, усе́рдие ко ис­пол­не́­нию за́­по­ве­дей его́, изо­би́­лие пло­до́в зем­ны́х, и да из­ба́­вит всю ру́с­скую стра­ну́ от гла́­да, тру́­са, по­то́­па, ог­ня́, ме­ча́, на­ше́ст­вия ино­пле­ме́н­ных и меж­до­усо́б­ныя бра́­ни, смер­то­но́с­ныя я́з­вы и от вся́­ка­го зла. Ей, уго́д­ни­че Бо́­жий! Не пре́­зри моле́ний на́­ших, но услы́­ши нас мо­ля́­щих­ся те­бе́, и под кро́вом за­ступ­ле́­ния тво­его́ со­хра­ни́ нас (и оби́­тель твою́) ненаве́тны от враг ви́­ди­мых и не­ви́­ди­мых, да спо­до́­бим­ся скон­ча́­ти жи­тие́ на́­ше в по­кая́­нии и восприи́мем ве́ч­ная бла­га́я во Ца́рст­вии Хри­ста́ Бо́­га на́­ше­го, иде́­же восхва́лим с то­бо́ю и все́­ми свя­ты́­ми достопоклоня́емое и́мя Пре­свя­ты́я Тро́ицы, От­ца́ и Сы́­на и Свя­та́­го Ду́­ха, во ве́­ки ве­ко́в. Ами́нь.

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Свята́я великому́ченице Варва́ро, моли́ Бо́га о на́с.

Во́ду нече́стия тиме́нну оста́вивши, к воде́ чисти́тельной притекла́ еси́, Варва́ро, и на́ша очи́сти сердца́, чи́сто пе́ти твоя́ страда́ния.

Водо́ю креще́ния очи́стившися, великому́ченице, чи́стому Жениху́, Христу́, прилепи́лася еси́, Ему́же и на́с чи́сто присво́й, моли́твами твои́ми.

Сла́ва: В воде́ пото́пльшему зми́я лука́ваго подо́бящися, кро́вию твое́ю страда́льческою вра́жию погрузи́ла еси́ си́лу, страстоно́сице, от него́же и на́м изба́витися Спа́са умоли́.

И ны́не: Во́ду сле́з очища́ющую, Пречи́стая, пода́ждь ми́ и, очи́стивши мя́ от ка́ла беззако́ний, чи́ста предста́ви, Богороди́тельнице, Сы́ну Твоему́ и Бо́гу.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Небе́снаго кру́га смотря́ющи украше́ние, му́драя де́во Варва́ро, Верхотво́рца позна́ла еси́, Его́же и возлю́бльши, Тому́ служи́ти изво́лила еси́; и на́с в любви́ Его́ утверди́, мо́лимся.

Небе́снаго Творца́ в Тро́ице пресве́тлое изобразу́ющи естество́, три́ о́кна в ба́не оте́честей изобрази́ти повеле́ла еси́, Тро́ическому покланя́тися уча́щи Божеству́, Ему́же и на́с ве́чно покланя́тися сподо́би.

Сла́ва: Небе́снаго черто́га жела́ющи, небе́сному Жениху́ чистоту́ де́вства твоего́ соблюла́ еси́, вре́меннаго презре́вши; и мене́ в чистоте́ Тому́ служи́ти, му́ченице, укрепи́.

И ны́не: Небе́снаго Творца́, Богоро́дице Всепе́тая, поро́ждши, небе́с простра́ннейша яви́лася еси́; мене́ от простра́ннаго пути́ поги́бельна укло́нши, на небе́сный пу́ть наста́ви, молю́ся.

Седа́лен, гла́с 3.

В страда́нии твое́м вся́ удиви́ла еси́, я́ко претерпе́вши мучи́телей ра́ны, вяза́ния, му́ки и темни́цы, Варва́ро прехва́льная. Те́мже и вене́ц с небесе́ тебе́ даде́ Христо́с, к Нему́же, возжеле́вши усе́рдно, притекла́ еси́; То́й благода́ть подаде́ тебе́, му́ченице, врачева́ния источа́ти челове́ком.

Сла́ва, и ны́не: Боже́ственная ски́ния была́ еси́, Сло́ва, еди́на Пречи́стая Ма́ти Де́во, чистото́ю а́нгелы превозше́дшая; па́че все́х мене́, пе́рсть бы́вша, оскверне́на плотски́ми прегреше́ньми, очи́сти моли́тв Твои́х Боже́ственными вода́ми, подаю́щи, Чи́стая, ве́лию ми́лость.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Услы́шавши, Варва́ро, небеса́, пове́дающа сла́ву Бо́жию, на земли́ Бо́га сла́вити возжела́ла еси́, Его́же сла́вы и на́с сподо́би.

Услы́шав оте́ц тво́й тебе́, Вы́шняго Отца́ испове́дующу, гоня́ше на убие́ние, но не возмо́же отто́ргнути от и́стиннаго Бо́га.

Сла́ва: Услы́шавши преще́ния оте́ческая и му́ки от него́ терпя́щи, Варва́ро, непоколеби́ма пребыла́ еси́, и мене́ непоколеби́ма в доброде́телех упра́ви.

И ны́не: Услы́ши, Пречи́стая Влады́чице, моле́ние мое́, и изба́ви мя́ от зо́л, и гла́с благослове́нных, призыва́ющий в Ца́рство, слы́шати удосто́й.

Пе́снь 5.

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Просвети́вши свещу́ свою́, му́ченице, ве́рою, свеща́ми опали́ти те́ло твое́ предала́ еси́, в черто́г небе́сный све́тло вни́ти жела́ющи.

Просвеща́хуся ве́рою неве́рием омраче́ннии лю́дие, ви́дяще тя́, жже́ния, бие́ния, ре́зания терпя́щую до́блественне, му́ченице.

Сла́ва: Просвети́ мя́, о Варва́ро, омраче́ннаго мгло́ю грехо́вною, и све́том невече́рним осиява́тися, све́тлая де́во, молю́ся, сотвори́.

И ны́не: Просвети́ла еси́ потемне́нное естество́, Богоро́дице, Све́т и́стинный ро́ждши; те́мже и мене́, све́том просвети́вши, от мра́чных вра́г свободи́.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Моли́тву твою́ страда́льческую услы́шав, Христо́с, Варва́ро, в темни́це затворе́нную посети́, исцеле́ние от ра́н подаде́ и на по́двиг укрепи́; ты́ же моя́ ра́ны грехо́вныя уврачу́й, му́ченице, молю́ся.

Моли́твою ти́, и страда́льческим тве́рдым терпе́нием, и чу́дным исцеле́нием Иулиани́ю от злоче́стия привлекла́ еси́ страда́ти с тобо́ю за Христа́, привлецы́ и мене́ к го́рнему мудрова́нию, страстоно́сице.

Сла́ва: Моли́тву вся́к принося́й с ве́рою тебе́, му́ченице, и к моща́м твои́м святы́м притека́яй, душе́вных страсте́й и теле́сных исцеле́ние ско́ро прие́млет, е́же и на́м бога́тно подава́й, мо́лимся.

И ны́не: Моли́тву на́шу приими́, Пречи́стая, и моли́твою Ти́ всемо́щною, изба́вити на́с от вра́г ви́димых и неви́димых, от грехо́в же и вся́кия му́ки, моли́, Его́же родила́ еси́, Человеколю́бца Бо́га.

Конда́к, гла́с 4.

В Тро́ице благоче́стно пева́емому, после́довавши Бо́гу, страстоте́рпице, и́дольская притупи́ла еси́ чти́лища; посреде́ же по́двига страда́льчествующи, Варва́ро, мучи́телей преще́ния не устраши́лася еси́, мужему́дренная, велегла́сно пою́щи при́сно: Тро́ицу чту́, еди́но Божество́.

И́кос:

Уневе́стившуюся Христу́ муче́нием Варва́ру, соше́дшеся, почти́м досто́йно: я́ко да, тоя́ моли́твами па́губы душетле́нныя изба́вльшеся и губи́тельства, тру́са и паде́жа, житие́ в ми́ре препрово́дим, сподо́бившеся со все́ми святы́ми, от ве́ка Бо́гу благоугоди́вшими, ходи́ти во све́те и пе́ти с ни́ми: удиви́л еси́, Спа́се, твоя́ ми́лости все́м челове́ком, ве́рою испове́дающим: Тро́ицу чти́м, еди́но Божество́.

Пе́снь 7.

Ирмо́с: Де́ти евре́йстии в пещи́ попра́ша пла́мень дерзнове́нно и на ро́су о́гнь прело́жше, вопия́ху: благослове́н еси́, Го́споди Бо́же, во ве́ки.

Де́ти евре́йския а́нгел от огня́ неопа́льны сохрани́вый и тебе́, Варва́ро, на́гу води́му, от студа́ защити́, оде́ждою свы́ше обле́к, пою́щую: благослове́н еси́, Го́споди Бо́же, во ве́ки.

Де́тское игра́лище вменя́ющи му́ки, не пощади́ла еси́ те́ла твоего́, е́же бы́ти ему́ за Христа́ стру́жему и о́стро стира́ему, великому́ченице, пою́щи: благослове́н еси́, Го́споди Бо́же, во ве́ки.

Сла́ва: Дете́й евре́йских и а́з подража́я, Варва́ро, хвалю́ Христа́, да́вшаго тебе́ кре́пость; ты́ же мя́, на по́двиг доброде́телей укре́пльши, оде́ждою небе́сною облещи́ся сподо́би во ве́ки.

И ны́не: Деторо́дию Твоему́, Де́вою и по рождестве́ пребы́вшу, дивлю́ся, Богоро́дице; удиви́ у́бо и на мне́ ми́лость Сы́на Твоего́, да, поми́лован Тобо́ю, пою́: благослове́н Бо́г, ублагослови́вый Тя́, Ма́терь Свою́, во ве́ки.

Пе́снь 8.

Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Победи́телие непобеди́мыя твоея́ ве́ры мучи́теле тща́шеся бы́ти, сосца́ твоя́ неща́дно отре́зоваху, ты́ же, тве́рдо терпя́щи, млеко́м уче́ния о Бо́зе напои́ла еси́ предстоя́щия и благословя́щия Христа́ во ве́ки.

Победи́ла еси́ му́жеством твои́м, му́ченице Варва́ро, вся́ мучи́тельская ухищре́ния. Моли́ у́бо Влады́ку Христа́, мо́лим тя́, все́м ве́рным на враги́ побе́ду да́ти, пою́щим: благослови́те вся́ дела́ Го́спода, и превозноси́те Его́ во ве́ки.

Сла́ва: Победи́тельница суро́ваго отца́ твоего́ яви́лася еси́ му́ченице: о́н бо небе́сным огне́м во а́дский о́гнь низведе́ся, ты́ же на не́бо возшла́ еси́, е́же и мне́ исхода́тайствуй, от огня́ избавля́ющи мя́ во ве́ки.

И ны́не: Победи́, Пречи́стая, враго́в ви́димых и неви́димых, низложи́ти на́с тща́щихся, и страсте́й мя́ вся́ких изба́ви, да пою́ торже́ственне: благослови́те, вся́ дела́, Го́спода и превозноси́те Его́ во ве́ки.

Пе́снь 9.

Ирмо́с: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Вои́стинну Бо́га испове́дающи, му́ченице, черто́г небе́сный насле́дила еси́, его́же и на́с сподо́би, да с Тобо́ю Христа́ ве́чно велича́ем.

Вои́стинну на тебе́, Варва́ро, испо́лнися Христо́во прорече́ние: преда́ст оте́ц ча́до на сме́рть, е́юже ты́ ве́чный живо́т обрела́ еси́.

Сла́ва: Вои́стинну никто́же притека́яй к тебе́, страстоно́сице, то́щ благода́ти твоея́ отхо́дит, ея́же и мене́ испо́лни, молю́ся.

И ны́не: Вои́стинну и́стиннаго Бо́га пло́тию, Богоро́дице, родила́ еси́, Его́же ми́лостива на́м в де́нь Суда́ соде́лай, да безконе́чно с Ни́м Тя́ велича́ем.

Свети́лен:

Я́ко шипо́к красне́йший из терно́внаго израсла́ еси́ ко́рене де́во Варва́ро, твое́ю за Христа́ излия́нною обагри́вшися кро́вию. И ны́не Боже́ственную твою́ па́мять соверша́ющыя любо́вию, спаса́й от бе́д.

Сла́ва, и ны́не: Вои́стинну Тя́ испове́дуем Влады́чице, Тобо́ю спаса́емии: и́бо Бо́га неизрече́нно родила́ еси́ разори́вшаго Кресто́м сме́рть, и к Себе́ привле́кшаго пра́ведных собо́ры, с ни́миже восхваля́ем Тя́ Де́во.

Конда́к 1.

Избра́нной Бо́гом от идолослужи́тельнаго ро́да и призва́нной во язы́к свя́т, в лю́ди обновле́ния, неве́сте Христо́ве, я́ко избавля́ющиися тобо́ю от разли́чных зо́л и обстоя́ния, благода́рственная пе́ния и хвале́ния воспису́ем ти́, моли́твенницы твои́, свята́я и всехва́льная великому́ченице: ты́ же, иму́щи дерзнове́ние ко Го́споду, от вся́ких на́с бе́д свободи́, да с ра́достию зове́м ти́:

Ра́дуйся, Варва́ро, неве́сто Христо́ва прекра́сная.

И́кос 1.

А́нгелов честну́ю и вселюбе́зную чистоту́ непоро́чно сохра́нши, честна́я Варва́ро, а́нгелом сожи́тельница бы́ти сподо́билася еси́, с ни́миже егда́ пое́ши тро́ическую пе́снь Бо́гу на небеси́, услы́ши на́с, пою́щих тебе́ на земли́ похва́льная пе́ния сия́:

Ра́дуйся, отрокови́це, Бо́гом Отце́м предуста́вленная бы́ти сообра́зна в страда́нии о́бразу Сы́на Его́; ра́дуйся, Сы́ном Бо́жиим, Све́том от Све́та, призва́нная из тмы́ в чу́дный све́т ве́ры и благода́ти Его́.

Ра́дуйся, я́ко позва́вшему тя́ Свято́му Ду́ху, и сама́ те́лом и ду́хом свята́ еси́; ра́дуйся, я́ко от скве́рны пло́ти и ду́ха непоро́чну тя́ соблюла́ еси́.

Ра́дуйся, рожде́нному от Де́вы Жениху́ Христу́ де́ву тя́ чи́стую обручи́вшая; ра́дуйся, земна́го обру́чника па́че Небе́снаго зна́ти не восхоте́вшая.

Ра́дуйся, кри́не де́вства, посреде́ те́рния и́дольскаго прора́стший до́ле; ра́дуйся, цве́те чистоты́, в неувяда́емой сла́ве цвету́щий горе́.

Ра́дуйся, в небе́сном вертогра́де Христо́ва благоуха́ния наслажда́ющаяся; ра́дуйся, Красне́йшаго па́че сыно́в челове́ческих зре́нием та́мо утеша́ющаяся.

Ра́дуйся, убели́вшая ри́зы твоя́ в Кро́ви А́гнчей на земли́; ра́дуйся, в ли́це де́вственном после́дующая Бо́жиему А́гнцу на небеси́.

Ра́дуйся, Варва́ро, неве́сто Христо́ва прекра́сная.

Конда́к 2.

Ви́дящи свята́я Варва́ра себе́ на высо́ком столпе́ от отца́ поста́влену, помышля́ше себе́ ма́нием Бо́жиим к небеси́ бы́ти возводи́му. Разу́мная у́бо восхожде́ния в се́рдце свое́м поло́жши, те́ми от тмы́ ко Све́ту и от преле́стных и́долов ко И́стинному Бо́гу у́мне восхожда́ше, пою́щи Ему́: Аллилу́иа.

И́кос 2.

Ра́зум неуразуме́нный о Еди́ном всея́ тва́ри Творце́ разуме́ти де́ва свята́я Варва́ра и́щущи, бесе́доваше со свои́м си́ ра́зумом, глаго́ля: от те́мных куми́ров чу́дным свети́лам небе́сным ка́ко бе́ созда́тися мо́щно, рцы́ ми́? К не́йже о́н со псало́мником рече́: вси́ Бо́зи язы́к бе́сове, Еди́н же е́сть Бо́г и Госпо́дь, И́же небеса́ и вся́ свети́ла и́х сотвори́. Таково́му твоему́, му́драя де́во, ра́зуму дивя́щеся, глаго́лем:

Ра́дуйся, па́че ста́рец идолослужи́тельных разу́мнейшая; ра́дуйся, па́че мудреце́в ми́ра сего́ мудре́йшая.

Ра́дуйся, я́ко тебе́ безве́стная и та́йная прему́дрости Своея́ Бо́г яви́л е́сть; ра́дуйся, я́ко тебе́ и́стиннаго богосло́вия Са́м Бо́г Сло́во научи́л е́сть.

Ра́дуйся, все́х звездоче́тцев умо́м Христо́вым превозше́дшая; ра́дуйся, я́вственнее па́че о́нех небе́сный кру́г прозре́вшая.

Ра́дуйся, я́ко в тва́ри, а́ки в зерца́ле, Самаго́ Творца́ усмотре́ла еси́; ра́дуйся, я́ко в созда́нных свети́лах Несозда́нный Све́т узре́ла еси́.

Ра́дуйся, ны́не уже́ кроме́ зерца́ла све́т лица́ Бо́жия на небеси́ зря́щая; ра́дуйся, те́м све́том неизрече́нно веселя́щаяся.

Ра́дуйся, у́мная звездо́, ея́же озаре́нием лице́ Бо́жие, я́ко со́лнце, све́тло на́м явля́ется; ра́дуйся, мы́сленная луно́, е́юже но́щь заблужде́ния я́ко де́нь просвеща́ется.

Ра́дуйся, Варва́ро, неве́сто Христо́ва прекра́сная.

Конда́к 3.

Си́ла Вы́шняго даде́ тогда́ святе́й Варва́ре, я́коже дре́вле проро́ку Иезеки́илю, лице́ адама́нтово, си́льно пред все́ми идолослужи́тельми, во е́же не убоя́тися е́й от зве́рскаго лица́ и́х, ни ужаса́тися лю́таго преще́ния. Те́мже со дерзнове́нием мужему́дренная де́ва взыва́ше: Тро́ицу чту́, Еди́но Божество́, и То́й ве́рою покланя́ющися, велегла́сно пою́: Аллилу́иа.

И́кос 3.

Иму́щи свята́я Варва́ра свы́ше да́нную себе́ му́дрость, востече́ к де́лателем ба́ни оте́ческия, и о́нем проявля́я та́йну Святы́я Тро́ицы, повеле́ три́ о́кна в ба́не устро́ити. А́ще, — рече́, — идолослужи́телие уста́ и́мут и не глаго́лют сла́вы и́стиннаго Бо́га, то ка́менныя в се́й ба́не сте́ны треми́ о́кнами, а́ки треми́ устна́ми, да свиде́тельствуют, я́ко Еди́н е́сть Бо́г, в Тро́ице Святе́й от всея́ тва́ри сла́вимый и покланя́емый. За таково́е у́бо мудрова́ние, свята́я Варва́ро, приими́ похвалу́ сию́:

Ра́дуйся, в трео́конной ба́не купе́ль свята́го креще́ния, во и́мя Тро́ицы Пресвяты́я, изобрази́вшая; ра́дуйся, в купе́ли воды́ и Ду́ха, к си́м же и кро́ве твоея́ му́ченическия, тебе́ измы́вшая.

Ра́дуйся, я́ко треми́ о́кнами тму́ многобо́жия, Тро́ице Святе́й проти́внаго, прогна́ла еси́; ра́дуйся, я́ко о́кнами треми́ Све́т Тро́ический я́сно узре́ла еси́.

Ра́дуйся, я́ко те́ми треми́ о́кнами призре́ на тя́ Со́лнце Пра́вды, тридне́вно возсия́вшее от гро́ба; ра́дуйся, я́ко те́ми тебе́ возсия́ де́нь Тро́ическаго спасе́ния.

Ра́дуйся, се́рдце твое́ Еди́ному в Тро́ице Бо́гу всегда́ отве́рсто име́вшая; ра́дуйся, чу́вства твоя́ пред бра́нию трие́х враго́в: пло́ти, ми́ра и диа́вола, кре́пко заключи́вшая.

Ра́дуйся, я́ко в души́ твое́й три́ мы́сленная о́кна: ве́ры, наде́жды и любве́, устро́ила еси́; ра́дуйся, я́ко те́ми треми́ о́кнами при Тро́ическом Божестве́ треми́ де́ньми воздви́женную Те́ла Христо́ва Це́рковь усмотре́ла еси́.

Ра́дуйся, я́ко тебе́ небеса́ от трие́х иера́рхий а́нгельских отверзо́шася; ра́дуйся, я́ко тебе́ го́рния оби́тели Тро́ическия ра́достно прия́ша.

Ра́дуйся, Варва́ро, неве́сто Христо́ва прекра́сная.

Конда́к 4.

Бу́ря я́рости ве́лия отца́ твоего́, ды́шущаго преще́нием и уби́йством, возшуме́ на хра́м души́ твоея́, свята́я Варва́ро, но того́ не возмо́же поколеба́ти: основа́н бо бе́ на тве́рдом ве́ры Христо́вы ка́мени, на не́мже ты́, му́драя де́во, неподви́жимо стоя́щи, укрепля́ющему тя́ Иису́су Христу́ пе́снь воспева́ла еси́: Аллилу́иа.

И́кос 4.

Слы́шав от тебе́, му́дрыя дще́ри, оте́ц тво́й Диоско́р неслы́шанная о Святе́й Тро́ице словеса́, я́ко а́спид глухи́й затка́ у́ши своя́ и по подо́бию змии́ну с жа́лом ядоно́сным устреми́ся со о́стрием меча́ на твое́ уби́йство; но ты́, неве́сто Христо́ва Варва́ро, подража́ющи Жениха́ твоего́ Иису́са, бежа́вшаго от меча́ И́родова, бе́гала еси́ от меча́ Диоско́рова, жела́ющи се́рдце его́ от зве́рския я́рости в любо́вь оте́ческую обрати́ти. Мы́ же разу́мное твое́ бе́гство зва́нии почита́ем си́ми:

Ра́дуйся, блаже́нная, изгна́нная из до́му земна́го пра́вды ра́ди; ра́дуйся, бога́тая в Бо́га, лише́нная оте́ческих бога́тств Христа́ ра́ди.

Ра́дуйся, я́ко твоего́ обнища́ния е́сть Ца́рствие небе́сное; ра́дуйся, я́ко тебе́ угото́вася ве́чных бла́г сокро́вище.

Ра́дуйся, слове́сная а́гнице, от зла́го во́лка мучи́теля к До́брому Па́стырю Христу́ прибе́гшая; ра́дуйся, во дво́р пра́ведных ове́ц Его́, одесну́ю стоя́щих, вше́дшая.

Ра́дуйся, незло́бивая голуби́це, от земна́го вра́на в покро́в небе́снаго Орла́ прелете́вшая; ра́дуйся, в кро́ве крилу́ Его́ до́брый тебе́ покро́в обре́тшая.

Ра́дуйся, Небе́снаго Отца́ дщи́ честна́я, я́ко от земна́го роди́теля с безче́стием на сме́рть гони́ма была́ еси́; ра́дуйся, я́ко от безсме́ртнаго Го́спода Сла́вы в жи́знь ве́чную со сла́вою прия́та еси́.

Ра́дуйся, тоя́жде и на́м жи́зни присножела́ющая хода́таице; ра́дуйся, приле́жная о на́с к Бо́гу моли́твеннице.

Ра́дуйся, Варва́ро, неве́сто Христо́ва прекра́сная.

Конда́к 5.

Боготе́чной звезде́ была́ еси́ подо́бна, свята́я великому́ченице Варва́ро: бежа́щи бо пред отце́м твои́м, наставля́ла еси́ того́ та́инственне на пу́ть, веду́щий ко Пра́ведному Со́лнцу, от Де́вы возсия́вшему, Христу́ Бо́гу. Оба́че о́н душе́вныма ослепле́н очи́ма, а́бие и теле́сныма не узре́ тя́ пред собо́ю бежа́щую: ты́ бо сквозе́ ка́менную, тебе́ веле́нием Бо́жиим разступи́вшуюся, го́ру проше́дши, скры́лася еси́ от о́чию его́ в ка́менней пеще́ре, да от среды́ ка́мения, я́ко пти́ца, да́си гла́с Бо́гу, воспева́ющи: Аллилу́иа.

И́кос 5.

Ви́девше тя́ па́стырие, верху́ горы́ о́вцы пасу́щии, в ка́мени кры́ющуюся, дивля́хуся, глаго́люще: что́ сия́ слове́сная а́гница? Ко́его во́лка бе́гает? И се́ Диоско́р, па́че во́лка люте́йший, востече́ на го́ру, и тебе́ та́мо кры́ющуюся обре́т, и похи́тив за деви́ческия твоя́ власы́, влеча́ше ко своему́ до́му по жесто́кому пути́, на не́мже тя́, ве́рнии, срета́ем приве́тствии си́ми:

Ра́дуйся, младо́му еле́ню на гора́х арома́тских уподо́бившаяся; ра́дуйся, го́рняя, па́че до́льних, восхожде́ния в се́рдце твое́м полага́ющи, возлюби́вшая.

Ра́дуйся, избы́вшая поги́бельнаго идолослуже́ния ро́ва; ра́дуйся, на го́ру Тро́ическаго поклоне́ния восте́кшая.

Ра́дуйся, сквозе́ ка́мение проше́дшая, от каменносе́рдаго бе́гающи гоне́ния; ра́дуйся, среде́ ка́мения Ка́мень Христа́, утвержда́ющаго тя́, обре́тшая.

Ра́дуйся, в пеще́ру ка́менную вше́дшая, ви́дети Иису́са во гро́бе ка́менном бы́вша положе́нна; ра́дуйся, уже́ Того́ ви́дящая на престо́ле Сла́вы седя́ща.

Ра́дуйся, я́ко власы́ главы́ твоея́ за Христа́, храня́щаго, да и вла́с главы́ челове́ческия не поги́бнет, исто́ргани су́ть на земли́; ра́дуйся, я́ко ти́и от Христа́ изочте́ни су́ть ко увенча́нию на небеси́.

Ра́дуйся, власы́ твоя́ кро́вию до́ле, я́ко цвета́ми, обагри́вшая; ра́дуйся, заплете́ние власо́в твои́х окровавле́нных в вене́ц тебе́ златы́й обрати́вшая.

Ра́дуйся, Варва́ро, неве́сто Христо́ва прекра́сная.

Конда́к 6.

Пропове́дником богоно́сным, апо́столом Христо́вым, поревнова́вши дерзнове́нно, пред лице́м мучи́телей пропове́дала еси́ Христа́ И́стиннаго Бо́га: и Его́ ра́ди лю́тыя ра́ны, власяны́ми ру́бы и о́стрым чре́пием боле́зненно потира́емыя, му́жественно претерпе́ла еси́, свята́я Варва́ро. Та́же в темни́цу всажде́на, в не́й а́ки в черто́зе о Христе́ Иису́се ликова́ла еси́, пою́щи Ему́: Аллилу́иа.

И́кос 6.

Возсия́вый в се́рдце твое́м просвеще́ние и́стиннаго богоразу́мия, возсия́ и во очесе́х твои́х све́т Боже́ственнаго лица́ Своего́ Христо́с Госпо́дь: То́й бо, я́ко возлю́бленный тво́й Жени́х, в полу́нощи к тебе́, непоро́чней Свое́й неве́сте, в темни́цу прише́д, любе́зно тя́ посети́, от ра́н исцели́ и све́тлостию лица́ Своего́ неизрече́нно ду́шу твою́ возвесели́, на́с же, ве́рных, научи́ пе́ти тебе́ сицева́я:

Ра́дуйся, за страда́вшаго бие́ние Христа́ неща́дно бие́нная; ра́дуйся, бие́ния терпе́нием неви́димаго врага́ уби́вшая.

Ра́дуйся, я́звы Го́спода Твоего́ на те́ле твое́м носи́вшая; ра́дуйся, от все́х я́зв, Те́мжде Го́сподем, на те́ле твое́м исцеле́вшая.

Ра́дуйся, я́ко Са́м Госпо́дь, Све́т ми́ра, тебе́ в темни́це бы́вшей Себе́ яви́л е́сть; ра́дуйся, я́ко Са́м души́ и те́ла Вра́ч тебе́ больну́ю посети́л е́сть.

Ра́дуйся, чрез земну́ю темни́цу в небе́сный черто́г све́тло вше́дшая; ра́дуйся, от крове́й твои́х бра́чную тебе́ оде́жду истка́вшая.

Ра́дуйся, я́ко тобо́ю от мно́гих ра́н гре́шнии исцеля́ются; ра́дуйся, я́ко тобо́ю от все́х боле́зней с ве́рою тя́ призыва́ющии уздравля́ются.

Ра́дуйся, у́з грехо́вных ско́рая реши́тельнице; ра́дуйся, я́зв многозло́бных до́брая целе́бнице.

Ра́дуйся, Варва́ро, неве́сто Христо́ва прекра́сная.

Конда́к 7.

Хотя́щу безу́мному мучи́телю жела́ние свое́ улучи́ти, и еще́ покуша́ющемуся ласка́тельными словесы́ тебе́, свята́я Варва́ро, от И́стиннаго Бо́га отврати́ти ко преле́стным и́долом, ты́, я́ко му́драя де́ва, отвеща́ла еси́ тому́: пе́рвее тве́рдый адама́нт в мя́гкий во́ск претвори́ши, не́жели мене́ отврати́ши от Христа́ Бо́га моего́; Того́ бо, со Отце́м и Святы́м Ду́хом, Еди́наго И́стиннаго Бо́га испове́дую, сла́влю, хвалю́, и пою́ Ему́: Аллилу́иа.

И́кос 7.

Но́вую показа́ безчелове́чия я́рость зверообра́зный мучи́тель, егда́ тебе́, свята́я великому́ченице Варва́ро, повеле́ на дре́ве пове́сити, и ногтьми́ желе́зными те́ло твое́ строга́ти, и свеща́ми горя́щими твоя́ опаля́ти ре́бра, еще́ же и мла́том во главу́ тя́жко би́ти. Сие́ пачеесте́ственное терпе́ние твое́ благогове́йно воспомина́юще, похвала́ми блажи́м тя́ си́ми:

Ра́дуйся, я́ко пове́шена была́ еси́ на дре́ве, Христа́ ра́ди на Кресте́ распя́таго; ра́дуйся, стро́гана по ре́бром Иису́са ра́ди, копие́м в ре́бра прободе́ннаго.

Ра́дуйся, я́ко о́гнь любве́ к Бо́гу в се́рдце твое́м возжегла́ еси́; ра́дуйся, я́ко за Того́ о́гненными свеща́ми пали́ма была́ еси́.

Ра́дуйся, тверде́йшая адама́нта в терпе́нии невреди́мом; ра́дуйся, крепча́йшая ка́меннаго столпа́ в му́жестве непоколеби́мом.

Ра́дуйся, я́ко мла́том, би́вшим тя́ по главе́, вене́ц Ца́рствия тебе́ искова́ся; ра́дуйся, я́ко те́мже мла́том глава́ врага́ твоего́ сокруши́ся.

Ра́дуйся, я́ко со Христо́м, Его́ ра́ди, на земли́ страда́ла еси́; ра́дуйся, я́ко с Ни́м и о Не́м на небеси́ прославля́ешися.

Ра́дуйся, все́х враго́в на́ших кре́пкая победи́тельнице; ра́дуйся, во все́х беда́х на́ших ско́рая помо́щнице.

Ра́дуйся, Варва́ро, неве́сто Христо́ва прекра́сная.

Конда́к 8.

Стра́нное и стра́шное святы́я Варва́ры страда́ние ви́дящи, благове́рная в жена́х Иулиани́я удиви́ся зело́, ка́ко млада́ отрокови́ца в ю́ностнем телеси́ таковы́я му́жественно за Христа́ терпи́т му́ки? Та́же, сле́знаго испо́лнившися умиле́ния, благода́рственно и та́ возопи́ Христу́ Бо́гу: Аллилу́иа.

И́кос 8.

Ве́сь Сладча́йший Иису́с сла́дость, ве́сь жела́ние тебе́ бы́сть, свята́я Варва́ро; сла́дце бо Его́ ра́ди го́рькия терпе́ла еси́ му́ки, глаго́лющи: ча́шу страда́ний, ю́же даде́ ми́ Возлю́бленный мо́й Жени́х, не и́мам ли пи́ти? Те́мже и сама́ показа́лася еси́ ча́ша, сла́дость чуде́сных исцеле́ний излива́ющая все́м вопию́щим к тебе́ сицева́я:

Ра́дуйся, отве́ргшая во а́дское го́ре и́дольскую го́ресть; ра́дуйся, возлюби́вшая небе́сную Иису́сову сла́дость.

Ра́дуйся, мы́сленная ста́мно, ма́нну бра́шна творе́ния во́ли Бо́жия в себе́ иму́щая; ра́дуйся, ве́рных во благи́х жела́ние исполня́ющая.

Ра́дуйся, реко́ испо́лненная благода́ти Бо́жия вода́ми; ра́дуйся, исто́чниче, кипя́щий чуде́с излия́нии.

Ра́дуйся, я́ко пчела́, от злово́ннаго и́дольских же́ртв ды́ма отлете́вшая; ра́дуйся, во благоуха́нную ми́ра Христо́ва воню́ сла́дце прите́кшая.

Ра́дуйся, я́ко твои́ми во все́м те́ле я́звами была́ еси́ подо́бна со́ту; ра́дуйся, я́ко кро́ве твоея́ ка́пли сладча́йшия па́че ме́да бы́ша Пресла́дкому Иису́су.

Ра́дуйся, я́ко все́м ве́рным воспомина́ние твое́ пресла́дко; ра́дуйся, я́ко все́й Це́ркви Христо́вой и́мя твое́ прече́стно.

Ра́дуйся, Варва́ро, неве́сто Христо́ва прекра́сная.

Конда́к 9.

Все́ естество́ а́нгельское ве́лиею возра́довася ра́достию, узре́вши му́жественную кре́пость твою́, свята́я и непобеди́мая му́ченице Варва́ро: ви́девше бо а́нгельстии чи́нове ве́тхаго врага́, прего́рдаго кня́зя тмы́, со все́м его́ бесо́вским и и́дольским по́лчищем от тебе́, еди́ныя млады́я де́вы, посра́мленнаго, побежде́ннаго же и под но́зе твои́ пове́рженнаго, ве́лиим гла́сом возопи́ша Бо́гу: Аллилу́иа.

И́кос 9.

Вети́и многовеща́ннии ри́торскими свои́ми язы́ки не возмо́гут изрещи́ вели́чества твои́х боле́зненных страда́ний, о Варва́ро! Кто́ бо ска́жет боле́знь твою́, коли́ка бе́, егда́ сосца́ твоя́ уре́зана бы́ша? Кто́ изрече́т сту́д лица́ деви́ческаго, егда́ обнаже́на по всему́ гра́ду от беззако́нных мучи́телей води́ма была́ еси́? Сицеву́ю боле́знь и безче́стие твое́ мы́ то́чию воспомяну́вше, содрога́емся и со умиле́нием глаго́лем си́це:

Ра́дуйся, до́брая ле́торасле са́да Иису́сова; ра́дуйся, и́стинная лозо́ виногра́да Христо́ва.

Ра́дуйся, два́ сосца́ твоя́ отре́занная, а́ки два́ гре́зна в че́сть Го́сподеви твоему́ прине́сшая; ра́дуйся, кро́вь твою́, а́ки вино́ умиле́ния, от те́х источи́вшая.

Ра́дуйся, я́ко Христа́ ра́ди обнаже́ннаго и ты́ ри́з твои́х совлече́на была́ еси́; ра́дуйся, я́ко Его́ ра́ди, во Иерусали́ме руга́тельне води́маго, и ты́ по гра́ду на поруга́ние води́ма была́ еси́.

Ра́дуйся, от а́нгела све́тлою оде́ждою в наготе́ твое́й оде́янная; ра́дуйся, то́ю от сту́дных оче́с неви́димо покрове́нная.

Ра́дуйся, чу́дный а́нгелом и челове́ком позо́р бы́вшая; ра́дуйся, и саме́х мучи́телей терпе́нием твои́м удиви́вшая.

Ра́дуйся, я́ко Са́м Госпо́дь свы́ше призре́ на твоя́ страда́ния; ра́дуйся, я́ко Са́м То́й Подвигополо́жник похвали́ по́двиги твоя́.

Ра́дуйся, Варва́ро, неве́сто Христо́ва прекра́сная.

Конда́к 10.

Спасти́ хотя́ ду́шу твою́, о те́ле твое́м вся́чески неради́ла еси́, свята́я Варва́ро: егда́ бо на тя́ ме́чное на сме́рть осужде́ние изы́де, ты́ под ме́чь о́стрый, а́ки под вене́ц, кра́сный, ра́достно иду́щи, Бо́гу, в му́ченическом по́двизе тебе́ укрепля́ющему, воспева́ла еси́ пе́снь: Аллилу́иа.

И́кос 10.

Стены́ ка́менныя тве́рдее окамене́нный се́рдцем бы́сть Диоско́р, тво́й, свята́я Варва́ро, не уже́ роди́тель, но лю́тый мучи́тель: то́й бо, я́ко услы́ша твое́ ме́чное на сме́рть осужде́ние, не то́чию о сме́рти твое́й не поболе́, но и са́м свои́м мече́м на ме́сте осужде́ния твою́ святу́ю усече́ главу́, и та́ко, по предрече́нию Госпо́дню, окая́нный оте́ц предаде́ на сме́рть свое́ ча́до. В то́й у́бо блаже́нней твое́й кончи́не приими́ от на́с пе́ния сия́:

Ра́дуйся, за главу́ Це́ркве — Христа́ под ме́чь главу́ твою́ прекло́ншая; ра́дуйся, за любо́вь к небе́сному человеколюби́вому Отцу́ Безсме́ртному на сме́рть от земна́го безчелове́чнаго отца́ тле́ннаго пре́данная.

Ра́дуйся, тече́ние му́ченическаго пути́ сконча́вшая до́бре; ра́дуйся, ве́ру безсме́ртному Обру́чнику Христу́ до сме́рти сохра́ншая бо́дре.

Ра́дуйся, си́лою свы́ше на бра́нь проти́ву си́л преиспо́дних препоя́санная; ра́дуйся, победоно́сною сла́вою в вы́шних от Христа́ Победи́теля оде́янная.

Ра́дуйся, ору́жием благоволе́ния Бо́жия венча́нная на земли́; ра́дуйся, цве́том нетле́ния украше́нная на небеси́.

Ра́дуйся, де́вам добро́то и похвале́ние; ра́дуйся, му́чеником красото́ и ра́дование.

Ра́дуйся, христиа́ном кре́пкое прибе́жище; ра́дуйся, ве́рным тве́рдое заступле́ние.

Ра́дуйся, Варва́ро, неве́сто Христо́ва прекра́сная.

Конда́к 11.

Пе́ние на́ше похва́льное, а́ще бы и тмочи́сленное, ве́мы, я́ко не́сть дово́льно по достоя́нию восхвали́ти тя́, свята́я и всехва́льная му́ченице Варва́ро; оба́че мы́, Бо́жиих тобо́ю на́м оби́льно подава́емых дарова́ний благода́рни су́ще, Бо́гу, в тебе́ Свои́ми благодея́нии прославля́емому, благода́рственными усты́ пое́м: Аллилу́иа.

И́кос 11.

Светоприе́мную свещу́, на небе́сном све́щнице пред престо́лом Святы́я Тро́ицы поста́вленную, зри́м у́мныма очи́ма тебе́, свята́я де́во Варва́ро: отону́дуже, егда́ нощны́й грехо́в на́ших мра́к луча́ми моли́тв твои́х просвеща́еши и на́с на све́тлую спасе́ния стезю́ наставля́еши, по до́лгу досто́йна еси́ от на́с зва́нием бы́ти почита́ема си́м:

Ра́дуйся, светоу́мная луче́, во све́тлость немерца́ющую прилуче́нная; ра́дуйся, мы́сленная денни́це, де́нь невече́рний озаря́ти возше́дшая.

Ра́дуйся, благово́нная сми́рно, Це́рковь Христо́ву благоуха́ющая; ра́дуйся, злата́я кади́льнице, фимиа́м моли́твы о на́с к Бо́гу принося́щая.

Ра́дуйся, мирополо́жнице исцеле́ний неоску́дная; ра́дуйся, сокро́вище Бо́жиих даро́в неиждиви́тельное.

Ра́дуйся, ча́ше, от оби́лия до́му Бо́жия че́рплющая ра́дость; ра́дуйся, сосу́де, от исполне́ния Христо́ва прие́млющий все́х бла́г небе́сных сла́дость.

Ра́дуйся, адама́нте, пе́рстень безсме́ртнаго со Христо́м обруче́ния украси́вый; ра́дуйся, ве́нче добро́ты, в руце́ Госпо́дней держи́мый.

Ра́дуйся, я́ко на тя́ Ца́рь Сла́вы, Госпо́дь си́л, сла́ву и велеле́пие возложи́л е́сть; ра́дуйся, я́ко тебе́ Ца́рь ца́рствующих и Госпо́дь госпо́дствующих Ца́рство Свое́ и госпо́дствие дарова́л е́сть.

Ра́дуйся, Варва́ро, неве́сто Христо́ва прекра́сная.

Конда́к 12.

Благода́ть от Бо́га дана́ ти́ е́сть, храни́ти и соблюда́ти от внеза́пныя боле́зни и на́глыя сме́рти вся́каго челове́ка, ве́рою, любо́вию и благогове́нием честна́я твоя́ страда́ния воспомина́ющаго и почита́ющаго; тоя́ благода́ти не лиши́ и на́с, до́брая де́во Варва́ро, да и мы́, здра́ви су́ще те́лом и ду́хом в ны́нешней и бу́дущей жи́зни о тебе́ пое́м Бо́гу: Аллилу́иа.

И́кос 12.

Пое́м твоя́ кре́пкия по́двиги, почита́ем страда́ния, хва́лим долготерпе́ние, ублажа́ем святу́ю твою́ кончи́ну, сла́вим твое́ в немощно́м те́ле показа́вшееся непобеди́мое му́жество, и́мже на земли́ и на небеси́ просла́вилася еси́, свята́я и добропобе́дная великому́ченице Варва́ро, и в че́сть твои́х победоно́сных по́двигов и страда́ний похва́льная воспису́ем ти́ сия́:

Ра́дуйся, от а́нгельских чино́в в сожи́тельство и́х любе́зно прия́тая; ра́дуйся, от де́вственных лико́в в черто́г небе́сный ра́достно введе́нная.

Ра́дуйся, от му́ченических полко́в под вене́ц сла́вы провожда́емая во гла́се ра́дования; ра́дуйся, от все́х жи́телей небе́сных прие́мшая о Го́споде целова́ние.

Ра́дуйся, я́ко мзда́ твоя́ мно́га е́сть на небесе́х; ра́дуйся я́ко ра́дость твоя́ ве́чна е́сть во све́тлости святы́х.

Ра́дуйся, от вра́г ви́димых и неви́димых кре́пкая на́м засту́пнице; ра́дуйся, ра́дости на́м, благода́ти же и сла́вы ве́чныя хода́таице.

Ра́дуйся, душе́вных и теле́сных неду́гов на́ших цели́тельнице; ра́дуйся, спаси́тельных бла́г земны́х и небе́сных пода́тельнице.

Ра́дуйся, я́ко тобо́ю от неча́янныя и ве́чныя сме́рти сохране́ни бы́ти упова́ем; ра́дуйся, я́ко тобо́ю ве́чную жи́знь улучи́ти благонаде́жно ча́ем.

Ра́дуйся, Варва́ро, неве́сто Христо́ва прекра́сная.

Конда́к 13.

О, многострада́льная и всехва́льная свята́я великому́ченице Варва́ро! Ны́нешнее на́ше моле́ние прие́мши, от вся́ких боле́зней душе́вных и теле́сных, и вра́г ви́димых и неви́димых на́с изба́ви, и от ве́чнаго муче́ния твои́м богоприя́тным хода́тайством сохрани́, да с тобо́ю на земли́ живы́х во ве́ки пое́м Бо́гу: Аллилу́иа.

Этот конда́к читается трижды, затем 1-й и конда́к 1-й.

Моли́тва ко святе́й великому́ченице Варва́ре.

Свята́я сла́вная и всехва́льная великому́ченице Христо́ва Варва́ро! Со́браннии дне́сь в хра́ме твое́м Боже́ственном лю́ди, и ра́це моще́й твои́х покланя́ющиися и любо́вию целу́ющии, страда́ния же твоя́ му́ченическая, и в ни́х Сама́го Страстополо́жника Христа́, да́вшаго тебе́ не то́чию е́же в Него́ ве́ровати, но и е́же по Не́м страда́ти, похвала́ми ублажа́ющии, мо́лим тя́, изве́стная жела́ния на́шего хода́таице: моли́ с на́ми и о на́с умоля́емаго от своего́ благоутро́бия Бо́га, да ми́лостивно услы́шит на́с, прося́щих Его́ благосты́ню, и не отста́вит от на́с вся́ ко спасе́нию и житию́ ну́ждная проше́ния, и да́рует христиа́нскую кончи́ну животу́ на́шему безболе́зненну, непосты́дну, ми́рну, Боже́ственных Та́ин прича́стну, и все́м на вся́ком ме́сте, во вся́кой ско́рби и обстоя́нии, тре́бующим Его́ человеколю́бия и по́мощи, вели́кую Свою́ пода́ст ми́лость, да благода́тию Бо́жиею и твои́м те́плым предста́тельством, душе́ю и те́лом всегда́ здра́ви пребыва́юще, сла́вим ди́внаго во святы́х Свои́х Бо́га Изра́илева, не удаля́ющаго по́мощи Своея́ от на́с всегда́, ны́не и при́сно и во ве́ки веко́в. Ами́нь.

Моли́тва втора́я ко святе́й великому́ченице Варва́ре.

Прему́драя и всекра́сная свята́я великому́ченице Христо́ва Варва́ро! Блаже́нна еси́, я́ко преми́рная му́дрости Бо́жия пло́ть и кро́вь не яви́ тебе́, но Са́м Бо́г Оте́ц Небе́сный, И́же тебе́, ве́ры ра́ди от неве́рнаго отца́ оста́вленную, изгна́нную и умерщвле́нную, в дще́рь Себе́ возлю́бленную прия́т: за тле́нное земна́го име́ния насле́дие пло́ти нетле́ние дарова́; труды́ му́ченическия упокое́нием небе́снаго измени́ Ца́рствия; вре́менное твое́ житие́, сме́ртию Его́ ра́ди пресече́нное, сицево́ю возпросла́ви по́честию, я́ко ду́шу с ли́ки небе́сных вчини́ духо́в, те́ло же, на земли́ в хра́ме и́х а́нгельском положе́нное, а́нгелом запове́да сохрани́ти це́ло, че́стно и многочуде́сно. Блаже́нна еси́, Христу́ Сы́ну Бо́жию, Жениху́ небе́сному уневеще́нная де́во, Его́же добро́ты твоея́ рачи́теля име́ти жела́ющи, всю́ себе́ страда́нием, ра́нами, у́дов ре́занием и са́мыя главы́ усече́нием, а́ки у́тварьми дража́йшими потща́лася еси́ украси́ти; да та́ко, я́ко жена́ ве́рна главе́ свое́й му́жу, Христу́ ду́хом и те́лом соедини́шися неразлу́чно, глаго́лющи: обрето́х, Его́же возлюби́ душа́ моя́, удержа́х Его́, и не оста́вих Его́. Блаже́нна еси́, я́ко Святы́й Ду́х на тебе́ почи́л е́сть, и́мже духо́вными духо́вная разсужда́ти науче́на, вся́ ду́хи лука́вствия во и́долах, я́ко па́губныя отри́нула еси́, и еди́наго Бо́га Ду́ха позна́вши, я́ко и́стинная покло́нница, ду́хом и и́стиною кла́нятися изво́лила еси́, пропове́днически глаго́лющи: Тро́ицу чту́, еди́но Божество́. Сию́ Святу́ю Тро́ицу, Ю́же в животе́ и сме́рти испове́данием и страда́нием свои́м просла́вила еси́, умоли́ о мне́, предста́тельнице моя́, я́ко да и а́з всегда́ тро́йственною, ве́ры, любве́ и наде́жды, ту́южде Святу́ю Тро́ицу почита́ю доброде́телию. И́мам свети́льник ве́ры, но пра́зден благи́х де́л еле́я, ты́, му́драя де́во, страда́льческую пло́ть твою́, кро́ве испо́лненну и ра́нами прелива́ющуся, а́ки свети́льник иму́щая, да́ждь от еле́я твоего́, да те́м душе́вную мою́ свещу́ украси́вши, сподо́блюся по тебе́ вни́ти в черто́г небе́сный. Пресе́льник а́з е́смь на земли́ и пришле́ц, я́коже вси́ отцы́ мои́; бла́г ве́чных насле́днице и, блаже́нная, обе́да в Ца́рствии небе́сном прича́стнице, я́ко в стра́нствии жития́, трапе́зы боже́ственныя угоще́ния, си́це и во исхо́де от ми́ра, жела́емаго сподо́би мя́ напу́тствования; и егда́ в коне́ц сно́м сме́рти начну́ усыпа́ти, косни́ся тогда́ изнемога́ющия пло́ти моея́, я́ко иногда́ а́нгел Илии́, глаго́лющи: воста́ни, я́ждь и пи́й, я́ко да благода́тию боже́ственных Те́ла и Кро́ве та́ин укрепле́н, преиду́ в кре́пости я́ди тоя́ дале́кий пу́ть сме́рти, да́же до горы́ небе́сныя; и та́мо, Его́же ты́ чрез три́ о́кна ба́нныя пре́жде ве́рою Бо́га Тро́ицу узре́ла еси́, Сего́ ку́пно с тобо́ю лице́м к лицу́ да удосто́юся ви́дети, и сла́вити Его́ в несконча́емыя ве́ки, ами́нь.

Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Свята́я великому́ченице Варва́ро, моли́ Бо́га о на́с.

О, Тро́ице Пребоже́ственная Честна́я! Я́же па́че ума́ дарова́ние Твои́м рабо́м подаю́щи, светоно́сную вдохни́ мра́чному моему́ уму́ лучу́, Твою́ похвали́ти му́ченицу Варва́ру приснопа́мятную.

Похвале́ний вся́к преде́л вои́стинну превзы́де Твои́х му́ченик сла́ва, Человеколю́бче; но, е́же от ве́ры по си́ле прие́м хвале́ние, возниспосли́, Влады́ко, бога́тно воздая́ние.

От терно́внаго ко́рене израсте́ ши́пок красне́йший, Це́рковь Христо́ву облагово́нстви, и червле́нием страда́ния обагри́вшися кро́вию сла́вная Варва́ра, ю́же досто́йно воспое́м.

Богоро́дичен: Превы́шши яви́лася еси́, Чи́стая, вся́кия тва́ри, ви́димыя же и неви́димыя, Присноде́во: Зижди́теля бо родила́ еси́, я́коже благоволи́ воплоти́тися во утро́бе Твое́й, Его́же со дерзнове́нием моли́ спасти́ пою́щия Тя́.

Пе́снь 3.

Ирмо́с: Процвела́ е́сть пусты́ня я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Уязвля́ема любо́вию Твое́ю, я́ко женихо́вою, Влады́ко, неоде́ржным стремле́нием страстоте́рпица Варва́ра все́ оте́ческое безбо́жие возненави́де.

Ни сла́дости красота́, ни цве́т добро́ты, ни бога́тство же, ни сла́дости ю́ностныя услади́ша тя́, Варва́ро сла́вная, Христу́ уневе́стившуюся, до́брая де́во.

К соверше́нным подвиго́м ничто́же яви́ся возбране́ние не́мощи же́нстей, ни ю́ность во́зраста, Христе́: неви́димою бо Твое́ю си́лою укрепля́ема.

Богоро́дичен: Чи́ни удиви́шася а́нгельстии, Пречи́стая, и челове́ческая устраши́шася сердца́ о Рождестве́ Твое́м. Те́мже Тя́, Богоро́дицу, ве́рою чти́м.

Седа́лен, гла́с 3.

В страда́нии твое́м вся́ удиви́ла еси́, я́ко претерпе́вши мучи́телей ра́ны, вяза́ния, му́ки и темни́цы, Варва́ро прехва́льная. Те́мже и вене́ц с небесе́ тебе́ даде́ Христо́с, к Нему́же, возжеле́вши усе́рдно, притекла́ еси́; То́й благода́ть подаде́ тебе́, му́ченице, врачева́ния источа́ти челове́ком.

Сла́ва, и ны́не: Боже́ственная ски́ния была́ еси́, Сло́ва, еди́на Пречи́стая Ма́ти Де́во, чистото́ю а́нгелы превозше́дшая; па́че все́х мене́, пе́рсть бы́вша, оскверне́на плотски́ми прегреше́ньми, очи́сти моли́тв Твои́х Боже́ственными вода́ми, подаю́щи, Чи́стая, ве́лию ми́лость.

Крестобогоро́дичен: Нескве́рная А́гница Сло́ва, нетле́нная Де́ва Ма́ти, на Кресте́ зря́щи пове́шена из Нея́ без боле́зни прозя́бшаго, ма́терски подо́бно рыда́ющи, вопия́ше: увы́ Мне́, Ча́до Мое́, ка́ко стра́ждеши во́лею? Хотя́ изба́вити от страсте́й безче́стия челове́ка.

Пе́снь 4.

Ирмо́с: Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.

Из Де́вы ро́ждься, дарова́л еси́ отрокови́цам де́вам киче́ние низложи́ти льсти́ваго: те́мже добропобе́дная Варва́ра сего́ горды́ни поруга́ся.

Прама́ти, хитростьми́ льсти́ваго прельсти́вшися пе́рвее, пи́щи изгна́на бы́сть ра́йския: Варва́ра же, сему́ поруга́вшися, в небе́снем черто́зе ны́не водворя́ется.

Кресто́м Твои́м сме́рти си́лу разори́л еси́, те́мже, телесе́ отрокови́ца, Христе́, не пощаде́вши, терпи́т до́блественнейше ра́ны, Варва́ра, тве́рдым умо́м.

Богоро́дичен: Тя́, приста́нище спасе́ния и сте́ну необори́му, Богоро́дице Влады́чице, вси́ ве́рнии ве́мы: Ты́ бо моли́твами Твои́ми от бе́д избавля́еши ду́ши на́ша.

Пе́снь 5.

Ирмо́с: Хода́тай Бо́гу и челове́ком бы́л еси́, Христе́ Бо́же: Тобо́ю бо Влады́ко, к светонача́льнику Отцу́ Твоему́, от но́щи неве́дения, приведе́ние и́мамы.

Око́нцы треми́ ба́ни просвеща́тися повеле́вши, та́инственно написа́ла еси́ креще́ние, Варва́ро, Тро́ичным све́том души́ светоно́сное су́щее очище́ние.

Су́щаго Бо́га разже́гшися ре́вностию, лжеиме́нных бого́в скверна́вая оплева́ ли́ца, Варва́ра всехва́льная, руга́ющися отрокови́ца вне́шнему мироде́ржцу.

Неи́стовства лю́таго о́тча укло́ншуюся Варва́ру, разсту́пльшися, а́бие гора́ прия́т, я́коже дре́вле приснопа́мятную первому́ченицу Фе́клу, Христу́ чудоде́йствовавшу.

Богоро́дичен: Моли́ Твоего́ Сы́на и Го́спода, Де́во Чи́стая, плене́нным избавле́ние от проти́внаго обстоя́ния, на Тя́ наде́ющимся, ми́рное дарова́ти.

Пе́снь 6.

Ирмо́с: Во глубине́ грехо́вней содержи́мь е́смь, Спа́се, и в пучи́не жите́йстей обурева́емь, но, я́коже Ио́ну от зве́ря, и мене́ от страсте́й возведи́ и спаси́ мя.

Я́коже обеща́лся еси́ му́дрость дарова́ти, Спа́се, богонауче́ну, Тебе́ ра́ди стоя́щим пред суди́щем мучи́телей, ея́же му́ченица Варва́ра испо́лнися.

Безбо́жных ле́сть изобличи́ла еси́ сло́вом богому́дрым, Варва́ро сла́вная, терпе́нием же де́л мучи́телей мудрова́ния удиви́ла еси́.

Ра́нам неща́дно строга́тися, ру́бы же власяны́ми тве́рдо востира́тися Христа́ ра́ди непоро́чная страстоте́рпица те́ло предаде́.

Богоро́дичен: Неискусому́жно, Де́во, родила́ еси́ и ве́чнуеши Де́ва, явля́ющи и́стиннаго Божества́, Сы́на и Бо́га Твоего́, о́бразы.

Конда́к, гла́с 4.

В Тро́ице благоче́стно пева́емому, после́довавши Бо́гу, страстоте́рпице, и́дольская притупи́ла еси́ чти́лища; посреде́ же по́двига страда́льчествующи, Варва́ро, мучи́телей преще́ния не устраши́лася еси́, мужему́дренная, велегла́сно пою́щи при́сно: Тро́ицу чту́, еди́но Божество́.

И́кос:

Уневе́стившуюся Христу́ муче́нием Варва́ру, соше́дшеся, почти́м досто́йно: я́ко да, тоя́ моли́твами па́губы душетле́нныя изба́вльшеся и губи́тельства, тру́са и паде́жа, житие́ в ми́ре препрово́дим, сподо́бившеся со все́ми святы́ми, от ве́ка Бо́гу благоугоди́вшими, ходи́ти во све́те и пе́ти с ни́ми: удиви́л еси́, Спа́се, твоя́ ми́лости все́м челове́ком, ве́рою испове́дающим: Тро́ицу чти́м, еди́но Божество́.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

И́же зе́млю погуби́ти и потреби́ти мо́ре мучи́тель, су́етно свире́пствуя, я́ко игра́лище, лежи́т Варва́ры отрокови́цы под нога́ми: сего́ бо попра́в, Христо́с, я́коже пти́цу ху́ду, связа́.

Ра́нами нестерпи́мыми твоему́ стру́жему те́лу всему́, обагре́ну же крове́й ка́плями, свеща́ми, претерпе́ла еси́, пали́ма по ре́бром, му́ченице всехва́льная, Христа́ благодаря́щи, Варва́ро сла́вная.

О, безчелове́чнаго и немилосе́рдаго мучи́телей суровства́ и мно́жайшаго безбо́жества! Сосцы́ бо му́ченицы, я́коже в мясосе́чнице, лю́те мечи́ отсеца́ху, у́м утвержда́ющия Подвигополо́жнику Христу́.

Богоро́дичен: Святы́х святе́йшую поразумева́ем Тя́, я́ко еди́ну ро́ждшую Бо́га непреме́ннаго, Де́во нескве́рная, Ма́ти безневе́стная: все́м бо источи́ла еси́ ве́рным нетле́ние, Боже́ственным Рождество́м Твои́м.

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Яви́ся тебе́ Христо́с во Све́те непристу́пнем, заключе́нней, о Варва́ро, в темни́це, дерза́ти повелева́я, и ра́ны врачу́я, и ра́дость да́руя: те́мже впери́лася еси́ твоего́ Жениха́ раче́нием.

Яви́ся, Христе́, явле́нно прорече́ние Твое́ испо́лнено: оте́ц бо ча́до на сме́рть предае́т, самоде́латель же закла́ния бы́в окая́нный роди́тель Твоея́ му́ченицы. Те́мже с небесе́ огне́м истреби́ся.

А́нгел све́тел оде́ждею светови́дною тя́, Христа́ ра́ди обнаже́нную, честна́я Варва́ро, оде́яше, я́коже неве́сту, обходя́щу стра́сти: оде́жди бо, му́ченице, совлекла́ся еси́, боже́ственное прие́мши измене́ние.

Богоро́дичен: Ты́ от Отца́ неразлу́чнаго, во чре́ве, богому́жно пожи́вшаго, безсе́менно зачала́ еси́ и несказа́нно родила́ еси́, Богороди́тельнице Пречи́стая: те́мже Тя́, спасе́ние все́х на́с, испове́даем.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Сла́вную иму́щи прия́ти кончи́ну мече́м, Варва́ро, муче́ния твоего́, со Иулиани́ею венце́в му́ченических сподо́бльшися, гла́с Боже́ственный услы́шала еси́, исполня́ющий моле́ния твоя́.

Твоему́ сочета́вшися ны́не Всецарю́, Жениху́ Христу́, облиста́ющися сла́вою, Варва́ро, Боже́ственнаго све́та в небе́сных черто́зех, певцы́ твоя́ назира́й, страсте́й изменя́ющи и приводя́щи живу́щему Бо́гу.

Исполня́я твое́ проше́ние, Варва́ро страстоте́рпице, Христо́с врачева́ния подае́т соверша́ющим твою́ ве́рою ле́тнюю па́мять, я́ко и́стинно морски́й песо́к, твоя́ превзыдо́ша благосла́вная чудоде́йства.

Богоро́дичен: Черто́г была́ еси́ и́же па́че ума́ воплоще́ния Сло́ва, Де́во Богороди́тельнице, оде́яна сла́вою доброде́телей и испещре́на. Те́м Тя́, Всенепоро́чная, Богоро́дицу возвеща́ем.

Свети́лен.

Я́ко ши́пок красне́йший, из терно́внаго израсла́ еси́ ко́рене, де́во Варва́ро, же́ртвою, му́ченице, свяще́ннаго страда́ния обагри́вшися кро́вию. И ны́не боже́ственную твою́ па́мять соверша́ющия любо́вию, спаса́й от бе́д.

Сла́ва, и ны́не, богоро́дичен: Вои́стинну Тя́ Богоро́дицу испове́дуем, Влады́чице, Тобо́ю спаса́емии: и́бо Бо́га неизрече́нно родила́ еси́, разори́вшаго Кресто́м сме́рть и к Себе́ привле́кшаго преподо́бных собо́ры, с ни́миже восхваля́ем Тя́, Де́во.

Песнь 1

Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть: препрославленный Господь славно бо прославися.

Твоя похвалы начати хотящу ми, подаждь твой ныне глас медоточный, преподобне, имже православную уяснил еси Церковь песньми, отче Иоанне, яже твою почитает память.

Яко мудр и остроумен судия, изряднейше сущих естество смотряя, нестоящих предразсудил еси вечнующая: привременными бо изменил еси пребывающая, отче Иоанне, идеже тя и ныне Христос прослави.

Богородичен: Превышши явилася еси, Чистая, всякия твари, видимыя же и невидимыя, Приснодево: Зиждителя бо родила еси, якоже благоволи воплотитися во утробе Твоей, Егоже со дерзновением моли спасти поющия Тя.

Песнь 3

Ирмос: Процвела есть пустыня, яко крин, Господи, языческая неплодящая, Церковь пришествием Твоим, в нейже утвердися мое сердце.

Расточил еси богатство, Богу взаим дая, темже тебе на Небесех уготовася Царство; но и ныне воздаяние, Иоанне, приял еси многократное.

Премудрости талант прием, деяньми украшая, уяснил еси, Иоанне, Церковь Христову, егоже многоусугубляеши, и житие оставив.

Богородичен: Чини удивишася Ангельстии, Пречистая, и человеческая устрашишася сердца о Рождестве Твоем. Темже Тя, Богородицу, верою чтим.

Кондак, глас 4

Песнописца и честнаго Богоглагольника, Церкве наказателя и учителя и врагов сопротивоборца Иоанна воспоим: оружие бо взем — Крест Господень, всю отрази ересей прелесть и яко теплый предстатель к Богу всем подает прегрешений прощение.

Икос

Церковному наставнику, и учителю, и жерцу, яко таиннику неизглаголанных, возопием согласно: иже к Богу твоими молитвами отверзи уста наша и сподоби глаголати словеса учений твоих, ты бо Троице явился еси сопричастник, яко другое солнце облистая в мире, чудесы и учении просияв, яко Моисей, в законе Господни поучаяся всегда, словом и делом был еси светильник и моля непрестанно всем подати прегрешений прощение.

Песнь 4

Ирмос: Пришел еси от Девы не ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи

Повелению Христову повинувся, оставил еси мирскую красоту, богатство, сладость, светлость, Егоже ради, взем твой крест, последовал еси, Иоанне мудре.

Сообнищав обнищавшему Христу человеческаго ради спасения, спрославился еси, якоже Той обещася, и сцарствуеши же присноцарствующему, Иоанне.

Богородичен: Тя, пристанище спасения и стену необориму, Богородице Владычице, вси вернии вемы: Ты бо молитвами Твоими от бед избавлявши души наша.

Песнь 5

Ирмос: Ходатай Богу и человеком был еси, Христе Боже: Тобою бо, Владыко, к Светоначальнику, Отцу Твоему, от нощи неведения приведение имамы.

Страхом Христовым, отче, утверждаемь к Божественней жизни, плотское мудрование все покорил еси духу, твоя, Иоанне, чувства очищая.

Очистив всякия скверны тело, и ум, и душу тщаливо, Богомудре, зарю приял еси трисолнечную, Иоанне, светлыми тя богатящую даровании.

Богородичен: Моли Твоего Сына и Господа, Дево Чистая, плененным избавление от противнаго обстояния, на Тя надеющимся, мирное даровати.

Песнь 6

Ирмос: Во глубине греховней содержимь есмь, Спасе, и в пучине житейстей обуреваемь, но, якоже Иону от зверя, и мене от страстей возведи и спаси мя.

Просветився Духа благодатию, Божественных и человеческих знанием вещей ясно обогатився, требующим, Иоанне, независтно преподал еси.

Подобне ликом Небесным, мудре, Церковь православно украсил еси, ликостоянныя песни приглашая Троице Боговещанныя.

Богородичен: Неискусомужно, Дево, родила еси и вечнуеши Дева, являющи истиннаго Божества, Сына и Бога Твоего, образы.

Песнь 7

Ирмос: Богопротивное веление беззаконнующаго мучителя высок пламень вознесло есть. Христос же простре Богочестивым отроком росу духовную, Сый благословен и препрославлен.

Ревностию разжигаемь, богоборных ересей всякое злоумие возразил еси светлыми писании, убелив всем ясно древле сеянная, мудрыми, о Иоанне, написанныя тонко.

Тепле обличил еси злоименных учеников Манента хульное нечестие, развратити покусившееся Церковь Христову, словесы и догматы твоими, о Иоанне, яже счинил еси.

Богородичен: Святых святейшую поразумеваем Тя, яко Едину рождшую Бога непременнаго, Дево нескверная, Мати безневестная: всем бо источила еси верным нетление Божественным Рождеством Твоим.

Песнь 8

Ирмос: Пещь иногда огненная в Вавилоне действа разделяше Божиим велением, халдеи опаляющая, верныя же орошающая, поющия: благословите, вся дела Господня, Господа.

Обличил еси яве, треблаженне Иоанне, Несториево разделение, Севирово слияние, единовольное пребезумие, веру же единодейственну сияние Православия всем облистав концем.

Всея враг плевелы обычно еретическия в Церкви Христове, сего поклонения отметатися во иконах честных, но обрете не дремлюща тя, всеблаженне Иоанне, всякое семя злое искореняюща.

Богородичен: Ты от Отца неразлучнаго, во чреве богомужно пожившаго, безсеменно зачала еси и несказанно родила еси, Богородительнице Пречистая: темже Тя, спасение всех нас, исповедаем.

Песнь 9

Ирмос: Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная. Тем Всепетую Богородицу величаем.

Научил еси вся церковныя пети сыны православно Единицу в Троице Честную, воплощение же Слова Божественное богословити яве, Иоанне, уясняя неудобопостижная многим во Священных Писаниих.

Святых чины песнословив, преподобне, Чистую Богородицу, Христова Предтечу, таже апостолы, пророки с постники и мудрыя учители, праведники и мученики, в тех ныне водворяешися скиниих.

Богородичен: Чертог была еси иже паче ума воплощения Слова, Дево Богородительнице, одеяна славою добродетелей и испещрена. Тем Тя, Всенепорочная, Богородицу возвещаем.

Пе́снь 1.

Ирмо́с: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.

Смути́вшуюся мою́ ду́шу помышле́нии же и словесы́ очи́сти все́льшеюся в тя́, пропове́дниче Христо́в Андре́е, Боже́ственною благода́тию, я́ко да чи́сте источу́ ти́ пе́ние досто́йное.

Честно́е, Предте́ча Христо́в, свои́х ученико́в верхо́внейшее, от непло́дове прозя́бший, из Де́вы ро́ждшемуся Христу́ препросла́вленному, Андре́я, ра́дуяся, приведе́.

Жела́нием и любо́вию неукло́нною доброде́тели степе́ней наче́н и восхожде́нию при́сно поуча́яся, от немощны́я си́лы к верхо́внейшей, Андре́е, си́ле дости́гл еси́.

Богоро́дичен: Ра́дуйся, благода́ти исто́чниче; ра́дуйся, ле́ствице и две́ре небе́сная; ра́дуйся, све́щниче, и ста́мно злата́я, и горо́ несеко́мая, Я́же Жизнода́вца Христа́ ми́ру Ро́ждшая.

Пе́снь 3.

Ирмо́с: Еди́не Ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме неизрече́нныя сла́вы Твоея́, Человеколю́бче.

Прите́кл еси́, жа́ждею не зва́н, Андре́е, но самово́льне жи́зни ко исто́чнику, я́коже еле́нь, и все́м, сего́ обре́т, пропове́дал еси́, и, пи́в, напои́л еси́ нетле́ния вода́ми иста́явшия жа́ждею концы́.

Уве́дев есте́ственныя зако́ны, Андре́е досточу́дне, и о́бщника сро́дника прия́л еси́, вопия́: обрето́хом жела́емаго и путесотвори́вшаго пло́ти рожде́ние, сказа́л еси́ ра́зум духо́вный.

Мре́жею сло́ва из глубины́ пре́лести улови́л еси́ слове́сныя ры́бы, апо́столе, и трапе́зе Христо́вей сне́дь чи́стую прине́сл еси́, просвеще́нныя благода́ти Я́вльшагося в подо́бии пло́ти.

Богоро́дичен: Бо́га заче́нши во утро́бе, Де́во, Ду́хом Всесвяты́м, пребыла́ еси́ неопа́льна, поне́же Тя́ купина́, законополо́жнику Моисе́ю пали́му, несожже́нна я́ве предвозвести́, о́гнь прии́мшую нестерпи́мый.

Седа́лен, гла́с 8.

Я́ко первозва́ннаго все́х ученико́в, и самови́дца Сло́ва, и служи́теля, Андре́е апо́столе, по до́лгу чти́м тя́, А́гнцу бо, взе́млющему грехи́ ми́ра, несомне́нною ве́рою те́пле после́довал еси́, отону́дуже и стра́сти Его́ о́бщник показа́лся еси́, пло́тию претерпе́вшаго на́с ра́ди во́льно сме́рть. Сего́ ра́ди вопие́м ти́: моли́ся Христу́ Бо́гу грехо́в оставле́ние пода́ти пра́зднующим любо́вию святу́ю па́мять твою́.

Сла́ва: И́дольская свире́пства низложи́в, Спа́совы стра́сти вожделе́в, Андре́е блаже́нне, показа́лся еси́ апо́стол, с небесе́ все́м точа́ чудеса́, и язы́ков бы́л еси́, всеблаже́нне, учи́тель. Те́м твою́ па́мять досто́йно чту́ще, в пе́снех сла́вим и ве́рно велича́ем, Госпо́день апо́столе, моли́ся Христу́ Бо́гу грехо́в оставле́ние дарова́ти пра́зднующим любо́вию святу́ю па́мять твою́.

И ны́не: Ра́дуйся, престо́ле огнезра́чный Бо́жий; ра́дуйся, Отрокови́це, седа́лище ца́рское, о́дре упещренопостла́нный, златопорфи́рный черто́же, хлами́до червленоша́рная, украше́нный хра́ме, молниено́сная колесни́це, свети́льниче многосве́тлый; ра́дуйся, Богоро́дице, двонадесятосте́нный гра́де, и две́рь златокова́нная, и черто́же светообра́зный, светлопозлаще́нная трапе́зо, богоукраше́нная ски́ние; ра́дуйся, сла́вная Неве́сто солнцека́плющая; ра́дуйся, еди́на души́ моея́ благоле́пие.

Пе́снь 4.

Ирмо́с: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше свято́му, во спасе́ние на́ше и обновле́ние.

Боже́ственная, истреби́тельная го́ршаго вседе́тельнаго и светоза́рнаго Ду́ха си́ла, в тя́, Андре́е, все́льшися боголе́пне, о́гненнаго язы́ка во о́бразе, неизрече́нных показа́ тя́ пропове́дника.

Не ору́жия ко мще́нию взя́ше плотска́я и к низверже́нию кре́пких тверды́нь вра́жиих, Андре́й всечестны́й, но, Христо́м огради́вся, принесе́, плени́в, язы́ки в послуша́ние.

Го́ру тя́, ка́плющую разу́мное весе́лие, преесте́ственный Бо́г, осуществи́выйся е́же о на́с, Андре́е, яви́, го́ры го́рькия де́монскаго возноше́ния потребля́ющую си́лою Ду́ха.

Любо́вию соверша́ющия твою́ па́мять в пе́снех, от оби́льна да́ра Учи́теля твоего́, Христа́, Андре́е пребога́те, духо́внаго весе́лия вода́ми исполня́я не преста́й, моли́твами твои́ми.

Богоро́дичен: Пое́м ве́лие и стра́шное Твое́ та́инство, преми́рных бо утаи́вся чинонача́лий, на Тя́ при́сно Сы́й сни́де, я́ко до́ждь на руно́, Всепе́тая, на спасе́ние на́ше и обновле́ние.

Пе́снь 5.

Ирмо́с: Просвети́вый сия́нием прише́ствия Твоего́, Христе́, и освети́вый кресто́м Твои́м ми́ра концы́, сердца́ просвети́ све́том Твоего́ богоразу́мия правосла́вно пою́щих Тя́.

Восприя́л еси́, Его́же вожделе́л еси́, Андре́е апо́столе, в нетле́нных с Ни́м обита́в селе́ниих, трудо́в твои́х снопы́ пожа́в досто́йно, те́мже тя́ пе́сньми сла́вим.

Возлюби́л еси́ Влады́ку и Того́ во сле́д бы́стро поте́кл еси́, стопа́ми Его́ к жи́зни наставля́емь и страсте́й Того́ нелжи́во, прече́стне Андре́е, да́же до сме́рти подража́я.

Напря́г тя́, я́ко стрелу́ си́льну, блаже́нне, испусти́ в ве́сь ми́р Госпо́дь, ураня́я де́моны и злоче́стием уя́звленныя челове́ки врачу́я.

Богоро́дичен: Веселя́тся небе́сныя си́лы, зря́ще Тя́, ра́дуются с ни́ми и челове́ческая собра́ния, Рождество́м бо Твои́м соедини́шася, Де́во Богоро́дице, Тя́ досто́йно сла́вяще.

Пе́снь 6.

Ирмо́с: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Мо́ре жите́йское препла́вая в ладии́ теле́сней, вся́ческая пра́вящаго, Христа́, обре́л еси́ ко́рмчия, всеблаже́нне, и к Нему́, ра́дуяся, приста́л еси́, Андре́е всече́стне.

Ду́хи сло́вом прогоня́ются, неду́зи бе́гают, душе́вных же страсте́й мно́жество дале́че от неду́жных отгоня́ются, да́нною тебе́ от Бо́га, Андре́е, благода́тию.

Я́ко волна́ ти́хая, кро́тким ду́хом дви́жимь, блаже́нне, изсуши́л еси́ моря́ лука́вая многобо́жия Боже́ственными струя́ми и ре́ки богозна́ния все́м источи́л еси́.

Богоро́дичен: Веселя́тся о Тебе́, Де́во Пречи́стая, ро́да на́шего пра́отцы, Еде́м восприе́мше Тобо́ю, его́же преступле́нием погуби́ша, Ты́ бо Чи́стая и пре́жде Рождества́ и по Рождестве́ еси́.

Конда́к, гла́с 2.

Му́жества тезоимени́таго богоглаго́льника и Це́ркве возсле́дователя верхо́внаго, Петро́ва сро́дника восхва́лим, зане́ я́коже дре́вле сему́ и ны́не на́м воззва́: прииди́те, обрето́хом Жела́емаго.

И́кос:

Дре́вле у́бо Дави́д востяга́ет гре́шнаго, я́ко мене́, пове́дати Бо́жия благосло́вне оправда́ния, оба́че к ве́ре учи́т па́ки и слеза́ми мно́жайшими изглаго́льствует: дне́сь бо гла́с Его́ а́ще услы́шите, серде́ц не ожесточи́те, я́ко не́когда Изра́иль преогорчи́. Наво́дит же про́чее во псалме́: Го́сподеви вся́ земля́ воспо́йте, прииди́те, обрето́хом Жела́емаго.

Пе́снь 7.

Ирмо́с: Тебе́, у́мную, Богоро́дице, пе́щь разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Нелжи́во я́вственно испо́лнися обеща́ние Твое́, Христе́, бу́ри бо учени́к Тво́й боже́ственнейший, сло́вом запреща́я, на кро́ткую тишину́ преложи́, хва́льный отце́в Бо́же и препросла́вленный.

На у́мную Сио́на, апо́столе, взы́ти го́ру повеле́н, спасе́ния же прии́м ча́шу, ра́дуяся, подае́ши, преходя́ сме́ртию к боже́ственней жи́зни, хва́льнаго отце́в Бо́га и препросла́вленнаго.

Тя́ слове́сную реку́ показа́ боже́ственная вода́ жи́зни, преле́стныя ре́ки пото́ки изсуша́ющую, блаже́нне, пропове́дания и вопию́щия напая́ющую: хва́льный отце́в Бо́же и препросла́вленный.

Ты́ земноро́ден сы́й, апо́столе, преесте́ственно чудоде́йствуеши, любо́вию бо сраствори́вся, Тому́ после́довал еси́, возлюби́вшему тя́ Христу́, хва́льный, воспева́я, Бо́г и препросла́вленный.

Богоро́дичен: Тя́ Иа́ков, Богоро́дице, ле́ствицу проро́чески разуме́, Тобо́ю бо на земли́ Превыша́емый яви́ся челове́ком и поживе́, я́коже благоволи́: хва́льный отце́в Бо́г и препросла́вленный.

Пе́снь 8.

Ирмо́с: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Светоно́сная и веселотво́рная луча́ врачева́ний, Андре́е, Христо́в апо́столе, осиява́ет на́с боже́ственная па́мять твоя́, вопию́щих: вся́ дела́ Госпо́дня, Го́спода по́йте и превозноси́те во вся́ ве́ки.

Челове́ческое естество́ получи́в, того́ превозше́л еси́ зако́ны, и ко а́нгельстей преше́л еси́ ски́нии, Андре́е апо́столе, и зове́ши: вся́ дела́ Госпо́дня, Го́спода по́йте и превозноси́те во вся́ ве́ки.

Е́же с высоты́ Ду́ха Бо́жия дохнове́ние тя́ пре́жде о́гненно просвети́, ри́тора, богоглаго́ливе, показу́ет те́пла, вопию́ща, апо́столе, Христу́ твоему́: вся́ дела́ Госпо́дня, Го́спода по́йте и превозноси́те во вся́ ве́ки.

Светолу́чен, я́коже мо́лния, во све́т язы́ков изше́л еси́, тму́ неве́дения отгоня́, и ве́рныя просвеща́я, зову́щия: благослови́те, вся́ дела́ Госпо́дня, Го́спода, по́йте и превозноси́те Его́ во ве́ки.

Богоро́дичен: Ра́дуйся, престо́ле сла́вы Бо́жия, ра́дуйся, ве́рных стено́, Е́юже Све́т су́щим во тме́ возсия́, — Христо́с, Тебе́ блажа́щим и вопию́щим: вся́ дела́ Госпо́дня, Го́спода по́йте и превозноси́те Его́ во ве́ки.

Пе́снь 9.

Ирмо́с: О́браз чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Я́ко учени́к всеизя́щнейший, на кресте́ хоте́нием распе́ншемуся Влады́це твоему́ да́же до сме́рти после́дуя, возше́л еси́, ра́дуяся, на высоту́ креста́, идя́й ше́ствием на небеса́, блаже́нне апо́столе.

Две́рь Еде́ма тебе́ отве́рзеся, и предложи́ся ле́ствица небе́сная, и прия́ша тя́ небе́сныя оби́тели, и предста́л еси́, ра́дуяся, апо́столе, Христу́ Жизнода́вцу о ми́ре моли́твенник изя́щнейший.

Ра́вными просла́вился еси́ страда́ньми Учи́теля твоего́, блаже́нне Андре́е всему́дре, кресто́м бо боже́ственный коне́ц прия́л еси́ и прича́стием бо́г бы́л еси́. Те́мже тя́ мо́лим, о на́с при́сно моли́ся.

Ра́дуяся, дво́ице всеизря́днейшая, на небесе́х насле́довавши ны́не гражда́нство, назира́ете же венце́в произволе́ние, те́х побежда́ющи си́лу, и Боже́ственных дарова́ний просвеща́ете светлостьми́.

Богоро́дичен: Из ко́рене Дави́дова прозябла́ еси́ проро́ческаго, Де́во, и богооте́ческаго, но и Дави́да я́ко и́стинно Ты́ просла́вила еси́, я́ко ро́ждшая проро́чествуемаго Го́спода сла́вы, Его́же пою́ще, досто́йне велича́ем.

Свети́лен.

Сло́во Пребезнача́льное обре́т тя́, всеблаже́нне, первозва́нна показа́ все́х апо́столов, Андре́е приснопа́мятне, и Сего́ стопа́м возсле́дуя, показа́лся еси́ путево́ждь заблу́ждших, к небе́сному сия́ возводя́ боже́ственному ше́ствию.

Сла́ва: Петро́ва скро́вника, ученико́в пе́рвейшаго, самови́дца и слугу́ бы́вшаго Сло́ва, Андре́я апо́стола пресла́вно восхва́лим, язы́ки бо просвети́, и ра́спят бы́в, кончи́ну подъе́млет, я́ко учени́к Влады́ки.

И ны́не: Бо́га, Его́же родила́ еси́, Де́во всенепоро́чная, моли́ о все́х, благоче́стно Тя́ чту́щих, с первозва́нным Андре́ем улучи́ти боже́ственнаго осия́ния Твоего́ Сы́на и стоя́ния избра́нных и святы́х, и́бо мо́жеши, я́ко хо́щеши.

Пе́снь 1.

Ирмо́с: Столпо́м о́гненным и о́блачным Изра́иля наставле́й я́ко Бо́г, мо́ре разве́рже, колесни́цы же фарао́новы глубино́ю покры́, пои́м пе́снь побе́дную, я́ко еди́н просла́вися.

Тро́стию Ева́нгелия из глубины́ ле́сти изъе́мь, Андре́е многопе́тый, ты́ улови́л еси́ лю́ди, я́ко обеща́ Христо́с, научи́вый тя́ челове́ки, я́ко ры́бы, лови́ти.

И́же ве́ры сто́лп, седа́лище и́стинных догма́т Христо́вых, Андре́й богодохнове́нный вся́ дне́сь призыва́ет земны́я концы́ пра́зднество ле́тное соста́вити, стеце́мся у́бо, вси́ ве́рнии.

Морска́го ки́та мре́жами испыту́я, худо́жеством лове́ц мре́жею Ду́ха язы́ки, племена́ и лю́ди уловля́еши Ду́хом я́вственнее и вы́шнюю глубину́, многочу́дне, я́ве открыва́еши на́м.

Тайногра́дче небе́сный, самови́дче и ри́торе неизрече́ннаго позна́ния Христо́ва, прие́мый свы́ше Ду́ха Свята́го, глаго́люща в язы́цех Седя́щаго, огне́м разделя́юща дарова́ния, моли́ спасти́ся на́м.

Тро́ичен: Пребезнача́льныя Тро́ицы Еди́нице Пресу́щественней ве́рою покланя́юся, не разсеца́я Божества́, е́сть бо Единови́дна, Проста́, Неразде́льна, совокупля́ю же сию́ Существо́м, Ли́цы же ве́рне разделя́ю.

Богоро́дичен: Младе́нствует Бо́г из Де́вы и обновля́ет растле́вшияся из Ада́ма, разруша́ет же средосте́ние и вражды́ прегражде́ние пло́тию Свое́ю, кля́тву благословля́ет прама́тернюю, из Пречи́стыя Ма́тере проше́д.

Пе́снь 3.

Ирмо́с: Да утверди́тся се́рдце мое́ в во́ли Твое́й, Христе́ Бо́же, и́же над вода́ми не́бо утвержде́й второ́е и основа́вый на вода́х зе́млю, Всеси́льне.

Сло́вом призыва́ющему, — гряди́ во сле́д Мене́, — Христу́ а́бие после́дова со Андре́ем и Ки́фа, роди́теля оста́вивше, и ладию́, и мре́жи, я́ко ве́ры предусмотри́телие.

Ка́пища претвори́в в хра́мы Бо́жия, всече́стне, освяти́л еси́ в ни́х сы́ны креще́ния, я́же благода́ть обнови́ водо́ю и Ду́хом.

Би́сер многоце́нный та́инственне ми́ру предложи́л еси́, в селе́ се́рдца твоего́ сокрове́нный, апо́столе, его́же ве́рою сокро́вищствоваша язы́цы обре́тшии.

Я́ко сокро́вище, Ева́нгелие в ру́ки прии́м, многопе́те, всю́ обогати́л еси́ зе́млю Боже́ственныя про́поведи, те́мже и па́мять твою́ почита́ет со страда́нии твои́ми.

Тро́ичен: В Тро́ице еди́ну си́лу правосла́вне вси́ воспои́м, — Безнача́льнаго, Несозда́ннаго Бо́га, Единосу́щнаго, Сопресто́льнаго, Триипоста́снаго, Трисо́лнечнаго, — Сию́ воспева́юще.

Богоро́дичен: Вся́ка у́бо ма́ти, ча́до ро́ждши, не ктому́ де́вствовати мо́жет, Ты́ же, ро́ждши Христа́, Де́во Ма́ти, пребыла́ еси́, млекопита́ющи Жи́знь на́шу и чиста́ пребы́вши.

Седа́лен, гла́с 8.

Я́ко первозва́ннаго все́х ученико́в, и самови́дца Сло́ва, и служи́теля, Андре́е апо́столе, по до́лгу чти́м тя́, А́гнцу бо, взе́млющему грехи́ ми́ра, несомне́нною ве́рою те́пле после́довал еси́, отону́дуже и стра́сти Его́ о́бщник показа́лся еси́, пло́тию претерпе́вшаго на́с ра́ди во́льно сме́рть. Сего́ ра́ди вопие́м ти́: моли́ся Христу́ Бо́гу грехо́в оставле́ние пода́ти пра́зднующим любо́вию святу́ю па́мять твою́.

Сла́ва: И́дольская свире́пства низложи́в, Спа́совы стра́сти вожделе́в, Андре́е блаже́нне, показа́лся еси́ апо́стол, с небесе́ все́м точа́ чудеса́, и язы́ков бы́л еси́, всеблаже́нне, учи́тель. Те́м твою́ па́мять досто́йно чту́ще, в пе́снех сла́вим и ве́рно велича́ем, Госпо́день апо́столе, моли́ся Христу́ Бо́гу грехо́в оставле́ние дарова́ти пра́зднующим любо́вию святу́ю па́мять твою́.

И ны́не: Ра́дуйся, престо́ле огнезра́чный Бо́жий; ра́дуйся, Отрокови́це, седа́лище ца́рское, о́дре упещренопостла́нный, златопорфи́рный черто́же, хлами́до червленоша́рная, украше́нный хра́ме, молниено́сная колесни́це, свети́льниче многосве́тлый; ра́дуйся, Богоро́дице, двонадесятосте́нный гра́де, и две́рь златокова́нная, и черто́же светообра́зный, светлопозлаще́нная трапе́зо, богоукраше́нная ски́ние; ра́дуйся, сла́вная Неве́сто солнцека́плющая; ра́дуйся, еди́на души́ моея́ благоле́пие.

Пе́снь 4.

Ирмо́с: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ прибли́житися ле́том, позна́ешися, внегда́ приити́ вре́мени, пока́жешися. Сла́ва си́ле Твое́й, Го́споди.

Мре́жи твоя́ пове́рг и взе́м кре́ст, путе́м после́довал еси́ зову́щему Христу́, и мре́жу Ду́ха распросте́р, вме́сто ры́б челове́ки ло́виши. Сла́ва да́вшему ти́ Ду́ху.

Ду́ха пла́мень язы́ком прии́м, бы́л еси́, апо́столе, богоприя́тен му́ж, небе́сныя красоты́ обходя́, и я́же в те́х у́мная познава́я добро́ты, и на́м открыва́яй сия́.

Пусты́ню жа́ждущую напои́л еси́, му́дре, боже́ственными словесы́ твои́ми и показа́л сию́ многопло́дну, ча́да церко́вная плодонося́щую про́поведи се́мя. Сла́ва да́вшему ти́ Ду́ху.

Неизрече́нную твою́ добро́ту Андре́й предуви́дев, Иису́се, сро́дника призва́ све́тле: Пе́тре единокро́вне, обрето́хом Месси́ю, в зако́не и проро́цех пропове́даннаго, гряди́, прилепи́мся и́стинно жи́зни.

Тро́ичен: Тро́ицу во еди́нице воспои́м, ве́рнии, во еди́ном Божестве́ Отца́, и Сы́на, и Ду́ха Боже́ственнаго, существо́ еди́но и естество́ неразде́льне, неразлу́чне, неча́стне: еди́н бо в тре́х ли́цех Бо́г.

Богоро́дичен: Еди́наго от Тро́ицы неизрече́нно во чре́ве заче́нши, родила́ еси́ нетле́нно я́ко Сы́на, и Тро́ица у́бо прило́га отню́д не возыме́, и чиста́, я́коже бе́ и пре́жде рождества́, цела́, Богома́ти, пребы́вши.

Пе́снь 5.

Ирмо́с: Озари́ на́ш у́м, Бо́же, све́том за́поведей Твои́х, и све́тлостию благода́ти Твоея́, да́руя на́м, Бла́же, Твоя́ ми́лости, зане́ све́т и ми́р повеле́ния Твоя́.

Вожделе́вый креста́, Христо́в учениче́, получи́л еси́ кресто́м твои́м нетле́нное Ца́рство, к нему́же вся́ привле́кл еси́ кресто́м боготаи́нники, насле́дство подая́й богосло́вом того́.

Поиска́л еси́ Христа́, и́стинно Живота́, и взыска́в, пе́рвый обре́л еси́, обре́т же, та́йне прия́л еси́, и прие́м Сего́ в само́м да́вшем, и бы́л еси́ сокро́вище жи́зни нетле́нныя.

Глаго́лы твои́х боже́ственных греме́ний излия́шася в ми́ре и от крае́в до крае́в земли́ проидо́ша, окружи́ша бо, я́коже колесо́, и яви́шася твоя́ мо́лния, я́ко глаго́лет Дави́д, вселе́нней.

Помина́й на́с, Христо́в учениче́, соверша́ющих твою́ па́мять и чту́щих мо́щи твоя́, моли́ся при́сно приле́жно о па́стве, ея́же бы́л еси́ изнача́ла храни́тель и спасе́ние.

Тро́ичен: Отца́ и Сы́на и Ду́ха — Бо́га, неразде́льную Тро́ицу, триипоста́сное Ца́рство просла́вим согла́сно, ве́рнии, безпреста́нными богосло́вии, Сию́ ве́рно песносло́вяще.

Богоро́дичен: Родила́ еси́ Све́т, не ве́дущи ка́ко, всесве́тлый све́щниче Со́лнца светонося́щая, и была́ еси́ невеще́ственнаго Све́та но́вое прия́телище, точа́щее все́й земли́ богозна́ния зари́.

Пе́снь 6.

Ирмо́с: Проро́ка Ио́ну подража́я, вопию́: живо́т мо́й, Бла́же, свободи́, из тли́ и спаси́ мя́, Спа́се ми́ра, зову́ща: сла́ва Тебе́.

И́же из Вифсаи́ды изводи́мый, на́с пра́здновати созыва́ет, торжество́ свое́ предложи́в на́м изря́дства боре́ний свои́х.

Худо́жеством ры́барь, ве́рою же учени́к, я́ко глубину́ испыту́я сердца́ ве́рных, у́дицу низпуща́ет сло́ва и уловля́ет на́с.

Любве́ Христо́вы в се́рдцы твое́м о́гнь обнося́, учениче́, вопия́л еси́ язы́ком: пла́мень ва́ш угасе́, и́стинно я́вльшуся Христу́.

Со́лию у́м осоли́вше Христо́вою, я́ди ва́ша услади́ша ва́м догма́ты небе́сныя и нетле́нныя сла́дости.

Тро́ичен: Отцу́ и Сы́ну и Ду́ху Пра́вому поклони́мся, ве́рнии, — триипоста́сному естеству́ неразде́льному, — вопию́ще: сла́ва в Тро́ице Бо́гу.

Богоро́дичен: Благоволе́нием Отца́ воплоти́ся Сы́н, Ду́хом Бо́жиим во утро́бе Твое́й, Чи́стая, и спасе́ пре́жний о́браз, Богороди́тельнице, я́ве.

Конда́к, гла́с 2.

Му́жества тезоимени́таго богоглаго́льника и Це́ркве возсле́дователя верхо́внаго, Петро́ва сро́дника восхва́лим, зане́ я́коже дре́вле сему́ и ны́не на́м воззва́: прииди́те, обрето́хом Жела́емаго.

И́кос:

Дре́вле у́бо Дави́д востяга́ет гре́шнаго, я́ко мене́, пове́дати Бо́жия благосло́вне оправда́ния, оба́че к ве́ре учи́т па́ки и слеза́ми мно́жайшими изглаго́льствует: дне́сь бо гла́с Его́ а́ще услы́шите, серде́ц не ожесточи́те, я́ко не́когда Изра́иль преогорчи́. Наво́дит же про́чее во псалме́: Го́сподеви вся́ земля́ воспо́йте, прииди́те, обрето́хом Жела́емаго.

Пе́снь 7.

Ирмо́с: Су́щим в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́, я́ко еди́неми усты́, поя́ху и благословля́ху, глаго́люще: благослове́н Бо́г оте́ц на́ших.

Всесвята́го Ду́ха о́гнь, соше́дый свы́ше, апо́столе Христо́в, язы́ки но́вы, и́миже никогда́ же веща́л еси́ ми́ра конце́м, повеле́ тебе́ глаго́лати вели́чия Его́.

Преудивля́ет вся́ку мы́сль про́поведь, ю́же воструби́сте земли́, таи́нницы Христо́вы и зри́теле вы́шних, я́ко еди́ни двана́десяте, тмы́ земли́ просвети́сте.

Удивле́на бы́сть, Влады́ко Христе́, благода́ть Твоя́ в богому́дрых ученице́х, я́ко ма́лии и простцы́ су́ще, всю́ зе́млю протеко́ша от коне́ц ея́ да́же до коне́ц все́х.

Кто́ научи́ тя́ та́ко глаго́лати, апо́столе? Кто́ просвети́ тво́й у́м, зре́ти я́сно непристу́пныя сла́вы зарю́, возсия́вшую и́стины све́т в сердца́х на́ших?

Тро́ичен: Тро́ически воспои́м, ве́рнии, сла́вяще Безнача́льнаго Отца́ и Сы́на и Ду́ха Пра́ваго, — еди́нственное существо́ еди́но, — Ю́же трегу́бо да воспои́м: Свя́т, Свя́т, Свя́т еси́ во ве́ки, ами́нь.

Богоро́дичен: Я́ко от Тро́ицы еди́наго Тя́, Христе́, сла́вим, я́ко из Де́вы воплоти́выйся кроме́ враще́ния, челове́чески вся́ поне́сл еси́, не отступи́в естества́ Оте́ческаго, Иису́се, а́ще и соедини́лся еси́ на́м.

Пе́снь 8.

Ирмо́с: На Сина́и купину́ горя́щу неопа́льну сохра́ншаго и о́троки посреде́ горя́щаго пла́мене изба́вльшаго, Бо́га по́йте, благослови́те и превозноси́те Его́ во ве́ки.

Худо́жеством ры́барства из мо́ря улови́л еси́ ры́бы, всему́дре, ны́не же ве́рою челове́ки ло́виши Христу́ от ле́сти вра́жия, глубина́ бо бе́ ле́сть иногда́, погружа́ющая язы́ки бу́рею неве́дения.

У́мную жития́ нево́лненно преплы́л еси́ глубину́, апо́столе, прелете́в ве́трилом Ду́ха, ве́рою Христо́вою. Те́мже и в приста́нище жи́зни дости́гл еси́, ра́дуяся, во вся́ ве́ки.

У́мному Со́лнцу, на дре́ве заше́дшу самовла́стною во́лею, и́же Со́лнца свети́льник сразреши́тися ища́й, и заити́ во Христа́, на дре́ве пове́шен бы́сть кре́стнем Андре́й вели́кий, свети́ло церко́вное.

О, учениче́ и люби́миче Христо́в и сочи́сленне апо́столов Его́! Егда́ на престо́ле ся́дет Судия́ с ва́ми двана́десятьми суди́ти, я́ко обеща́ние глаго́лет, бу́дите тогда́ на́м человеколю́бия стена́.

Тро́ичен: Трисве́тлую Еди́ницу и Тро́ицу Сопресто́льную возславосло́вим неразделя́юще, соединя́юще же Ю́ соесте́ственно, я́ко еди́но и́стинно существо́, соедине́нно в ли́цех тре́х неслива́емо.

Богоро́дичен: Су́ща от Тро́ицы Еди́наго заче́нши, родила́ еси́, воплоще́ннаго из Тебе́ и обновля́ющаго зако́ны естества́ Рождество́м Твои́м, Чи́стая, Того́ о на́с я́ко Бо́га при́сно моля́щи не преста́й, Богоро́дице.

Пе́снь 9.

Ирмо́с: Светоно́сный о́блак, в о́ньже все́х Влады́ка, я́ко до́ждь с небесе́ на руно́, сни́де и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

И́же мре́жу распростры́й та́инственнаго боговиде́ния и я́ко ры́бы в не́й улови́вый добро́тами небе́сных разуме́ний, моли́, свя́те, Святу́ю Тро́ицу источи́ти и на́м очище́ние.

Благодари́м язы́цы, тобо́ю просве́щшиися и от земли́ на небеса́ тобо́ю возведе́ннии, служе́ния бо вра́жия отсту́пльше, бы́хом соприча́стницы святы́х а́нгел, Госпо́дния же сла́вы о́бщницы.

Неизрече́нных самови́дцы и служи́телие Сло́ва, таинственново́дцы и зри́телие неизсле́дных, снасле́дником и на́м бы́ти моли́теся, апо́столи, Христо́ва ца́рствия и прича́стником Божества́ Его́.

Вяза́ти и реши́ти прие́мше от Христа́ вла́сть, разреши́те вся́ от у́з мно́гих прегреше́ний, егда́ прии́дет Христо́с и вси́ ся́дете двана́десять на престо́лех толи́цех суди́ти вся́ племена́ Изра́илева.

Тро́ичен: Триипоста́сное естество́ и неразде́льную сла́ву, в Божестве́ еди́ном пева́емую, непреста́нно на небеси́ и на земли́ Тро́ицу неразлу́чную просла́вим, с Сы́ном Отцу́ и Ду́ху покланя́ющеся благоче́стно.

Богоро́дичен: Под Твое́ благоутро́бие прибега́ющия ве́рою и покланя́ющияся благоче́стно Сы́ну Твоему́, Де́во Богороди́тельнице, Того́ я́ко Бо́га ми́ра и Го́спода моли́, от тле́ния и бе́д изба́вити и вся́ких напа́стей.

Свети́лен.

Сло́во Пребезнача́льное обре́т тя́, всеблаже́нне, первозва́нна показа́ все́х апо́столов, Андре́е приснопа́мятне, и Сего́ стопа́м возсле́дуя, показа́лся еси́ путево́ждь заблу́ждших, к небе́сному сия́ возводя́ боже́ственному ше́ствию.

Сла́ва: Петро́ва скро́вника, ученико́в пе́рвейшаго, самови́дца и слугу́ бы́вшаго Сло́ва, Андре́я апо́стола пресла́вно восхва́лим, язы́ки бо просвети́, и ра́спят бы́в, кончи́ну подъе́млет, я́ко учени́к Влады́ки.

И ны́не: Бо́га, Его́же родила́ еси́, Де́во всенепоро́чная, моли́ о все́х, благоче́стно Тя́ чту́щих, с первозва́нным Андре́ем улучи́ти боже́ственнаго осия́ния Твоего́ Сы́на и стоя́ния избра́нных и святы́х, и́бо мо́жеши, я́ко хо́щеши.

Конда́к 1.

Первозва́ннаго апо́стола Христо́ва, Ева́нгелия Свята́го пропове́дника, Росси́йския страны́ богодухнове́ннаго просвети́теля, Андре́я пресла́внаго, пе́сньми восхва́лим, стоя́ще на версе́ холма́, иде́же Кре́ст водрузи́ десни́ца его́, и ему́ я́ко Це́ркве возсле́дователю верхо́вному, в сле́д себе́ указа́вшему е́й пу́ть ко Христу́, во умиле́нии воззове́м:

Ра́дуйся, Андре́е, апо́столе Христо́в Первозва́нный.

И́кос 1.

А́нгел благове́стник А́гнца Христа́, взе́млющаго грехи́ ми́ра, бы́л еси́ Андре́е апо́столе, и с Ни́м во ве́ки пребыва́еши на небеси́; отону́дуже и при́зри на пе́ния, приноси́мая тебе́ во хра́ме твое́м, на ме́сте, иде́же стоя́сте но́зе твои́, и я́ко бога́т сы́й благода́тию Бо́жиею, пода́ждь на́м сло́во бла́го, да зове́м ти́:

Ра́дуйся, денни́це от гра́да Вифсаи́ды на́м возсия́вшая; ра́дуйся, равноче́стный бра́те верхо́внаго Петра́.

Ра́дуйся, учениче́ вели́каго Предте́чи Христо́ва; ра́дуйся, пе́рвее про́чих апо́стол зва́нный ко апо́стольскому служе́нию от Самого́ Го́спода.

Ра́дуйся, я́ко и други́м с ра́достию воззва́л еси́: прииди́те, обрето́хом жела́емаго Месси́ю; ра́дуйся, и на́с к Нему́ же приводя́й.

Ра́дуйся, Андре́е, апо́столе Христо́в Первозва́нный.

Конда́к 2.

Учи́телю, где́ живе́ши? — вопроси́л еси́, Андре́е, Спа́са ду́ш на́ших и, с Ни́м пребы́в де́нь еди́н, возлюби́л еси́ на вся́ дни́ живота́ твоего́ обре́теннаго тобо́ю Месси́ю, и бра́та твоего́ старе́йшаго приве́л еси́ к Нему́. Те́мже и на́с, я́ко ме́ньшую бра́тию твою́, к Нему́ же не преста́й влещи́, да и мы́, после́дующе стопа́м твои́м, вопие́м Бо́гу: Аллилу́иа.

И́кос 2.

Прови́дя в тебе́, святы́й Андре́е, ве́ры и любве́ пла́мень, Госпо́дь па́ки тя́ обре́те на е́зере Геннисаре́тсте, я́ко ры́баря, ку́пно с бра́том твои́м, вмета́юща мре́жи во глубину́, и рече́ ва́ма: гряди́та по Мне́, и А́з сотворю́ вы́ ловца́ челове́ком. — Ты́ же а́бие после́довал еси́ Ему́ и богодухнове́нным сло́вом, я́ко мре́жею, челове́ки улови́л еси́ Христу́, с ни́миже и мы́, уловле́ннии тобо́ю во спасе́ние, веща́ем ти́:

Ра́дуйся, я́ко от Самого́ Го́спода лови́тве духо́вней научи́лся еси́; ра́дуйся, я́ко на то́м же е́зере с про́чими апо́столы обурева́емь бы́в, ве́рою спа́слся еси́ в Го́спода, запреща́ющаго ве́тром и мо́рю.

Ра́дуйся, стяжа́вый ве́лию ве́ру, егда́ ви́дел еси́ пречу́дное насыще́ние пяти́ ты́сящ пятию́ хле́бами; ра́дуйся, да́р прия́вый от Го́спода цели́ти вся́к неду́г и вся́ку боле́знь.

Ра́дуйся, я́ко гла́с с небесе́ слы́шан бы́сть е́ллином, Христа́ тобо́ю узре́вшим; ра́дуйся, я́ко на горе́ Елео́нстей открове́на бы́ша и тебе́ гряду́щая при кончи́не ми́ра.

Ра́дуйся, Андре́е, апо́столе Христо́в Первозва́нный.

Конда́к 3.

Стра́нствия Влады́чня и Безсме́ртныя Трапе́зы на го́рнем ме́сте Сио́на наслади́вся, я́ко ве́рный дру́г Христо́в, вку́пе с про́чими апо́столы узре́л еси́ Го́спода и Бо́га твоего́, от Него́же и Ду́х Свя́т прия́л еси́, во е́же вяза́ти и реши́ти грехи́ людски́я. И па́ки, в то́йжде го́рнице Сио́нстей, оби́льное бы́сть на тя́ излия́ние обетова́ннаго Ду́ха во о́гненных язы́цех. Те́мже вся́ племена́ удиви́шася, ка́ко язы́ком и́х глаго́лал еси́ вели́чия Бо́жия, поя́: Аллилу́иа.

И́кос 3.

От Го́спода за́поведь прии́м пропове́дати Ева́нгелие все́й тва́ри, обте́кл еси́ мно́гия гра́ды и страны́, апо́столе Андре́е, призыва́я лю́ди к позна́нию И́стиннаго Бо́га и крестя́ и́х во и́мя Отца́ и Сы́на и Свята́го Ду́ха; с ни́миже и мы́ сподо́бихомся благода́ти креще́ния. Сего́ ра́ди благода́рственная воспису́ем ти́:

Ра́дуйся, чуде́с Христо́вых провозве́стниче ве́рный; ра́дуйся, свята́го Ева́нгелия пропове́дниче громогла́сный.

Ра́дуйся, и́дольскаго служе́ния потреби́телю; ра́дуйся, и́стиннаго благоче́стия насади́телю.

Ра́дуйся, я́ко по сло́ву твоему́ лю́дие водо́ю и Ду́хом возрожда́ются; ра́дуйся, я́ко тобо́ю ве́рнии Безсме́ртныя Трапе́зы причаща́ются.

Ра́дуйся, Андре́е, апо́столе Христо́в Первозва́нный.

Конда́к 4.

Си́ла Бо́жия осени́ тя́, апо́столе Первозва́нный, во е́же благовести́ти си́лу и сла́ву Сы́на Бо́жия и утвержда́ти вся́ ве́ровати во Святу́ю Тро́ицу призва́нныя. Те́мже у́бо и на́с, покланя́ющихся Еди́ному в Трие́х Ипоста́сех Бо́гу, на зла́чней па́жити ве́ры Христо́вы соблюди́, да благода́тию Свята́го Ду́ха вы́ну освяща́емии, велегла́сно пое́м Ему́: Аллилу́иа.

И́кос 4.

Приве́д ко Христу́ бра́та твоего́ Си́мона Петра́, Первозва́нне, с ни́м изше́л еси́ и на апо́стольское служе́ние твое́, пе́рвее во Антиохи́ю и Сино́п, и та́мо победи́в де́монов полки́, от у́з темни́чных спу́тника твоего́ апо́стола Матфи́я свободи́л еси́, и ю́зники с ни́м бы́вшия крести́л, верхо́вному Петру́ отту́ду в за́падныя страны́ теку́щу, ты́ бра́тнее целова́ние да́л еси́ ему́, са́м же до́бре подвиза́лся еси́ на восто́цех. Те́мже и мы́, лю́дие Це́ркве Восто́чныя, блажи́м тя́:

Ра́дуйся, си́ло Бо́жия, полки́ де́монов прогоня́ющая и у́зы темни́ц сокруша́ющая; ра́дуйся, прия́телище благода́ти апо́стольския, от а́довых у́з тайноде́йственне на́с свобожда́ющия.

Ра́дуйся, за́пад и восто́к с бра́том твои́м богому́дрым, про́поведи ра́ди сло́ва Бо́жия, жре́бием раздели́вый; ра́дуйся, во гра́де Сино́пе неве́рие иуде́ев си́лою чуде́с твои́х обличи́вый.

Ра́дуйся, я́ко та́мо от безбо́жных Христа́ ра́ди бие́н бы́л еси́; ра́дуйся, я́ко от Самого́ я́вльшагося ти́ Го́спода исцеле́ние я́зв тебе́ дарова́ся.

Ра́дуйся, Андре́е, апо́столе Христо́в Первозва́нный.

Конда́к 5.

Двукра́ты возвра́щся во Святы́й Гра́д, да ку́пно со апо́столы пятидеся́тный де́нь пра́зднуеши та́мо, двукра́ты па́ки ше́ствовал еси́ от свята́го Сио́на, во е́же Христа́ пропове́дати вселе́нней, пе́рвее со Иоа́нном напе́рсником Госпо́дним, посе́м же с Си́моном Канани́том и Матфи́ем, и́же жре́бием назна́менован бы́сть во апо́стола, и вся́ преде́лы Аси́и и По́нта обте́кл еси́, сло́вом спасе́ния все́х оглаша́я, да Бо́гу пою́т: Аллилу́иа.

И́кос 5.

От мо́ря Галиле́йскаго до По́нта Евкси́нскаго а́постольския мре́жи твоя́ распростры́й и все́ помо́рие о́крест огласи́вый благове́стием твои́м, восте́кл еси́, Первозва́нне, и в страны́ Ски́фии, Кре́ст Христо́в всю́ду водружа́я в зна́мение на́шего спасе́ния. Сего́ ра́ди и мы́, а́ще и по́зднии ро́ди, вне́млюще благове́стию твоему́ и воспомина́юще по́двиги твоя́, зове́м ти́:

Ра́дуйся, в Нике́и лю́тыя разбо́йники укроти́вый и люте́йшаго драко́на умертви́вый; ра́дуйся, Кре́ст Христо́в посреде́ гра́да сего́ водрузи́вый, я́ко Предте́ча сы́й двукра́ты собра́нных та́мо оте́ц богоно́сных.

Ра́дуйся, я́ко во Аси́и и По́нте тобо́ю све́т Христо́в возсия́; ра́дуйся, я́ко апо́стольский же́зл тво́й предго́рие Кавка́са све́ту Христо́ву отве́рзе.

Ра́дуйся, и́мже мра́к Киммери́йский озари́ся; ра́дуйся, и́мже вселе́нная струя́ми воды́ жи́вы напои́ся.

Ра́дуйся, Андре́е, апо́столе Христо́в Первозва́нный.

Конда́к 6.

Бу́рею страсте́й одержи́мая и, я́ко во́ды океа́на, волну́емая, племена́ челове́ков, я́же не ве́дяху Бо́га И́стиннаго, приве́л еси́, апо́столе, к ти́хому приста́нищу Христо́ву и те́х сердца́, а́ки у́тлую ладию́ неве́рием обурева́емая, на я́кори ве́ры Правосла́вныя утверди́л еси́. Те́мже и мы́, я́ко ча́да Правосла́вныя ве́ры, благода́рным се́рдцем и благода́рными усты́ вопие́м Бо́гу: Аллилу́иа.

И́кос 6.

На горе́ Елео́нстей Боже́ственнаго Учи́теля твоего́ иногда́ со про́чими апо́столы вопроси́л еси́, Андре́е: Рцы́ на́м, что́ е́сть зна́мение прише́ствия Твоего́? — На гора́х же Ки́евских, я́ко орга́н сы́й благода́ти Ду́ха Свята́го, ты́ предвозвести́л еси́ гряду́щую сла́ву ме́ста сего́; мы́ же, предрече́нныя на́м ми́лости сея́ сподо́бльшеся, умиле́нно взыва́ем ти́:

Ра́дуйся, я́ко с горы́ Сио́на зако́н на́м ева́нгельский прине́сл еси́; ра́дуйся, я́ко по вода́м Ворисфе́на апо́стол Бо́жий к на́м восте́кл еси́.

Ра́дуйся, благода́ть Иорда́нову, креще́ния на́шего ра́ди, реце́ се́й дарова́вый; ра́дуйся, на гора́х Ки́евских Кре́ст на́шего спасе́ния водрузи́вый.

Ра́дуйся, и́мже оби́льное излия́ние благода́ти Бо́жией зде́ предрече́ся; ра́дуйся, и́мже бытие́ гра́да вели́ка и церкве́й мно́гих зде́ предвозвести́ся.

Ра́дуйся, Андре́е, апо́столе Христо́в Первозва́нный.

Конда́к 7.

Дне́сь, во исполне́ние проро́ческаго гла́са твоего́, хра́м пресла́вный красу́ется на ме́сте, иде́же не су́щая я́ко су́щая прови́дел еси́ по да́ру Ду́ха Свята́го; о́крест же его́ гра́д ве́лий с це́рквами златове́рхими и́стину слове́с твои́х свиде́тельствует, ему́же и доны́не ты́, я́ко с го́рния кафе́дры, ми́р благовеству́еши. Те́мже и мы́, сбытие́ богодухнове́нных глаго́л твои́х зря́ще, ве́лиим гла́сом взыва́ем Бо́гу: Аллилу́иа.

И́кос 7.

От светоно́сныя зари́, Первозва́ннаго апо́стола, све́т богове́дения восприи́мши, свята́я О́льга возсия́ Росси́йстей земли́ я́ко денни́ца на́шего спасе́ния, возводя́ всле́д себе́, я́ко светоза́рное свети́ло, вну́ка своего́ Влади́мира, просвети́теля всея́ полу́нощныя страны́. Те́мже и мы́, возве́дше о́чи на́ша к тебе́, Андре́е богому́дре, я́ко к нача́льному благове́стнику на́шего спасе́ния, воспису́ем ти́ похва́льная сия́:

Ра́дуйся, я́ко денни́це на́шего спасе́ния, О́льзе святе́й, све́та Боже́ственнаго позна́ние дарова́ся; ра́дуйся, я́ко благове́рию ея́ Христо́во Ца́рствие отве́рзеся.

Ра́дуйся, я́ко благослове́нием твои́м пресла́вное свети́ло от сея́ денни́цы на́м произы́де; ра́дуйся, я́ко по твоему́ предвозве́стию апо́стольскому равноапо́стольный кня́зь на́м яви́ся.

Ра́дуйся, я́ко тобо́ю свята́го Влади́мира ца́рствие земно́е к небе́сному приобщи́ся; ра́дуйся, я́ко Дне́пр и Поча́йна, ре́ки Ки́евския, спаси́тельною купе́лию на́м бы́ша.

Ра́дуйся, Андре́е, апо́столе Христо́в Первозва́нный.

Конда́к 8.

Пропове́дуют пресла́внаго гра́да Ки́ева и всея́ Росси́йския страны́ па́стырие и пасо́мии па́мять дея́ний твои́х, богому́дре Андре́е апо́столе; в не́драх же пеще́рных нетле́нно почива́ющии уго́дницы Бо́жии, со Анто́нием и Феодо́сием, немо́лчными усты́, я́ко жи́ви су́ще, сла́ву твою́ веко́м и родо́м возглаша́ют, тобо́ю бо водруже́нный зде́ Кре́ст, я́ко благосенноли́ственное дре́во, произрасте́, во е́же изнести́ на́м плоды́ благоче́стия и святы́ни. Мы́ же ра́йскаго вертогра́да твоего́, а́ки птенцы́ духо́внии, тобо́ю науче́ни есмы́ воспева́ти Бо́гу: Аллилу́иа.

И́кос 8.

Не то́чию Руси́ еди́ныя бы́л еси́ спасе́ния провозве́стник, Первозва́нный апо́столе Христо́в, но и вся́ слове́нская племена́, я́коже ко́кош, птенцы́ своя́ под криле́ собира́яй, приве́л еси́ я́ ко Христу́; ты́ бо от Херсо́ниса во мра́к полу́нощныя страны́ прозира́я, су́щим та́мо лю́дем, да Бо́жию науча́тся сло́ву, прему́дрыя учи́тели, Кири́лла и Мефо́дия, про́поведию твое́ю за мно́гия ве́ки предугото́вал еси́; мы́ же, а́ки уста́ми си́х просвети́телей на́ших, велегла́сно вопие́м ти́:

Ра́дуйся, слове́нская племена́ искони́ благослови́вый; ра́дуйся, сло́во и́х разу́мное сло́вом Бо́жиим умудри́вый.

Ра́дуйся, я́ко глаго́лу Бо́жию послушли́вии, Це́ркве ча́да слове́сная бы́ша; ра́дуйся, я́ко в Херсо́нисе, иде́же пропове́дал еси́, пе́рвая ру́сская пи́смена Кири́лл святы́й обре́те и прия́т я́.

Ра́дуйся, я́ко те́ми А́лфу и Оме́гу, Нача́ток и Коне́ц — Христа́ Бо́жию прему́дрость возвести́л еси́ и́м; ра́дуйся, я́ко и вся́ богодухнове́нная писа́ния учи́телие сии́ на язы́к слове́нск на́м преложи́ша.

Ра́дуйся, Андре́е, апо́столе Христо́в Первозва́нный.

Конда́к 9.

Пусты́нныя Ски́фии не убоя́вся, во глубину́ полу́нощныя страны́ просте́рл еси́ апо́стольская стра́нствия твоя́, Первозва́нне, отону́дуже и в ве́тхий Ри́м прише́л еси́, и́же тогда́ глава́ ми́ру язы́ческому бы́сть; оба́че тмы́ ра́ди и́дольския оста́вль его́, и на кра́сный бре́г Воспо́ра прише́д, та́мо во гра́де Византи́и, и́же но́вый Ри́м и ма́терь христиа́ном бы́сть, апо́стольский престо́л тво́й утверди́л еси́, да от него́ восто́к и се́вер ве́сь све́том ве́ры озари́тся, ве́рнии же ча́да Це́ркве Христо́вы Бо́гу единомы́сленно воззову́т: Аллилу́иа.

И́кос 9.

Ма́ти Сио́н, — псало́мски рече́т челове́к, я́ко челове́к духо́вно роди́ся в не́м, но́вый же Сио́н на́м бы́сть Ки́ев: в не́м бо све́т и благода́ть Бо́жия яви́ся все́м сыново́м росси́йстим от кафе́дры, ю́же ты́, Первозва́нне апо́столе, в Византи́и утверди́л еси́. Те́мже и мы́, Невече́рним Све́том озаря́емии, благода́рне взыва́ем ти́:

Ра́дуйся, от горы́ Сио́нския снизше́дый и го́рним све́том Ки́ев многохо́лмный озари́вый; ра́дуйся, гра́ду сему́ многопло́дие духо́вное благослове́нием твои́м, низпосла́вый.

Ра́дуйся, я́ко посреде́ вселе́нныя апо́стольский престо́л тво́й утверди́л еси́; ра́дуйся, я́ко под се́нь его́, в но́вом Ри́ме, вся́ просвеще́нныя тобо́ю язы́ки собра́л еси́.

Ра́дуйся, и́мже Правосла́вие в душа́х и́х утвержда́ется; ра́дуйся, и́мже от восто́ка тма́ за́пада отрева́ется.

Ра́дуйся, Андре́е, апо́столе Христо́в Первозва́нный.

Конда́к 10.

Егда́ наста́ вре́мя преставле́ния твоего́, блаже́нне апо́столе, в дре́вния Па́тры Аха́йския прише́л еси́, да та́мо жре́н бу́деши, тече́ние бо сконча́л еси́, по́двигом до́брым подвиза́лся еси́, все́м пропове́дав Христа́ ра́спята, иуде́ем собла́зн, е́ллином же безу́мие, на́м же, зва́нным и спаса́емым, — Христа́, Бо́жию Си́лу и Бо́жию Прему́дрость, от Нея́же и научи́хомся пе́ти Бо́гу: Аллилу́иа.

И́кос 10.

Всю́ду и́менем Го́спода Иису́са боля́щия исцеля́я, ме́ртвыя воскреша́я, бе́сы изгоня́я, и во Па́трах предсме́ртную про́поведь твою́ чудеса́ми утверди́л еси́, апо́столе Христо́в, и анфипа́та Ле́звия обрати́л еси́ к позна́нию и́стины, егда́ противле́ния ра́ди я́звою пораже́н бы́в, тобо́ю от одра́ боле́зни воздви́жен бы́сть, лю́дие же вси́, ви́девше в тебе́ си́лу Бо́жию, и́долы своя́ сокруши́ша, посе́м и Госпо́дь яви́ся тебе́, я́коже Па́влу иногда́ в Кори́нфе, и повеле́ взя́ти кре́ст тво́й, назна́меновав си́м твое́ в Па́трах, Его́ ра́ди, страда́ние. Те́мже и мы́, дивя́щеся ве́лией благода́ти в тебе́, благогове́йно взыва́ем:

Ра́дуйся, ве́лия Бо́га всемогу́щаго си́ло; ра́дуйся, многоце́нное чуде́с сокро́вище.

Ра́дуйся, дре́вних Па́тр просвеще́ние и украше́ние; ра́дуйся, неве́рие анфипа́та в ве́ру премени́вый.

Ра́дуйся, я́ко та́мо па́ки яви́ся тебе́ Госпо́дь, на по́двиг кре́стный тя́ призва́вый; ра́дуйся, я́ко угото́вася тебе́ вене́ц пра́вды.

Ра́дуйся, Андре́е, апо́столе Христо́в Первозва́нный.

Конда́к 11.

Неро́н ке́сарь, я́коже иногда́ И́род, гоне́ние на вся́ ве́рныя воздви́гнувый, в Ри́ме Па́вла мече́м усе́кну, Петра́ же на кресте́ распя́, подо́бне и тебе́ дости́же в Па́трах рука́ мучи́телева, егда́ вме́сто кро́ткаго Ле́звия судию́ поста́ви Егеа́та лю́таго, и́же не терпя́й креще́ния бра́та своего́, ниже́ исцеле́нием жены́ своея́ умягче́н бы́в, в темни́цу вве́рже тя́ и, я́коже верхо́внаго Петра́, на кре́ст осуди́. Ты́ же ю́зник сы́й, в темни́це мра́чней, я́ко во све́тлем хра́ме, бра́та анфипа́това Стратокли́са во епи́скопа Па́тром проро́чествовал еси́, Бо́гу со все́ми ве́рными посреде́ узи́лища воспева́я: Аллилу́иа.

И́кос 11.

На ме́сте ло́бнем кре́ст воздвиза́ем узре́в, на не́мже име́л еси́ ра́спят бы́ти, не убоя́лся еси́, апо́столе, да́же до сме́рти свиде́тельствовати возлю́бльшаго тя́ и возлю́бленнаго тобо́ю Христа́, и к сему́ зна́мению спасе́ния ру́це простира́я, умиле́нно взыва́л еси́:

Ра́дуйся, Кре́сте Всечестны́й, пред ни́мже с весе́лием предстою́, ве́дая тя́, упова́ние мое́; ра́дуйся, Кре́сте Животворя́щий, его́же глава́ до небе́с дости́же, подно́жие же врата́ а́да сокруши́.

Ра́дуйся, Кре́сте достопокланя́емый, восприе́мый Влады́ку моего́, я́ко гро́здие сладча́йшее, источи́вшее на́м спасе́ние; ра́дуйся, Кре́сте благослове́нный, разбо́йника спасы́й и тому́ плоды́ испове́дания дарова́вый.

Ра́дуйся, я́ко и моея́ ра́дости исполне́ние бы́л еси́; — те́мже ра́дуйся и ты́, страстоте́рпче, на Кресте́ ве́ру твою́ во Христа́ запечатле́вый.

Ра́дуйся, Андре́е, апо́столе Христо́в Первозва́нный.

Конда́к 12.

Прииди́те, свиде́телие ра́дости моея́! — воззва́л еси́ апо́столе к соверши́телем во́ли Егеа́та, — твори́те во́лю на́ю обою́, распни́те мя́ и, я́ко а́гнца, принеси́те в же́ртву созда́вшему мя́ Творцу́. — И сия́ ре́к, возше́л еси́ на кре́ст, я́ко на го́рнюю кафе́дру, с нея́же три́ дни́ и три́ но́щи пропове́дал еси́ сло́во Бо́жие о́крест стоя́щим лю́дем, да не боя́тся сме́рти, испове́дающе Го́спода Иису́са. Егда́ же све́том небе́сным озари́ся ли́к тво́й, ужасе́ся мучи́тель и тя́ со креста́ взя́ти повеле́; оба́че ты́, страстоте́рпче, не восхоте́л еси́ от кре́стных му́к разреши́тися, до исхо́да твоего́ непреста́нно Бо́гу вопия́: Аллилу́иа.

И́кос 12.

Сла́вяще апо́стольския по́двиги твоя́, Андре́е Первозва́нне, ублажа́ем святу́ю кончи́ну твою́, е́юже Живоно́сную Стра́сть Сы́на Бо́жия просла́вил еси́, и во умиле́нии се́рдца взыва́ем ти́ си́це:

Ра́дуйся, дру́же Христо́в, с ра́достию кре́стная страда́ния за Него́ претерпе́вый; ра́дуйся, апо́столе ве́рный, со креста́ глаго́лы живота́ ве́чнаго лю́дем пропове́давый.

Ра́дуйся, я́ко в ча́с сня́тия со креста́ осени́ тя́ све́т, а́ки мо́лния с небесе́; ра́дуйся, я́ко правосла́вно испове́дающим пропове́даннаго тобо́ю Христа́ Сы́на Бо́жия обеща́л еси́ благода́ть ве́лию.

Ра́дуйся, Го́рняго Иерусали́ма апо́стольское основа́ние; ра́дуйся, седя́й со апо́столы на еди́ном от двоюна́десяте престо́лов, во е́же суди́ти вся́ коле́на Изра́илева.

Ра́дуйся, Андре́е, апо́столе Христо́в Первозва́нный.

Конда́к 13.

О, Первозва́нный апо́столе Христо́в Андре́е! При́зри на благохвале́ния сия́ все́х чту́щих святу́ю па́мять твою́, и я́ко водрузи́л еси́ кре́стное дре́во на гора́х гра́да Ки́ева, при́сно осеня́й и на́с спаси́тельным зна́мением си́м, да, Кресто́м Го́спода Бо́га и Спа́са на́шего охраня́еми, дости́гнем в ме́ру во́зраста исполне́ния Христо́ва и сподо́бимся с тобо́ю и со все́ми святы́ми, во гла́се ра́дования, в безконе́чныя ве́ки пе́ти Бо́гу, Спаси́телю на́шему: Аллилу́иа.

Этот конда́к читается три́жды, затем и́кос 1-й и конда́к 1-й.

Моли́тва.

Первозва́нне апо́столе Бо́га и Спа́са на́шего Иису́са Христа́, Це́ркве после́дователю верхо́вный, всехва́льне Андре́е! Сла́вим и, велича́ем апо́стольския труды́ твоя́, сла́дце помина́ем твое́ благослове́нное к на́м прише́ствие, ублажа́ем честна́я страда́ния твоя́, я́же за Христа́ претерпе́л еси́, лобыза́ем свяще́нныя мо́щи твоя́, чти́м святу́ю па́мять твою́ и ве́руем, я́ко жи́в Госпо́дь, жива́ же и душа́ твоя́ и с Ни́м во ве́ки пребыва́еши на небеси́, иде́же и лю́биши ны́ то́южде любо́вию, е́юже возлюби́л еси́ на́с, егда́ Ду́хом Святы́м прозре́л еси́ на́ше, е́же ко Христу́ обраще́ние, и не то́чию лю́биши, но и мо́лиши о на́с Бо́га, зря́ во Све́те Его́ вся́ ну́жды на́ша. Та́ко ве́руем и та́ко сию́ ве́ру на́шу испове́дуем во хра́ме, и́же во и́мя твое́, святы́й Андре́е, пресла́вно созда́ся, иде́же святы́я мо́щи твоя́ почива́ют; ве́рующе же, про́сим и мо́лим Го́спода и Бо́га и Спа́са на́шего Иису́са Христа́, да моли́твами твои́ми, я́же при́сно послу́шает и прие́млет, пода́ст на́м вся́ потре́бная ко спасе́нию на́с гре́шных; да я́коже ты́ а́бие по гла́су Го́спода, оста́вль мре́жи своя́, неукло́нно Ему́ после́довал еси́, си́це и ки́йждо от на́с да и́щет не свои́х си́, но е́же к созида́нию бли́жняго и о го́рнем зва́нии да помышля́ет. Иму́ще же тя́ предста́теля и моли́твенника о на́с, упова́ем, я́ко моли́тва твоя́ мно́го мо́жет пред Го́сподем и Спаси́телем на́шим Иису́сом Христо́м, Ему́же подоба́ет вся́кая сла́ва, че́сть и поклоне́ние со Отце́м и Святы́м Ду́хом во ве́ки веко́в. Ами́нь.