Кондак 1

Избраннии от рода Ааронова, рождшии Иоанна богохвальнаго, Предтечею и Крестителем Господним предуготованным быти, святии и праведнии Захарие и Елисавето! Яко имущии дерзновение ко Господу, предстательством вашим от всяких нас бед свободите, взывающих вам: Радуйтеся, святии и праведнии Захарие и Елисавето, добрый плод для людей возрастившии.

Икос 1

Ангели земнии и человецы небеснии воистину явистеся, святии Захарие и Елисавето, от юности вашея всеми добродетельми украшении и непорочно житие свое вкупе пожившии, ему же чудящеся, зовем вам гласы хвалебными сице: Радуйтеся, рода Аронова славное прозябение. Радуйтеся, благочестивых родителей светлое украшение. Радуйтеся, душевныя и телесныя чистоты рачителие. Радуйтеся, заповедей Божиих ревностнии хранителие. Радуйтеся, супрузи праведнии, Богом предъизбраннии. Радуйтеся, на трапезу небесную Господом призваннии. Радуйтеся, святии и праведнии Захарие и Елисавето, добрый плод для людей возрастившии.

Кондак 2

Видев Отец Небесный с высоты славы Своея, яко житие ваше, святии и праведнии Захарие и Елисавето, благочестиво и свято бысть, благослови от отрасли вашея святыя произрасти честному и славному плоду – Иоанну, во еже быти ему пророком, Предтечею и Крестителем Сыну Своему возлюбленному Иисусу Христу, Ему же хвалу воздаем: Аллилуиа.

Икос 2

Разумом Божественным свыше направленный Архангел Гавриил предсташе тебе, иерее Захарие, вшедшему покадити во святилище и служащему по чину чреды своея. Зрящи же вестника небеснаго, одесную алтаря кадильнаго стоящаго, страх велий объяше тя, обаче посланник Божий рече ти: «Не бойся, Захарие». Мы же, милостию Божиею к семейству твоему умиленные, вопием: Радуйтеся, целомудреннаго жития крепкое охранение. Радуйтеся, грехов и страстей непреложное одоление. Радуйтеся, благодатию Божиею щедро осененнии. Радуйтеся, зрящие на небе тайны сокровенныя. Радуйтеся, яко ангели бесплотнии, на земли пожившии. Радуйтеся, чистоту телесную в житии своем сохранившии. Радуйтеся, святии и праведнии Захарие и Елисавето, добрый плод для людей возрастившии.

Кондак 3

Сила неизреченная милосердия Божия на вас, святии, открыся, ибо видя праведность хождения вашего пред лицем Божиим, посла вам Господь велие утешение в старости, да поете Ему верно: Аллилуиа.

Икос 3

Имеяй повеление от Господа утешити тя, святе Захарие, возвести ти ангел Божий, яко молитва твоя благоприятна есть Богу и внимая ей, милость ти дарует Бог: благословляше бо супружницу твою Елисавету, узы неплодства ея разрешая, да родит сына, соименнаго благодати Иоанна. Тем же приимите от нас песнь сию: Радуйтеся, житием своим Богу угодившии. Радуйтеся, свято пред Ним неизменно ходившии. Радуйтеся, яко в молитвах своих ко Творцу возвышалися есте. Радуйтеся, яко словом Господним всегда утешалися есте. Радуйтеся, вся надежды своя на Творца возлагавшии. Радуйтеся, в своих добрых делах утомления не знавшии. Радуйтеся, святии и праведнии Захарие и Елисавето, добрый плод для людей возрастившии.

Кондак 4

Бурею мирскаго жития не одоленный, сын ваш, святии Захарие и Елисавето, велик пред Господем будет, не токмо телом, но и духом, рече Ангел Господень, ибо своим рождеством той принесет в мир велию радость, яко мнози возрадуются рождению его, восхваляя Творца: Аллилуиа.

Икос 4

Слышаще дивныя глаголы о сыне своем, яко той велиим пророком и постником наречется, и еще от чрева матери своея исполнится Духа Свята и мнози от сыновей Израильских его ради обратятся ко истинному Богу, ибо надлежит ему быти Предтечею Христовым в духе и силе пророка Илии и приуготовити народы ко принятию Спасителя, зело поражен и удивлен бысть Захария, не решаяся реченному Ангелом веровати. Мы же, словесам ангельским внимая, вопием вам сице: Радуйтеся, стяжавшии милость Творца превеликую. Радуйтеся, языкам принесшии радость великую. Радуйтеся, седины свои славою покрывшии. Радуйтеся, наград на небе себя не лишившии. Радуйтеся, милосердному Господу во всем уподоблявшиеся. Радуйтеся, Триединому Богу всегда поклонявшиеся. Радуйтеся, святии и праведнии Захарие и Елисавето, добрый плод для людей возрастившии.

Кондак 5

Бога точию бояйся, рече ангел Господень Захарии: Аз есмь Гавриил, предстояй пред Богом и посланный благовестити тебе все сие, обаче за то, что ты не уверовал еси словесам моим, будеши немым и не промолвиши ни единаго слова дондеже всему реченному мною надлежит исполнитися по воле великаго Бога, Коему славу пою: Аллилуиа.

Икос 5

Видевше людие бывшии в церкви Господней, умедлившу Захария во алтари, зело дивляхуся сему, изшедшу же ему к ним и не могущу глаголати, но токмо помавающу, разумеша вси, яко бысть ему видение во алтари. Мы же, прославляя дивнаго в чудесех Своих Господа, глаголем вам сице: Радуйтеся, яко сила Божия на вас совершися. Радуйтеся, яко воля Божия непреложно на вас сотворися. Радуйтеся, яко милость Творца с преизбытком на вас излияся. Радуйтеся, яко радость велия вам щедро Творцем даровася. Радуйтеся, яко вы возвеличены быша дланию святою. Радуйтеся, яко вы всем пример подаете собою. Радуйтеся, святии и праведнии Захарие и Елисавето, добрый плод для людей возрастившии.

Кондак 6

Словес Господних, ангелом возвещенных, сбытие видяще, возрадовася зело Елисавета, ибо зачне сына своего и таяшеся месяц пять, глаголющи: яко тако сотвори мне Господь во дни, в няже призре отъяти поношение мое в человецех, да пою Ему хвалу: Аллилуиа.

Икос 6

Возсия обильно благодать Божия в Елисавете святей, егда исполнися Духа Свята и возопи гласом велиим Деве Марии: «Благословенна Ты в женах и благословен плод чрева Твоего! И откуду мне сие, яко прииде Мати Господа моего ко мне!». Чадо же ее взыграся во чреве радощами пришествию Матери Божией. Да и на нас сниде благодать Святаго Духа, вопиющих радощами сице: Радуйтеся, Духом Святым позлащеннии. Радуйтеся, благодатию щедро Творцем осененнии. Радуйтеся, чадо великое свято зачавшии. Радуйтеся, радость отцовства и материнства от Бога познавшии. Радуйтеся, Матери Божией сродницы всечестнии. Радуйтеся, воплотившагося Сына Божия раби преблагии. Радуйтеся, святии и праведнии Захарие и Елисавето, добрый плод для людей возрастившии.

Кондак 7

Хотящу людем возвестити от ангела пронареченное имя сына своего Иоанна, святе Захарие, по рождестве его написа е и абие отверзошася язык и уста твоя, и глаголаше паки, благословя Бога и поя Ему: Аллилуиа.

Икос 7

Новую подаяй благодать тебе Господь, праведне Захарие, Духом Святым насыти тя, воеже пророчествовати ти, глаголя: «Благословен Господь Бог Израилев, яко посети и сотвори избавление людем Своим и воздвиже рог спасения нам, в дому Давида отрока Своего, якоже глагола усты святых сущих от века пророк Его и ты, отроча, пророк Вышняго наречешися, предъидеши бо пред лицем Господним, уготовати пути Его». Мы же, пророчеству твоему внимая, чрез вас, праведницы Божии, восхваляем Господа, воспевая вам похвалы сии: Радуйтеся, отроча святое в мир родившии. Радуйтеся, рождеством сим радость миру возвестившии. Радуйтеся, восхвалившии Бога безмерно. Радуйтеся, служившии Господу верно. Радуйтеся, вся Законы Его исполнявшии. Радуйтеся, себя в чистоте сохранявшии. Радуйтеся, святии и праведнии Захарие и Елисавето, добрый плод для людей возрастившии.

Кондак 8

Странное чудо бысть окрест живущим людем, егда слышаху о преславнем и чуднем рождестве чада вашего, святии и праведнии Захарие и Елисавето, и со удивлением глаголаху в себе: «Что убо отроча сие будет?». Мы же, преславному рождеству Предтечи и Крестителя Господня радующеся, Господу взываем: Аллилуиа.

Икос 8

Весь был еси смущением велиим исполнен, пророче Божий Захарие, зря Пресвятую Деву Марию с Богомладенцем ко храму пришедшую и на месте нечистых жен пред дверьми храма ставшую, очищения законнаго просити хотящую. Ведуще бо Ю во Святая Святых тобою, по внушению Божию, введенную и тамо воспитанную и духом уразумев, яко сия Матерь есть Дева Чистая и по рождестве, постави Ю сего ради на месте девиц, идеже женам имущим мужа стояти не подобаше. Мы же, восхваляя с тобою Деву Чистую, с любовию и умилением вопием: Радуйтеся, Матери Божией славу воздавшии. Радуйтеся, купно со всеми Ея восхвалявшии. Радуйтеся, Бога пришествие в мир ожидавшии. Радуйтеся, чистою молитвою Творца ублажавшии. Радуйтеся, Ликом Младенца Христа услажденнии. Радуйтеся, в Царствие Божие Ним возведеннии. Радуйтеся, святии и праведнии Захарие и Елисавето, добрый плод для людей возрастившии.

Кондак 9

Вси Ангели и святых лики радовахуся радостию велиею, егда ты, святе Захарие, на руце свои праведнии, умилися сердцем и со страхом Божиим, приял еси Богомладенца, и яко Творцу и Богу, возвал еси Ему: Аллилуиа.

Икос 9

Витийство человеческое не довлеет к достойному прославлению дивнаго жития вашего, святии и праведнии Захарие и Елисавето, несть бо возможно исповести и исчести вся моления и пощения ваша, вся слезы и воздыхания ваша яже к Богу. Приимите от нас, любовию к вам подвизаемых, малыя похвалы сия: Радуйтеся, Духа Святаго сосуди от века избраннии. Радуйтеся, руце своя простираху к Творцу в уповании. Радуйтеся, Пресвятыя Троицы угодницы вернии. Радуйтеся, к Богу дорогу нашедшии в тернии. Радуйтеся, трудами своими спасение стяжавшии. Радуйтеся, на Господа токмо во всем уповавшии. Радуйтеся, святии и праведнии Захарие и Елисавето, добрый плод для людей возрастившии.

Кондак 10

Спасения чаду своему хотяще, поят мати чадо свое и бежаху с ним в горы от злочестиваго детоубийцы Ирода, той бо посла в Вифлеем воинов, да избиют вся младенцы, приказа умертвити и чадо ваше, блаженнии Захарие и Елисавето. Мы же, Господу, хранящему избранныя Своя от руки нечестиваго, с любовию глаголем: Аллилуиа.

Икос 10

Стеною заступления от настигавших убийц бысть тебе Господь, праведная Елисавето, егда по молению твоему: «Гора Божия, приими мать с сыном!», повеле горе каменней тотчас расступитися и заключити тебе с чадом в себе. Спасению вашему со слезами радуяся, вопием вам сице: Радуйтеся, Господом на всех путях хранимии. Радуйтеся, рукою Божиею по жизни сей водимии. Радуйтеся, любовь к Творцу в себе носившии. Радуйтеся, нетленный плод в раю вкусившии. Радуйтеся, за правду Божию пострадавшии. Радуйтеся, быти с Богом возжелавшии. Радуйтеся, святии и праведнии Захарие и Елисавето, добрый плод для людей возрастившии.

Кондак 11

Пение молебное Господу Богу приносил еси, святый и праведный Захарие, егда воини зверонравнаго Ирода приидоша к тебе с повелением отдати им сына твоего. Ты же отвечал еси им: «Аз служу ныне Господу Богу Израилеву и не вем идеже есть сын мой!», укрепляющему тебя Богу вопияй: Аллилуиа.

Икос 11

Света небеснаго исполнися храм Господень, праведне Захарие, егда вопрошающим тя воином рекл еси: «Тело мое убиете, душу же мою восприимет Господь!» Бывшу же тебе убиту между церковию и алтарем, якоже повеле Ирод, пролиявшаяся кровь твоя святая сгустися на мраморе и отверде во свидетельство и вечное осуждение Иродово. Мы же, мученическую кончину твою прославляя, воспеваем гласами хвалебными: Радуйтеся, души Творцу посвятившии. Радуйтеся, в святости их сохранившии. Радуйтеся, славою небесною от Бога венчаннии. Радуйтеся, в радость Господа своего войти призваннии. Радуйтеся, яко пищу нетленную ныне вкушаете. Радуйтеся, яко Бога за нас присно вы умоляете.

Кондак 12

Божественная благодать явися на тебе, праведная Елисавето, и неизреченное чудо дивно открыся, егда бо в горе, укрывшей тя со чадом, Божиим повелением устроися пещера, открыся источник водный и над пещерою финикс произрасте, подавая плоды своя во изобилии. Таковому благоволению Божиему радуяся, ты пела еси Ему с чадом своим: Аллилуиа.

Икос 12

Поюще радостную песнь хвалы и благодарения Господу, по истечении сорока дний по убиении праведнаго Захарии, душу свою предаде Творцу своему святая Елисавета и с супругом своим на небеси соединися. Прославляя праведное житие ваше, святии Захарие и Елисавето, усердно молим вас услышати хвалебное пение наше: Радуйтеся, яко в вере святей вы есте утверждение. Радуйтеся, яко наше от бед вы есте ограждение. Радуйтеся, яко нас от скорбей присно вы защищаете. Радуйтеся, яко страсти телесныя в нас укрощаете. Радуйтеся, благочестивым супругом вы есте покровителие мудрии. Радуйтеся, чадом нашим вы есте воспитателие добрии. Радуйтеся, святии и праведнии Захарие и Елисавето, добрый плод для людей возрастившии.

Кондак 13

О, святии и праведнии Захарие и Елисавето! Молим вас со усердием и любовию: испросите нам у Господа нашего в жизни сей в вере и добродетелех утверждение, от скорбей и напастей избавление, прегрешений наших прощение, да сподобимся и мы Царствие Небесное наследовати и вечно воспевати Богу: Аллилуиа. Аллилуиа. Аллилуиа.

Сей кондак читается трижды. Затем икос 1 и кондак 1.

Молитва

О, велиции Христовы праведницы, святии Захарие и Елисавето! К вам прибегаем и вам молимся с великим упованием: принесите за нас грешных святыя молитвы ваша ко Господу да пошлет вся благопотребная душам и телесем нашим, веру праву, любовь нелицемерну, в добрых делех преуспеяние, душам и телесем здравие и вечное спасение. Не презрите молитв наших, со умилением вам возносимых, но будите нам предстателие ко Господу да сподобимся помощию вашею спасение вечное получити, Царствие Небесное унаследовати и вкупе с вами и всеми святыми славословити неизреченное человеколюбие Отца и Сына и Святаго Духа, в Троице покланяемаго Бога, во веки веков. Аминь.

Кондак 1

Взбранной Воеводе, Пречистой и Богообрадованной Деве Богородице, огнезрачныя иконы Своея явлением обрадовавшей Церковь Христову и ею от огненнаго запаления защищающей верныя, похвальное возглашаем пение; Ты же, о, Богомати, Купина Неопалимая нами именуемая, яко имущая державу непобедимую и милосердие многое, ускори на помощь к нам, требующим Твоего заступления, и от всяких бед свободи зовущих Ти:

Радуйся, Благодатная, Купино Неопалимая, огненнаго запаления нас избавляющая.

Икос 1

Ангелов Царице и всея твари Владычице Госпоже Богородице, от ангельских ликов горе приемлющая хвалебное пение, сподоби и нас, земных и перстных, возносити к Тебе гласы хвалы благодарения за премногую милость Твою к роду человеческому. И аще недостойни есмы пети Тя по достоянию, обаче Ты, яко благая, не возгнушайся наших недовлеющих похвал и, яко Сын Твой две лепте вдовицы милостивно прият, тако любоблагоутробно услыши нас, со умилением Тебе вопиющих:

Радуйся, Огнь Божества во чреве Твоем неопальне носившая; радуйся, Спасителя падшему человечеству рождшая.

Радуйся, силу адову пречестным рождеством Твоим упразднившая; радуйся, Адама и Еву древняго проклятия свободившая.

Радуйся, вочеловечению Единаго от Троицы непорочно послужившая; радуйся, Творца небесе и земли безсеменно воплотившая.

Радуйся, Благодатная, Купино Неопалимая, огненнаго запаления нас избавляющая.

Кондак 2

Видя Моисей на Синаи купину огнем горевшую и не сгоравшую, ужасеся, и се бысть глас к нему Божественный от купины: Иззуй сапоги от ногу твоею: место бо, на немже ты стоиши, земля свята есть. Сего послушающе, и мы, смиреннии, таинство воплощения Бога Слова от Пречистыя Девы, чудом неопалимыя купины прообразованное, исповедуем, и со страхом поклоняемся месту явления Божия, зовуще Зиждителю всяческих: Аллилуиа.

Икос 2

Разум человеческий не может постигнути таинства смотрения Божия, от сложения мира искупление падшего человечества предопределившаго в Совете превечном Триипостаснаго Божества, обаче Духом Святым вдохновленныя святии Божии пророцы, издалече предзряще чудо чудес, яко Творец рабий зрак восприимет, спасти хотя дело рук Своих от погибели вечныя, возвещаху прообразы и пророчествы неложными имущее совершитися искупление рода человеча обетованным Искупителем, Емуже Ты, Всечистая, плоть взаимодавши, сподобилася еси быти Мати Господа Твоего, внушающаго нам вопити к Тебе:

Радуйся, огнезрачная палато на херувимех Седящаго; радуйся, светоносная ложнице серафимом Повелевающаго.

Радуйся, одре Царя великаго верху горы небесныя; радуйся, престоле одушевленный Обладающаго горними и дольними.

Радуйся, кивоте освященный Божества, Святая Святых больший; радуйся, стамно всезлатая, в Нейже манна спасительная уготовася, плоть и кровь Божественнаго Агнца.

Радуйся, Благодатная, Купино Неопалимая, огненнаго запаления нас избавляющая.

Кондак 3

Силою Всевышняго действующи, Владычице преблагая, силу естества огненнаго укрощаеши святою иконою Твоею и многа чудеса ею содеваеши во вселенней; темже род христианский ублажает Тя гласы хвалебными и в бедах внезапных, наипаче же во время огненнаго запаления, к Тебе молитвенно притекает, приемля помощь от Тебе благовременну. Сего ради благодарственно вопием прославльшему Тя Царю славы Христу: Аллилуиа.

Икос 3

Имущи любовь велию к людем, искупленным честною кровию Сына Твоего и Бога, Богомати Пречистая, прияла еси от Него власть строити и покрывати род христианский; Ты бо грешником еси споручница покаяния их пред Творцем, ненадежным надежда спасения, бедствующим скорая помощь, погибшим взыскание державное и всему миру покров. Тебе, милосердой и благолюбивой заступнице нашей, за любовь любовию воздающе, смиренномудренне глаголем:

Радуйся, радосте всемирная, Еюже слезы отъемлются от очес страждущих и скорбящих; радуйся, прибежище благоотишное, в Немже спасаются обуреваемии бурею страстей житейскаго моря.

Радуйся, утолительнице всемогущая праведно движимаго на нас гнева Божия; радуйся, пламень огня угашающая росою молитв Твоих пред Престолом Вседержителя.

Радуйся, от грома и молнии соблюдающая предстательством Твоим небесным; радуйся, помощь Твою святую благовременно подающая всякой души, верно Тебе молящейся.

Радуйся, Благодатная, Купино Неопалимая, огненнаго запаления нас избавляющая.

Кондак 4

Буря огненная егда найдет на нас внезапно и пламень грады и веси наша обымет, тогда, Госпоже Всемилостивая, ускори на помощь к нам безпомощным и иконою Твоею честною защити и избави нас от огненнаго наказания, егоже сотворихомся достойни грех наших ради, Тебе бо грешнии имамы заступницу непостыдную, на Тя упование наше возлагаем и, прославляюще силу молитв Твоих, рождшемуся от Тебе Спасу мира зовем: Аллилуиа.

Икос 4

Слышим и видим чудеса велия, от иконы Твоея бываемая, Царице наша Всеблагая, юже даровала еси нам во утешение и защиту в несчастиих; се бо и всепоядающий огнь изнемогает в силе своей пред силою благодатною Твоего пречистаго образа, якоже многажды видехом и испытахом, Неопалимую Купину Тя именующе в изображении сего Твоего образа и пред ним воспевающе гласы хвалебными сице:

Радуйся, молитвеннице неусыпающая ко Христу Богу, на милость к нам Его преклоняющая; радуйся, кару Божию за беззакония наша от глав наших отводящая.

Радуйся, ризою Твоею честною от всяких несчастий нас сохраняющая; радуйся, Матерним покровом щедрот Твоих жилища наша от огня и грома соблюдающая.

Радуйся, всемилостивая услышительнице гласов наших молебных в скорби и обстоянии; радуйся, державная скоропомощнице наша во дни тяжких испытаний.

Радуйся, Благодатная, Купино Неопалимая, огненнаго запаления нас избавляющая.

Кондак 5

Боготечная звезда, икона Твоя всечестная, Богородице Дево, во всем мире чудес множеством благодатно сияет и просвещает души и сердца человеческая к познанию велия Твоего милосердия, имже род христианский покрываеши и заступаеши, яко Мати благосердая. О сем радующеся, благодарим Христа Бога, Тебе, Матерь Свою по плоти, и нам в Матерь по духу даровавшаго, и зовем Ему во умилении глубоцем: Аллилуиа.

Икос 5

Видим икону Твою, Владычице, яко воистину купину неопалимую, во огни несгорающую и присутствием своим жилища человеческая в пламени несгораемыми соделывающую; Тебе бо дадеся благодать свыше силу естества огненнаго укрощати, Огнь Божества во чреве Твоем неопально вместившей. Сея же благодати и пречистый образ Твой причастен показася, темже от верных Неопалимая Купина наименовася, егоже мы чествуем благолепно и Тебе хвалебно вопием:

Радуйся, Свеще Неугасимая, в молитвах Своих у Престола Господа присногорящая; радуйся, огнем любве Божия и наша хладная сердца воспламеняющая.

Радуйся, сению молитв Твоих зной страстей наших прохлаждающая; радуйся, в час скорби и недоумения помыслы душеполезныя нам низпосылающая.

Радуйся, во время безпомощия нашего, егда бедствуем и не имамы помогающего, на помощь к нам ускоряющая; радуйся, в годину несчастий внезапных державною рукою Твоею от погибели нас исхищающая.

Радуйся, Благодатная, Купино Неопалимая, огненнаго запаления нас избавляющая.

Кондак 6

Проповедует Церковь Христова чудеса Твоя, Богородительнице, яко песка морскаго и звезд небесных множае суть; от востока бо и до запада хвально имя Твое чудесы и несть града или страны, идеже не совершися Тобою действо силы Божия во избавление и спасение, просвещение и исцеление людей христоименитых, наипаче же чрез иконы Твоя святыя обыкла еси чудотворити, изливающи от них струи милости и щедрот бедствующему и болящему человечеству. Сего ради славословим Тя гласы песней духовных, и вопием Сыну Твоему и Богу нашему: Аллилуиа.

Икос 6

Возсияла еси в светолитии божественныя славы, Дево Богоотроковице, Младенца предвечнаго Господа Иисуса Христа на руку Твоею держащи и ликом сил ангельских окружаема, якоже Тя видим на иконе изображенную, моисейскую Неопалимую Купину таинственно пронареченную, от неяже дары благодатныя верным даруеши, от огня и грома спасаеши, недужныя врачуеши, скорбящия утешаеши и всем вся благая и душеполезная низпосылаеши, во еже пети Тебе гласы немолчными сице:

Радуйся, о Нейже радуется и торжествует ангельский собор и человеческий род; радуйся, Еяже слава превосходит похвалы земныя и небесныя.

Радуйся, от горних высот всю вселенную Матернею любовию Твоею назирающая; радуйся, юдоль земную многоскорбную благодеянии Твоими посещающая.

Радуйся, нейсчетною благостынею Твоею не оставляющая презренныя и отверженныя; радуйся, сердоболием Твоим от рова погибельнаго исхищающая безнадежных.

Радуйся, Благодатная, Купино Неопалимая, огненнаго запаления нас избавляющая.

Кондак 7

Хотя Господь явити любовь Свою к людем, искупленным Его кровию, дарова нам в покров и защиту Матерь Свою Пренепорочную и Сию сотвори прибежище благоотишное всякой души христианстей, скорбящей и озлобленней, помощи и милости требующей. Ведуще убо таковое милосердное служение Твое роду человеческому, Владычице Всеблагая, к Тебе очи наши в скорбех возводим и руце молебно простираем, утешения от Тебе единыя просяще, да спасеши нас предстательством Твоим от скорбей временных и вечных и сподобиши на земли живых, в радости святых пети Богу: Аллилуиа.

Икос 7

Дивно прославила еси чудесы икону Твою святую, Неопалимая Купина именуемую, Богородице Дево, еюже грады и веси от запаления огненнаго и молниеноснаго грома соблюдаеши и домы верных благословляеши, в нихже чествуется благоговейно пречистаго лика Твоего подобие. Сего ради, яко дар многоценен, образ Твой благодатный радостно приемлем, достодолжным поклонением почитаем и Тя по долгу ублажаем благохвалении сими:

Радуйся, алавастре врачевания, на всякий недуг врачевство содержащий; радуйся, мироположнице благоухания Христова, облагоухавшего падшее человечество.

Радуйся, узы греховныя разрешающая кающимся грешником; радуйся, пленицы страстей сокрушающая подвизающимся о чистоте.

Радуйся, дев младопитательнице и матерей тихое веселие; радуйся, вдов заступнице и сирот благосердое призрение.

Радуйся, Благодатная, Купино Неопалимая, огненнаго запаления нас избавляющая.

Кондак 8

Странно есть видети, яко икона Твоя, Владычице, на дске написанная и по естеству своему огненному действу подверженная, силу пачеестественную являет и присутствием своим силу огня укрощает. Познающе в сем силу Божию и Твоих молитв действо, величаем возвеличившаго Тя Зиждителя всяческих Бога, во отраду и утешение нам даровавшаго образ Твой чудотворный и сим спасающаго нас от огненнаго запаления, да присно зовем Ему благодарственно и хвалебно: Аллилуиа.

Икос 8

Весь мир христианский славит имя Твое преблагословенное, Марие Богородице, и всякому верному сладостно и утешительно есть взирати на пречистаго лика Твоего подобие, имже обыкла еси являти многая и преславная чудеса. Се и мы, смиреннии, Твою святую икону видяще, благолепно ей поклоняемся и с любовию ю лобызаем, чающе от нея помощи и заступления Твоего державнаго, наипаче же во время беспомощия нашего, егда грех ради наших огненное запаление на ны найдет внезапно, да спасаеми Тобою от погибельнаго пламене, благодарственными усты Тебе вопием:

Радуйся, нерукотворенная скиние Бога Слова, херувим превысшая и серафимы превосходящая святынею и чистотою; радуйся, облаче легкий Солнца правды, Имже Небесный к земным прииде, да на небо с Собою возведет.

Радуйся, райския двери отверзшая падшему человечеству Рождеством Твоим Святым; радуйся, небо и землю воедино совокупльшая, во еже пети Тебе и Рождшемуся от Тебе немолчныя хвалы.

Радуйся, Божественный источниче, Воду жизни источивый, от Негоже пиющии ктому не умирают; радуйся, Грозд спасения возрастившая благословенная лозо, вино безсмертия искапающий человеком.

Радуйся, Благодатная, Купино Неопалимая, огненнаго запаления нас избавляющая.

Кондак 9

Всяку похвалу превосходит слава Твоя, Преблагословенная и Препрославленная Мати Господа нашего; недоумевают бо и уми безплотнии пети Тя по достоянию, паче же нам земным и перстным сие неудобно есть, обаче любовию к Тебе побеждаеми, дерзаем приносити Тебе посильное пение хвалы и благодарения за премногую милость Твою к роду человеческому, егоже возлюбила еси и емуже благотворити не престаеши, подвизающи всяк возраст верных взывати рождшемуся от Тебе Спасу Христу: Аллилуиа.

Икос 9

Витии человечестии изнемогают постигнути великую тайну Твоего приснодевства, Богородительнице, юже утаи Господь от премудрых века сего и верою откры смиренным и благоговейным, пытливаго испытания чуждым, от нихже православно и несумненно до Рождества и в Рождестве, и по Рождестве Дева проповедуешися. Приими убо, о, Мати и Дево, и наше о сем исповедание вседушевное и укрепи нас последовати Тебе житием непорочным и сердечною чистотою, да возможем благоугодно воспевати Тебе песни сицевыя:

Радуйся, крине белоснежный девства и чистоты, неувядаемо цветущий горе; радуйся, к девству и чистоте невидимо руководствующая живущих доле.

Радуйся, матерство и девство в Себе чудно сочетавшая; радуйся, во обою непорочно и свято Себе соблюдшая.

Радуйся, иноческих ликов предводительнице в девстве богоугоднем; радуйся, девственных полков начальнице в чистоте души и тела.

Радуйся, Благодатная, Купино Неопалимая, огненнаго запаления нас избавляющая.

Кондак 10

Спасение человеческое устрояя, Един от Троицы воплотитися от Тебе изволи, Богоневесто Владычице, естество человеческое прославив седением одесную Отца на престоле Божества, яко Сын Единородный, Тойже и Сын Твой по плоти бысть и Тебе с Собою прослави славою, превысшею всякия славы, еяже добротою осеняема, не забываеши милостивно род человеческий, но молитвенно предстательствуеши пред Творцем, в Троице Единым, о всех верно поющих Ему славословия песнь: Аллилуиа.

Икос 10

Стена еси девственным ликом и иноческим собором, Богородице Дево, и всем усердно к Тебе в молитвах притекающим, икону же Твою святую благоговейно чествующим; Тебе бо единей даровася от Господа благодать всемирнаго заступления и верных в девстве и чистоте утверждения. Темже непорочнаго жития рачителие под Матерний покров Твой от бури страстей прибегают и благоотишие душевное находят, согласно Тебе взывающе:

Радуйся, иноков и инокинь благочестивых изрядная покровительнице и теплая к Богу о них ходатаице; радуйся, тайных среди мира рабов Божиих всегдашняя помощнице и в подвизех духовных руководительнице.

Радуйся, юных наставнице целомудрия и воздержания; радуйся, старцев благоговейных упокоение и отрадо.

Радуйся, домы и семейства христианския осеняющая благим Твоим покровом; радуйся, всяк возраст верных сподобляющая Твоего благосердаго попечения.

Радуйся, Благодатная, Купино Неопалимая, огненнаго запаления нас избавляющая.

Кондак 11

Пение хвалебное приносит Тебе немолчно святая Христова Церковь, Всепетая Владычице, возвещающи милости Твоя и чудеса, имиже обогатися вся вселенная. Воистину, кто бо, якоже Ты, скоропослушлив есть к молитвенным прошением нашим? Но и самая прошения обыкла еси предваряти, милующи и ущедряющи требующих помощи Твоея святыя, еяже не лиши и нас смиренных, в час сей поющих во славу имене Твоего и вопиющих Богу: Аллилуиа.

Икос 11

Светозарная Твоя икона, Богомати Пречистая, просвещает потемненныя грехми души наша сиянием Божественных чудес, в нихже познаем Божия всемогущества силу и Твое милосердие неисчетное, присно готовое способствовати нам в покаянии и обращении от злых дел на путь спасения. Молим убо Тебе, Всеблагая, не остави нас заблуждати в дебрех грехов и страстей, но приведи к тихому пристанищу благочестнаго и богоугоднаго жития, да возможем достойно приносити Тебе сия песненныя дары:

Радуйся, враги наша невидимыя запинающая бодренною Твоею молитвою; радуйся, сим не попускающая обладати нами насилием смертнаго сего телесе.

Радуйся, яко беси имене Твоего святаго боятся и трепещут; радуйся, яко икона Твоя честная всяку силу диаволю присутствием своим прогоняет.

Радуйся, подвижников благочестия укрепляющая в брани духовной со враги спасения человеческаго; радуйся, в час кончины помогающая любовь и веру к Тебе имущим.

Радуйся, Благодатная, Купино Неопалимая, огненнаго запаления нас избавляющая.

Кондак 12

Благодати Божия причастну исповедуем Твою святую икону, богоблагодатная Дево, и светло торжествуем праздник ея явления; во образе бо неопалимыя купины сия явльшися, тожде и действо показует своими чудесы, от огненнаго пламене сохраняющи и соблюдающи жилища наша своим присутствием. Сию убо, яко щит и забрало, имуще, Тебе, помощницу нашу державную, хвалами песненными ублажаем и рождшемуся от Тебе Спасителю нашему вопием: Аллилуиа.

Икос 12

Поем Тя, Богородительнице, едину надежду и упование наше, исповедуем милости Твоя, не таим чудес Твоих, прославляем неисчетную благость Твою к роду христианскому, благословляем имя Твое святое, еже воистину миро излиянное есть любящим Тя, благоуханием духовным исполняющее благочестивыя души. Облагоухай убо и нас, Владычице, смердящих страстьми греховными, и сподоби чистым сердцем и нескверными усты взывати к Тебе:

Радуйся, миро источающая сладостное и душеспасительное, имже умащаются сердца боголюбивая; радуйся, недуги душевныя и телесныя врачующая единым прикосновением к иконе Твоей святей.

Радуйся, водительнице благая, на путь благоугождения и спасения направляющая кающихся грешников; радуйся, лествицею добродетелей возводящая подвижников Христовых ко вратам Царствия Небеснаго.

Радуйся, смиренных и терпеливых страдальцев венчающая утешением благодатным; радуйся, изгнанных и гонимых безвинно услаждающая предвкушением блаженства райскаго.

Радуйся, Благодатная, Купино Неопалимая, огненнаго запаления нас избавляющая.

Кондак 13

О, всепетая Мати, рождшая всех святых святейшее Слово и Неопалимая Купина от нас недостойных именуемая! Вонми гласу молений и пений наших, пред святою иконою Твоею усердно Тебе возносимому, и теплою молитвою Твоею ко Господу огня временнаго и вечнаго избави нас, хвалящих имя Твое и прославляющих чудеса Твоя, Сыну же Твоему и Богу нашему вопиющих: Аллилуиа.

Этот кондак читается трижды, затем 1-й икос «Ангелов Царице …» и 1-й кондак «Взбранной Воеводе …».

Молитва

О, Пресвятая и Преблагословенная Мати сладчайшаго Господа нашего Иисуса Христа! Припадаем и поклоняемся Тебе пред святою и пречестною иконою Твоею, еюже дивная и преславная чудеса содевающи, от огненнаго запаления и молниеноснаго грома жилища наша спасаеши, недужныя исцеляеши и всяко благое прошение наше во благо исполняеши. Смиренно молим Тя, всесильная рода нашего Заступнице, сподоби ны, немощныя и грешныя, Твоего Матерняго участия и благопопечения. Спаси и сохрани, Владычице, под кровом милости Твоея богохранимую страну нашу, власти и воинство ея, Церковь Святую, храм сей (или: обитель сию) и вся ны, припадающия к Тебе с верою и любовию и умиленно просящия со слезами Твоего заступления. Ей, Госпоже Всемилостивая, умилосердися на нас, обуреваемых грехми многими и не имущих дерзновения ко Христу Богу просити Его о помиловании и прощении, но Тебе предлагаем к Нему на умоление, Матерь Его по плоти; Ты же, Всеблагая, простри к Нему богоприемнеи руце Твои и предстательствуй за нас пред благостию Его, просящи нам прощения прегрешений наших, благочестиваго мирнаго жития, благия христианския кончины и добраго ответа на Страшнем Суде Его. В час же грознаго посещения Божия, егда огнем возгораются домы наша или молниеносным громом устрашаеми будем, яви нам милостивное Твое заступление и державное вспоможение, да спасаеми всесильными Твоими ко Господу молитвами, временнаго наказания Божия зде избегнем и вечное блаженство райское тамо унаследуем, и со всеми святыми воспоем Пречестное и Великолепое имя покланяемыя Троицы, Отца и Сына и Святаго Духа, и Твое велие к нам милосердие во веки веков. Аминь.

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Ум помраченный мой просвети, Дево, огненосным сиянием Твоея славы, память в славословии изнемогающую укрепи и воспламени хладное мое сердце Божественною любовию, да Тебе, Купине Неопалимей, пение хвалебное воспою достойно, Чистая.

Храм Трисолнечнаго Света прекрасный, украси моя чувства, молюся, да целомудренною мыслию и нескверными усты огнезрачныя иконы Твоея явление воспою достойно, Чистая.

К Твоей пресветлаго зрака иконе припадаю, окаянный: душу мою озари благодатно, яви и тело нескверно и, от лютых мя недугов свободивши, покажи причастника наследия Небеснаго, Богоневестная.

Недугующа страстьми многоразличными от иконы Твоея Божественныя исцеления сподоби мя, о, Богомати Владычице. Да славлю чудеса Твоя и пою Тя, благих Виновную, Вечную Благость Воплотившую, мира Благую Заступницу.

Песнь 3

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний Краю, верных Утверждение, Едине Человеколюбче.

Низложи налоги бесовския, стужающия мне, Владычице, гордость в добродетели, лицемерие в святости, тщеславие во бдении, высокоумие в благоговении и неблагодарность в благодеяниих Сына Твоего, Едина Всепетая Дево.

Странна мя любочестия сотвори, молю Тя, Дево, и чужда любопытства о человеческих согрешениих, дерзость и излишнее на милость Сына Твоего упование отдали от мене, да достойны Ему плоды принесу, Едина Пречистая.

Начало от земли приемшую худость моего естества познавая, молю Тя, Дево, даждь ми презрение славолюбия, бегство человеческия хвалы, познание собственнаго греха и собственныя немощи, Едина Богоблаженная.

Краткий всех вещей и всего мира конец, смертный час и мучение будущее за суету деяний тщеславных помышляти сподоби мя, Дево. Да благодатию Сына Твоего к пути истиннаго покаяния наставлен, вечнаго избегну проклятия, Пренепорочная.

Седален, глас 8

Величия Твоя кто исповесть, Богородице, явлением бо огнезрачныя иконы Твоея возвеселила еси души православных, многим недуги ею врачующи, от огня же и грома защищающи, иже по Бозе на Тя упование возлагают. О, Всемилостивая Владычице, не лиши убо и нас Твоего заступления, спаси православных христиан от всякаго зла, да Тобою хвалящеся, не постыдимся во веки.

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Жестокосердием отягченнаго мя облегчи, немилосердием к требующим окамененную утробу мою умягчи, бурею сребролюбия объятаго мя утиши, во огни неопалимыя купины Прообразованная Владычице.

Во уповании тленных и временных вещей не остави мя и пламень хищения неправеднаго угаси во мне пламенем огня Божественнаго, Неопалимая Купино явльшаяся, Богоневестная Владычице.

Идолослужение в лихоимении и заблуждение от истиннаго благочестия и православныя веры потреби от мене, Владычице, и не попусти мя пасти падением еретическим, да восхваляю имя Твое благословенное до кончины живота моего в Православии непорочно, Едина Приснодево.

Ум мой, молю Тя, Богородице, благоустрой к познанию вечных истин Христова Евангелия, к разсмотрению тленности временных благ направи мой помысел и щедролюбие даруй ми неоскудное, да благодатию Христовою украшен, пою Тя, Едина Приснодево.

Песнь 5

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Огнь нечистоты и всякия скверны во мне, безстуднем, морем благости Твоея потопи, и мглу греховную разжени, и сердце мое радости исполни, Всенепорочная.

Срамословию безобразному не даждь во мне места, Владычице, селение соблазнов замени в души моей зрением собственных грехов, храм мя чистоты и целомудрия соделай, да нескверными усты величаю Тя выну, Всенепорочная.

Смерть, суд и мучения вечная грешником уготованная в памяти моей углуби, Владычице, да поне последняя сия в памяти содержа, лютая беззакония оставлю и плоды покаяния истиннаго принесу, величая Тя присно, Едино души моея Упование.

Любовь сея жизни излишнюю и плотскаго покоя рачение отложи от мене, молю Тя, Дево Чистая. Да суетных попечений избег, Тобою получу нетленное на Небеси богатство, Едина души моея Покровительнице.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися, и живот мой аду приближися, и молюся, яко Иона: от тли, Боже, возведи мя.

Радости суетныя, к преогорчению ближняго приводящия, чужда мя соделай, Купино Неопалимая верными именуемая, Пречудная Царица. Даждь ми сопечаловатися искреннему моему в бедствиях, Человеколюбивая Владычице и памятозлобия избави мя, прилежно молю Тя, Всенепорочная Дево.

Зависти в помысле моем не даждь вкоренятися, видением несгараемыя купины Прообразованная Моисею, и Рождшаяся от корене свята, Дево, и братоненавидения избави мя, Чистая. Да не злобою мрачною осквернен быв, лишуся Божия благодати и жизни вечныя, Всенепорочная Владычице.

Терпение в бедах утверди во мне, Всечистая, с радующимися духовную радость, к сетующим сожаление даруй ми, Пресвятая, и братолюбие низпосли мне свыше, любве пучину Рождшая Дево, и любовь велию присно Являющая роду христианскому.

Желание крайнее согрей во мне всякому ближнему от души благотворити, Благая, да не како злоб лютых душа моя исполнится, и живот мой аду приближится, и предан буду без милости яко не сотворивый милости, во тьму кромешнюю, Всенепорочная Богоневесто.

Кондак, глас 8

Предочистим чувствия душ и телес наших, да видим таинство Божественное, образно явленное древле великому во пророцех Моисею купиною, горевшею огнем и не сгаравшею, в нейже Твоего безсеменнаго Рождества, Богородице, предвозвещение исповедуем и, благоговейно покланяющеся Тебе и Рождшемуся от Тебе Спасу нашему, со страхом вопием: радуйся, Владычице, Покрове, и Прибежище, и Спасение душ наших.

Икос

Провидя дивный Моисей в неопалимей купине на Синаи тайну от века утаеную, Безлетнаго в лете родитися Восхотевшаго, Рождение от Чистыя и Неискусобрачныя Девы, ужасом содержим вопияше: сия земля воистину свята есть, яко Плод спасительный миру из нея произыдет, Имже горесть падения Адамова усладится. Сего послушая, и мы, таинства Божия событие познавшии, ублажаем Тя, Богородице, Возвеличившую падшее человечество и милосердием неизреченным Призревающую на род христианский, темже и зовем Ти: радуйся, Владычице, Покрове, и Прибежище, и Спасение душ наших.

Песнь 7

Ирмос: От Иудеи дошедше отроцы, в Вавилоне иногда верою Троическою пламень пещный попраша, поюще: отцев Боже, благословен еси.

Веселие мирское пресецы и душетленное пристрастие умертви во мне, Дево, презрение временных, желание вечных благ и нетленную радость подаждь ми, с поющими: отцев Боже, благословен еси.

Безчинное веселие и излишество, ум вредящее, душе скверну раждающее, отлучи от мене, Дево, и сподоби во здравии душевнем и телеснем духовнаго утешения наслаждатися с поющими: отцев Боже, благословен еси.

Грехом, смерть лютую раждающим, оскверних душу мою, но Ты, Пречистая Владычице, огнезрачная и неопалимая купино явльшися, тину страстей моих изсуши огнем Божия благодати и настави мя на богоугодное житие. Украси же воздержанием и целомудрием и даждь ми чистым сердцем пети: отцев Боже, благословен еси.

К Твоей огнезрачной иконе взирая, молю Тя, Владычице, омраченнаго мя самолюбием светом зрака Твоего просвети и, похоти плотския укротивши во мне, огнем Божия любве хладное сердце мое воспламени, да Рождшемуся от Тебе достойно возмогу пети: отцев Боже, благословен еси.

Песнь 8

Ирмос: Царя Небеснаго, Егоже поют вои Ангельстии, хвалите и превозносите во вся веки.

Возмущение души моея утоли, Всенепорочная, от клеветы наветующих избави мя, вражду греховную во мне укроти и ненависть мрачную отврати от мене, Дево, да прославляю Тя, Чистая, во веки.

Огнь ярости во мне зело разнеженный, росою благодатныя молитвы Твоея угаси, хулу, умножающую души моея озлобление и всякий вид злобы, гнездяйся в сердце моем, искорени, Дево, да Тя прославляю, Чистая, во веки.

Образ Христов Евангельскими добродетельми напиши в души моей, Богоблагодатная, укрепи и утверди мя во всяком деле благом, от всякия же злобы отврати сердце мое, да мирными усты прославляю Тя, Чистая, во веки.

Кротким оком Твоим виждь мое смирение, Пренепорочная Богоневесто, и приклони ухо Твое к молитве сердца моего, кротостию и незлобием благоукраси мя, помраченнаго безобразием злобных страстей, и сотвори причастника блаженства, кротким обетованнаго, да радуяся прославляю Тя, Чистая, во веки.

Песнь 9

Ирмос: Воистину Богородицу Тя исповедуем, спасеннии Тобою, Дево Чистая, с безплотными лики Тя величающе.

Скорби сердца моего утиши, Радосте скорбящих, уныние душегубительное отъими от мене, Утолительнице печали, и леность ко взысканию добродетелей искорени во мне, Взыскание погибших, да Тебе, Дево Чистая, непрестанно величаю.

Малодушием болезнующаго мя оживи, Целительнице болящих, отчаянием падшаго мя возстави, Одигитрие заблуждших, грехами умерщвленнаго мя воскреси, Споручнице грешных, да Тебе, Дево Непорочная, непрестанно величаю.

Усердие во мне творити волю Божию возбуди и ревность ко славе Божией воспламени в сердце моем, Купино Огнезрачная и Неопалимая, и благоговейна служителя Христова соделай мя, Дево, Предводительнице моего спасения.

Слезами покаяния и умиления изсохшую в знои страстей душу мою умягчи, яко руно орошенное Гедеона, и сокрушение к исправлению даждь ми, Дево, да вечныя блага унаследую, и с лики избранных Божиих воспою Тя, Ходатаицу моего спасения.

Светилен

Икону Твою всечестную в залог благоволения Твоего верным даровала еси, Владычице, покрывающи и сохраняющи ею от огненнаго запаления на Тя уповаюшия. О, Мати Царя Христа Бога, буди и нам, грешным, Прибежище спасения в нечаянных бедах и Ходатаица вечныя жизни.

Кондак 1

Возбранной Воеводе, пренепорочней Деве Богородице, земли Калужския избавительнице, хвалебныя песни приносим Ти, раби Твои, яко иконы Твоея явлением даровавшей нам стража неусыпна. Ты же моления нашего, пред иконою Твоею возносимаго, не отвержи, но защити ны, Владычице от всех врагов видимых и невидимых и избави ны от всяких болезней душевных и телесных, да во умилении сердца зовем Ти:

Радуйся, Владычице, милость Свою нам и заступление являющая.

Икос 1

Ангелов множество славят Тя, Царицу всех и Богородицу, Ты бо исполнила еси радости сердца наша явлением нам чудотворныя иконы Твоея в Тинкове и чудесы во храме имене Рождества Твоего в веси Калужке; сей убо иконе Твоей поклоняющеся, Тебе, богоизбранная Дево, моление возносим, со страхом и любовию глаголюще:

Радуйся, от патриархов прообразованная и от пророков предвозвещенная; радуйся, рождшая Агнца, вземшего грехи мира.

Радуйся, Адама и Еву от древняго проклятия свободившая; радуйся, чудотворною иконою Твоею всю землю Калужскую озаряющая.

Радуйся, икону Твою во знамение милости нам давшая; радуйся, яко на икону Твою взирающе, Самой Тебе, истинней Богородице, покланяемся.

Радуйся, Владычице, милость Свою нам и заступление являющая.

Кондак 2

Видяще начертание лика Твоего, девица Евдокия в развращении сердца своего дерзновенно оплеванием поругася ему, не ведущи, яко сей Твой лик есть, Пресвятая Дево; Ты же вразумления ради наказала еси ю разслаблением всего телесе, смягчением руку и ногу, ослеплением очию и отъятием языка, и сим показала еси, яко начертание лика сего есть икона Твоя чудотворная, да вси людие вопиют к рождшемуся от Тебе Богу Слову: Аллилуиа.

Икос 2

Разум человеческий не может постигнути великаго Твоего милосердия, Пресвятая Богородице, яко искреннее покаяние болящия девицы прияла еси и совершенное исцеление ей даровала еси, да молитву приносит пред иконою Твоею, взывающи сице:

Радуйся, лествице небесная, Иаковом предвиденная; радуйся, тайну воплощения Божия, от веков в Бозе сокровенную, открывшая.

Радуйся, ведущим брань противу мира и диавола добрая споспешнице; радуйся, от грехопадений наших, имже несть числа, избавляющая.

Радуйся, яко призывающии имя Твое от падения страстнаго восташа; радуйся, благодатное безстрастие ищущим его усердно подающая.

Радуйся, Владычице, милость Свою нам и заступление являющая.

Кондак 3

Силою, данною Ти свыше, чудотворную Твою икону, Пречистая Богородице, даровала еси нам в знамение милости Твоея, являющися родителем тоя девицы, и рекла еси им: Буду ходатайствовати о граде Калуге и о всех людех страны сея. Мы же, взирающе на икону Твою и множество чудес, от нея изливающихся, видяще, с радостию к ней припадаем и из глубины сердца благодарим Тя, дивную заступницу, взывающе Богу: Аллилуиа.

Икос 3

Имущи о Церкви Христовой попечение и видевши, яко посреде обителей земли Калужския живут людие неции, святыя Христовы Церкве отвергшиися, Пресвятая Богородице, непременное желание изрекла еси, да вси чтут Православную Церковь. Родителем же тоя девицы повелела еси, да совершено будет молебствие пред Твоею иконою со освящением воды и да окропит иерей ею дщерь их, болезнию пораженную, яко да исцелеет от недуга своего. Нас же спаси, Госпоже Богородице, верою и любовию воспевающих Ти:

Радуйся, в защиту Церкве Православныя чудеса показующая; радуйся, хулителей православныя веры невидимо наказующая.

Радуйся, православныя веры ограждение и утверждение; радуйся, крепкая стено Церкве Православныя.

Радуйся, святителей веселие и благоговейных иереев похвало; радуйся, иноков и инокинь благочестивых изрядная покровительнице и обителей их неусыпная блюстительнице.

Радуйся, Владычице, милость Свою нам и заступление являющая.

Кондак 4

Бурю напастей провидя, угрожавших краю нашему от озлобления Наполеона, устремившагося на землю Калужскую, святитель Евлампий моляшеся пред Твоею иконою, Богородице, о избавлении града Калуги и всея ея области от врагов, весть же прием, яко войско вражие поражено бысть на реце Чернушце, благодарственно Спасу Христу возопи: Аллилуиа.

Икос 4

Слышавше милость Твою, Богородице, чрез Твою икону на поле брани близ веси Тарутина нам низпосланную, егда явила еси ю на воздусе иноплеменником, якоже свидетельствоваша плененнии от них, и тако даровала еси победу воем российским, радуемся о Твоей, Владычице, помощи и со упованием воспеваем Ти сице:

Радуйся, купино неопалимая, боговидцем Моисеем предзримая; радуйся, от потопа греховнаго нас спасшая.

Радуйся, кадильнице златая, яко фимиам благоуханный, молитвы Твоя к Богу, Сыну Твоему, присно возносящая; радуйся, праведно движимый гнев Божий на ны молением Своим скоро утоляющая.

Радуйся, яко явлением на воздусе иконы Твоея страх и трепет нападе на враги иноплеменныя; радуйся, яко явлением иконы Твоея во время брани победу российской рати подала еси.

Радуйся, Владычице, милость Свою нам и заступление являющая.

Кондак 5

Боготечная звезда явилася еси нам, Богородице, смыслы наша озаряющая и на путь спасительный наставляющая, врагом же нашим была еси, яко молния, устрашающая их и отражающи от нас, егда Наполеон, поразив близ града Малоярославца рать нашу, понуди ю отыти ко граду Калуге, сам же, услышав сие по Твоему милостивому, Заступнице, повелению, неверным же неведомыя ради вины, вместо еже ко граду Калуге ити, иде по пути, егоже сам разори и опустоши, ко граду Гжатску, и тако рать свою погуби. Сего ради, Твое крепкое заступление ведуще, со умилением глаголем Богу: Аллилуиа.

Икос 5

Проявивши велию любовь к людем, живущим в стране Калужстей, Пресвятая Богородице, землю нашу сохранила еси и множество врагов, обышедших ю, далече от нея отгнала еси, сии же врази наши уведеша, коль крепка есть помощь Божия Матере. Мы же, Твое всемощное заступление, нам бывшее, добре ведуще, в радости сердца воспеваем Ти сице:

Радуйся, клеще таинственная, Исаием провиденная; радуйся, примирение наше с Богом соделавшая.

Радуйся, Спасителя падшему человечеству рождшая; радуйся, в годину брани помощию Твоею уповающих на Тя не оставляющая.

Радуйся, всемощным заступлением Твоим от меча иноплеменных нас избавляющая; радуйся, без пролития крове одоление православным воем даровавшая.

Радуйся, Владычице, милость Свою нам и заступление являющая.

Кондак 6

Проповедница богознаменитаго чудесе явися некая жена во граде Боровске, юже врачеве никакоже возмогоша исцелити, и рекоша, яко надлежит ей не по мнозе времени умрети. Она же, веру имущи, яко сила Божия всемогущая есть, не закосне просити, да в веси Калужке пред Твоею, Богородице, иконою совершено будет о здравии ея молебствие, и по вере своей абие от недуга своего исцелена бысть. Темже и мы, благодарственно прославляюще Бога, вопием Ему: Аллилуиа.

Икос 6

Возсияла еси икона Твоя, Богородице, чудеснаго исцеления ради жены, живущия во граде Боровске, даже и посреде жителей его, в расколе пребывающих, сего ради и синклит градский, в немже по преизбыточеству бяху людие, в расколе упорствующии, устави, да будет совершено на стогнах града молебное пение пред Твоею иконою, яже принесена бысть во град сей, прежде же николиже в онь бяше приносима. Темже, яко благая Владычица, научи ны разумети промышление Божие о спасении людей, да взываем Ти радостно:

Радуйся, двере, Иезекиилем прореченная; радуйся, вочеловечению Единаго от Святыя Троицы непорочно послужившая.

Радуйся, рождением Сына Твоего спасение миру являющая; радуйся, с верою имя Твое призывающих от смерти спасающая.

Радуйся, раскольников на путь благий обращающая; радуйся, яко божественную веру прославила еси, прелесть же раскола посрамила еси.

Радуйся, Владычице, милость Свою нам и заступление являющая.

Кондак 7

Хотящи возгрети в сердцах людей страны Калужския любовь к иконе Твоей, Заступнице наша, токи чудес изливаеши от Твоея иконы: молитвою бо, к Тебе возносимою, глухому внезапу слух даровася, ослепшему зрение открыся, разслабленному крепость во удесех его возвратися, здравие душею страждущей и бесом одержимей дадеся, люте болящей и врачми оставленней житие во здравии на многая лета продолжися; темже и мы, с любовию к иконе Твоей припадающе и прославляюще Бога, вопием Ему: Аллилуиа.

Икос 7

Необоримая еси ограда, охраняющая ны от всяких болезней душевных и телесных, Пресвятая Богородице, и заступающая всех, к Тебе прибегающих с молитвою. Темже и мы, припадающе к иконе Твоей, молим Тя, Владычице: от всяких болезней душевных и телесных избави ны, вопиющия Ти из глубины сердца:

Радуйся, солнце селения Христова, Псалмопевцем предъявленное; радуйся, рождшая Избавителя, беззакония наша туне очищающаго.

Радуйся, стамно пресвятая, в нейже алчущим правды соблюдается Хлеб жизни вечныя; радуйся, яко всякия болезни душевныя и телесныя милостивно врачуеши с верою к чудотворней Твоей иконе приходящих.

Радуйся, болезнующих, оставленных врачми, от смерти избавляющая; радуйся, яко молитвами Твоими престают тлетворнии ветри и смертносныя язвы.

Радуйся, Владычице, милость Свою нам и заступление являющая.

Кондак 8

Великое и уму человеческому неудобопостижимое чудо явила еси, Владычице мира, егда внезапу исцелила и укрепила еси в трезвенном житии некую жену, в области града Жиздры живущую, яже пиянству предана бе; совестию своею терзашеся, яко страстию порока порабощена бысть, и сея ради вины обратися с верою к Тебе, Владычице, молящися пред Твоею иконою и от Тебе исцеление желающи получити. Сего ради и мы, на милость Твою уповающе, восхваляем Твое милосердие, взывающе Богу: Аллилуиа.

Икос 8

Видят и слышат жители Калужския земли новую купель Силоамскую, паче оныя древния явльшуюся, Пресвятая Богородице, в храме Рождества Твоего в веси Калужке, в немже покланяются чудотворней иконе Твоей; не единожды бо в лето и не точию первее входяй здравие приемлет, но выну всяк недуг врачуеши всех с верою к Тебе прибегающих. Сего ради вопием Ти:

Радуйся, Еяже ради ад стенет и дуси злобы трепещут; радуйся, Еяже ради врата рая всем нам отверзаются.

Радуйся, помощь Твою святую благовременно подающая всякой душе, верно Тебе молящейся; радуйся, от страсти к пиянству обратившихся к Тебе с молитвою избавляющая.

Радуйся, от рова погибельнаго безнадежных извлачающая; радуйся, притекающих к покрову Твоему сладкое успокоение.

Радуйся, Владычице, милость Свою нам и заступление являющая.

Кондак 9

Вси гордынею одержимии страх Божий скоро забывают. Сице две жене, в стране Калужстей живущии, гордынею преисполненнеи, ясно являста сомнение свое, яко икона Твоя цельбоносна есть, Владычице, и сим толико прогневаста Бога, яко праведным судом Его тяжкими недуги наказание прияша. Мы же, таковое вразумление видяще, с любовию покланяемся Твоему образу, взывающе Богу: Аллилуиа.

Икос 9

Витии века сего отрицают поклонение иконе Твоей, Пречистая Дево, не разумеют бо в своем суемудрии, яко честь, иконе воздаваемая, на первообразное восходит. Мы же, не токмо сие ведуще, но и благодеяния, иконою Твоею нам являемая, видевше, душею радующеся, Тебе, Богородице, глаголем:

Радуйся, стамно всезлатая, в нейже плоть и кровь божественнаго Агнца уготовашася; радуйся, трапезо святая, хлебом жизни нас питающая.

Радуйся, суетную мудрость нечестивых витий посрамляющая и ослепленных ею на путь правый наставляющая; радуйся, яко по благостыне Своей угашаеши в нас огнь нечестия пламенем огня божественнаго.

Радуйся, вразумляющая знаменьми и чудесы колеблемых в вере; радуйся, Богоблагодатная, страх Божий и смирение в сердца наша вселяющая.

Радуйся, Владычице, милость Свою нам и заступление являющая.

Кондак 10

Спасти хотящи люди, покланяющияся Твоей иконе, от бед, благоволила еси, Богородице, явитися некоей девице, в Лужецком, близ града Можайска, монастыре жительствовавшей, и предварити, да не имать общения с женою развращенною, и тем сохранила еси ю от грядущия беды. Темже и мы прославляем Господа Бога, давшего благодать таковую иконе Твоей, и вопием Ему: Аллилуиа.

Икос 10

Стена еси крепкая, ограждающая род человеческий от бед, Пресвятая Богородице, и скорую помощь являеши от Твоея иконы всем чтущим ю во градех, весех и обителех. Сего ради и мы, осеняемии Твоим, Богомати, заступлением, на Твой взирающе пречистый образ, молим Тя, да избавиши ны от всяких клевет, бед и скорбей, вопиющих Ти:

Радуйся, явльшая миру обетованнаго Сокрушителя главы змиевы; радуйся, радость вечную, Спасителя миру, рождшая.

Радуйся, рождением Сына Божия двери царствия Христова нам отверзшая; радуйся, казнь Божию за беззакония наша от глав наших отклоняющая.

Радуйся, любящих и чтущих Тя от всяких бед и скорбей избавляющая; радуйся, радосте всего мира, Еюже слезы скорбящих отъемлются.

Радуйся, Владычице, милость Свою нам и заступление являющая.

Кондак 11

Пение непрестанно приношаше Ти, Пресвятая Богородице, некий житель Жиздринския веси, с верою пред Твоею иконою моляше, да даруеши ему дщерь. Ты же, Богородице, благоволила еси вняти мольбам его и даровала еси ю ему. Мы же, зряще на Твою икону и видяще токи чудес, от нея изливаемыя, благая Богородительнице, из глубины сердца благодарим Тя, Царицу нашу дивную, воспевающе Богу: Аллилуиа.

Икос 11

Светлыми лучами чудес икона Твоя сияет, Богомати Пречистая, и прогоняет всякое вражие действо силою Божиею, от нея исходящею; темже и мы, грешнии, имуще таковое знамение Твоего к нам благоволения, радуемся, глаголюще: О Пресвятая Богородице! Умоли Господа, да спасет ны имиже весть судьбами, да не погибнем в нераскаянии о наших грехопадениих, и услыши похвалы сия, Тебе возносимыя:

Радуйся, Творца небесе и земли безсеменно воплотившая; радуйся, осенением святыя иконы Твоея всякое вражие действо от нас отгоняющая.

Радуйся, прошения наша на пользу исполняющая; радуйся, неоскудеваемый источниче благословений и милостей Божиих к людем Твоим.

Радуйся, благочестивых супружеств незримое ограждение; радуйся, молитв ради усердных плод безчадным низпосылающая.

Радуйся, Владычице, милость Свою нам и заступление являющая.

Кондак 12

Благодать умиления молитвеннаго от Твоея, Владычице, иконы источаемая, да исполнит души наша, аще грех ради в безчувствие впадаем. Пробуди наше душевное усыпление, да не погибнем люте без покаяния, и приими нас в вечныя кровы, Богородительнице, да, радующеся, поем Богу, Тобою нас спасающему: Аллилуиа.

Икос 12

Поюще чудеса, являемая от Твоея иконы, Мати Христа Бога нашего, и припадающе к ней, молим Тя, Владычице: буди нам защищение в день кончины нашея, егда имамы предстати на суд пред страшным престолом славы Сына Твоего, Господа нашего, да вопием Ти:

Радуйся, от власти лютаго миродержца уповающих на Тя избавляющая; радуйся, гнев Божий от рода православнаго отводящая.

Радуйся, благую христианскую кончину ублажающим Тя подающая; радуйся, славящих Тя на воздушных мытарствах заступающая.

Радуйся, заступнице усердная рода православнаго и крепкая надеждо вечнаго его спасения; радуйся, отверзающая райския двери православному роду, присно Тя блажащему.

Радуйся, Владычице, милость Свою нам и заступление являющая.

Кондак 13

О всепетая Мати Христа Бога нашего! Приими милостивно сие моление наше, еже принесохом пред Твоею иконою, и в час смертный явися нам Сама, Пречистая, простирающи руку помощи, отгоняющи духи злобы, ищущия поглотити души наша при разлучении от телесе, и умоли приснопокланяемую Троицу избавити ны мучения вечнаго, да предстательством Твоим наследуем Царствие Небесное и сподобимся со святыми пети Богу: Аллилуиа.

Этот кондак читается трижды, затем 1-й икос «Ангелов множество …» и 1-й кондак «Возбранной Воеводе …».

Молитва

О Пресвятая Дево, Мати Христа Бога нашего, дивная Царице небесе и земли! Вонми многоболезненному воздыханию сердец наших; призри с высоты святыя Твоея на нас, с верою и любовию предстоящих пред чудотворною Твоею иконою и со умилением молящихся Тебе, Владычице! Не предаждь умалению Церковь Православную, помози нам, Пресвятая Богородице, святоотеческую православную веру до конца дней наших непорочно сохранити, во всех заповедех Господних неуклонно ходити и избави ны от пагубных душевредных учений.

На Твою, дивная Царице небесе и земли, милость уповаем раби Твои: очисти умы наша от греховных помыслов, душевнаго разслабления, обуревания страстей, от искушений, соблазнов и грехопадений; Ты бо еси, Владычице, крепкое прибежище грешников кающихся. Воздвигни нас из глубины греховныя и истинным покаянием ороси изсохшая сердца наша, просвети сердечная очи наша к зрению спасения и прельщенных бесовскою прелестию на путь правый настави; всякое дело злое и богопротивное разруши, всякому же благому и богоугодному делу научи и споспешествуй; вложи, Владычице, в сердца наша дух страха Божия, дух благочестия, дух кротости, смирения, терпения, незлобия; умягчи злая сердца наша и злыя благи сотвори, низпосли нам ревность о спасении ближних.

Вразуми и научи ны, о Всемилостивая Заступнице наша, како безгрешно ходити по пути земнаго сего жития, яко Ты, Пресвятая, веси и веру нашу, и упование наше видиши, Владычице мира! Скорбящих утеши, бедствующим помози; сохрани от молниеноснаго грома, тлетворных ветр, лютых болезней, смертоносныя язвы, междоусобныя брани, нашествия врагов иноплеменных.

Пресвятая Богородице! Избави ны от внезапныя и насильственныя смерти; всем нам даруй обращение на путь истинный и христианскую кончину живота нашего, безболезненну, непостыдну, мирну, Святых Таин причастну. Во время исхода нашего предстани нам, Дево Богородице, и избави ны от власти бесовския, воздушных горьких мытарств и огня вечнаго. Скончавшимся внезапною смертию милостива быти Сына Твоего умоли и о всех усопших, иже не имут сродников, о упокоении их Сына Твоего умоляющих, Сама буди непрестанная и теплая молитвенница и ходатаица. Преставльшияся же в вере и покаянии от временнаго жития сего отцы, братию и сестры наша сподоби Твоим ходатайством вселитися во обителех небесных со ангелы и со всеми святыми, идеже не престают гласи празднующих и радостно славящих Пресвятую Троицу, Отца и Сына и Святаго Духа, ныне и присно и во веки веков. Аминь.

Кондак 1

Избраннии и Духа Святаго исполненнии, преподобнии и богоноснии отцы наши, Антоние и Феодосие Печерстии, преизящная Российския земли прозябения. пречудная российскаго народа украшения, хотящу мне, недостойному, похвальное вам совершити пение, смиренно вас молю: потемненный мой разум светом данныя вам от Бога благодати озарите, мрак неведения просветите, неудобства и препоны разрушите, мою немощь укрепите, нас же всех, сынов российских, от всех бед и напастей, скорбей и болезней отечески свободите, да в теплоте сердца из глубины души вси купно вопием вам:

Радуйтеся, Антоние и Феодосие, монашескаго в России жития первоначальницы.

Икос 1

Ангелом подобнаго желающе жития, абие в юности своей вся красная мира разсудне пренебрегосте, и аки сметие от себе отвергше, детскими попрасте ногами, вас же всецелых, в дар Христу Богу и приношение освятисте, тем таковое ваше святое и богоприятное разсуждающе произволение, сицевое вам приносим пение:

Радуйтеся, отцы богоноснии, вся земная, благая и красная мира презревшии; радуйтеся, Христа от юности всем сердцем и всею душою возлюбившии.

Радуйтеся, дом, имения и вся родителей стяжания ни во чтоже вменившии; радуйтеся, благое и сладкое иго Христово на рамена, в детстве еще суще, вземшии.

Радуйтеся, яко уподобистеся праведнаго Авеля богоприятному приношению; радуйтеся, яко подражателие бысте боголюбиваго Ноя в благодарном его по изшествии из ковчега жертвоприношении.

Радуйтеся, ваша телеса, вместо тучных агнцев и тельцов, Создателю своему принесшии; радуйтеся, души ваша, вместо благовоннаго фимиама, Христу Спасителю вознесшии.

Радуйтеся, сердца ваша во всегдашнее Богу и Божией Матери служение добре уготовавшии и всецело предавшии; радуйтеся, все ваше житие, подобне Самуилу, на служении Божии даже до последняго издыхания красно и богоугодно препроведшии.

Радуйтеся, многое множество мужей и жен, юношей и дев вашему подражати житию научившии; радуйтеся, благий и легкий ярем Христов многим усладившии.

Радуйтеся, Антоние и Феодосие, монашескаго в России жития первоначальницы.

Кондак 2

Видя всевидящее око Отца Светов таковое ваше Богу вельми благоугодное начинание и душеспасительное намерение, аще и не абие вас купно жительствовати устрои, обаче не в долгом времени сице вас соедини и совокупи, якоже соедини и совокупи Павла Петру, да един ярем понесше, многих в Небесная введете обители: чесому мы удивляющеся, благодарственно Богу, тако устроившему, поем: Аллилуиа.

Икос 2

Разум богоприятен, Антоние всехвальне, тебе же самому и прочим душеполезен стяжати усердствуя, сего днем и ношию от всемилостиваго Бога с теплыми слезами прилежно просил еси, пророчески вещая: скажи ми, Господи, путь, воньже пойду. Темже человеколюбивый Бог, вняв твоему слезному молению, вложи в твое сердце, да не медля в Афонскую гору идеши, ты же, аки вторый Авраам, ялся еси пути с велиим тщанием, Божие исполняя веление, чесо ради вопием тебе таковая:

Радуйся, отче Антоние, древнему уподобивыйся Аврааму, по слову Божию, доброхотно и послушно, без скорби и сетования от сродник и южик своих удаляющемуся; радуйся, в далечайшую неведомую страну, обретения ради монашескаго жития, от своих си нескорбно удаливыйся.

Радуйся, долгий, трудный и прискорбный путь скоротечно без смущения прешедый; радуйся, ангела Божия в том пути спутника, якоже иногда Товиа, имевый.

Радуйся, Афонския горы, по твоему желанию, Божию же изволению, благополучно достигнувый; радуйся, многая тамо духовная благая и душеполезная сокровища стяжавый.

Радуйся, многих тамо своим любомудрым житием в посте и молитве, неустаннем труде и бдении, и безответнем, Господа ради, послушании удививый; радуйся, в иноческих трудех и подвизех великим старцем Святыя горы тебе сравнивый.

Радуйся, Антоние, аки Богомудрая пчела, от труждающихся тамо отец, аки от различных цветов, сладость иноческую собравый; радуйся, туюжде сладость во Отечество сохранно принесый, и зде благоуспешно насадивый и возрастивый сторицею.

Радуйся, яко в монашество тоюжде сладостию многих, с нимиже и Феодосиа Великаго в слове и деле привлекл еси; радуйся, яко собранную братию твою духовною сладостию изобильно насытил и в добродетелех укрепил еси.

Радуйтеся, Антоние и Феодосие, монашескаго в России жития первоначальницы.

Кондак 3

Сила Вышняго в чистоте твое и непорочное всельшися сердце, преблаженне Феодосие, тако всего тебе Божиею любовию разжже, яко всех земных и временных удалятися, вечных же и нескончаемых выну искати тебе научи и вразуми, тем таковое твое о спасении души зряще тщание и усердие, умильно Всесильному Богу поем: Аллилуиа.

Икос 3

Имел еси, отче преблаженне Феодосие, превеликое желание, еже святая в Иерусалиме посетити места, и к сему делу желаемую обрел еси удобность, ко грядущим в Иерусалим приобщився, но злобный враг спону тебе и препятие содела, наусти бо матерь твою, яже вслед тебе гнавши, и достигши, аки злодея связана, в дом привлекши, по многом биении, твердо в храмине заключи, ты же, аки адамант, сия злострадания терпеливо понесл еси, посем от заключения испущен, паки на хлебопечение церковному литургисанию приличное вдался еси, чесому удивляющеся, сице тебе вопием:

Радуйся, отче Феодосие, непоколебимый и нерушимый терпения столпе; радуйся, пречудный и прекрасный смирения и кротости образе.

Радуйся, тяжкая матерняя биения и ногами попирания благодушно и мужественно терпевый; радуйся, тояжде ласкания и лобзания аки смертоносный вред себе вменивый.

Радуйся, служение Богу и Божией Матери паче всего вседушно возлюбивый; радуйся, церковному служению со всяким усердием от детства прилежавый.

Радуйся, сверстников поругания и посмеяния в честь себе вменивый; радуйся, всем старым и юным образ смирения и кротости тебе представивый.

Радуйся, всем обидяшим тебе вседушно погрешения простивый; радуйся, всеми добродетельными человеки паче сверстник твоих хвалимый, любимый и почитаемый.

Радуйся, добронравием и благочестием краснее, неже светлыми ризами, тебе украсивый; радуйся, матерняя и властительская одеяния, яко скверное блато, вменивый.

Радуйтеся, Антоние и Феодосие, монашескаго в России жития первоначальницы.

Кондак 4

От богомерзких сластей и волнений непреодоленен явился еси, преподобне отче наш Феодосие: ибо твое, еже непрестанно работати Господеви всегда имущи в уме и в сердце произволение, на кийждо день на большия простирался еси труды, и на кийждо день приятнейшим и любезнейшим Богу быти усердствовал еси, всякое же мира сладострастие и любочестие побеждая, Единому Богу выну воспевал еси: Аллилуиа.

Икос 4

Слышав, преблаженне отче Феодосие, жестокое святаго Антония и острое в пещернем затворе житие, скоротечно, аки елень на источники водныя, к нему тай от матере твоея текл еси, идеже доспев прилежно его молил еси, да тя в свое сожительство приимет и в число иночествующих впишет, он же, провидев в тебе живущую благодать Божию, неотлагательно повеле на тя иноческий возложити образ, ты же за то благодаривши Бога благодетеля, обоеручно иноческаго явился еси жития, и со Антонием купно непрестанно труждался еси, о чесом мы помышляюще, тако взываем к вам:

Радуйтеся, Антоние и Феодосие, иноческаго жития основатели; радуйтеся, первейшии новоначальных иноков в России наставницы.

Радуйтеся, в монашеское отишие, аки в некий корабль безопасный, к вам приходящих вводители; радуйтеся, предобрии в пучине мира сего влающихся управители.

Радуйтеся, мирския бури, волнения и мятежи в тишину мудре прелагающии; радуйтеся, всех любезно в доброе и спасительное пристанище наставляющии.

Радуйтеся, свирепеющия врагов шатания мудре усмиряющии; радуйтеся, от всех неприязненных обуреваний к вам притекающих удобно спасающии.

Радуйтеся, всех под ваш покров и защищение отечески приемлющии; радуйтеся, всех без лицеприятия от всех напастей и бед защищающии.

Радуйтеся, бедствующим всегда и во всем, и на коемждо месте добре предстательствующии; радуйтеся, за обидимых, озлобляемых и уничижаемых присноходатайствующии.

Радуйтеся, Антоние и Феодосие, монашескаго в России жития первоначальницы.

Кондак 5

Богоявленныя звезды, ихже на тверди Российстей яви Солнце Премирное, лучами высокия вашея святыни многих просвещающия, многих на путь боговедения наставляющия, многих к иночествованию приводящия, многих же в добродетелех, остром же и прискорбном житии утверждающия и укрепляющия, сие Божие изволение в вас добре исполнившееся зряще, поем благодарно всемилостивому Богу: Аллилуиа.

Икос 5

Видевше мнози богоугодное ваше в пещерах, аки во гробех, заключенное житие, умиляхуся душами, сердцы же сокрушающеся, спешно к вам, спасения ищуще, притекаху, смиренно просяще, да и их таковаго жития общниками соделавше, во всегдашнее Богу служение освятите: вы же помняще Рекшего: Грядущаго ко Мне не иждену вон, всех приходящих любезно приимасте, и отечески поучасте; темже сицевым вас венчаем песнопением:

Радуйтеся, преблаженнии отцы, многих от работнаго ига мирскаго в сладкую духа свободу изведшии: радуйтеся, многих истинно Христу работати и искренно Ему служити научившии.

Радуйтеся, вашими добродетельми многим ко спасению, якоже иногда Моисей в землю обетованную, путь открывшии; радуйтеся, многих не уже в землю обетованную, но в самая Небесная жилища введшии.

Радуйтеся, не словом точию, но множае паче делом и усердною к Богу молитвою своих учеников и последователей поучающии; радуйтеся, ваша купножители монашескими правилы красно и боголепно управляющии.

Радуйтеся, различными искушениями и напастьми отягченным скоро пособствующии; радуйтеся, от супостат боримым и тяжко насильствуемым всегда помоществующии.

Радуйтеся, одолеваемых от сопротивных, но не отчаивающихся и богонадежно в молитве вас призывающих, внезапным вашим пособием подкрепляющии; радуйтеся, всякое враждебное устремление сильно воспящающии.

Радуйтеся, собранное вами духовное стадо бодренным оком выну назирающии; радуйтеся, ваших учеников и наследников непрестанно на путь Божиих заповедей наставляющии.

Радуйтеся, Антоние и Феодосие, монашескаго в России жития первоначальницы.

Кондак 6

Проповедуемо и везде попремногу похваляемо бе ваше, преподобнии отцы, богоугодное и безмолвное житие, кто бо точию нестяжательное и в пещерных затворех продолжаемое сие видев или слышав, Ангелов вас паче, нежели человеков быти не мняше; терпению же вашему и различному тела умерщвлению кийждо удивляяся, Богу приличное воздая благодарение, купно с вами пояше песнь: Аллилуиа.

Икос 6

Возсиясте на круге Российския церковныя области, преблаженнии, аще бо и самих себе в темных пещерах, аки под спудом, заключисте, обаче лучами ваших подвигов и добродетелей, такожде вся окрестныя страны озаристе и просветисте, якоже чувственное солнце мир озаряет и просвещает, и тако многих сердца к богоугодному житию возбудисте и согреясте, и удобна к добродеянию сотвористе, яко и солнце, согревая землю, удобну творит ю к прозябению различных древ, и плодов, и былий сельных, и всякаго злака на службу человеком и скотом. О сем благодаряще Бога, сицевое вам приносим пение:

Радуйтеся, просветители в омрачении страстей пребывающих; радуйся, вразумители в суете и самозабвении жительствующих.

Радуйтеся, руководители в недоумении и заблуждении сущих; радуйтеся, управители добре житие начинающих.

Радуйтеся, укрепители в благом изнемогающих и малодушием и унынием колеблемых; радуйтеся, возбудители в небрежении спящих.

Радуйтеся, бодрости и трезвения предобрии учители; радуйтеся, нерадения и праздности известнии прогонители.

Радуйтеся, трудолюбия, еже всякому благу начало и утверждение, теплейшии рачители; радуйтеся, чистаго и непорочнаго жития неусыпающии хранители.

Радуйтеся, всех ко спасению изящнии и вернии путеводители; радуйтеся, всех благочестно и богоугодно жити хотящих мудрии наставницы.

Радуйтеся, Антоние и Феодосие, монашескаго в России жития первоначальницы.

Кондак 7

Хотя всезлобный враг доброму вашему начинанию спону и препятие сотворити, тако князя противу вас гневом разжже и яростию распали за пострижение в иночество слуг его, паче прочих любимых, некоего евнуха и сына болярска, яко нужда вам бе своя пещерная оставити жилища и инуде преселитися: обаче не долго сим своим ухищрением враждебник веселяшеся, ибо благодушный князь, вразумлен сый своею богобоящеюся супружницею, вскоре познав ваше незлобие и вражию разсмотрев хитрость и коварство, с молением посла к вам, да на свое паки возвратитеся прежнее местопребывание, о чесом возрадовавшеся, благодарно воспесте Богу: Аллилуиа.

Икос 7

Новый труд и новый подвиг по возвращении в пещерная ваша жилища воспряли есте, отцы преподобнии: на разширение бо монашеских келий и на устроение молитвеннаго храма неленостно устремистеся, да злокозненнаго врага гордыню поперете и его безстудное безумие посрамите, собранную же братию к богоугодному и добродетельному житию вящше возбудите и на усерднейшее Христу Богу служение подвигнете, на что мы, умныма взирающе очима, сице взываем к вам:

Радуйтеся, пещернаго иноческаго пребывания трудолюбнии обретатели и ревнители; радуйтеся, теплии монашескаго жития и преславнии защитницы.

Радуйтеся, обителей ваших бодрии и неусыпающии хранители; радуйтеся, княжескаго гнева и ярости смиреннейшии укротители.

Радуйтеся, врагов и неприятелей ваших истиннии и нелицемернии любители; радуйтеся, обиды вам творящих и напасти деющих праведнии рачители.

Радуйтеся, заповедей и советов Божиих усерднейшии исполнители; радуйтеся, к чистому и непорочному житию предводители благопоспешнии.

Радуйтеся, добронравия и благоговения учители преизящнии; радуйтеся, подвизающихся в благочестии и труждающихся в благотворении всесильнии силою Христовою помощницы.

Радуйтеся, в иноческих трудех неутружденнии подвижницы; радуйтеся, собранному вами стаду непреоборимии во всем поборницы.

Радуйтеся, Антоние и Феодосие, монашескаго в России жития первоначальницы.

Кондак 8

Странное ваше и вельми скорбное житие не токмо человеков на земли, но и ангелов на Небеси удиви: вы бо, заключившися в пещерах, аки в темных гробех, всеусердно в теплоте сердца и души Единому Богу работасте, да та, яже во дни и в нощи Создателю вашему приносимая служения, неведома и незнаема будут мирови, ведома же и знаема Самому Творцу явятся. Сего ради мы Богу, тако вас научившему и вразумившему, присно поем: Аллилуиа.

Икос 8

Все ваше, преблаженнии и богоноснии отцы, тщание и все о том бяше попечение, да выну всезлобному рода христианскаго врагу сопротивляетеся и гордую его главу попираете и стираете, общаго же всем Творца, купно со ученики своими в душах и телесех ваших прославите и в сем благом изволении вашем и богоугодном подвиге укрепляемии силою свыше, толико преуспесте, яко вся возмогосте о укрепляющем вас Христе Иисусе. Темже и слава Божия возсия из пещер ваших и озари вся концы земли, чесо ради таковое вам похвальное воздаем пение:

Радуйтеся, неутомимии хвалы и чести Божия в мире ревнители и проповедницы; радуйтеся, высокоумные вражия гордыни крепцыи смирители.

Радуйтеся, враждебных наветов и стужений достохвальнии упразднители; радуйтеся, неприязненных сетей и пагубных козней мужественнии воспятители.

Радуйтеся, глубоким смирением и кротостию, аки драгоценными бисерами себе украсившии; радуйтеся, в тех же боголюбезных добродетелех многих утвердившии.

Радуйтеся, в постничестве и воздержании древним пустынножителем поревновавшии; радуйтеся, в неустанней молитве, без всякаго стужения и уныния, дни и нощи проводившии.

Радуйтеся, в тойже пребывати молитве ваших последователей добре научившии; радуйтеся, како бодрствовати противо вражиим наветом и оных одолевати образ и путь нам показавшии.

Радуйтеся, на мысленныя враги пост, молитвы и коленопоклонения, вместо оружия, употреблявшии; радуйтеся, сицевым вашим тесным и скорбным житием Божию в мире славу умножившии.

Радуйтеся, Антоние и Феодосие, монашескаго в России жития первоначальницы.

Кондак 9

Всякий человеческаго естества чин, нищих и богатых, худородных и высокородных на убогое, смиренное и вельми острое житие ваше взирая, велие Богу воздаваше благодарение и попремногу прославляше Его благостыню и неизреченное милосердие, яко сице тесное и прискорбное проходити житие вас устрои, да вы многих от душегубительныя изведше стези, пастырски на стезю спасения наставите, поучающе их присно пети Создателю и Промыслителю: Аллилуиа.

Икос 9

Витии избраннии явистеся, преславнии отцы наши, но не по образу мира сего витийствовавшии, ибо яже мир сей любит, вы всем усердием возненавидесте, и яже блажит и вельми почитает, вы презресте, и далече от себе отвергше, аки непотребное и неполезное сметие, ногама своима попрасте, темже от всех таковое похвальное приемлете почитание:

Радуйтеся, мира и всех его сластей, красот и прелестей доблестнии презрители; радуйтеся, иноческаго нестяжания и нищеты теплейшии любители.

Радуйтеся, тела вашего и всех телесных чувств суровии умертвители; радуйтеся, кротости, смирения и воздержания приснии рачители.

Радуйтеся, все ваше утешение и блаженство в нищете и нестяжании положившии; радуйтеся, безмолвием и от мира устранением зело себе удобрившии.

Радуйтеся, всецело самих себе на Божий промысл и попечение возложившии; радуйтеся, сладких брашен и гортаноугодных питий никогдаже похотевшии.

Радуйтеся, мягких и светлых одеяний на ся никакоже возложившии; радуйтеся, многошвенныя рубища, аки драгоценныя украшения, во всецелом вашем житии всегда с любовию носившии.

Радуйтеся, вместо избранныя пищи, постом многодневным и острым тела умерщвлением вас питавшии; радуйтеся, вместо сладкаго пития, сердечными слезами себе самих напоевавшии.

Радуйтеся, Антоние и Феодосие, монашескаго в России жития первоначальницы.

Кондак 10

Спасти хотя многих, всех обращения и спасения милостивно ожидаяй Премилосердый Бог, других вас апостолов России яви, да вами многих вразумит и на правый спасения путь наставит, в чем вы апостольски потруждшеся, в неведении сущих евангельской истине неленостно поучая, к правоверию приведосте и к хранению Божиих заповедей и богоугодному и чистому житию словом и делом непрестанно возбуждасте, поя Богу Помощнику: Аллилуиа.

Икос 10

Стена тверда и крепкое ограждение явистеся, всехвальнии отцы, к вам прибегающим, не точию бо иночествовати с вами хотящим руку помощи милостивно подавасте, но и различными мирскими делы, напастьми и скорбьми отягченных и утесненных тако утешасте, якоже родители чада своя, во обстоянии скорбей и болезней сущия, утешают, отраду им своим попечением подающе и отеческою ласкою тяжесть скорбей облегчающе. За каковое ваше благодетельство сицевое вам благодарственное воздаем пение:

Радуйтеся, бедствующим и различными напастьми боримым скории помощницы; радуйтеся, обидимых и озлобленных известнии защитницы.

Радуйтеся, обуреваемых тяжкими мира сего прилоги предобрии кормчии; радуйтеся, убожествующих и в скорбней нищете сущих всещедрии обогатители.

Радуйтеся, алчущих и гладствующих милостивии кормители; радуйтеся, нестерпимою палимых и утесняемых жаждою предивнии прохладители.

Радуйтеся, одежды и крова лишенным в недрах милосердия Божия покров и убежище открывающии; радуйтеся, слепотствующих, наипаче же в законе Господни заблуждающих, пречуднии руководители.

Радуйтеся, болезньми и тяжкими недуги одержимых и томимых премудрии уврачеватели; радуйтеся, всех напастей, бед и скорбей сильнии и крепцыи прогонители.

Радуйтеся, всякаго добра временнаго и вечнаго податели; радуйтеся, с верою к вам притекающих от всех скорбных обстояний теплии защитители.

Радуйтеся, Антоние и Феодосие, монашескаго в России жития первоначальницы.

Кондак 11

Пение еже приносим вам, богоноснии отцы, несть довольно к похвалению преславных ваших подвигов и трудов вышечеловеческих, яко бо житие бе превосходящее житие человеческое, ангельскому же подобящееся, сице и похвалам от Ангел паче нежели от человек вам приносимым быти достоит: обаче усердное наше зряще произволение, любезно приносимое нами приимите пение, нас же от грех и всяких скверн и нечистот вашими молитвами очистите, да на всяк день и час чистым сердцем поем Богу: Аллилуиа.

Икос 11

Светоподательная на земном крузе явистася светила, Божия благодати исполненная, отцы преблаженнии, всю вселенную, из подземнаго пещернаго спуда, пресветлыми вашими добродетельми ясно просвещающия, дела бо ваша из подземных возсиявше заключений, тако всему миру во уведение и познание приидоша, яко и Восток оная ублажает, и Запад величает, и Юг восхваляет, и Север попремногу прославляет. Темже и мы сице вам от любве припеваем:

Радуйтеся, всех добродетелей неленостнии исполнители; радуйтеся, многих монашеских обителей предобрии соградители.

Радуйтеся, всяких добродетелей пресветлая зерцала; радуйтеся, крепкая и непреодолимая ваших обителей забрала.

Радуйтеся, прекрасная и пречудная Духа Святаго жилища; радуйтеся, всех богоугодных и благоприятных дел преудобренная вместилища.

Радуйтеся, Творцу и Богу вашему во временнем житии добре угодившии; радуйтеся, к исходу от сея временныя и многотрудныя жизни прекрасно себе уготовившии.

Радуйтеся, ваших учеников, аки истинных чад, не точию в животе сем, но и при исходе наипаче на богоугодное житие наставившии; радуйтеся, темже учеником, по отшествии отсюду, невидимое спребывание и всегдашнее содействие и помощь обещавшии.

Радуйтеся, в небесная жилища богопоспешно без всякаго препятия вшедшии; радуйтеся, мзду велию за ваша иноческая злострадания от Всещедраго Мздовоздаятеля восприемшии.

Радуйтеся, Антоние и Феодосие, монашескаго в России жития первоначальницы.

Кондак 12

Благодать, юже Всемилостивый и Всещедрый Бог от Своих неистощимых подаваше сокровищ, никогдаже в вас тща и праздна бываше, но выну обилен плод творяше, аки зерно доброе в добрую вверженное землю, вы бо верным и мудрым рабом, от своего господина таланты вземшим, уподобившеся, тако силами, свыше вам подаваемыми, трудолюбне деласте, яко да и Богу приятни и любезни явитеся, и себе в небесных селениях нескончаемое приобрящете воздаяние, непрестанно поюще Богу: Аллилуиа.

Икос 12

Поюще ваше безмолвное и весьма от житейских и мирских попечений удаленное, со Единым Богом житие, похваляем многоболезненныя труды и подвиги ваши, почитаем дневныя и всенощныя бдения и молитвы, славим частыя долулегания и коленопреклонения, и вся та чтим плоти умерщвления и духа сокрушения, яже любве ради Христовы благодушно подъясте, воспоминаем купно и мздовоздаяния, яже от праведнаго Судии и Мздовоздаятеля Бога обильно восприяли есте, сице воспевающе:

Радуйтеся, в небесней нескончаемей славе Ангелом уподобившиися; радуйтеся, честь равную патриархом приемшии.

Радуйтеся, в чине пророков, яко дар пророчества имущии, вписаннии; радуйтеся, к лику апостолов и евангелистов, яко словом и делом Христа благовестившии, сопричтеннии.

Радуйтеся, в сонме мучеников, яко много Христа ради претерпевшии, благочестно восприятии; радуйтеся, в собрании исповедников саном исповедничества почтеннии.

Радуйтеся, с девствующими, яко девственницы, возвеличеннии; радуйтеся, со всеми святыми добре Богу угодившими, участие и наследие обретшии.

Радуйтеся, пресладким и блаженным Пресвятыя Троицы лицезрением выну насыщающиися; радуйтеся, по иноческих подвизех и постнических трудех нескончаемым упокоением наслаждающиися.

Радуйтеся, неизреченных благ, преподобным от века уготованных, наследия праведно удостоившиися; радуйтеся, Царствия Небеснаго, вся в себе сладости и красоты, вся величия и блаженства, ум человеческий превосходящия, содержащаго, общницы и обладатели явившиися.

Радуйтеся, Антоние и Феодосие, монашескаго в России жития первоначальницы.

Кондак 13

О преблаженнии и всякия чести достойнии, отцы богоноснии, Антоние и Феодосие Печерстии, малое сие моление, нами, недостойными, вам от любве приносимое, любезно приимше, ваше купно же и наше Отечество от всех неприязненных нападений и вражиих наветов непоколебимо и невредимо соблюдите, нас же, сыновне с верою и любовию к вам притекающих, от всяких бед, скорбей и напастей отечески избавите, да выну благодарно поем о вас Богу Спасителю: Аллилуиа.

Этот кондак читается трижды, затем 1-й икос «Ангелом подобнаго…» и 1-й кондак «Избраннии и Духа Святаго…».

Молитва

Преподобнии и богоноснии отцы наши Антоние и Феодосие, к вам мы грешнии, яко к теплым заступником и скорым помощником и известным предстателем, усердно прибегаем, смиренно просяще вашея помощи и заступления в бездне зол и бед погружаемии, яже на всяк день и час нам и от человек лукавых приключаются и от духов злобы поднебесныя, всегда и везде и всякими образы погибели душ и телес наших ищущих, находят на ны. Известны бо есмы несумненно, коль великое к милосердному Богу имате дерзновение: еще бо на земли между странствующими к Горнему Отечеству пребывающе, велию силу благодати Божия, устами и руками вашими чудодействующия, в себе показасте, яко и огнь с небес, по подобию Илиину, на показание места, на немже имяше быти основана, на честь и всегдашнее Бога и Божия Матере славословие, великая церковь Печерская, и росу, по образу Гедеонову, на очищение и вечное прославление тогожде святаго места низведосте: такожде вемы, коль многое множество мужей и жен, из разных стран и народов, скорбящих и напаствуемых, или различными тяжкими болезнями одержимых, или под бременем насилия и притеснения неудобь носимым упадающих и жития своего отчаявающихся, вашими молитвами и заступлением получиша скорое себе облегчение и избавление. Аще убо вся та помоществования, еще в смертном суще странствовании, бедствующим милостивно подавасте, кольми паче днесь, егда уже Всемогущей предстасте Троице, и большее приясте дерзновение, во еже молити Ю о нашем недостоинстве, и нас в бедах и печалех сущих утешати, в тяжких нуждах и напастех по нас ратовати, в злоключениях и бедствиях нас заступати и защищати. Сего ради и мы, столь многими враждебными наветами, озлоблениями и коварными злоумышлениями отвсюду угрожаемии и теснимии, вашему теплому и сильному по Бозе вручаем себе покровительству и защищению, и усердно молим благостыню вашу: сохраните нас неврежденных от всех бед и зол, наипаче же от бесовских козней и хитростей, льстивых подступов и наглых нападений, да не будем им в поругание и посмеятельство, но тако их крепкою вашею помощию от нас отжените, якоже во дни оны от обители отгнасте их, многая пакости иногда деющих. Сицевая же их неполезная укротивше на ны востания и устремления, тако нас, утвержденных в вере, надежде и любви постоянных соделайте, да николиже нами каковое возобладает недоумение, или сумнение в тех, яже Святая Мати Церковь веровати поучает, и исповедати дерзновенно повелевает. Надежду нашу на Господа Бога в душах наших весом и мерою правды и милости Божия сице устройте, яко да ниже излишне уповаем обещанная от Бога без труда и подвига восприяти, ниже, зряще великая прегрешения и тяжкая законопреступления, весьма Божия милосердия отчаиваемся. Любовь в сердцах наших сице утвердите, и достойну соделайте, да ничтоже земное и скорогибнущее паче Бога, вся сотворшаго и вся в Себе содержащаго, ниже помышляем, ниже желаем, ниже предпочитаем. Чувства наша душевная вкупе и телесная в таковом благоустроении и благолепной мерности на всяк день и час удерживайте и снабдевайте, да теми никогдаже Благаго, Человеколюбиваго Бога прогневаем. Разум уцеломудрите, да он паче о Бозе, Его вездеприсутствии и благопромышлении помышляет, неже о временных и ничтоже сущих печется. Развращенную волю нашу выну исправляйте, да николиже хощет, еже хотению Божию сопротивляется, но теми да уловляется, и в сих безмятежно и безпечально да пребывает, яже суть Богу угодна и приятна, человеку же спасительна и полезна. Память истрезвляйте, да та непрестанно представляет уму и сия, имиже Всемилостиваго прогнева Бога и Его благоутробие раздражи и оная, яже всякаго человека, кроме всякаго сумнения, по временной сей жизни ожидают; к симже и Отечества вашего не забывайте, но в мирном устроении пребывати ему у Престола Величества Божия непрестанно ходатайствуйте. Вся люди, сущыя в стране нашей, мирных и безпечальных сохраните, и от всякаго злаго обстояния вскоре избавите. Егда же приспеет наше от временнаго сего жития отшествие и к вечности преселение, сице нам в помощь предстаните и от насилий вражиих свободите, якоже предстасте иногда Еразму монаху в тяжком смертном бедствии обретавшемуся, и сице сердца наша к истинному покаянию и жалению о грехах подвигните, якоже и онаго сердце подвигосте, иже в истинном покаянии от здешних к Богу отъиде, да и мы, в сицем совести нашея свидетельстве, Пресвятей и Неразделимей представше Троице, прославляем Ю купно с вами и всеми святыми в безконечныя веки. Аминь.

Кондак 1

Избранный угодниче Христов, иноков русских первоначальниче и великий чудотворче, преподобне отче наш Антоние, с любовию приносим ти сия хвалебныя песни, яко небесному предстателю нашему; ты же, имеяй дерзновение ко Господу, молися о спасении нас, грешных, да зовем ти благодарно:

Радуйся, Антоние, монашескаго на Руси жития первоначальниче.

Икос 1

Ангел во плоти был еси, преподобне отче Антоние, аще и на земли родился еси во граде Любечи, но вышний град, Иерусалим прекрасный, гражданина тя стяжа: обитаеши бо в нем со Ангелы и святыми и чудес лучами озаряеши выну Отечествие твое земное, от нас же, чтущих тя, услыши похвальное пение сицевое:

Радуйся, родителей благочестивых сыне; радуйся, града Любеча святое прозябение.

Радуйся, рая Иисусова ветве многоплодная; радуйся, делы благими Христу благоугодивый.

Радуйся, от младенчества Богом избранный; радуйся, от юности Бога всею душею возлюбивый.

Радуйся, вся заповеди Господни верно сохранивый; радуйся, во оправданиях Владычних непорочно ходивый.

Радуйся, чистое вместилище добродетелей; радуйся, красное селение Духа Святаго.

Радуйся, целомудрия рачителю; радуйся, смирения любителю.

Радуйся, Антоние, монашескаго на Руси жития первоначальниче.

Кондак 2

Видев Господь душу твою, отче Антоние, пламенем Божественныя любве объятую, в юношеском возрасте научи тя богоугождению истинному, Егоже промыслом наставляем, пещеру в Любечи ископал еси и в ней в молитвах усердных пребывал еси, подвизался сокрушити главу адскаго змия и победити вся его искушения, да возможеши достойно и праведно воспевати Триединому Богу ангельскую песнь: Аллилуиа.

Икос 2

Разум небесный свыше тебе даровася, преподобне отче Антоние, и в юных летех мудростию старческою процвел еси, вся тленная в уметы вменив, единому же Богу благоугождати вожделев, чесому свидетель неложен пещера, в юности тобою ископанная в Любечи для подвигов духовных, яже яко труба всем возвещает, каков подвижник был еси в юности твоей. О сем дивящеся, вопием ти:

Радуйся, юноше, Богом возлюбленный; радуйся, отроче десницею Всевышняго освященный.

Радуйся, пророка Божия Илии, в пещере жившаго, благий подражателю; радуйся, Крестителя Христова Иоанна, в пустыни обитавшаго, ревностный последователю.

Радуйся, пещерное подвижническое житие усердно возлюбивый; радуйся, многая благодатная дарования стяжавый.

Радуйся, закон Бога твоего на скрижалех сердца твоего написавый; радуйся, заповеди Евангелия Христова свет стезям твоим имевый.

Радуйся, Христа премного возлюбивый; радуйся, непорочно и свято на земли поживый.

Радуйся, мир и вся красная его презревый; радуйся, о горних благах выну помышлявый.

Радуйся, Антоние, монашескаго на Руси жития первоначальниче.

Кондак 3

Силою Божиею укрепляемый, Отечествие твое земное оставил еси, Антоние богомудре, и в жребий Богоматере, Святую Афонскую гору, удалился еси, да тамо обрящеши пристанище тихое ко спасению и навыкнеши иноческому равноангельному житию, егоже возжелел еси, да сподобишися благоприятно славословити Творца всяческих Бога и пети Ему: Аллилуиа.

Икос 3

Имея помысл чист и душу непорочну, отче Антоние, яко овча кроткое, на пажить Богоматернюю, Святую Афонскую гору, притекл еси и к доброму пастырю иноческия обители обратился еси, прося его, да причтет тя к стаду словесных своих овец; тот же, провидев в тебе сосуд избран Духу Святому, с любовию тя прия и во иноческий чин облече. Мы же ублажаем тя звании сими:

Радуйся, иноче боголюбезный; радуйся, постниче нелицемерный.

Радуйся, воине духовный, не обязавыйся куплями житейскими; радуйся, куплю небесную совершивый.

Радуйся, Христа, бисера драгаго, обретый; радуйся, Того ради Отечествие земное оставивый.

Радуйся, Того ради странник и пришлец на земли чуждей бывый; радуйся, любовию крепкою с Ним навеки соединивыйся.

Радуйся, Афонския горы жителю добрый; радуйся, жребия Богоматерняго прозябение благодатное.

Радуйся, преподобных отец Афонских духовный учениче; радуйся, богоносных пустынножителей Святыя горы неленостный сподвижниче.

Радуйся, Антоние, монашескаго на Руси жития первоначальниче.

Кондак 4

Бури страстей избежав, в пустыни Афонстей безстрастия благодатнаго достигл еси, преподобне отче Антоние, и духовно возрасл еси в мужа совершенна о Христе; темже безмолвия крайняго возжелев, с благословения игумена твоего, в горе, в пещере вселился еси и тамо в молитве и посте безмолвно подвизался еси, вопия немолчно Богу: Аллилуиа.

Икос 4

Слышав игумен твой глас небесный, повелевающ ему, да послет тя, отче Антоние, в страну Русскую на подвиги духовныя, призва тя и благослови, да идеши туде, идеже рожден был еси, и устроиши обитель иноческую на месте, свыше Богом на то предызбраннем. Сего ради тебе зовем:

Радуйся, светильниче Божия благодати, на Афоне возжженный и Россию духовно просветивый; радуйся, яко свет добрых дел твоих немерцаемо светится присно.

Радуйся, заре невечерняя Солнца Правды Христа; радуйся, послушания рачителю, безпрекословно волю игумена твоего исполнивый.

Радуйся, святое благословение горы Афонския в наследие стране Русской принесый; радуйся, в волю Божию всего себе предавый.

Радуйся, мудрый странниче, иский Отечествия горняго; радуйся, краснеи нозе твои в путь, спасительный для многих, направивый.

Радуйся, вся дольняя презревый, о горних же выну воздыхавый; радуйся, нищету духовную себе совершенно усвоивый.

Радуйся, смирения святаго преисполненный; радуйся, слезами молитвенными себе орошавый.

Радуйся, Антоние, монашескаго на Руси жития первоначальниче.

Кондак 5

Боготечней звезде подобен быв, отче Антоние, от Афона на Русь притекл еси, и во граде Киеве, в пещере варяжстей, вселился еси, обиталище разбойников в храм молитвы претворив, идеже день и нощь в молитве неусыпно подвизался еси и благоумиленно воспевал еси Господу: Аллилуиа.

Икос 5

Видевше тя людие киевстии, Антоние богоносне, яко Ангела Божия, всеми добродетельми украшена и равноангельное житие в пещере провождавша, прихождаху к тебе усердно, ови благословения и молитв от тебе ищуще, ови же подвизатися с тобою хотяще; ты же, по глаголу Христову, приходивших к тебе не отгонял еси, но спасению человеков радостно служил еси, и основание славней лавре Печерстей положил еси, яже красуется тобою, яко краеугольным камнем своим, и воспевает ти песни таковыя:

Радуйся, подвижничество духовное в Русской стране насадивый; радуйся, слез твоих теченьми оное во сто крат уплодоносивый.

Радуйся, делателю добрый винограда небеснаго; радуйся, водительству твоему себе вдавших управителю.

Радуйся, в подземных кровех пространство царствия небеснаго получивый; радуйся, к нему бодренно и неуклонно ученики твоя путеводивый.

Радуйся, правило веры истинныя; радуйся, образе кротости духовныя.

Радуйся, верховный отче иноков русских; радуйся, зерцало светлое всех добродетелей иноческих.

Радуйся, о немже радуются Ангелы на небеси; радуйся, о немже Бога славят человецы на земли.

Радуйся, Антоние, монашескаго на Руси жития первоначальниче.

Кондак 6

Проповедник смирения святаго был еси братии твоей пещерней, преподобне отче Антоние; смирения бо ради игуменства и священства уклонился еси, любя паче поучати братию не толико властию и словом, колико примером святоподвижнаго жития твоего, по глаголу Господню, всем быв слугою. Темже ныне прославляешися со Ангелы и сладце поеши Пресвятей Троице: Аллилуиа.

Икос 6

Возсиял еси на горах Киевских яко столп утверждения верных, Антоние богомудре, и яко денница светлая, от мрака пещернаго востекл еси на гору небесную, отонудуже озаряеши Церковь православнорусскую, в нейже почитаешися по достоянию первоначальником иноческаго жития и слышиши от верных чад ея пение сицевое:

Радуйся, прославльший горы Печерския добродетельми твоими духовными; радуйся, претворивый пещерное жилище разбойников в храмы Господа славы.

Радуйся, в подземных кровех главу глубиннаго змия крепко сокрушивый; радуйся, богомыслием непрестанным еще во плоти небесная блага созерцавый.

Радуйся, утешения Божественнаго сподобивыйся; радуйся, умиления молитвеннаго преисполненный.

Радуйся, многих чад о Христе стяжавый; радуйся, подражатели жития твоего святаго отечески возлюбивый.

Радуйся, яко семя твое духовное не оскуде в земли Русской; радуйся, яко веселишися со чады твоими во обителех райских.

Радуйся, яко плод благокрасный, предивнаго Феодосия, духовно возрастил еси; радуйся, яко с ним вкупе во славе небесней пребывая, Бога выну о нас, грешных, умоляеши.

Радуйся, Антоние, монашескаго на Руси жития первоначальниче.

Кондак 7

Враг спасения человеческаго хотя скорбь тебе сотворити, преподобне отче наш Антоние, вооружи гневом на тя великаго князя Киевскаго Изяслава; ты же, гневу его место уступая, в область Черниговскую удалился еси и, в горе Болдиней пещеру себе ископав, тамо люботрудно подвизался еси, и тем начало обители Свято-Ильинския положил еси, яже благоговейно чествует ныне твою пещеру, чудесы многими прославленную, о нихже вернии прославляют дивнаго во святых Своих Бога, зовуще: Аллилуиа.

Икос 7

Новаго тя Антония Великаго дарова Господь стране Русской, преподобне отче; якоже бо той древле всю Церковь вселенскую светом добродетелей и чудес своих просвети и первоначальник всех иноков явися, тако и ты ныне всю Церковь Русскую подвиги твоими и чудесы духовно облистал еси и по достоянию первоначальник иноков русских именуешися. Темже зовем ти:

Радуйся, во смирении твоем великих дарований Божиих удостоенный; радуйся, нищетою духовною богатство небесное стяжавый.

Радуйся, древним пророком Божиим равночестный; радуйся, прозорливости благодатныя преисполненный.

Радуйся, будущая яко настоящая созерцавый; радуйся, тайная помышления человеческая прозревавый.

Радуйся, вся искушения духов тьмы победоносно отражавый; радуйся, велию власть на диавола от Господа получивый.

Радуйся, от мучительства демонскаго многая человеки молитвою твоею свободивый; радуйся, яко исцеления благодатная от гроба твоего верным подаеши.

Радуйся, победивый враги невидимыя глубоким твоим смирением; радуйся, низложивый и посрамивый гордыню злобнаго велиара.

Радуйся, Антоние, монашескаго на Руси жития первоначальниче.

Кондак 8

Странное и безмолвное житие провождал еси, богоносне отче, егда от Чернигова паки в Киев возвратился еси и от Дальния пещеры твоея в Ближнюю преселился еси, юже со ученики твоими ископав, яко рай красный удобрил еси подвиги твоими и чудесы, и в ней безмолвно пребывая, умиленно воспевал еси Царю Славы Христу: Аллилуиа.

Икос 8

Весь в Бозе быв богомыслием непрестанным, преподобне отче Антоние, в светлом видении в Цареграде, во Влахернстей церкви, вкупе с преподобным Феодосием, таинственно виден был еси каменоздательми великия печерския церкве, егда Пресвятая Владычица Богородица посылаше их в Киев сооружати церковь ту и вручаше им божественную икону Успения Своего. Слышавше таковая превелия чудеса Божия, тебе, чудотворцу преславному, вопием:

Радуйся, изрядный слуго Пресвятыя Богородицы; радуйся, присный прославителю Ея милости и чудес.

Радуйся, обитель славную во имя Ея святое на Руси основавый; радуйся, икону Ея чудотворную, от рук Ея дарованную, радостно приявый.

Радуйся, сим образом Ея божественным обитель твою духовно обогативый; радуйся, с Нею вкупе молитися за ны ко Господу дерзновение получивый.

Радуйся, верный исполнителю заповедей Сына Ея и Бога; радуйся, преславный совершителю многих великих чудес.

Радуйся, пещерный жителю, всю Русь исполнивый славою подвигов твоих; радуйся, от темных мест подземных светивый миру равноангельным житием.

Радуйся, безмолвниче дивный, вне житейских сует поживый; радуйся, затворниче благоумиленный, молчаливая уста имевый.

Радуйся, Антоние, монашескаго на Руси жития первоначальниче.

Кондак 9

Всем сердцем Бога возлюбив, отче Антоние, Богом возлюблен был еси, Иже послушаше благоутробно молитвы твоя и исполняше милостиво вся прошения твоя. В указание тебе места, идеже име создатися великая печерская церковь, просил еси, преподобне, у Господа: да будет по всей земли роса, на месте же том суша; и паки: да будет по всей земли суша, на месте же том роса; и бысть тако по прошению твоему. Темже радостно воспел еси чудес Богу: Аллилуиа.

Икос 9

Витий человеческих похвалы превосходит святоподвижническое житие твое, преподобне отче Антоние: кто бо достойно может восхвалити тя, чудотворца преславнаго, огнь с небес сведшаго молитвою твоею, якоже пророк Илия древле, и огнем тем все хврастие попалившаго на месте, идеже име создатися великая церковь печерская, в знамение велией благодати Божией, яже тамо обитати будет. О сем дивящеся, смиренно глаголем:

Радуйся, одушевленной церковию Бога Живаго бывый; радуйся, в храме Триипостаснаго Господа душу твою освятивый.

Радуйся, огнедохновенныя дары Духа Святаго в сердце твое приемый; радуйся, духоносцем, апостолом Христовым, единонравный.

Радуйся, низводителю предивный огня с небесе; радуйся, удостоверителю чудотворный Божия благоволения к месту великия печерския церкве.

Радуйся, адаманте, блистаяй дарами Божия благодати и не сокрушимый прилоги вражиими; радуйся, столпе непоколебимый святыя православныя веры.

Радуйся, чудотворче преславный и богоприятный; радуйся, молитвенниче крепкий и скороуслышанный.

Радуйся, руце твои преподобнеи со дерзновением многим горе воздевавый; радуйся, прошения твоя со слезами теплыми Господеви приносивый.

Радуйся, Антоние, монашескаго на Руси жития первоначальниче.

Кондак 10

Спасителя душ наших, Господа Иисуса Христа, видети сподобился еси в видении дивнем, преподобне отче Антоние, и обетования благая от уст Его Божественных услышал еси, яко верный Его раб и угодник. Молися убо Ему, преподобне, да и нас, убогих, не отринет от сладкаго лицезрения Своего, но сподобит со святыми выну видети лице Его пресветлое и пети Ему: Аллилуиа.

Икос 10

Царя Небеснаго Христа верный раб и последователь был еси, отче преподобне, сего ради чудотворения даром от Него обогатился еси. Мы же, тя целебника благодатнаго ведуще, усердно ныне к святому гробу твоему приходим, и цельбы безмездныя душам и телесем нашим от него приемлюще, благодарственно глаголем ти:

Радуйся, величием подвигов твоих древним богоносным отцем уподобивыйся; радуйся, глубиною смирения твоего превозшедый сподвижники твоя.

Радуйся, сети вражия яко паучину сокрушивый; радуйся, в царствие горнее яко орел воспаривый.

Радуйся, во след себе многия ученики ко Христу приведый; радуйся, чада твоя духовная от искушений диавольских бодренно хранивый.

Радуйся, ленивыя подвигнувый ко исправлению христоподражательным твоим житием; радуйся, грешныя к покаянию приведый богомудрыми твоими словесы.

Радуйся, наказателю любвеобильный; радуйся, увещателю пресладкий.

Радуйся, отче, отцев красото; радуйся, пастырю добрый тобою собраннаго словеснаго стада.

Радуйся, Антоние, монашескаго на Руси жития первоначальниче.

Кондак 11

Пение всеумиленное Господеви приносил еси, преподобне отче Антоние, и, возлежа на одре смертнем, молился еси усердно об обители твоей и ученицех; таже прощение и благословение твоей братии преподав, с миром почил еси, к лику святых и преподобных отец приложився, с нимиже ныне сладце поеши Христу Богу: Аллилуиа.

Икос 11

Светоподательный светильник являешися по смерти, преподобне отче Антоние, из-под спуда пещернаго поставленный на версех небесных, отонудуже светлостию чудес просвещаеши Церковь Христову. Просвети, угодниче Божий, и наша мрачныя души светом Христовым и молитвами твоими помози нам тьмы греховныя избавится, лучи благодати Божия в сердца наша восприяти и неосужденно пети тебе:

Радуйся, светильниче, благодатию сияяй; радуйся, зерцало пресветлое иноческаго жития.

Радуйся, вторый Моисее, мысленныя скрижали, добродетели твоя, нам от горы Святыя принесый; радуйся, вертоград духовный на горах Печерских насадивый.

Радуйся, яко розги его от юга и до севера прострошася; радуйся, яко листвия его присно зеленеют.

Радуйся, оляденевшую в язычестве землю Русскую духовно оплодотворивый; радуйся, садоделатель добрый в ней бывый.

Радуйся, новосаждения богоугодная в ней возрастивый; радуйся, от пещерных затворов в рай Иисусов цветы многая пресадивый.

Радуйся, Ангеле земный; радуйся, человече небесный.

Радуйся, Антоние, монашескаго на Руси жития первоначальниче.

Кондак 12

Благодать Божия хранит священный гроб твой, Антоние, отче наш, огня исхождением и воды излиянием от него возбранивши хотевшим обрести мощи твоя; ты бо, смирен сый, и по смерти не восхотел еси явити мощей твоих миру, сим поучая нас благодатному смирению, да во умилении смиренномудренно поем Богу: Аллилуиа.

Икос 12

Поюще святоподвижное и равноангельное житие твое, преподобне отче, хвалим, славим и величаем укрепившаго тя Господа, даровавшаго нам в тебе образ святый и достоподражательный. Приими убо, угодниче Христов, от нас, смиренных, с любовию всем сердцем тя почитающих, сия нелестныя похвалы:

Радуйся, Пресвятыя Живоначальныя Троицы благоволением увенчанный; радуйся, Пресвятыя Владычицы Богородицы милостями ущедренный.

Радуйся, ангельских воинств содружества сподобивыйся; радуйся, блаженства святых удостоенный.

Радуйся, сонаследниче преподобных; радуйся, постников благодатное удобрение.

Радуйся, пещерножителей славо и похвало; радуйся, всея православныя русския страны крепкое ограждение.

Радуйся, Святыя Лавры твоея непостыдное упование; радуйся, подвизающимся тамо спасения вечнаго ходатаю.

Радуйся, телеса наша безмездно врачуяй чрез прикосновение к честному твоему гробу; радуйся, души наша возводяй к наследию блаженства райскаго святыми твоими молитвами.

Радуйся, Антоние, монашескаго на Руси жития первоначальниче.

Кондак 13

О великий первоначальниче иноков русских и преславный чудотворче, преподобне отче наш Антоние! Мы, чада твоя духовная и овцы пажити твоея, сия малыя песни хвалебныя усердно тебе приносяще, молим тя: яви нам любовь твою отеческую и умоли Господа Бога избавити нас геенны и удостоити Царствия Небеснаго, да поем Ему со святыми: Аллилуиа.

Этот кондак читается трижды, затем икос 1-й «Ангел во плоти был еси…» и кондак 1-й «Избранный угодниче Христов…».

Молитва

О пастырю наш добрый и наставниче, приснопоминаемый иноков русских первоначальниче, преподобне и богоносне отче наш Антоние! Ты горе, на небеси, мы низу, на земли, удаленнии от тебе не толико местом, колико греховною нечистотою нашею, обаче памятующе отеческую любовь твою к людем, ти сродным, припадаем и молим ти ся со умилением и верою: помози нам, грешным, покаянием очиститися и достойными быти помилования и прощения от Господа и Создателя нашего.

Умоли благость Его даровати нам великия и богатыя милости: земли плодоносие, воздуха благорастворение, мир глубок, братолюбие искреннее, благочестие нелицемерное, житейских потреб довольство, и да не во зло обратим благая, даруемая нам от щедродательныя Его десницы, но во славу имене Его святаго и во спасение наше. Сохрани, угодниче Божий, предстательством твоим святым всех нас. Соблюди, чудотворче святый, благомощными твоими молитвами обитель твою и всю страну нашу невредимыми от всякаго зла, и вся люди, жительствующия в обители твоей и на поклонение семо приходящия, осени небесным твоим благословением, и в скорбех, бедах и болезнех утешение, избавление и исцеление им подаждь, да благодарно славим, хвалим и величаем прославльшаго тя Господа, чрез тебе дивно благодетельствующаго нам, Безначальнаго Отца, Единороднаго Его Сына и Единосущнаго Его Духа, Троицу Живоначальную и Нераздельную, и твое святое заступление, во веки веков. Аминь.

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою, радуяся, Тоя чудеса.

Яко грубословен и косноязычен, недоумея вам, преподобнии отцы, хваление принести, молюся: дарствуйте молитву о мне, еже датися отсвыше дару воспети память вашу, славна бо есть миру и славно прославися.

От младых ногтей в дар принесосте себе Богови, о преблаженнии отцы, темже, прием ваше благое предприятие, благодатию Духа наставил вы есть на путь правый.

Заповедей спасенных послушавше, жизнь временную преобидесте и, Крест Господень на рамо вземше, мрачный мир непреткновенно преидосте, Небесным желанием водими.

Отечество, родители, други и богатство, аки прелесть, отвергше, горний Иерусалим Бога же Отца, не стыдящагося вас братию нарицати, Христа, един бисер взыскати тесным путем изволисте, Антоние свободоимените и Феодосие богодарованне.

Яко пустыннолюбныя горлицы, гор Печерских достигше, богоноснии отцы, во подземная места вселистеся и, на твердом духовнаго желания основании гнездо свое положше, богопеснивыя породисте птенцы, иночествующих лики.

Троичен: Слава Ти, слава, Троице Пресвятая, тихообразно подающая благодать в сердца верных, да скончаем хваления святых дело и возвеселимся зело, честнии друзи Твои, Господи.

Богородичен: Управи ум мой, Пречистая, во хвалении преподобных Твоих, да не уклонься в неподобная, пленится в работу лукавства, и буду радование чуждему.

Песнь 3

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.

Яко елень, возжаждав духовнаго пития, отче Антоние, от Печерския горы на Афонскую гору, скача, пришед, обрете струи ангеловидных отец жития, и сим поревновав, от потока учения их испив, и утвердися.

Втораго тя Моисея, Антоние, скрижали добродетелей на Печерскую гору принесшаго, слышав, Феодосий, притек, глаголя: вчини мя в сих любовь, утверди мя в них, аки в мирех, уязвен бо есмь любовию сопоследовати христоподражанному житию твоему.

Любовию и желанием ко Богу единоумне сопрягшеся, отцы преподобнии, на колесницу смирения, нищеты, терпения и чистоты вседосте и превысоких достигосте святых селений.

Кто не удивится вашему житию, о преблаженнии отцы? Кто не почудится ревности по Бозе? Яко во плоти суще, Ангелом весьма уподобистеся, ихже и сожителие суще ныне, не забудите и нас, песньми вас ублажающих.

Троичен: Непостижимая благость и действо Твое, во Троице Единый Боже: яко бренных воскриляеши горе и от миродержавныя нощи выспре ко свету возвышаеши, приводиши и устрояеши, Бог бо еси и твориши, елика хощеши.

Богородичен: По величию Твоему, Пречистая, блажат Тя вси роди, и мы с ними блажим песньми, чтуще Тя раболепным поклонением, и величаем.

Седален

Небесное богатство и присносущную славу тщащеся восприяти, нищету и смирение смирившагося Владыки восприясте и миру себе распясте со похотьми и страстьми, тем, блажаще память вашу, преподобнии отцы наши Антоние и Феодосие, молим: молите Христа Бога даровати нам велию милость.

Песнь 4

Ирмос: Седяй в Славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Самовластная ума, отче Антоние, оставль, под иго Владычне преклонился еси, емуже и доблественный Феодосий припрягся: пленистеся в послушание Христово и бысте добрии делателие, единонравны сердцем и духом.

Не устрашиша вас в темных пещерах демонская страхования, доблемудреннии воини, преподобнии отцы, но падеся ратуяй вас под ногами вашими, низвержен оружием теплыя ко Богу молитвы.

Твердое ваше и жестокое житие видев, Всеблагий Бог от темных мест просвети вас дарованием чудес и славны сотвори миру, ихже недостоин бе мир, в горах и вертепах крыющихся толиких светил.

Яко пресветлая светила постави вас Бог, преподобнии отцы, на свещницы с под спуда, и просветисте жития добродетельми иночествующих лики, иже, собрани, добре пожиша вашим наставлением.

Троичен: Царю царем, Всемогущая Троице, брения немощию обложенным нам, рабом Твоим, даждь благодать ясно пети память преподобных Твоих, в нихже удивил еси вся хотения Своя, Боже.

Богородичен: Всесильная Владычице, нас, немощных, препояши силою на сопротивных, подающи немощней плоти крепость: о Тебе бо и немощнии крепкия враги побеждают и победительная в песнех дароносят.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Учением и творением бысте образ иночествующим, отцы треблаженнии, и вашим наставлением мнози успеша в заповеди Господни и сих исполнением ко горнему шествию благий путь улучиша.

Пророческим сподобльшеся даром, достохвальнии отцы, ов бо огнь указательный на место с небеси упасти сотвори, ов же скудную житницу молитвою муки исполни, от тех даров крупицами насытити души наша молимся.

Яко законодавцы, постническим ликом предтекосте: ты, отче Антоние, скрижали деяния и видения предлагая, богоданный же Феодосий жезлом правления море страстей пресек, предхождение тем показуя во обетованную землю.

Упованием будущих благ себе вооруживше и Креста меч в руках имуще, победисте мысленнаго Амалика, и наша враги пособите победити, яко предводителей наших, молим вы, отцы преподобнии.

Троичен: Миродательная Троице, Единочестный Боже, мир огради, православныя люди, предстоящия в честнем храме преподобных Твоих, храм Себе сотворяя сердца приносящих Ти песнь хваления.

Богородичен: Мироположнице и скиние Пресвятая Бога Слова, нам слово даждь и мысль управи, во еже пети Тя, яко Благую Благому Родительницу.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Вышше естества человеческаго подвигшеся, преподобнии, уподобистеся безплотных чином, темже и почесть сих улучисте; сея богодарованныя вам благодати и нас, чада ваша, не лишите ходатайством своим ко Богу, молимся.

Вам, аки неусыпным стражем, Дева и Богомати ввери дом Свой, егоже пасосте, от волков мысленных стрегуще в нем собранное вами стадо, о преблаженнии.

Всегдашним яже к Богу ума воскрилием и воздеянием рук, преподобнии отцы, ставше, Духу Пресвятому селение себе сотвористе, темже вас, аки дом Божий преукрашен, хвалами украшаем.

Сия еста преудобренная отца, аки Херувими, осеняющии дом Богоматере, и аки премудрии вожди иноческому лику, ихже не удалитеся заступати во всяких нуждах и скорбех.

Троичен: Троице Пресвятая, желательное достояние давшая во скиниях святых богоносным первоначальником нашим, сих ради и нас того сподоби, в жизни сей сохраняющи от языческих нахождений.

Богородичен: Тя, Заступницу мира и Богоматерь, всего живота моего спасение предлагаю, Ты бо, Бога рождши, спасти можеши поющия Тя и в заступление крова Твоего прибегающия.

Кондак, глас 8

Двоицу великих отец и правило иноков светлое, умныя зари, онебесившия Российскую Церковь, кто по достоянию хвалами воспоет? Тии бо Престолу Божию предстоят. Но, яко имущии дерзновение ко Святей Троице, Антоние преблаженне и Феодосие приснопамятне, молитеся о молебная вам приносящих и любовию песньми вас ублажающих.

Икос

В присносущнем Пресвятыя Троицы Божественнем свете да восприимете селение, преподобнии отцы, вся лета жизни сея в тесной пещере пожившии; темже и, преставльшеся от временных, великим чудес дарованием от Господа сподобистеся: болезни исцеляти, бесы от человек прогоняти и без вреда обитель свою сохраняти, заступающе в скорбех; молитеся о молебная к вам приносящих и песньми любовию вас ублажающих.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Благую жизнь зде поживше, блаженныя кончины сподобистеся, отцы святии, престависте бо ся от временных к вечным честною смертию, яже бывает честна преподобных Твоих, Господи Боже отец наших.

Равными труды ниву душ ваших возделавше, преподобнии, равная семена добродетелей посеясте и по кончине равных воздаяний пожинаете радостотворныя рукояти, поюще: Господи Боже отец наших.

На воде покойне при источнице вод пресладких, на ложах преподобных упокояющеся, преблаженнии отцы, от потока сладостнаго поне каплею вашея благодати чада ваша обдарствите, поющия в день памяти вашея: Боже отец наших.

Троичен: Троическое нераздельне, раздельне же Лицы, обаче Едино чтем Божество, Безначальна Отца, Собезначальна Сына и Преблагословеннаго, от Отца исходящаго Духа.

Богородичен: По Божественному существу Отцу Своему Единосущественный Бог Слово от Девы единоестествен человеком явися, плоть прием из пречестных кровей и благословенную нарек Свою Матерь.

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Грады и отечества своя, якоже Авраам, остависте, вышняго града со Авраамом жителие ныне, богоноснии отцы, суще, оттуду посетите нас в день памяти вашея и умолите Христа с вами нам пети во веки.

Иже ваше торжество празднующим днесь, о святии угодницы, молитеся избавится всякаго вражия навета, от варварских нахождений, на сопротивных возвышающе рог христиан православных, поющих Господа во веки.

Милостивно о нас простирайте руце свои ко Владыце, святии первоначальницы наши, и неотлучно назирайте стадо ваше, якоже обещастеся, сохраняюще то от волков мысленных, сподобите же с вама пети Господа во веки.

Славити вашу память кто не восхощет, той да не улучит вечныя славы, нам же, славящим, умолите Господа, идеже лицы святых, идеже собор преподобных со Ангелы, песньми превозносити Господа во веки.

Троичен: Яко на превознесенную возшедше гору, приидите, людие, станем во храме преподобных первоначальников Печерских и прославим Троицу Пресвятую, Яже нас собра во днешний день прославити память святых Своих.

Богородичен: Святую гору Божию и селение Вышняго мудрствующе Тя, Дево Чистая, зовем: слава Ти, матерей и девам славо и похвало человеческаго рода.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Иже верою приходящим ко храму вашему, святии отцы, утешение подавайте в скорбех, сохраняюще сих различных озлоблений, яко да вас, заступников наших, присно величаем.

Аки десятиструнная гусль и велегласная труба, Печерская вами согражденная Лавра проповедует вашу память, Антоние богомудре и Феодосие достохвальне, созывающи люди на хвалу и почесть, ихже и мы величаем.

Принесенное в дар благодарственное наше пение назрите, преподобнии отцы, и тихосмотрительным оком иже грубогранесловное исправите, приемлюще не яко в дар, но яко во сердец наших к вам рачение, имже вас днесь величаем.

Владычней подобящеся благости, аки две лепте, пение и делание сие от нас приемше, треблаженнии отцы, испросите грехом оставление, в час же конечный предстаните нам, обнадеждующе упованием доити, идеже святии Христа Царя величают.

Елико духовную благодать Пресвятаго Духа во грубый разум, толико воспети дерзнух память вашу, Антоние святе и Феодосие блаженне, сим навершая: дающему молитву молящемуся и пение хотящему Богу Единому слава буди, буди.

Богородичен: Хотением смотрения Своего вся сотворивый, Пречистая, из Тебе воплотивыйся Бог Истинный и Человек Совершенный.

Светилен

Света суще вышняго ближайшии граждане и прекраснаго Иерусалима насельницы святии, нижних, выну ратуемых, посетите и подавайте помощь вашу честную память ныне восхваляющим.

Песнь 1

Ирмос: Воду прошед, яко сушу, и египетскаго зла избежав, израильтянин волияше: Избавителю и Богу нашему поим.

Воды мирскаго мятежа, аки Моисей с Аароном Чермное море, преподобный Антоний с Феодосием блаженным немокренно преидоста и, без вреда пристанища Небеснаго достигше, радостно возгласиста: Избавителю и Богу нашему поим.

Волнами житейскими влаяйся аз, окаянный, и, да не погрязну фараонитски в глубине зол, бояся, к вам вопию: о отцы преподобнии, Избавителю и Богу нашему о мне помолитеся.

Водами слез твоих фараона мысленнаго потопил еси, Антоние, во умерщвленном же телеси, аки в тимпане, победная воспел еси, Феодосие, оба же о ны моление Избавителю и Богу нашему принесите.

Богородичен: Воды страстей моих изсуши, рождшая Незаходимое Солнце, Христа, и на сух путь безстрастия настави мя, добрая Путеводительнице, да благодарственная Избавителю Богу нашему и Тебе воспою во веки.

Песнь 3

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний Краю, верных Утверждение, Едине Человеколюбче.

Небесное житие в пещерах земных показасте, отцы преподобнии, утверждающеся же в любви Божией, желаемаго горняго края достигосте и зрети сподобистеся Единаго Человеколюбца.

На Небесный круг востекл еси, святе Антоние, к Небесным обителем преставился еси, преподобне Феодосие: тамо оба мольбу о нас, грешных, принесите к Единому Человеколюбцу.

Небесных благ лишився аз, окаянный, к вам притекаю, о Небеснии граждане: да не в конец отчужден буду части спасаемых, умолите о мне Единаго Человеколюбца.

Богородичен: Небес пространнейшая Богородительнице, Невместимаго вместившая в пречистых ложеснах Твоих, сподоби мя, грешнаго, получити место в селениих праведных и с теми наслаждатися лицезрения Единаго рожденнаго от Тебе Человеколюбца.

Седален

Моление твое теплое, Антоние преблаженне, огнь с небесе сведе на место, идеже ныне основася Богородична церковь, твоя же прилежная мольба, богоносе Феодосие, на то же место благодать Божию образом дуги от ветхия церкве преведе: оба бысте чудотворцы, оба теплии к Богу молебницы, оба велицыи Того угодницы; и ныне молитвами вашими попалите хврастие грехов наших, и благодати Божией приобщите ны, и от бед избавляйте нас, вскоре предстательствующе.

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Услышав глас Господень в Афоне к игумену, глаголющ: посли Ми Антония в Россию, яко тамо его требую, и прииде Антоний в новопросвещенную страну повелением Господа своего, и прослави Того Божество.

Услышав Феодосий глас Христа, во Евангелии глаголюща: грядите по Мне и возьмите иго Мое на себе, абие, вся яко уметы вменив, во след Его пойде и прослави Того Божество.

Услышавше равноангельное двою тою отцу в пещерах пребывание, мнози стекошася к нима подражати постнических подвигов и, образом добродетельнаго ею жития наставльшеся угождати Богу, прославиша Того Божество.

Богородичен: Услыши, Владычице, стенание и мольбы христоименитых людей, призри на озлобление и горесть утесняемых отвсюду, виждь слезы и рыдания сущих в бедах и скорбех и умилосердися на рабы Твоя, да Тя, Богородицу, прославляем.

Песнь 5

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Просветишася, яко небеса двема светилами, горы Киевския двема начальнейшими отцы преподобными, Антонием, аки солнцем, Феодосием, аки луною, и свет святыни их во тьме пещерной светяше, и тьма не объят их: людие же, на свет добрых дел ею взирающе, прославляху Отца Небеснаго.

Просветися вся Россия лучами чудес ваю, сынове немерцающаго Света, отцы преподобнии, аще и под спудом пещерным скрыстеся: творимая бо вами богоугождения втайне показа Бог яве и прослави прославляющих Его.

Просвещаетеся ныне, аки солнце, во Царствии Небеснем, о богоблаженнии: просветите помраченную мою душу и на светлую заповедей Божиих стезю наставите мя.

Богородичен: Просвети лице Твое на рабы Твоя, Христе, Свете истинный, и, отгнав тьму прегрешений наших, света присносущнаго общники сотвори ны, ради Рождшия Тя и преподобных Твоих, Человеколюбче.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Молитву излиял еси ко Господу, преподобне Антоние: да будет по всей земли роса, на месте же имевшия быти церкве суша; и паки: по всей земли суша, на месте же святем роса, и услышан был еси вскоре. Молю, и о мне помолися, да влаги моя изсушит страстныя, изсохшее же сердце мое росою благодати да оросит и от тли да возведет мя Бог мой.

Молитвами твоими, преподобне Феодосие, обитель твоя во оскудениих наполняшеся земных благ; душе моей скудной, не имущей добрых дел, исходатайствуй спасительная благая, и от тли да возведет мя Бог мой.

Молитвами преподобных Твоих угодников, Антония и Феодосия Печерских, излиявших пред Тобою сердца своя и молящихся к Тебе о всем мире выну, от тли, Боже мой, возведи мя.

Богородичен: Молитву мою по Господе Бозе к Тебе, Госпоже Богородице, проливаю и возвещаю моя душевныя печали: яко злыми моими делы в погибель влекомь есмь и не исправляюся, греховным оружием уязвляемь есмь и не чувствую, кит преисподняго ада пожрети мя хощет, и не бежу от него; обаче к Твоему милосердию вопию: от тли, Владычице моя, возведи мя.

Кондак, глас 2

Твердыя столпы благочестия, недвижимая иноческих законоположений основания и необоримыя стены Российския восхвалим: Антония, возлюбльшаго Бога, и Феодосия, возлюбленнаго Богом: труды бо онех и постническия подвиги прият паче всякаго всеплодия Един во святых прославляемый.

Икос

Кое похваление принесем двоице великих угодников Божиих: Антонию, обретшему благодать пред Господем, Феодосию, сподобльшемуся благодати от Господа, обема же послужившима Богоблагодатней Пречистей Деве? Якоже бо древле два Херувима славы бяху стояще у кивота завета, сице кивоту одушевленному, Божией Матери, сии два отцы преподобнии предстояста выну, хваляще воплощшагося от Нея Бога, и ныне предстоят с Херувимы Престолу неприступныя славы, аможе предста Царица одесную, крилами же непрестанных своих молений осеняют Россию, и умилостивляемый ими бывает с Богородицею Христос Бог, Един во святых прославляемый.

Песнь 7

Ирмос: От Иудеи дошедше, отроцы в Вавилоне иногда верою Троическою пламень пещный попраша, поюще: отцев Боже, благословен еси.

От горы Афонския блаженный Антоний в Россию пришед и, да будет на месте сем Святыя Горы благословение, рек, пояше: отец наших Боже, благословен еси.

От дому родительню преподобный Феодосий к Иерусалиму тещи желая, на горы Киевския прииде и сотвори я своею святынею, яко Сиона; труды же своими распространив обитель, яко Иерусалима, пояше: отец наших Боже, благословен еси.

От мирских любосластных страстей, аки от вавилонскаго пламене, неопальни соблюдшеся, отцы святии ныне в Церкви торжествующих с радостию вопиют: Единый в Троице Боже отец наших, благословен еси.

Богородичен: От Христа Бога посылахуся на проповедь два два, аможе Сам идти хотяше; Пречистая же Дева Богородица, хотящи Сама новопросвещенныя люди российския посетити и сотворити Себе посреде их селение, посла в Россию, аки апостольскую двоицу, сия два избранныя рабы Своя, Антония и Феодосия, поющия: воплощенный от Девы Христе Боже, со Отцем и Духом благословен еси.

Песнь 8

Ирмос: Царя Небеснаго, Егоже поют вои ангельстии, хвалите и превозносите во вся веки.

Царя Небеснаго в ангельском чину прославити хотя, пещеру житием твоим равноангельным соделал еси аки Небо, Антоние святе, и, земных Ангелов лик собрав, глаголал еси к ним: Егоже поют на Небеси вои ангельстии, Того мы на земли хвалим и превозносим выну.

Царю Небесному ввоинитися хотя, железом приковался еси, аки воинским поясом препоясуяся, Феодосие терпеливодушне, и подвизался еси, яко добр воин Иисус Христов, дондеже, мир и плоть одолев, врага диавола победил еси, торжественно хваля и превознося укреплявшаго тя Господа.

Царю Небесному с вои ангельскими ныне на Небеси предстояще, не забудите нас, притекающих к вам, о отцы преблаженнии, да и мы сподобимся с вами в будущей жизни хвалити и превозносити Христа во веки.

Богородичен: Царя Небеснаго рождшая, Богоневесто Владычице, сподоби ны части праведных, да с ними купно восхвалим рождшагося от Тебе Владыку и прославим во веки.

Песнь 9

Ирмос: Воистину Богородицу Тя исповедуем, спасеннии Тобою, Дево Чистая, с безплотными лики Тя величающе.

Воистину мертвы показастеся мирови, прежде погребения в пещеры, недра земная, аки во гроб, всельшеся, но Богови живы бесте, богомысленными вашими умы к Небеси паряще и со безплотными лики Того и купно Рождшую Его величающе.

Воистину житие ваше ангельско бысть: во плоти бо суще, нерадисте о плоти, но, аки пленника, ту, умерщвленьми смиривше, покористе духови и безплотных подражасте, неусыпно Господа и Госпожу Богородицу величающе.

Воистину наследницы Царствия Небеснаго сотвористеся, земная наследия презревше и отчуждившеся суетнаго мира, присвоистеся Богови и, разрешшеся союзов плоти, со Христом ныне жительствуете, со безплотными лики Тому и Пренепорочней Того Матери предстояще и о нас молящеся.

Богородичен: Воистину Тобою человеческий род получи спасение, о Пренепорочная Дево Марие! Ты бо соединила еси с человеком Бога, в пречистей Твоей утробе воплотивши неизреченное Отчее Слово, Ты и нас, грешных, удалившихся от Господа, паки к Господу приближи, и примири, и присоедини Ему, да со безплотными лики, купно и с теми, иже во плоти ангельски пожиша, и Тебе, и рождшагося от Тебе Христа Владыку величаем во веки.

Светилен

Света суще вышняго ближайшии граждане и прекраснаго Иерусалима насельницы святии, нижних, выну ратуемых, посетите и подавайте помощь вашу честную память ныне восхваляющим.