Кондак 1

Взбра́нней Воево́де победи́тельная, я́ко из­ба́вль­ше­ся от ве́ч­ныя сме́р­ти бла­го­да́­тию от Те­бе́ ро́жд­ша­го­ся Хри­ста́ Бо́­га на́­ше­го и Тво­и́м ма́терним пред Ним хо­да́­тай­ством, бла­го­да́р­ствен­ная воспису́ем Ти, раби́ Твои́: я́ко иму́щая держа́ву непобеди́мую, от вся́­ких нас бед и ско́рб­ных об­стоя́­ний сво­бо­ди́, зо­ву́­щих: ра́­дуй­ся, Бла­го­да́т­ная Бо­го­ро́­ди­це Де́­во, всех скор­бя́­щих Ра́­дос­те.

Икос 1

А́н­гел пред­ста́­тель по́с­лан бысть с Не­бе­се́ ре­щи́ Бо­го­ро́­ди­це: ра́­дуй­ся, возвеща́я Боже́ственным воплоще́нием Хри­сто́­вым хотя́щую роди́тися от Нея́ Ра́­дость все­му́ ми́­ру, в ско́р­би погиба́ющу. Те́м­же и мы, грех­ми́ обремене́ннии, на­де́ж­ду спа­се́­ния в Те­бе́ улучи́вше, уми́ль­но взы­ва́­ем Ти:

Ра́­дуй­ся, Бо́­жие ко гре́ш­ным благоволе́ние; ра́­дуй­ся, ка́ю­щих­ся пред Го́сподом Бо́­гом кре́п­кое за­ступ­ле́­ние. Ра́­дуй­ся, па́д­ша­го Ада́ма воззва́ние; ра́­дуй­ся, слез Е́виных из­бав­ле́­ние. Ра́­дуй­ся, грехо́вную отъе́млющая скве́рну; ра́­дуй­ся, ба́­не, омы­ва́ю­щая со́­весть. Ра́­дуй­ся, ро́жд­шая Изба́вителя, без­за­ко́­ния на́­ша ту́­не очища́ющаго; ра́­дуй­ся, всечу́дное всех к Бо́­гу при­ми­ре́­ние. Ра́­дуй­ся, мо́сте, вои́стину преводя́й нас от сме́р­ти к животу́; ра́­дуй­ся, мир от по­то́­па грехо́внаго спа́сшая. Ра́­дуй­ся, ле́ствице не­бе́с­ная, Е́ю­же Гос­по́дь к нам сни́­де; ра́­дуй­ся, вина́ всех обо́жения. Ра́­дуй­ся, Бла­го­да́т­ная Бо­го­ро́­ди­це Де́­во, всех скор­бя́­щих Ра́­дос­те.

Кондак 2

Ви́­дя­ще то́­ки чу­де́с, излива́емыя от свя­ты́я Твоея́ ико́­ны, бла­га́я Бо­го­ро­ди́­тель­ни­це, я́ко Ты еси́ мо­ля́­щих­ся бла­га́я по­мо́щ­ни­ца, оби́­ди­мых за­сту́п­ни­ца, ненаде́ющихся наде́жда, пе­ча́ль­ных уте­ше́­ние, а́лчущих корми́тельница, на­ги́х оде­я́ние, де́в­ствен­ных це­ло­му́д­рие, стра́н­ных наста́вница, тру­жда́ю­щих­ся по́­мощь, сле­пы́х про­зре́­ние, глухи́х благослы́шание, больны́х ис­це­ле́­ние, благода́рственне во­пи­е́м о Те­бе́ Бо́­гу: Алли­лу́иа.

Икос 2

Ра́­зум недоразуме́нный на­ходя́­щих на ны лю́­тых скор­бе́й ра­зу­ме́­ти и́щуще, к Те­бе́ при­бе­га́­ем, о Ма́­ти и Де́­во, уте­ше­ния тре́бующе. Ты же, Я́ко бла­га́я, нау­чи́ ны ра­зу­ме́­ти в них блага́го Сы́­на Тво­его́ милосе́рдое про­мыш­ле́­ние во спа­се́­ние душ на́­ших и очи­ще́­ние мно́гих со­гре­ше́­ний, да взы­ва́­ем Ти ра́­дост­но:

Ра́­дуй­ся, обу­ре­ва́­емых ти́­хое при­ста́­ни­ще; ра́­дуй­ся, сумня́щихся из­ве́ст­ное утвер­жде́­ние. Ра́­дуй­ся, еди́на Ма́­ти ми­ло­се́р­дия; ра́­дуй­ся, ско́­рая по­мо́щ­ни­це су́­щим в бе­да́х и на­па́с­тех. Ра́­дуй­ся, скорбьми́ гре­хи́ на́­ша очища́ющая; ра́­дуй­ся, печа́лию на́­ша не́­мо­щи ду­ше́в­ныя врачу́ющая. Ра́­дуй­ся, су́етныя ра́­дос­ти ми́­ра се­го́ презира́ти нас науча́ющая; ра́­дуй­ся, от ми́­ра к преми́рным ум наш возводя́щая. Ра́­дуй­ся, от люб­ве́ зем­ны́я к не­бе́с­ней Бо­жией любви́ нас привлека́ющая; ра́­дуй­ся, в са́мых стра­да́­ни­ях на́­ших уте­ше́­ние и бла­го­да́т­ную жизнь нам по­даю́­щая. Ра́­дуй­ся, обетова́ние благ ве́ч­ных; ра́­дуй­ся, Хо­да́­таи­це ве́ч­ныя ра́­дос­ти. Ра́­дуй­ся, Бла­го­да́т­ная Бо­го­ро́­ди­це Де́­во, всех скор­бя́­щих Ра́­дос­те.

Кондак 3

Си́­лою свы́­ше укре­пи́ мя, бла­га́я Вла­ды́­чи­це, неду́гующа те́­лом и ду­ше́ю, и по­се­ще́­ния Тво­его́ спо­до́­би и про­мыш­ле́­ния, мрак уны́ния и ско́р­би, облежа́щий мя, отгоня́юще, да спаса́емый То­бо́ю, непреста́нно во­пию́ Бо́­гу: Алли­лу́иа.

Икос 3

Иму́­щи бо­га́т­ство ми­ло­се́р­дия не­из­ре­че́н­ное, всем скор­бя́­щим ру́­ку по́­мо­щи простира́еши, не­ду́­ги врачу́ющи, стра́с­ти исцеля́ющи. Не пре́­зри и ме­не́, бла­га́я Вла­ды́­чи­це, на од­ре́ не́­мо­щи моея́ низлежа́ща и во­пию́­ща Ти:

Ра́­дуй­ся, ми́­лос­ти со­кро́­ви­ще мно­го­це́н­ное; ра́­дуй­ся, от­ча́­ян­ных еди́на на­де́ж­до. Ра́­дуй­ся, те́­ла мо­его́ врачева́ние; ра́­дуй­ся, ду­ши́ моея́ спа­се́­ние. Ра́­дуй­ся, тве́р­дая кре́­пос­те немощны́х; ра́­дуй­ся, изнемога́ющих за­сту́п­ни­це и укреп­ле́­ние. Ра́­дуй­ся, гнев Бо́­жий Тво­и́м мо­ле́­ни­ем ско́ро утоля́ющая; ра́­дуй­ся, стра́с­ти на́­ша си́­лою мо­ли́тв Тво­и́х укроща́ющая. Ра́­дуй­ся, сле­пы́х зре́­ние, глухи́х слы́­ша­ние; ра́­дуй­ся, хромы́х хожде́ние, немы́х глаго́лание. Ра́­дуй­ся, бо­ля́­щих бла­го­на­де́ж­ное по­се­ще́­ние; ра́­дуй­ся, Я́ко То­бо́ю по ме́ре ве́­ры подаю́тся бла­го­да́т­ная ис­це­ле́­ния всем немощству́ющим. Ра́­дуй­ся, Бла­го­да́т­ная Бо­го­ро́­ди­це Де́­во, всех скор­бя́­щих Ра́­дос­те.

Кондак 4

Бу́ря мно́гих бед и на­па́с­тей обдержи́т мя, и волне́ния не ктому́ терплю́: Ты же, Я́ко ми́лостивая Ма́­ти Спа́­са мо­его́ и Бо́­га, воз­дви́г­ни ру́­це к Сы́­ну Тво­ему́, моля́щи Его́, да при́зрит на лю́тую скорбь се́рд­ца мо­его́ и воздви́гнет мя из пучи́ны отча́яния, во­пию́­ща­го Ему́: Алли­лу́иа.

Икос 4

Слы́шащи, Пре­свя­та́я Де́­во и Ма́­ти, Симео́на пра­вед­на­го прорече́ние: Те­бе́ же Само́й ду́­шу про́йдет ору́­жие, слага́ла еси́ в се́рд­це Тво­е́м вся гла­го́­лы сия́, разумева́ющи, я́ко ра́­дость ма́терняго се́рд­ца о ча́дех мно́гих пе­ча́­лей в ми́­ре сем бы­ва́­ет прича́стна. Те́м­же, я́ко искуше́нней по вся́ческим и спострада́ти ма́терней ско́р­би могу́щей, взы­ва́­ем Ти:

Ра́­дуй­ся, ра́­дость ми́­ру Хри­ста́ Спа­си́­те­ля ро́жд­шая; ра́­дуй­ся, мир от скор­бе́й из­бав­ля́ю­щая. Ра́­дуй­ся, хуле́ния и клеветы́ на Сы́­на Тво­его́ терпе́вшая; ра́­дуй­ся, страда́нием Его́ спострада́вшая. Ра́­дуй­ся, ско́рб­ных матере́й уте­ше́­ние; ра́­дуй­ся, чад их благода́тное охране́ние. Ра́­дуй­ся, в бе­да́х ско́­рое нам за­ступ­ле́­ние; ра́­дуй­ся, за­блу́жд­ших ис­прав­ле́­ние. Ра́­дуй­ся, младе́нцев пита́ние; ра́­дуй­ся, ю́ных наставле́ние. Ра́­дуй­ся, Ма́­ти сиро́тствующих; ра́­дуй­ся, вдов за­ступ­ле́­ние. Ра́­дуй­ся, Бла­го­да́т­ная Бо­го­ро́­ди­це Де́­во, всех скор­бя́­щих Ра́­дос­те.

Кондак 5

Богото́чную Кровь Сы́­на Тво­его́, на Кре­сте́ за спа­се́­ние на́­ше излива́емую, зря́щи, я́ко Раба́ Гос­по́д­ня, смире́нно во́ли От­ца́, И́же на небесе́х, повину́ющаяся, нам о́б­раз злострада́ния и терпе́ния яви́ла еси́, да и мы, в пещи́ ис­ку­ше́­ний и бед су́щии, во­пи­е́м смире́нно Бо́­гу: Алли­лу́иа.

Икос 5

Ви́­дя Тя Сын Твой и Бог при Кре­сте́ стоя́щую с возлю́бленным ученико́м и се́рд­цем Ему́ сраспина́ющуюся, гла­го́­ла­ше: Же́но, се сын Твой, и ученику́: се, Ма́­ти твоя́, всыновля́я Те­бе́ вся ве́­рую­щия в Не­го́. Мы же, я́ко о́бщницы ско́р­би и страда́ний Сы́­на Тво­его́, име́юще в Те­бе́ благу́ю Ма́­терь, на Тя все упо­ва́­ние в ско́р­би воз­ла­га́ю­ще, во­пи­е́м Ти:

Ра́­дуй­ся, Ма́­ти ро́­да хри­сти­а́н­ска­го; ра́­дуй­ся, усы­но­ви́в­шая нас при Кре­сте́ Сы́­на Тво­его́. Ра́­дуй­ся, Бо́­га с че­ло­ве́­ки соедини́вшая; ра́­дуй­ся, ве́р­ных Го́сподеви сочета́вшая. Ра́­дуй­ся, А́гнице, ро́жд­шая А́гнца, взе́мшаго гре­хи́ ми́­ра; ра́­дуй­ся, ча́ше, че́рплющая нам ра́­дость от Ис­то́ч­ни­ка без­сме́р­тия. Ра́­дуй­ся, спору́чнице спа­се́­ния гре́ш­ных; ра́­дуй­ся, взыска́ние поги́бших. Ра́­дуй­ся, неча́янная гре́ш­ных ра́­дос­те; ра́­дуй­ся, па́дших воста́ние. Ра́­дуй­ся, цели́тельнице всех немоще́й; ра́­дуй­ся, утоле́ние вся́­кия пе­ча́­ли. Ра́­дуй­ся, Бла­го­да́т­ная Бо­го­ро́­ди­це Де́­во, всех скор­бя́­щих Ра́­дос­те.

Кондак 6

Про­по­ве́­ду­ют ми́­лос­ти Твоя́, Бо­го­ма́­ти, вси концы́ вселе́нныя, и́бо честны́м по­кро́­вом Тво­и́м по­кры­ва́е­ши весь род христиа́нский, о не́м­же непреста́нно мо́лишися Хри­сту́ Спа­си́­те­лю на́­ше­му и избавля́еши от всех бед бла­го­нра́в­ныя и бо­го­боя́­щия­ся ра­бы́, ве́р­но во­пию́­щия Бо́­гу: Алли­лу́иа.

Икос 6

Воз­сия́ бла­го­да́ть све­то­за́р­ная от пре­чу́д­ныя ико́­ны Твоея́, Бо­го­ма́­ти, пред не́ю­же со сле­за́­ми при­па́­даю­ще, мо́­лим Ти ся: от­же­ни́ о́блак наше́дших на ны ис­ку­ше́­ний, да во­пи­е́м Ти ра́­дост­но:

Ра́­дуй­ся, принося́щая к Сы́­ну Тво­ему́ и Бо́­гу мо­ле́­ния ве́р­ных; ра́­дуй­ся, и Сама́ у Пре­сто́­ла Сы́­на Тво­его́ непреста́нно моля́щаяся о нас. Ра́­дуй­ся, предста́тельнице к Бо́­гу, мир от бед спа­са́ю­щая; ра́­дуй­ся, за­сту́п­ни­це ро́­да хри­сти­а́н­ска­го, от Бо́­га нам дарова́нная. Ра́­дуй­ся, дре́­во бла­го­сен­но­ли́ст­вен­ное, и́м­же покрыва́ются мно́­зи; ра́­дуй­ся, дре́­во светлоплодови́тое, и́м­же пита́ются ве́рнии. Ра́­дуй­ся, по­кро́­ве ми́­ру, ши́рший о́блака; ра́­дуй­ся, земле́ обетова́ния, из нея́же тече́т мед и мле­ко́. Ра́­дуй­ся, све́тлый о́блаче, ве́р­ныя непреста́нно освеща́ющий; ра́­дуй­ся, сто́л­пе о́гненный, на­став­ля́яй избра́нныя к небе́сному насле́дию. Ра́­дуй­ся, ни́во, растя́щая оби́­лие щед­ро́т; ра́­дуй­ся, пода́тельнице вся́­кия бла́­гос­ти. Ра́­дуй­ся, Бла­го­да́т­ная Бо­го­ро́­ди­це Де́­во, всех скор­бя́­щих Ра́­дос­те.

Кондак 7

Хо­тя́­щи яви́­ти то́­ки чу­де́с от Своея́ ико́­ны, Всех скор­бя́­щих Ра́­дос­ти, повеле́ла еси́, Вла­ды́­чи­це, боля́щей Евфи́мии моле́бная пе́­ния пред то́ю соверша́ти, и получи́вши ис­це­ле́­ние, всем пропове́дати ми́­лос­ти, ра́­ди тоя́ ико́­ны явле́нныя, да не сокры́т бу́дет ис­то́ч­ник бла­го­да́т­ных изцеле́ний всем тре́­бую­щим. Те́м­же и мы не таи́м Тво­и́х благодея́ний, но благода́рственне про­слав­ля́ю­ще Бо́­га, во­пи­е́м Ему́: Алли­лу́иа.

Икос 7

Но́вая ку­пе́ль Силоа́мская па́­че о́ныя дре́вния яви́­ся, Пре­чи́с­тая Вла­ды́­чи­це, храм Твой, в не́м­же покланя́емся чудотво́рней ико­не Тво­е́й: И́бо не еди́ною в ле́то и то́кмо пе́рвее входя́щим здра́­вие те́­ла подае́ши, но всег­да́ вся́кий не­ду́г и вся́­кую я́зву ду­ше́в­ную и теле́сную врачу́еши с ве́­рою и лю­бо́­вию к Те­бе́ при­бе­га́ю­щих. Се­го́ ра́­ди во­пи­е́м Ти:

Ра́­дуй­ся, ку­пе́ль, в ней­же вся ско́р­би на́­ша погружа́ются; ра́­дуй­ся, ча́ше, Е́ю­же ра́­дость и спа­се́­ние восприе́млем. Ра́­дуй­ся, ка́­ме­ню, напои́вший жа́ждущия жи́з­ни; ра́­дуй­ся, дре́­во, услажда́ющее сла́ныя воды́ жите́йскаго мо́ря. Ра́­дуй­ся, животво́рныя воды́ не­ис­то­щи́­мый ис­то́ч­ни­че; ра́­дуй­ся, ба́­не, омы­ва́ю­щая грехо́вную скве́рну. Ра́­дуй­ся, скор­бе́й на́­ших услаж­де́­ние; ра́­дуй­ся, пе­ча́­лей на́­ших утоле́ние. Ра́­дуй­ся, бо­ле́з­ней на́­ших врачева́ние; ра́­дуй­ся, бед из­бав­ле́­ние. Ра́­дуй­ся, де́монов попра́ние; ра́­дуй­ся, вра­го́в посрамле́ние. Ра́­дуй­ся, Бла­го­да́т­ная Бо­го­ро́­ди­це Де́­во, всех скор­бя́­щих Ра́­дос­те.

Кондак 8

Стра́нницы и прише́льцы вси ес­мы на зем­ли́ сей, по глаго́лу апо́столову: бе­ды́ от вра­го́в, бе­ды́ от сро́дник, бе­ды́ от лжебра́тии тер­пя́­ще в лише́ниих мно́гих и ско́р­бех. Ты же, Вла­ды́­чи­це, Я́ко Бла­га́я Одиги́трие, наста́ви нас к ти́­хо­му при­ста́­ни­щу, и мо­ли́ Сы́­на Тво­его́ проще́нию пре­гре­ше́­ний нам пре́ж­де кон­ца́ дарова́тися, да непреста́нно во­пи­е́м Бо́­гу: Алли­лу́иа.

Икос 8

Все жи­тие́ на́­ше на зем­ли́ боле́зненно и пе­ча́­ли испо́лнено от клеветы́, досажде́ния, укоре́ния и ины́х многови́дных бед и на­па́с­тей: немощству́ет бо те́­ло, изнемога́ет и дух наш. К Те­бе́ у́бо при­бе­га́­ем, Бо­го­ма́­ти, пред пре­чи́с­тою ико́­ною Твое́ю при­па́­даю­ще, ис­по́л­ни ра́­дос­ти и ве­се́­лия ско́рбная серд­ца́ на́­ша, да во­пи­е́м Ти:

Ра́­дуй­ся, путеводи́тельнице, к небе́сному оте́честву нас руководя́щая; ра́­дуй­ся, Ца­ри́­це не́­ба и зем­ли́, врата́ ра́йс­кая нам отверза́ющая. Ра́­дуй­ся, ми́лостивая, нас ми́лующая; ра́­дуй­ся, домострои́тельнице, жи­тие́ на́­ше до́б­ре устроя́ющая. Ра́­дуй­ся, руно́ ороше́нное, е́же Гедео́н предви́де; ра́­дуй­ся, блаже́нное чре́во, не­вме­сти́­ма­го все́­ми Бо́­га вмести́вшее. Ра́­дуй­ся, купино́ неопали́мая; ра́­дуй­ся, неруши́мая сте­но́. Ра́­дуй­ся, жи­во­но́с­ный ис­то́ч­ни­че; ра́­дуй­ся, цве́­те не­увя­да́­емый. Ра́­дуй­ся, умягче́ние злых сер­де́ц; ра́­дуй­ся умиле́ние бла­ги́х. Ра́­дуй­ся, Бла­го­да́т­ная Бо­го­ро́­ди­це Де́­во, всех скор­бя́­щих Ра́­дос­те.

Кондак 9

Вся­кая жите́йская в ми́­ре сем сла́­дость пе­ча́­ли бы­ва́­ет прича́стна: сла́­ва не стои́т, бо­га́т­ство мимотече́т, ле́пота и здра́­вие увяда́ют, дру́зи и и́скреннии сме́р­тию отъе́млются. Услади́ у́бо на́­ша ско́р­би, бла­ги́х вино́вная, Твою́ нетле́нную даю́щи ра́­дость нам, во­пию́­щим Бо́­гу: Алли­лу́иа.

Икос 9

Ве­ти́и мно­го­ве­ща́н­нии не­до­уме́­ют, ки́ими сло­ве­сы́ скорбя́щия утеша́ти, но Сама́, Вла­ды́­чи­це, возглаго́ли сердца́м на́­шим уте­ше́­ние, бла­го­да́­ти Твоея́ лу­ча́­ми о́блак ско́р­би на́шея и мрак уны́ния разгоня́ющи, да взы­ва́­ем Ти:

Ра́­дуй­ся, обра́довавшая наде́янием на Тя всех хри­сти­а́н; ра́­дуй­ся, ра́­дос­те и умире́ние ми́­ру. Ра́­дуй­ся, пода́тельнице Бо­же́ст­вен­ныя бла́­гос­ти; ра́­дуй­ся, на­де́ж­до благ ве́ч­ных. Ра́­дуй­ся, кораблю́ хотя́щих спас­ти́­ся; ра́­дуй­ся, при­ста́­ни­ще жите́йских пла́ваний. Ра́­дуй­ся, ве́р­ная хра­ни́­тель­ни­це упова́ющих на Тя по Бо́­зе; ра́­дуй­ся, оде́ж­до на­ги́х дерзнове́ния. Ра́­дуй­ся, хра­ни́­тель­ни­це всех и утвер­жде́­ние; ра́­дуй­ся, всех ве́р­ных ог­раж­де́­ние и свяще́нное при­бе́­жи­ще. Ра́­дуй­ся, по́­мо­ще ве́р­но мо­ля́­щих­ся Те­бе́; ра́­дуй­ся, све́т­лое бла­го­да́­ти позна́ние. Ра́­дуй­ся, Бла­го­да́т­ная Бо­го­ро́­ди­це Де́­во, всех скор­бя́­щих Ра́­дос­те.

Кондак 10

Спас­ти́ хо­тя́й род челове́ческий от ве́ч­ныя му́­ки и непрестаю́щия ско́р­би, Человеколю́бец Гос­по́дь в присноде́вственную утро́бу Твою́ все­ли́­ся и Те­бе́, Ма́­терь Свою́, да­ро­ва́ погиба́ющим в по́­мощь, по­кро́в и за­щи­ще́­ние, да бу́деши печа́льным уте­ше́­ние, скор­бя́­щим ра́­до­ва­ние, отча́янным наде́жда, ве́ч­ныя му́­ки Сво­и́м хо­да́­тай­ством из­бав­ля́ю­щая и к небе́сному весе́лию приводя́щая всех, ве́р­но во­пию́­щих Сы́­ну Тво­ему́ и Бо́­гу на́­ше­му: Алли­лу́иа.

Икос 10

Сте­на́ еси́ де́­вам, Бо­го­ро́­ди­це Де́­во, и всем к Тво­ему́ по­кро́­ву при­бе­га́ю­щим. Те́м­же мо́­лим Тя: за­сту­пи́, по­кры́й и соблюди́ всех си́­рых и без­по­мо́щ­ных от ис­ку­ше́­ний, озлобле́ний и бед, Те­бе́ с лю­бо́­вию взыва́ющих:

Ра́­дуй­ся, сто́л­пе де́вст­ва; ра́­дуй­ся, чис­то­ты́ и це­ло­му́д­рия со­су́­де из­бра́н­ный. Ра́­дуй­ся, во́инствующим на плоть целому́дрием изря́дное венча́ние; ра́­дуй­ся, во и́ночестве благоскорбя́щим пода́тельнице ве́ч­на­го ра́дования. Ра́­дуй­ся, пла́мень страс­те́й изменя́ющая; ра́­дуй­ся, мрак ис­ку­ше́­ний про­го­ня́ю­щая. Ра́­дуй­ся, нас­та́в­ни­це це­ло­му́д­рия; ра́­дуй­ся, чис­то­ты́ ог­раж­де́­ние. Ра́­дуй­ся, ис­прав­ле́­ние че­ло­ве́­ков; ра́­дуй­ся, Е́ю­же от паде́ния воста́хом. Ра́­дуй­ся, тве́р­дое ве́­ры утвер­жде́­ние; ра́­дуй­ся, прия́тное мо­ли́т­вы ка­ди́­ло. Ра́­дуй­ся, Бла­го­да́т­ная Бо­го­ро́­ди­це Де́­во, всех скор­бя́­щих Ра́­дос­те.

Кондак 11

Пе́­ние все­уми­ле́н­ное при­но́­сим Ти, раби́ Твои́, Бо­го­ро́­ди­це, я́ко всеси́льней за­сту́п­ни­це ро́­да на́­ше­го: утоли́ бо­ле́з­ни многовоздыха́ющих душ на́­ших, укро­ти́ гнев Бо́­жий, пра́ведно на ны дви́жимый грех ра́­ди на́­ших, из­ба́­ви нас от вся́­кия лю́тыя ско́р­би и бо­ле́з­ни, во­пию́­щих о Те­бе́ Бо́­гу: Алли­лу́иа.

Икос 11

Светоприе́мная свеща́, у́глем бла­го­да́­ти Бо́­жия возжже́нная, яви́­ся нам пречестна́я ико́­на Твоя́, Вла­ды́­чи­це, на ос­вя­ще́­ние на́­ше и уте­ше́­ние. Мы же, лю­бо́­вию чту́ще ю и с ве́­рою при­па́­даю­ще к ней, во­пи­е́м Ти:

Ра́­дуй­ся, си́льным Тво­и́м заступле́нием от всех бед нас из­бав­ля́ю­щая; ра́­дуй­ся, от тру́­са и по­то́­па нас защища́ющая. Ра́­дуй­ся, от гла́­да душе́внаго и теле́снаго нас снабдева́ющая; ра́­дуй­ся, огнь росо́ю мо­ли́тв Тво­и́х угаша́ющая. Ра́­дуй­ся, от сме́ртнаго губи́тельства нас спа­са́ю­щая; ра́­дуй­ся, в бра́нех кре́п­кая по­мо́щ­ни­це. Ра́­дуй­ся, от на­ше́ст­вия ино­пле­ме́н­ных нас огражда́ющая; ра́­дуй­ся, от меж­до­усо́б­ныя бра́­ни охраня́ющая. Ра́­дуй­ся, пла́­ваю­щих ле́гкое по во­да́м прехожде́ние; ра́­дуй­ся, путеше́ствующих до́б­рая води́тельнице. Ра́­дуй­ся, пле́нных свобожде́ние; ра́­дуй­ся, от належа́щаго пра­вед­на­го пре­ще́­ния Бо́­жия ско́­рое из­бав­ле́­ние. Ра́­дуй­ся, Бла­го­да́т­ная Бо­го­ро́­ди­це Де́­во, всех скор­бя́­щих Ра́­дос­те.

Кондак 12

Бла­го­да́­ти зало́г вос­хо­те́в­ши да́­ти ро́ду на́­ше­му, цельбоно́сную ико́­ну Твою́ яви́ла еси́ нам, Бо­го­ма́­ти, от нея́же то́­ки чу­де́с с ве́­рою при­хо­дя́­щим источа́ются, неду́зи врачу́ются и ско́р­би утоля́ются. Се­го́ ра́­ди ра́­дост­но о Те­бе́ во­пи­е́м Бо́­гу: Алли­лу́иа.

Икос 12

Пою́­ще Твоя́ ми́­лос­ти и чу­де­са́, Бо­го­ро­ди́­тель­ни­це, хва́­лим Тя вси, я́ко тве́р­дую предста́тельницу на́­шу, и со уми­ле́­нием покланя́емся Те­бе́, моля́щейся о нас, и про́­сим: воз­дви́г­ни ру́­це к Сы́­ну Тво­ему́, да всег­да́ в сей жи́з­ни и по сме́р­ти на́­шей ми­ло­се́р­дие Его́ неотсту́пно бу́дет от нас, взыва́ющих Ти:

Ра́­дуй­ся, не­по­сты́д­ное на́­ше упо­ва́­ние в жи­во­те́ и по преставле́нии на́­шем; ра́­дуй­ся, упова́ющим на Тя ми́рен ко­не́ц жи­тия́ се­го́ по­даю́­щая. Ра́­дуй­ся, в день су́дный на́­ша на­де́ж­до и за­щи­ще­́ние; ра́­дуй­ся, Судии́ пра­вед­на­го умоле́ние. Ра́­дуй­ся, гее́нны ве́ч­ныя из­бав­ле́­ние; ра́­дуй­ся, на­де́ж­до ве́ч­на­го спа­се́­ния. Ра́­дуй­ся, ключу́ Ца́рст­вия Хри­сто́­ва; ра́­дуй­ся, две́ре ра́йс­кая. Ра́­дуй­ся, мо́сте, к небесе́м приводя́й; ра́­дуй­ся, всех ка́ю­щих­ся гре́ш­ни­ков при­бе́­жи­ще и бла­га́я за­сту́п­ни­це. Ра́­дуй­ся, А́н­ге­лов ра́­дос­те; ра́­дуй­ся, всех пра́­вед­ных сла́­во и уте­ше́­ние. Ра́­дуй­ся, Бла­го­да́т­ная Бо­го­ро́­ди­це Де́­во, всех скор­бя́­щих Ра́­дос­те.

Кондак 13

О Все­пе́­тая Богообра́дованная Ма́­ти, ро́жд­шая на ра́­дость не́бу и зем­ли́ Ца­ря́ Хри­ста́, Бо́­га на́­ше­го! Услы́­ши глас скор­бя́­щих раб Тво­и́х, и прие́мши сие́ ма́­лое мо­ле́­ние на́­ше, из­ба́­ви нас от вся́­ких бед, скор­бе́й и на­па́с­тей; не­ду́­ги на́­ша ис­це­ли́, на­пра́с­ныя клеветы́ потреби́, вся́­ку зло́бу и вражду́ от­же­ни́ от нас и бу́­ду­щия из­ми́ му́­ки о Те­бе́ во­пию́­щих: Алли­лу́иа.

(Этот кондак чи­та­ет­ся трижды, за­те́м 1-й икос и 1-й кондак)

Мо­ли́т­ва

О Пре­свя­та́я Вла­ды́­чи­це Бо­го­ро́­ди­це, вы́ш­шая Хе­ру­ви́м и чест­не́й­шая Се­ра­фи́м, Бо­го­из­бра́н­ная От­ро­ко­ви́­це, всех скор­бя́­щих Ра́­дос­те! По­да́ждь уте­ше́­ние и нам, в ско́р­би су́­щим: ра́­зве бо Те­бе́ ино́го прибе́жища и по́­мо­щи не и́ма­мы. Ты еди́на еси́ ра́­дос­ти на́шея хода́таица, и Я́ко Ма́­терь Бо́­жия и Ма́­ти ми­ло­се́р­дия, предстоя́щи у Пре­сто́­ла Пре­свя­ты́я Тро́ицы, мо́жеши нам помо­щи́: ни­кто́­же бо при­те­ка́яй к Те­бе́ посра́млен от­хо́­дит. Услы́­ши у́бо и нас, ны́­не в день ско́р­би пред Твое́ю ико́­ною при­па́­даю­щих и со сле­за́­ми Те­бе́ мо­ля́­щих­ся: от­же­ни́ от нас належа́щия на нас ско́р­би и пе­ча́­ли в сей вре́­мен­ней жи́з­ни, не лише́ны же ны со­тво­ри́ Тво­и́м всеси́льным хо­да́­тай­ством и ве́ч­ныя несконча́емыя ра́­дос­ти в Ца́рст­вии Сы́­на Тво­его́ и Бо́­га на́­ше­го. Ами́нь.

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Ку́ю Ти́ досто́йную пе́снь принесе́т на́ше неможе́ние? то́чию обра́довательную, е́йже на́с Гаврии́л та́йно научи́л е́сть: ра́дуйся, Богоро́дице Де́во, Ма́ти Неневе́стная.

Ра́дуйся, благода́ти исто́чниче; ра́дуйся, ле́ствице и две́рь небе́сная; ра́дуйся, све́щниче, и ста́мно злата́я, и горо́ несеко́мая, Я́же Жизнода́вца Христа́ ми́рови ро́ждшая.

Всея́ моея́ жи́зни предста́тельнице, от бе́д мно́гих изба́ви мя́, да благода́рственный гла́с воспева́ю Ти́, Богоневе́сто Пречи́стая, и бу́дущия мя́ исхити́ му́ки.

Я́же все́м удо́бь послу́шная в ско́рби и в печа́ли помога́ющая, Богоро́дице блага́я, благода́ть пода́ждь пе́ти Тя́ дерза́ющим, Влады́чице, скорбя́щих ра́досте.

Многобога́тную благода́ть стяжа́вши, Влады́чице, дерзнове́нною Твое́ю моли́твою пресла́вно изми́ мя́ от напа́стей, убо́гаго раба́ Твоего́, скорбя́щих ра́досте.

Я́же еди́на в напа́стех и ско́рбех защища́ющая, под кро́в Тво́й, Пречи́стая, прибега́ющих те́пле, приими́ я́ко Преблага́я, я́же от се́рдца моле́ния.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Утвержде́ние бу́ди, и прибе́жище, и покро́в, Де́во Богороди́тельнице, ве́рою к Тебе́ прибега́ющим и Бо́жию Тя́ Ма́терь испове́дающим.

Кре́пость моя́, и ра́дость, и весе́лие, и стена́ тве́рдая, и предста́тельница Ты́ еси́, Всенепоро́чная, искуше́ний и бе́д избавля́ющи мя́.

Ми́лостивным и кро́тким Твои́м о́ком, Богороди́тельнице, зря́щи мя́ во обстоя́нии и ско́рби одержи́ма, вско́ре свободи́: Тя́ бо призыва́ю на по́мощь.

Кропи́ши исцеле́ний струи́ боля́щим, Де́во, всю́ду, Тя́ бо исто́чника показа́ милосе́рдия, Влады́чице, И́же ми́лости Госпо́дь, из Тебе́ рожде́йся па́че ума́.

Исто́чник ми́лости, подая́й скорбя́щим утеше́ние, Ты́ еси́, те́мже, Влады́чице, и мне́ моли́твенных Твои́х во́д исто́чник источи́, и угаси́ страсте́й пе́щь.

Отча́явся по́мощи вся́кия, к Тебе́, Пренепоро́чная, держа́вней храни́тельнице и покро́ву, притеко́х: не отри́ни у́бо мене́ от боже́ственнаго покро́ва Твоего́.

Седа́лен, гла́с 7:

Ра́дуйся, Со́лнца о́блаче мы́сленнаго и неизрече́ннаго, Влады́чице; ра́дуйся, всесве́тлая свеще́; ра́дуйся, све́щниче всезлаты́й; Тобо́ю, Пресвята́я, Е́ва изба́вися от кля́твы. Но я́ко иму́щая дерзнове́ние ко Благопреме́нному Сы́ну Твоему́ и Бо́гу, ма́тернею моли́твою не оскуде́й о на́с моли́тися, Пречи́стая.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Наде́ждо ненаде́жных, помо́щнице ни́щих, пла́чущих утеше́ние, согреша́ющих очище́ние, руководи́тельнице заблу́ждших, боля́щих целе́бнице и исправле́ние па́дающих, Влады́чице, спаси́ рабы́ Твоя́.

Не неприча́стни есмы́, Влады́чице, Твоего́ заступле́ния в ско́рбех; те́мже и ны́не на́м помози́ вско́ре, лю́те обурева́емым, ру́ку простира́ющи, Чи́стая; бу́ди ми́лостива боле́знем на́шим, Ма́ти Бо́жия, ра́дость ско́рую подаю́щи.

Вся́ блага́я и те́плая засту́пница су́щи гре́шником и смире́нным, Богороди́тельнице Пречи́стая Влады́чице, от бе́д и скорбе́й, и грехо́в спаса́й рабы́ Твоя́.

Пресла́вную Твою́ Ма́терь, Христе́, приими́ моля́щуюся о ми́ре, ми́лостивно Тебе́ зову́щую: Сы́не Мо́й, приими́ мольбу́ Мою́ и ути́ши гне́в, належа́щий земли́.

Кро́в и заступле́ние, и прибе́жище бу́ди ми́, Де́во, рабу́ Твоему́, и изба́ви мя́ от безме́рных зо́л, воспева́ти Тя́, Пречи́стая: сла́ва неизрече́нному Рождеству́ Твоему́.

Наде́жда и щи́т, и утвержде́ние Ты́ мне́ еси́, Блага́я, и лю́тых избавле́ние, и просвеще́ние души́ мое́й, и хвала́, и стена́, и держа́ва.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Ты́ кре́пость моя́, Ты́ похвала́, и ра́дование, и храни́тельница ми́ еси́, и заступле́ние, и прибе́жище, и предста́тельница непобеди́ма, Пресвята́я Богоро́дице Де́во, те́мже спаси́ раба́ Твоего́.

Спаси́ мя́, Влады́чице, из глубины́ напа́стей, и скорбе́й, и печа́лей, и страсте́й теле́сных и в тишине́ боже́ственней сохрани́ ду́шу мою́.

Моли́твеннице нело́жная, упова́ние христиа́н, Обра́дованная, приими́ мольбы́ от на́с, приле́жно призыва́ющих и моля́щихся Тебе́.

Покро́в мо́й еси́ Ты́ и при́сное хвале́ние, о Влады́чице Богоро́дице, ника́коже бо презира́еши к Тебе́ прибега́ющих.

До́м Тя́ сла́вы, го́ру Бо́жию святу́ю, Чи́стая, неве́сту, черто́г, хра́м освяще́ния Сы́н Бо́жий, в Тя́ всели́выйся, и ра́й сла́дости присносу́щныя на́м соде́ла.

Сте́ну необори́му, Чи́стая, моли́тву Твою́ стяжа́вше, вопие́м Ти́: умилосе́рдися, о Влады́чице, и ви́димыя и неви́димыя враги́ прожени́.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Боля́щих цели́тельницу, па́дающих воста́ние, согреша́ющих очище́ние, Богоро́дице, Тебе́ молю́, со слеза́ми припа́даю и зову́ Ти́: я́ко сильна́ Сама́ мя́ спаси́, погиба́ющаго.

Ты́ еси́ стена́ неруши́ма, Ты́ еси́ покро́в тве́рд, Богоро́дице Блага́я, Ты́ еси́ предста́тельница крепка́ рабу́ Твоему́: сего́ ра́ди призыва́ю Тя́ при́сно и притека́ю к покро́ву Твоему́.

Ми́рови ра́дость су́щи, Богоро́дице Чи́стая, ра́дуйся, Тебе́, Де́во, зове́м со а́нгелом ве́рно: Твоея́ ра́дости сподо́би ны́, и печа́ль на́шу разори́.

Сла́дость а́нгелов, скорбя́щих ра́дость, христиа́н предста́тельница Ты́ еси́, Де́во Ма́ти Госпо́дня: заступи́ на́с и изба́ви ве́чных му́к.

В де́нь печа́ли, егда́ и́мам теле́сных соу́з разреши́тся, предста́ни ми́, Богороди́тельнице, и обдержа́ния бесо́вскаго исхити́.

При́зри, Влады́чице, на мя́, смире́ннаго, и па́че наде́жды спаси́ мя́: Ты́ бо еси́ упова́ние и покро́в ми́, жи́знь и све́т се́рдцу моему́, Богоро́дице, и утвержде́ние.

Конда́к, гла́с 6:

Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице, Ты́ на́м помози́, на Тебе́ наде́емся и Тобо́ю хва́лимся, Твои́ бо есмы́ раби́, да не постыди́мся.

И́кос:

Простри́ дла́ни Твоя́, и́миже все́х Влады́ку я́ко младе́нца прия́ла еси́, за мно́жество бла́гости; не оста́ви на́с, всегда́ наде́ющихся на Тя́, бо́дренною Твое́ю моли́твою и неисче́тною просты́нею уще́дри на́с, и пода́ждь душа́м на́шим милосе́рдие Твое́, во ве́ки источа́ющи: Тебе́ бо и́мамы, гре́шнии, Засту́пницу от находя́щих на ны́ бе́д и зо́л. Но, я́ко иму́щи милосе́рдия щедро́ты, ускори́ на моли́тву, и потщи́ся на умоле́ние, предста́тельствующи при́сно, Богоро́дице, чту́щих Тя́.

Пе́снь 7.

Ирмо́с: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Страстьми́ престаре́вся и неосла́бными напа́стьми, и скорбьми́, и доспе́в к за́падом жития́ моего́, доброде́телей неприча́стен, ле́ностию снеде́н бы́в, вопию́ Ти́, Влады́чице: утеше́ние земны́м, поми́луй мя́.

Ра́дуйся, исто́чниче присноживо́тныя воды́; ра́дуйся, раю́ пи́щный; ра́дуйся, стено́ ве́рных; ра́дуйся, Неискусобра́чная; ра́дуйся, всеми́рная ра́досте, Е́юже на́м возсия́ хвали́мый отце́в Бо́г и препросла́влен.

Все́м, су́щим в ми́ре, засту́пница еси́ и стена́ христиа́ном, и прибе́жище непосты́дно, Чи́стая Мари́е. Те́мже ве́рою Тя́ чту́ще, вопие́м Христу́: оте́ц на́ших Бо́же, благослове́н еси́.

О, благоутро́бия Твоего́, Де́во Чи́стая! Реши́ши бо безме́рныя печа́ли и напа́сти, призыва́ющим в ну́жде и обстоя́нии: те́мже и ны́не помози́, Благослове́нная, Тя́ восхваля́ющим.

Еди́но упова́ние и по́мощь ве́рным су́щи, Богороди́тельнице, потщи́ся помощи́ рабо́м Твои́м, погружа́емым скорбьми́ и в боле́знех су́щим, и прибега́ющим к Тебе́ с любо́вию души́.

Ра́дование благода́рственное Тебе́ прино́сим, Ма́ти Бо́жия, я́ко вои́стинну Тобо́ю изба́влени вся́каго зла́го начина́ния, и согла́сно Тебе́ пое́м: благослове́на еси́.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Ра́дуйся, престо́ле сла́вный Бо́жий; ра́дуйся, ве́рных стено́, Е́юже су́щим во тьме́ возсия́ Све́т — Христо́с, Тебе́ блажа́щим и вопию́щим: вся́ дела́ Госпо́дня, Го́спода по́йте и превозноси́те во вся́ ве́ки.

Пое́м Тя́, Пречи́стая и Ма́ти Бо́жия, и кто́ не сла́вит Тя́, вои́стинну Благу́ю, су́щую наде́жду ду́ш на́ших? те́мже, Пречи́стая, и мою́ мольбу́ приими́.

Ты́ еси́ спасе́ние все́х челове́к, Я́же Бо́га ро́ждшая неизрече́нно; Ты́ еси́ ве́рных спаси́тельница, Богоро́дице, и слепы́х наста́вница, и па́дающих исправле́ние, Те́мже Тя́ восхваля́юще, Христу́ зове́м: благослови́те вся́ дела́ Го́спода, по́йте и превозноси́те Его́ во вся́ ве́ки.

Струи́ исцеле́ний на́м всегда́, ве́рным, Чи́стая, источа́еши: те́мже незави́стную благода́ть взе́млюще, воспева́ем Рождество́ Твое́, Чи́стая, и превозно́сим во вся́ ве́ки.

На Тя́ возложи́х, Влады́чице, се́рдце, и ду́шу, и те́ло: не и́мам бо ины́я наде́жды, ра́зве Тебе́, е́юже получу́ ми́лость. Те́мже пода́ждь ми́ бога́тую Твою́ благода́ть.

На мольбу́ мою́ ны́не умилосе́рдися и ра́дость в печа́ли ме́сто да́руй ми́, да пою́ Тя́, Влады́чице, и вопию́ Сы́ну Твоему́: благослови́те, вся́ дела́ Госпо́дня, Го́спода.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Ра́дуйся, Мари́е, вели́кое всея́ тва́ри чу́до; ра́дуйся, Дщи́ у́бо Дави́дова, Госпо́дня же Ма́ти; ра́дуйся, пе́ние Гаврии́лово; ра́дуйся, прибе́жище и утвержде́ние, и по́мощь все́м, Пресвята́я, су́щим на земли́ гре́шником.

Ю́же изво́лил еси́, Влады́ко, приими́ ми́лостивно Моли́твенницу — Ма́терь Твою́, о на́с, и Твоея́ бла́гости вся́ческая испо́лнятся: да Тя́ вси́ я́ко Благоде́теля велича́ем.

О, Де́во Блага́я! О, ми́ра ра́досте и прибе́жище! О, храни́лище ве́рных и избавле́ние скорбе́й! Ты́ предста́ни ми́ в ча́с сме́рти и изба́ви от бесо́в, и́щущих поглоти́ти мя́.

Ты́ еси́ а́нгелов ра́дость, Ты́ еси́ пра́ведников добро́та, Ты́ еси́ ве́рных наде́жда, Ты́ еси́ соблюде́ние на́ше, Ты́ еси́ мо́ст, к жи́зни нестаре́ющейся преводя́й ве́рою и любо́вию Тя́ велича́ющия.

О, Ма́ти вся́ческих Творца́, всесве́тлая печа́льных уте́хо, оскорбля́емых предста́тельнице и немощны́х засту́пнице, сохрани́ мя́, Блага́я, от бе́д и прило́г вра́жиих.

Еди́на боля́щих посеще́ние, еди́на па́дших исправле́ние, Влады́чице, еди́на к Бо́гу руководи́тельнице и вхо́де, еди́на хода́таице ве́чных бла́г, поми́луй мя́ еди́наго, па́че все́х согреши́вшаго.

Свети́лен.

Под кро́в Тво́й, Де́во Госпоже́, прибега́ем вси́ ро́ди челове́честии: просвети́ ны́ све́том Рождества́ Твоего́, гре́шныя рабы́ Твоя́, моля́щияся приле́жно и покланя́ющияся Тебе́, и прося́щия умире́ния ми́рови и душа́м на́шим ве́лия ми́лости.

Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Мо́ря жите́йскаго волна́ми потопля́емь и напа́стьми лю́тыми одержи́мь, ко приста́нищу устреми́хся невла́емому — покро́ву Твоему́: те́мже мя́ изба́ви, Богоро́дице, от лю́тых.

Положи́ Тя́ приста́нище су́щим в беда́х, Чи́стая, Бо́г, И́же от Тебе́ благоволи́вый восприя́ти пло́ть. Те́мже Ти́, припа́дающе, взыва́ем: да́руй по́мощь Твою́ рабо́м Твои́м.

Еди́на Благослове́нная и Богора́дованная, Я́же Ра́дость челове́ком ро́ждши неизрече́нную, печа́ли отыми́ души́ моея́, молю́ся, и возвесели́ се́рдце мое́.

Изба́ви мя́, Пречи́стая, бесо́вския пре́лести, озлобле́ния же, и вре́да, и искуше́ния, да ве́рою Тя́ сла́влю, су́щую по Бо́зе засту́пницу и покро́в мо́й.

Я́же ненаде́ющихся наде́жда, па́дших исправле́ние, печа́льных утеше́ние, Све́т Боже́ственный ро́ждшая, ду́шу мою́, су́щую во тьме́, просвети́.

Я́ко Гаврии́л Де́ве, прииди́те, ве́рнии, и мы́ вопие́м благогове́йно: вои́стинну укра́шена еси́, Чи́стая, ро́ждшая Ра́дость; ра́дуйся, Благослове́нная.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных и пое́т Тя́ ду́х мо́й.

Ты́ еси́ земноро́дных упова́ние, и по́мощь, и ра́дость, покро́в и прибе́жище, Влады́чице, Ма́ти Живота́. Те́мже Тя́ мо́лим: Твою́ по́мощь низпосли́ все́м пою́щим Тя́, Пречи́стая.

И́же Тобо́ю изба́вльшеся от бе́д и Тебе́ ра́ди ра́дость получи́вше, Ма́ти Безневе́стная, я́ко пода́тельницу благу́ю и засту́пницу благохва́льну вси́ прославля́ем.

Благослове́н Пло́д чре́ва Твоего́, Де́во Богоро́дице, все́х ра́досте, Ра́дость бо всему́ ми́ру родила́ еси́ и весе́лие, разгоня́ющее печа́ль грехо́вную, Богоневе́сто.

Тя́ храни́тельницу, Пресвята́я, в напа́стех стяжа́х; Тебе́ по Бо́зе мою́ предста́тельницу и́мам неусы́пну, Тебе́ да обря́щу, Пречи́стая, избавля́ющую мя́ в де́нь Суда́ вся́каго осужде́ния.

Возвели́чи ми́лость и заступле́ние, Пречи́стая, Твои́х моли́тв на мне́ и изба́ви мя́ от напа́стей и скорбе́й, Ра́дость ми́ру ро́ждшая.

Я́же ра́дости прие́мшая исполне́ние, приими́ от на́с, ра́б Твои́х, целова́ние арха́нгелово: ра́дуйся, Ра́дость ро́ждшая ми́ру; ра́дуйся, ста́мно, из нея́же ма́нна небе́сная все́м ве́рным дарова́ся; ра́дуйся, Благослове́нная.

Седа́лен, гла́с 7:

Ра́дуйся, Со́лнца о́блаче мы́сленнаго и неизрече́ннаго, Влады́чице; ра́дуйся, всесве́тлая свеще́; ра́дуйся, све́щниче всезлаты́й; Тобо́ю, Пресвята́я, Е́ва изба́вися от кля́твы. Но я́ко иму́щая дерзнове́ние ко Благопреме́нному Сы́ну Твоему́ и Бо́гу, ма́тернею моли́твою не оскуде́й о на́с моли́тися, Пречи́стая.

Пе́снь 4.

Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.

От вели́ких и разли́чных прегреше́ний же и напа́стей всегда́ спаса́еши мя́, те́мже Тя́ я́ко ро́ждшую Го́спода молю́ и к Тебе́ прибега́ю, непобеди́мей по́мощи скорбя́щим: от бе́д изведи́ мольба́ми Твои́ми.

Бо́же мо́й Милосе́рде, Бо́же Человеколю́бче, Воли́телю ми́лости, ны́не на мя́ изли́й Твою́ ми́лость: мо́лит Тя́ наде́жда и засту́пница моя́, Ма́ти Твоя́.

Ми́лость Твою́ и милосе́рдие на рабы́ Твоя́, Чи́стая, простри́, при́сно моля́щия Тя́, вся́кия ско́рби и му́ки избавля́ющи моли́твами Твои́ми.

Ра́дуйся, кра́сная пала́то Сло́ва, де́вственный черто́же Царя́; ра́дуйся, похвало́ все́х безпло́тных; ра́дуйся, челове́ков ра́досте и по́моще и упова́ние.

Спасе́ние пода́ждь ми́ душе́вное и теле́сное, Пренепоро́чная, и неду́гующему да́руй цельбу́ и лю́тых избавле́ние.

О соде́яниих мои́х лука́вых и прегреше́ниих мно́гих кто́ возмо́жет умоли́ти Судию́, а́ще не Ты́, Чи́стая, еди́на согреша́ющих засту́пнице?

Пе́снь 5.

Ирмо́с: Мра́к души́ моея́ разжени́, Светода́вче Христе́ Бо́же, началоро́дную тму́ изгна́в бе́здны, и да́руй ми́ све́т повеле́ний Твои́х, Сло́ве, да у́тренюя, сла́влю Тя́.

Добро́ту Тя́ Иа́ковлю возлюби́ Бо́г, Де́во Отрокови́це, украша́я вся́ Тобо́ю, омрачи́вшияся преступле́нием пе́рвее.

Ду́шу мою́ сохрани́, я́ко зе́ницу о́ка, под кро́вом крилу́ Твое́ю, Блага́я Пречи́стая, и от духо́в лука́вых томле́ния и муче́ния изба́ви.

Изба́вльшеся Тобо́ю прама́терния печа́ли, Богороди́тельнице, утеше́ния испо́лнени бы́хом, Весе́лие все́м ро́ждшая и всеми́рную Ра́дость, те́мже, Всепе́тая, Твоя́ песносло́вцы от бе́д Твои́ми моли́твами соблюди́.

Благодари́м Тя́, изба́вльшеся Тобо́ю грехо́в мно́гих, и не́мощей, и боле́зней, и неду́г лю́тых, Пречи́стая Влады́чице: наде́жда бо еси́ тверда́ Твои́м ве́рным рабо́м.

С боже́ственным соше́дшеся Гаврии́лом, возопии́м Богоро́дице ве́рно: ра́дуйся, Де́во Свята́я, Благода́тная, Госпо́дь с Тобо́ю, И́же Тебе́ ра́ди, потреби́в печа́ль, подаде́ ми́ру ра́дование.

Боля́щую ду́шу мою́ исцели́, ро́ждшая все́х Взе́млющаго неду́ги, Пречи́стая Влады́чице.

Пе́снь 6.

Ирмо́с: Содержи́ма мя́, приими́, Человеколю́бче, грехи́ мно́гими, и припа́дающа щедро́там Твои́м, я́ко проро́ка, Го́споди, и спаси́ мя́.

В нощи́ и во дни́, я́ве и вта́й под Тво́й прибега́ем кро́в, Пречи́стая Де́во, и́же Тя́ ве́рно славосло́вящии.

В напа́стех засту́пницу Тя́ и́мамы тве́рду, в ско́рбех кре́пкое спасе́ние, поко́й в печа́лех, в беда́х по́мощь, Присноде́во.

Добро́та честны́х святы́х а́нгел, ра́дование челове́к все́х Ты́ еси́, Богоро́дице Де́во: Ты́ мя́ к животу́ наста́ви.

Пала́та Царя́ Сла́вы и огнезра́чный была́ еси́ престо́л, Де́во, херуви́м превы́шши и серафи́м, те́мже Тя́ вся́кое дыха́ние сла́вит, я́ко Ма́терь Зижди́теля.

Ра́дуйся, клеще́ У́гля Боже́ственнаго; ра́дуйся, проро́ков печа́ть и апо́столов похвало́, Пречи́стая Богоро́дице, Ея́же ра́ди от нетле́ния свободи́хомся.

Бе́здну щедро́т ро́ждши, Богоро́дице Де́во, ско́рбных жития́ ду́шу мою́ спаси́ и ра́дости духо́вныя две́ри отве́рзи ми́: на Тя́ бо еди́ну наде́жду возложи́х.

Конда́к, гла́с 6:

Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице, Ты́ на́м помози́, на Тебе́ наде́емся и Тобо́ю хва́лимся, Твои́ бо есмы́ раби́, да не постыди́мся.

И́кос.

Простри́ дла́ни Твоя́, и́миже все́х Влады́ку я́ко младе́нца прия́ла еси́, за мно́жество бла́гости; не оста́ви на́с, всегда́ наде́ющихся на Тя́, бо́дренною Твое́ю моли́твою и неисче́тною просты́нею уще́дри на́с, и пода́ждь душа́м на́шим милосе́рдие Твое́, во ве́ки источа́ющи: Тебе́ бо и́мамы, гре́шнии, Засту́пницу от находя́щих на ны́ бе́д и зо́л. Но, я́ко иму́щи милосе́рдия щедро́ты, ускори́ на моли́тву, и потщи́ся на умоле́ние, предста́тельствующи при́сно, Богоро́дице, чту́щих Тя́.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́. Сего́ ра́ди о́троцы в пещи́, ра́дованною ного́ю, я́ко во цве́тнице, лику́юще, поя́ху: благослове́н еси́, Бо́же оте́ц на́ших.

Водвори́хомся в ве́чер в пла́чи печа́лей и ча́янии злы́х, но Твои́м боголе́пным кро́вом, Де́во, обоже́ни бы́вше, обрето́хом ра́дость зау́тра: Ты́ бо спасла́ еси́ на́с.

Я́ко боже́ственное прибе́жище покро́в Тво́й, Влады́чице, вси́ стяжа́вше к Бо́гу, в напа́стех и гоне́ниих, и гресе́х к Тебе́ прибега́ем и Тобо́ю измене́ние прие́млем, Пречи́стая.

Гре́шников прибе́жище, низве́рженных исправле́ние Ты́ еси́, Влады́чице: сего́ ра́ди притека́ю к покро́ву Твоему́, спаси́ мя́, Богоневе́сто.

В недоуме́нии и печа́ли сы́й и в беда́х, Пречи́стая, Тя́ призыва́ю те́пле от се́рдца моего́: предвари́, и изба́ви мя́, и пода́ждь, Чи́стая, мне́ утеше́ние.

Благослове́нная Де́во, ра́досте скорбя́щих все́х ве́рных, от вся́каго искуше́ния и печа́ли, и зло́бы зави́дящих мне́ изми́ и от гре́х и разли́чных неду́г мя́ изба́ви.

Вся́ еси́ светоно́сна, Све́т незаходи́мый, Де́во, прие́мши и просвеща́ющи, Чи́стая, ве́рою Тебе́ вопию́щия: Благослове́н, Пречи́стая, Пло́д Твоего́ чре́ва.

Пе́снь 8.

Ирмо́с: На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Вся́ еси́ Чи́стая и Боже́ственныя сла́вы испо́лнена, Бли́жняя Моя́, — рече́ Ду́х Бо́жий, Тя́ провозвеща́я, Пречи́стая. Ю́же пе́сньми воспева́ем, пою́ще: тебе́ подоба́ет ра́доватися, Бо́га Челове́ка ро́ждшей.

А́нгелов похвало́ и челове́ков спасе́ние, и спору́чница бу́ди ми́, Ма́ти Бо́жия: я́ко да обращу́ся и прииму́ разреше́ние пре́жде согреше́нных в ве́дении и не в ве́дении.

Тя́ по Бо́зе упова́ние спасе́ния в напа́стех иму́ще, ве́рнии, взыва́ем: вся́ дела́ Госпо́дня, Го́спода по́йте и превозноси́те Его́ во ве́ки.

Приими́ пе́снь от худы́х усте́н, Де́во Всепе́тая, вопию́щих Ти́: ра́дуйся, боля́щим телесе́м врачевство́ и отча́янным душа́м спасе́ние.

В боле́знех и напа́стех одержи́мыя не пре́зри, Блага́я, но мольбу́ худу́ю услы́шавши, свободи́ на́с от скорбе́й вели́ких, да ве́рно Твою́ ми́лость и заступле́ние, Чи́стая, воспева́ем.

Стоя́щих утвержде́ние еси́ и па́дших исправле́ние, Де́во, те́мже мя́, па́дшаго, возста́ви, да Тя́ сла́влю, Благослове́нную и Обра́дованную.

Пе́снь 9.

Ирмо́с: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, О́трока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Ра́дости на́м ве́чныя и жи́зни яви́лася еси́ преесте́ственне, Богороди́тельнице, Хода́таица, Чи́стая, Спа́са все́х ро́ждшая, от лица́ земна́го вся́ку сле́зу я́ве отъе́мшаго и все́м ра́дость пода́вшаго.

Ра́дость и весе́лие, и ра́дование боже́ственное, Де́во неискусому́жная, на́м умно́жися Бо́жие: се́ бо, пла́чущиися лю́те, ра́дуемся моли́твами Твои́ми.

Под Твое́ милосе́рдие прибега́ющии ве́рою избавля́ются ско́рбных бе́д жития́: те́мже и а́з ко Твоему́ покро́ву прибего́х, Богоро́дице.

Псалмы́ Тя́ воспева́ем, Благода́тная, и немо́лчно, е́же ра́дуйся, прино́сим: Ты́ бо источи́ла еси́ все́м ра́дость.

Иска́пающая боже́ственную сла́дость, все́х Сла́дость ро́ждшая, ду́шу мою́ услади́, я́дом змии́ным огорче́нную, отчужда́ющи мя́ го́рькаго вре́да всегда́ хода́тайством Твои́м, предста́тельнице и ра́досте ве́рных, Влады́чице.

Благословя́, благословлю́ Тя́, Пречи́стая, и велича́ю те́пле: благослови́ мя́ у́бо, Твоего́ певца́, и вся́ческих ну́ждных и печа́льных изба́ви, и сохрани́ Твои́ми дла́ньми непобеди́ма.

Свети́лен.

Под кро́в Тво́й, Де́во Госпоже́, прибега́ем вси́ ро́ди челове́честии: просвети́ ны́ све́том Рождества́ Твоего́, гре́шныя рабы́ Твоя́, моля́щияся приле́жно и покланя́ющияся Тебе́, и прося́щия умире́ния ми́рови и душа́м на́шим ве́лия ми́лости.

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Благогове́ют Ти́, Богоро́дице, а́нгелов нача́льницы, и святы́х чи́ни че́стно слу́жат, пра́веднии красу́ются, небе́сных Хода́таицу блажа́т Тя́. Ку́пно же и земля́ и не́бо в весе́лии све́тло восхваля́ют Тя́, и мы́, гре́шнии, ми́лости про́сим: озари́ на́ша сердца́, Влады́чице, воспе́ти пе́снь святы́я Твоея́ ико́ны явле́нию.

Прииди́те, собери́теся, христоимени́тии лю́дие, умы́ та́йно очи́стившеся, во святу́ю це́рковь Ма́тере Христа́ Бо́га на́шего: источа́ет бо на́м неоску́дно от святы́я ико́ны исто́чник духо́вен, целе́бен душа́м и те́лом, пе́снь вопию́щим: благослове́н из Тебе́ рожде́йся Бо́г на́ш.

Диви́т, Пренепоро́чная, и ужаса́ет вся́к слу́х стра́нно чу́до боже́ственнаго Твоего́ Рождества́: ка́ко херуви́мскаго Творца́ зачала́ еси́? ка́ко О́гнь нестерпи́мый во утро́бе носи́ла еси́? ка́ко су́щую Жи́знь пло́тию облекла́ еси́ и Живо́т всему́ ми́ру родила́ еси́, Бо́га ку́пно и челове́ка?

Под кро́в Тво́й, Де́во Госпоже́, прибега́ем вси́ ро́ди челове́честии: просвети́ ны́ све́том Рождества́ Твоего́, гре́шныя рабы́ Твоя́, моля́щияся приле́жно и кла́няющияся пречи́стей Твое́й ико́не, прося́ще от Тебе́ прия́ти вели́кия ми́лости.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Ку́ю Ти́ досто́йную похвалу́ на́ше принесе́т коне́чное неможе́ние? Я́ко явле́нием пречи́стыя Твоея́ боже́ственныя ико́ны незави́стныя исто́чники целе́бныя источа́еши, ве́рно прибега́ющим к Тебе́ рабо́м Твои́м.

Боже́ственныя Твоея́ ико́ны свято́е явле́ние, Богоро́дице Де́во, я́ко светоза́рное возсия́ на́м со́лнце, пресла́вных чуде́с лучи́ пуща́ющи, тьмы́ лю́тых обстоя́ний отгоня́ющи свяще́нными Твои́ми, Влады́чице, предста́тельствы.

Испо́лнила еси́ благода́ти иногда́ первопи́санную Твою́ ико́ну, Госпоже́ Де́во Богоро́дице, и ны́не та́ же благода́ть и́стинствует сия́нием ве́ры чуде́с, я́ко тоя́ ра́ди первопи́санныя, ко спасе́нию ве́рно к Тебе́ по Бо́зе прибега́ющим.

Покланя́емся, Богоро́дице, Твоему́ пречи́стому о́бразу и пресла́дкому Твоему́ Младе́нцу, преве́чному и незаходи́мому Све́ту, Христу́, И́мже спасла́ еси́ от лю́тых зо́л и тле́ния сме́ртнаго все́ челове́ческое естество́.

Седа́лен, гла́с 8.

Боже́ственнии Сло́ва апо́столи, Ева́нгелия Христо́ва велегла́снии вселе́нныя благове́стницы, боже́ственную це́рковь созда́вше в пресвято́е Твое́ и́мя, Богоро́дице, и к Тебе́, Госпоже́, прихо́дят, моля́ще Тя́ приити́ на тоя́ освяще́ние. Ты́ же, о Богома́ти, рекла́ еси́: иди́те с ми́ром и А́з с ва́ми та́мо е́смь. Они́ же, ше́дше, обрета́ют та́мо на стене́ це́ркве Твоего́, Влады́чице, о́браза подо́бие, Боже́ственною пи́сано си́лою шаро́вными подо́бии, и, ви́девше, поклони́шася Ти́ и просла́виша Бо́га. С ни́миже и мы́ боже́ственней Твое́й покланя́емся ико́не, прося́ще от Тебе́ вели́кия ми́лости: да́руй согреше́ний оставле́ние рабо́м Твои́м, еди́на Благослове́нная.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Почти́м, лю́дие, Чи́стыя в чистоте́ ико́ну Де́вы Богоро́дицы и Тоя́ Боже́ственнаго Младе́нца, Христа́ Бо́га на́шего, и лобыза́ем и прославля́ем со стра́хом и тре́петом: почита́ем бо ико́ну благоче́стно, па́че же почита́ем Са́мую Ту́ю су́щую Чи́стую Богома́терь.

Дави́д, боже́ственный и чу́дный проро́к, издале́ча прови́дя, глаго́ла: лицу́ Твоему́ помо́лятся бога́тии лю́дие. Мы́ же, ве́рнии, покланя́емся и лобыза́ем честну́ю ико́ну, душа́ми ку́пно и телесы́ освяща́ющеся.

Ева́нгелия Христо́ва богогла́сный списа́тель Лука́, Бо́жиим манове́нием всенепоро́чный Тво́й напису́ет о́браз, Богоро́дице, и Младе́нца Преве́чнаго на рука́х Твои́х вообрази́в, к нему́же притека́ющия напа́стей и бе́д избавля́еши, и вся́ покрыва́еши, и спаса́еши Твое́ю ми́лостию.

Ты́ еси́ похвало́ и вене́ц святы́м все́м, о Цари́це! Ты́ упова́ние на́ше и Помо́щница по Бо́зе, и на Тя́ наде́жду спасе́ния на́шего возложи́хом вси́. Тебе́ мо́лимся, я́ко Бо́жии Ма́тери: одожди́ гре́шным рабо́м Твои́м бога́тыя Твоя́ душеспаси́тельныя ми́лости.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Вся́ко, Пречи́стая, существо́ воспе́ти недоуме́ет Тя́, па́че бо го́рних умо́в превозвы́силася еси́, ро́ждши непристу́пнаго и стра́шнаго Всецаря́ и Бо́га, но, я́ко Ми́лостива и ско́рая челове́ком Помо́щница, вонми́ моле́нию ра́б Твои́х и да́руй Твою́ по́мощь.

Иде́же осени́т благода́ть Твоя́, Богоро́дице, стра́хом исчеза́ют де́мони и разруша́ется злоко́зненное те́х мечта́ние, бе́гают ду́си те́мнии, ра́дуется же ве́рных все́ мно́жество, Тебе́ пе́снь хва́льну от се́рдца вопию́ще: ра́дуйся, боже́ственный Покро́ве ду́ш на́ших.

Безоче́сным сла́дкое зре́ние дае́тся, глухи́м слы́шание, немы́м благоглаго́лание, хромы́м хожде́ние, прокаже́нным очище́ние, де́монствуемым целому́дрие и в боле́знех су́щим разли́чных исцеле́ние, осене́нием Пречи́стыя Твоея́, Богоро́дице, ико́ны.

Не умолчи́м никогда́же, Богоро́дице, псалмы́ и пе́сньми воспева́ти вели́чия Твоя́, Обра́дованная: Бо́га бо вои́стинну воплоти́вшагося родила́ еси́, во спасе́ние на́ше всеми́рное и избавле́ние.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Боже́ственнаго Твоего́ Рождества́, Де́во Госпоже́, пребога́тая благода́ть, ю́же дре́вле изглаше́нием предала́ еси́ пречи́стому Твоему́ о́бразу, неоску́дне де́йствовати вели́кая же и пресла́вная, во спасе́ние на Тя́ наде́ющимся.

Иде́же прославля́ется свято́е и́мя Обра́дованныя Богоро́дицы, та́мо вся́ческих благи́х исто́чницы пролива́ются; прииди́те в чистоте́, челове́цы, се́ бо явле́ние боже́ственныя Де́вы ико́ны сказу́ет Цари́цы прише́ствие, во спасе́ние все́х ве́рных.

Целе́ния боле́зней, отгна́ние же страсте́й и душепита́тельное спасе́ние, грехо́в проще́ние и ве́чное избавле́ние от пречи́стыя Твоея́ ико́ны, Влады́чице, ве́рно приходя́ще, прие́млем, Богома́ти Всенепоро́чная.

К Тебе́, Госпоже́, прибега́ют ро́ди правове́рных, про́сят вели́кия ми́лости и прие́млют неоску́дно су́щии в неду́зех исцеле́ние, в страсте́х премене́ние, в печа́лех утеше́ние. Источи́ и мне́, Влады́чице, ка́плю душеспаси́тельную, да со все́ми и а́з пою́ Твое́ вели́чие.

Конда́к, гла́с 8.

Притеце́м, лю́дие, к ти́хому сему́ и до́брому приста́нищу, ско́рой помо́щнице, гото́вому и те́плому спасе́нию, покро́ву Де́вы, ускори́м на моли́тву и потщи́мся на покая́ние: источа́ет бо на́м неоску́дныя ми́лости Пречи́стая Богоро́дица, предваря́ет на по́мощь и избавля́ет от вели́ких бе́д и зо́л благонра́вныя и богобоя́щияся рабы́ Своя́.

И́кос.

Смы́сл очи́стивше и у́м, притеце́м к Богоро́дице, све́тло пе́сньми ублажа́юще Ю́, и пречи́стую ико́ну Ея́ прославля́ем и чти́м, и, припа́дающе, покланя́емся я́ко Само́й су́щей О́ной: че́сть бо ико́ны на первообра́зное восхо́дит, и почита́яй и покланя́яйся е́й почита́ет са́мое первообра́зное, я́коже боже́ственнии отцы́ реко́ша. И а́ще кто́ не чти́т Пресвяты́я Богоро́дицы и не покланя́ется ико́не Ея́, ана́фема да бу́дет: посрамля́ет бо и погубля́ет не чту́щия ю́, избавля́ет же от вели́ких бе́д и зо́л благонра́вныя и богобоя́щияся рабы́ Своя́.

Пе́снь 7.

Ирмо́с: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Прииди́те, почерпе́м отпуще́ние от неистощи́маго исто́чника, точа́щаго святы́ню — Пречи́стыя Де́вы, и Тоя́ Пречи́стаго Младе́нца, Бо́жия Сло́ва, на́с ра́ди вочелове́чшагося. К Нему́ же возопии́м: Тво́рче Изба́вителю, препросла́вленный со Отце́м и Ду́хом, Бо́же, благослове́н еси́.

Неусы́пную, Чи́стая, и богоприя́тную иму́щи моли́тву, и непреодоле́емую держа́ву кре́пости, враго́в на́ших де́рзость, я́же на ны́, разори́, и вы́я и́х под но́зе ве́рному Импера́тору на́шему низложи́, да возвесели́мся о Тебе́, раби́, Сы́ну Твоему́ вопию́ще: оте́ц на́ших Бо́же, благослове́н еси́.

Ра́дуемся и весели́мся, ве́рнии лю́дие, чу́дному явле́нию ико́ны Пречи́стыя Влады́чицы Богоро́дицы, река́ бо яви́ся неисчерпа́ема, целе́бную во́ду точа́щи: слепы́м бо ви́дети дае́т и глухи́м слы́шание, хромы́м хожде́ние и все́м су́щим в неду́зех безме́здное исцеле́ние.

Неиспы́тана глубина́, недове́домо та́инство, непостижи́м о́браз, Де́во, зача́тия Твоего́: зача́тие без се́мене, без му́жа рождество́, Безпло́тный воплоти́ся, Преве́чный младе́нствует, Сы́н Бо́жий, Сы́н Тебе́, Де́вы, быва́ет. Ему́же вопие́м: Бо́же, благослове́н еси́.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

У́м а́нгельский и челове́ческий ужаса́ется, Богоро́дице, ка́ко Бо́га небе́снаго, ложесна́ми объе́мши, воплоти́ла еси́? ка́ко, Младе́нца ро́ждши, я́ко Сы́на на руку́ но́сиши? Его́же ужаса́ется тва́рь и трепе́щут го́рнии престо́ли, вопию́ще непреста́нно: Свя́т, Свя́т, Свя́т еси́, Бо́же, препе́тый и превозноси́мый во ве́ки.

Ра́дуйся, су́щая ра́досте всего́ ми́ра, со арха́нгелом Гаврии́лом вопие́м Ти́, Богоро́дице: ра́дуйся, вмести́лище Невмести́маго; ра́дуйся, Благода́тная, носи́ло Божества́ всего́; ра́дуйся, Ада́мово воззва́ние, с Тобо́ю Госпо́дь, и Тебе́ ра́ди с на́ми, спаса́я на́с. Его́же пое́м и превозно́сим во ве́ки.

Ко́рень Иессе́ев освяще́нный — ко́рень греха́ на́шего исто́ргнула еси́; же́зл Ааро́нов процве́тший — Жизнода́теля цве́та израсти́вши Христа́; ста́мно манноприе́мная — сме́рти всю́ си́лу сокруши́ла еси́ и в поро́ду жи́зни возвела́ еси́ ро́д челове́ческий. Те́мже Тя́ пое́м, до́брых вино́вную.

Ты́ похвала́ христиа́ном еси́, Влады́чице, Ты́ ору́жие на враги́ и стена́ к Тебе́ прибега́ющим. Тя́ и ны́не на по́мощь призыва́ем, Госпоже́, не да́ждь враго́м вознести́ся на лю́ди Твоя́, и́же Тебе́ не хва́лят, ни Сы́на Твоего́, Богоро́дице, и Твое́й ико́не не кла́няются: си́х победи́ и ду́ши на́ша спаси́.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Тебе́, тве́рдую помо́щницу ро́ду челове́ческому, Богоро́дице Мари́е, ли́к проро́ческий многообра́зно провозвести́, се́нь святу́ю, небе́с простра́ннейшую, скрижа́ль богопи́санную и купину́ неопали́мую, две́рь богопрохо́дную, го́ру же и ле́ствицу, и мо́ст, и же́зл процве́тший; мы́ же вои́стину Богоро́дицу Тя́ велича́ем.

Та́йна глубины́ Рождества́ Твоего́ у́м а́нгельский ужаса́ет, Де́во, и пречи́стая ико́на де́моны прого́нит, и ли́ца нечести́вых омрача́ет, и в сту́д порева́ет: не терпя́т бо взира́ти на си́лу ея́, бе́гают же и исчеза́ют. Мы́ же любе́зно покланя́емся и лобыза́ем, и Тя́, Богоро́дицу, велича́ем.

Предста́тельница су́щи неотсту́пна к Вы́шнему Царю́, я́ко иму́щи ма́терне дерзнове́ние непосты́дно, в ми́ре глубо́це правосла́вных житие́ утверди́ и Благове́рнаго Импера́тора на́шего возвы́си, и вся́ поле́зная да́руй всегда́ рабо́м Твои́м, да Тя́, Богоро́дице, велича́ем.

О, Всеми́лостивая христиа́ном помо́щнице! Не мо́жет Тя́ воспе́ти досто́йно у́м челове́ческий и а́нгельский, я́ко всея́ тва́ри честне́йши, небе́сных и земны́х сла́внейши: все́х бо родила́ еси́ Творца́ и Бо́га. Но, о Влады́чице! приими́ ми́лостивно ю́же Тебе́ от се́рдца возложи́хом пе́снь, спаса́й на́с всегда́, на Тя́ бо наде́емся.

Свети́лен:

Да почти́тся Всепе́тая Ма́ти Бо́жия, жи́знь су́щую ро́ждши — Христа́ Бо́га на́шего, ра́йских двере́й отверзе́ние, и всего́ ми́ра очище́ние, к животу́ возведе́ние. Се́й е́сть проро́ком глаго́лавый, Тому́ поклони́мся, Бо́гу и Спа́су ду́ш на́ших.

Сла́ва, и ны́не: Прииди́те, ве́рнии, с чистото́ю, возвели́чим Пречи́стыя Ма́тере Бо́га на́шего чу́дную ико́ну, и Боже́ственнаго Младе́нца Спа́са Христа́, Его́же, я́ко ро́ждшая, на руку́ носи́вши, и ма́терне дерзнове́ние к Нему́ иму́щи, непреста́нно мо́лит за ны́ и подае́т рабо́м Свои́м бога́тыя ми́лости.

Конда́к 1.

Избра́нной от все́х родо́в Засту́пнице ро́да христиа́нскаго, покро́вом Своея́ бла́гости покрыва́ющей страну́ на́шу правосла́вную, благода́рственная пе́ния прино́сим Ти́, Богоро́дице, о явле́нии чу́дныя Твоея́ ико́ны. Ты́ же, я́ко Всеми́лостивая, все́х притека́ющих к Тебе́ Помо́щнице, заступа́й на́с во все́х ско́рбех и ну́ждах, беда́х и напа́стех, да зове́м Ти́:

Ра́дуйся, Засту́пнице усе́рдная ро́да христиа́нскаго.

И́кос 1.

А́нгел предста́тель по́слан бы́сть рещи́ Богоро́дице «Ра́дуйся», егда́ Бо́г Сло́во воплоща́шеся во утро́бе Ея́: и мы́, гре́шнии, прославля́юще явле́ние чу́дныя Ея́ ико́ны и Боже́ственнаго Младе́нца Спа́са Христа́, со умиле́нием вопие́м Благода́тней:

Ра́дуйся, Богоизбра́нная Отрокови́це; ра́дуйся, Ма́ти Бо́жия.

Ра́дуйся, Цари́це Небесе́ и земли́; ра́дуйся, све́тлое Це́ркве Небе́сныя и земны́я украше́ние.

Ра́дуйся, А́нгелы чти́мая; ра́дуйся, пева́емая от Серафи́м.

Ра́дуйся, све́тлое проро́ческое сбытие́; ра́дуйся, апо́столов похвало́.

Ра́дуйся, му́ченическое испове́дание; ра́дуйся, преподо́бных ве́нче.

Ра́дуйся, пра́ведных весе́лие; ра́дуйся, гре́шных упова́ние.

Ра́дуйся, Засту́пнице усе́рдная ро́да христиа́нскаго.

Конда́к 2.

Ви́дящи, Всенепоро́чная, с высоты́ Небе́снаго жили́ща Своего́, иде́же с Сы́ном Твои́м в сла́ве пребыва́еши, ско́рбь рабо́в Твои́х в новопросвеще́ннем гра́де, я́ко гне́внаго ра́ди Бо́жия посеще́ния ве́ра Христо́ва поруга́ема быва́ет ага́рянским злове́рием, благоволи́ла еси́ яви́ти ико́ну Свою́, чудесы́ ю́ прославля́ющи, да утвержда́емии зна́меньми Твоея́ благода́ти, христолюби́вии лю́дие ве́рно вопию́т Бо́гу: Аллилу́иа.

И́кос 2.

Разуме́ние трикра́тнаго явле́ния Богома́тере му́драя отрокови́ца и́щущи, тече́ ко власте́м, пове́дающи и́м ди́вное явле́ние и гро́зное преще́ние: мы́ же дивя́щеся свы́ше да́нному отрокови́це вразумле́нию, благогове́йно вопие́м к Преблагослове́нней:

Ра́дуйся, устна́ми чи́стыми хвалу́ Бо́гови соверша́ющая; ра́дуйся, та́йны благода́ти Бо́жия ве́рным открыва́ющая.

Ра́дуйся, неве́рных сумни́тельное слы́шание; ра́дуйся, ве́рных изве́стная похвало́.

Ра́дуйся, мо́лние, неве́рных устраша́ющая; ра́дуйся, сла́вою чуде́с Твои́х ве́рных ра́зум озаря́ющая.

Ра́дуйся, ага́рянскаго злове́рия обличе́ние; ра́дуйся, горды́ни и́х низложе́ние.

Ра́дуйся, ве́ры христиа́нския утвержде́ние; ра́дуйся, почита́ния святы́х ико́н освяще́ние.

Ра́дуйся, ско́рбь на́шу в ра́дость претворя́ющая; ра́дуйся, несумне́нною наде́ждою на́с увеселя́ющая.

Ра́дуйся, Засту́пнице усе́рдная ро́да христиа́нскаго.

Конда́к 3.

Си́ла Вы́шняго благода́тию Богома́тере умудри́ и укрепи́ отрокови́цу к иска́нию многоце́ннаго Бо́жия да́ра, и та́, с ве́рою дерза́ющи о Го́споде, приступи́ к труду́ и, скры́тое в земли́ обре́тши сокро́вище святы́я ико́ны Богома́тери, ра́достно возопи́ к Бо́гу: Аллилу́иа.

И́кос 3.

Име́ющи благоутро́бное промышле́ние о новопросвеще́нных лю́дех гра́да Каза́ни, от пречестны́я Твоея́ ико́ны то́ки чуде́с источи́ла еси́, Влады́чице, слепы́м теле́сныма очи́ма зре́ние подава́ющи, омраче́нных же душе́вно све́том богопозна́ния и благоче́стия озаря́ющи, де́вствующим под осене́нием Твоея́ ико́ны приста́нище небу́рное да́рующи. Сего́ ра́ди зове́м Ти́:

Ра́дуйся, явле́нием ико́ны Твоея́ тьму́ лю́тых обстоя́ний отгоня́ющая; ра́дуйся, луча́ми чуде́с все́х просвеща́ющая.

Ра́дуйся, слепы́х прозре́ние; ра́дуйся, омраче́нных смы́слом просвеще́ние.

Ра́дуйся, сла́во Правосла́вия; ра́дуйся, ти́хое приста́нище и́щущих спасе́ния.

Ра́дуйся, Ма́ти целому́дрия; ра́дуйся, покро́ве и огражде́ние де́вства.

Ра́дуйся, Е́юже ликовству́ет все́ мно́жество ве́рных; ра́дуйся, Ея́же ра́ди рыда́ет де́монское по́лчище.

Ра́дуйся, все́х христиа́н вожделе́нная Помо́щнице; ра́дуйся, все́х скорбя́щих Ра́досте.

Ра́дуйся, Засту́пнице усе́рдная ро́да христиа́нскаго.

Конда́к 4.

Бу́рю смяте́ний и крамо́лы врага́ми воздви́гнутую в стране́ на́шей утоли́ти тща́щься блаже́нный Ермоге́н, списа́тель чуде́с Твоея́, Богома́ти, ико́ны, сле́зно пред не́ю моля́шеся и, ви́дев, я́ко во́инству правосла́вному в щи́т и побе́дное зна́мение Твоя́ ико́на дарова́ся, ве́рою укрепля́емый до конца́ живота́ своего́, вопия́ше Бо́гу: Аллилу́иа.

И́кос 4.

Слы́шавше правосла́внии во́ини открове́нную Преподо́бным Се́ргием святи́телю Арсе́нию та́йну, я́ко предста́тельством Богома́тере су́д об Оте́честве на́шем преложе́н на ми́лость, ико́ну Богома́терню, я́ко зна́мя побе́дное, прии́мше, исхити́ша ма́терь градо́в ру́сских из ру́к супоста́т и возопи́ша Засту́пнице христиа́н:

Ра́дуйся, Ма́ти Бо́га Вы́шняго; ра́дуйся, я́ко за все́х мо́лиши Сы́на Твоего́, Христа́ Бо́га на́шего.

Ра́дуйся, я́ко все́м твори́ши спасти́ся в держа́вный Тво́й покро́в прибега́ющим; ра́дуйся, Засту́пнице все́х су́щих в ско́рбех и боле́знех.

Ра́дуйся, все́м моля́щимся сокруше́нным се́рдцем пред пречи́стым Твои́м о́бразом поле́зная да́рующая; ра́дуйся, избавле́ние зо́л все́м, невозвра́тно наде́жду иму́щим на Тя́.

Ра́дуйся, ти́хое и до́брое приста́нище; ра́дуйся, ско́рая Помо́щнице.

Ра́дуйся, гото́вый и те́плый покро́ве спасе́ния; ра́дуйся, источа́ющая на́м неоску́дныя ми́лости.

Ра́дуйся, предваря́ющая на по́мощь; ра́дуйся, избавля́ющая от все́х бе́д.

Ра́дуйся, Засту́пнице усе́рдная ро́да христиа́нскаго.

Конда́к 5.

Боготе́чная звезда́ яви́ся Твоя́, Богома́ти, ико́на, всю́ страну́ Росси́йскую обтека́ющая, луча́ми чуде́с Твои́х осиява́ющая все́х блужда́ющих по мо́рю стра́стнаго жития́, мра́к печа́лей и мглу́ вся́ких неду́г и скорбе́й прогоня́ющая и наставля́ющая на пу́ть спасе́ния с ве́рою к Тебе́ притека́ющих и вопию́щих к Бо́гу: Аллилу́иа.

И́кос 5.

Ви́дев ца́рь Пе́тр, я́ко от святы́я ико́ны Богома́терни благода́тию Бо́жиею содева́ются мно́гия чудеса́, прие́млет ю́ в путеводи́тельницу во́инству своему́ и в де́нь бра́ни на све́ев в щи́т и покро́в, и победи́в до конца́ врага́ с по́мощию Богома́тере, те́м ка́мень соверше́нный во основа́ние но́ваго ца́рствующего гра́да положи́, ико́ну же Твою́ чу́дную, я́ко освяще́ние, я́ко щи́т и огражде́ние, в се́рдце гра́да поста́ви. Сего́ ра́ди вопие́м Пречи́стей:

Ра́дуйся, жили́ще и до́ме Христа́ Бо́га на́шего; ра́дуйся, вмести́лище неизрече́нныя Его́ сла́вы.

Ра́дуйся, гра́де одушевле́нный, при́сно ца́рствующий; ра́дуйся, пала́то преукраше́нная.

Ра́дуйся, Ра́досте градо́в и ве́сей; ра́дуйся, непобеди́мое христиа́н в беда́х храни́лище и предгра́дие.

Ра́дуйся, Це́ркве Правосла́вныя похвало́; ра́дуйся, Ру́сской земли́ утвержде́ние.

Ра́дуйся, христолюби́ваго во́инства Помо́щнице; ра́дуйся, враго́в одоле́ние.

Ра́дуйся, от бе́д избавле́ние; ра́дуйся, Ма́терними Твои́ми щедро́тами все́х посеща́ющая.

Ра́дуйся, Засту́пнице усе́рдная ро́да христиа́нскаго.

Конда́к 6.

Предстоя́ще пред пречи́стым Твои́м о́бразом архиере́ев сосло́вии и вси́ лю́дие, мона́си и мирсти́и, пропове́дуют, Госпоже́ Богороди́тельнице, вели́кия Твоя́ ми́лости, я́ко гра́ды огражда́еши, оби́тели покрыва́еши, ве́си защища́еши, и, ве́дуще Тя́ вои́стинну Помо́щницу си́льну и непобеди́му, со слеза́ми прино́сят Ти́ моли́твы, да простре́ши к Сы́ну Твоему́ Богоно́сныя ру́ки за лю́ди Твоя́, во е́же изба́вити на́с от все́х бе́д и напа́стей, да благода́рне вопие́м Бо́гу: Аллилу́иа.

И́кос 6.

Возсия́вши просвеще́ние и́стинное и отгна́вши дре́вле ле́сть ага́рянскую во новопросвеще́нней стране́ Каза́нской, ны́не во все́х гра́дех росси́йских све́тиши све́том чуде́с и ми́лостей: притека́ющий бо с ве́рою ко Твое́й ико́не цельбоно́сней скорбе́й избавле́ние, неду́гов исцеле́ние и ра́дости вся́кия исполне́ния прие́млют, вопию́ще Тебе́ усе́рдно:

Ра́дуйся, неистощи́мый исто́чниче святы́ни; ра́дуйся, многотеку́щая реко́ Боже́ственная благода́ти.

Ра́дуйся, гре́шных с Бо́гом примире́ние; ра́дуйся, грехо́в на́ших очище́ние.

Ра́дуйся, благоче́стия Наста́внице; ра́дуйся, в до́брых де́лех утвержде́ние и по́моще.

Ра́дуйся, до́брыя обе́ты прие́млющая; ра́дуйся, благи́м наме́рением спосо́бствующая.

Ра́дуйся, злы́я начина́ния разруша́ющая; ра́дуйся, вра́жия ко́зни расторга́ющая.

Ра́дуйся, ско́рая челове́ком Помо́щнице; ра́дуйся, ми́лость сугу́бо на́м подаю́щая.

Ра́дуйся, Засту́пнице усе́рдная ро́да христиа́нскаго.

Конда́к 7.

Хотя́щу наро́ду правосла́вному испове́дати ми́лости Преблагослове́нныя Цари́цы Не́ба и земли́ и по си́ле благода́рственная принести́ о избавле́нии его́ от наше́ствия иноплеме́нных, ди́вному хра́му, созда́нному в че́сть пречу́дныя ико́ны, побе́дная в да́р принесе́, да вси́ па́мятующе ми́лость Богома́тере, спа́сшия гра́д се́й и страну́, вы́ну воспева́ют Бо́гу благода́рными усты́: Аллилу́иа.

И́кос 7.

Сто́льному гра́ду Росси́и свята́я ико́на Твоя́, Богома́ти, вои́стинну яви́ся блага́я Одиги́трия, я́коже дре́вле Царегра́ду: к Тебе́ бо прибега́ют лю́дие, по́мощи Твоея́ на нача́ло пути́ и де́л свои́х прося́ще и благода́рственная принося́ще моле́ния пред пречи́стою ико́ною Твое́ю за избавле́ние от скорбе́й и напа́стей, Тебе́ Помо́щницу и Засту́пницу кре́пкую ве́дают. Те́мже благода́рственно вопие́м Ти́:

Ра́дуйся, Росси́йския страны́ покро́ве; ра́дуйся, Правосла́вия в не́й огражде́ние и утвержде́ние.

Ра́дуйся, несокруши́мый щи́те во́инов на́ших; ра́дуйся, броне́ и́х неуязви́мая.

Ра́дуйся, ко́зни враго́в облича́ющая; ра́дуйся, я́ко паучи́ну и́х растерза́ющая.

Ра́дуйся, нече́стия обличе́ние; ра́дуйся, крамо́лы разруше́ние.

Ра́дуйся, ю́ных от заблужде́ний исправле́ние; ра́дуйся, ста́рцев утеше́ние.

Ра́дуйся, душевре́дных уче́ний низложе́ние; ра́дуйся, душеполе́зных зна́ний дарова́ние.

Ра́дуйся, Засту́пнице усе́рдная ро́да христиа́нскаго.

Конда́к 8.

Стра́нно и сумни́тельно неве́рующим слу́шати, ка́ко от ико́ны Твоея́ то́ки благода́ти истека́ют, воня́ живо́тная благоуха́ет: мы́ же, ве́рующе сло́ву, рече́нному Тобо́й, Влады́чице, к первонапи́санней ико́не: «С тобо́й Моя́ благода́ть и си́ла», упова́ем, я́ко и с се́ю ико́ною благода́ть Твоя́ вы́ну: те́мже благогове́йно предстоя́ще лобыза́ем ю́, поклоня́емся е́й, я́ко Тебе́ Саме́й су́щей, че́сть бо ико́ны на первообра́зное восхо́дит, и Твоя́ благода́ть се́ю ико́ною зна́мения и чудеса́ содева́ет все́м с ве́рою притека́ющим к Тебе́ и вопию́щим Бо́гу: Аллилу́иа.

И́кос 8.

Вся́ бы́вши горе́, к Небе́сным взя́та, и земны́х не оставля́еши, Богома́ти, свяще́нным Твои́м предста́тельством: и́маши бо ма́тернее дерзнове́ние ко Христу́ Бо́гу на́шему. Те́мже утверди́ в ми́ре глубо́це правосла́вных житие́ и вся́ поле́зная всегда́ да́руй рабо́м Твои́м, да велича́юще воспева́ем Ти́:

Ра́дуйся, Невмести́маго вмести́лище; ра́дуйся, осене́нная си́лою Вы́шняго.

Ра́дуйся, прозя́бшая Кла́с Небе́сный; ра́дуйся, ми́р ве́сь душепа́губнаго гла́да изба́вльшая.

Ра́дуйся, вы́ну хода́тайствующая за ро́д на́ш; ра́дуйся, я́ко мно́го мо́жет моли́тва Твоя́ пред Сы́ном Твои́м и Бо́гом.

Ра́дуйся, все́х на́с при Кресте́ Сы́на Твоего́ усынови́вшая; ра́дуйся, всегда́ Ма́тернюю любо́вь к на́м явля́ющая.

Ра́дуйся, Хода́таице ве́чных бла́г; ра́дуйся, и во вре́менней жи́зни поле́зная на́м подаю́щая.

Ра́дуйся, изве́стное прибе́жище на́ше во все́х ско́рбных обстоя́ниих; ра́дуйся, несомне́нное утеше́ние в печа́лех.

Ра́дуйся, Засту́пнице усе́рдная ро́да христиа́нскаго.

Конда́к 9.

Вся́каго естества́ а́нгельскаго превы́шшая яви́лася еси́, Пресвята́я Де́во: Бо́га бо зачала́ еси́ пло́тию, Невмести́маго все́ми вмести́ла еси́ во утро́бе Твое́й, на рука́х носи́ла еси́ Нося́щаго ве́сь ми́р дла́нию: те́мже, я́ко Честне́йшую Херуви́м и Сла́внейшую без сравне́ния Серафи́м велича́юще Тя́, вопие́м о Тебе́ Бо́гу: Аллилу́иа.

И́кос 9.

Вити́я многовеща́нныя, я́ко ры́бы безгла́сныя, ви́дим о Тебе́, Богоро́дице: недоуме́ет бо вся́к язы́к благохвали́ти Тя́ по достоя́нию, изумева́ет у́м пе́ти Тя́, Богоро́дице; оба́че Блага́я су́щи, приими́ и от на́с арха́нгельский гла́с, Тебе́ вопию́щих:

Ра́дуйся, Благода́тная; ра́дуйся, я́ко Госпо́дь с Тобо́ю.

Ра́дуйся, Благослове́нная в жена́х; ра́дуйся, обре́тшая благода́ть у Бо́га.

Ра́дуйся, роди́вшая Спаси́теля ми́ру; ра́дуйся, Ма́ти Сы́на Бо́жия.

Ра́дуйся, Роди́тельнице Ве́чнаго Царя́; ра́дуйся, израсти́вшая на́м пло́д живота́.

Ра́дуйся, освяще́нная Ду́хом Святы́м; ра́дуйся, осене́нная си́лою Всевы́шняго.

Ра́дуйся, ве́рная Рабо́ Госпо́дня; ра́дуйся, я́ко Тя́ блажа́т вси́ ро́ди.

Ра́дуйся, Засту́пнице усе́рдная ро́да христиа́нскаго.

Конда́к 10.

Спасти́ хотя́щи мно́гия от находя́щих зо́л, скорбе́й и боле́зней, чу́дную ико́ну Твою́, Богома́ти, дарова́ла еси́, ея́же ра́ди слепи́и презира́ют, хроми́и хо́дят, разсла́бленнии возстаю́т, бесну́ющиися исцеля́ются, земли́ плодоно́сие подае́тся, лю́дие от смертоно́сныя я́звы избавля́ются, гра́ды и до́мы от огня́ спаса́ются: те́мже прославля́юще Бо́га, даю́щаго на́м таковы́я ми́лости, вопие́м Ему́ усе́рдно: Аллилу́иа.

И́кос 10

Стена́ еси́, Богоро́дице, стране́ Росси́йстей, гра́дом огражде́ние и сла́ва, правосла́вному во́инству на враги́ укрепле́ние. Те́мже, благодаря́ще Тя́, вопие́м:

Ра́дуйся, прославля́ющих Тя́ прославля́ющая; ра́дуйся, не чту́щих Тя́ посрамля́ющая.

Ра́дуйся, враго́в устраше́ние; ра́дуйся, от наше́ствия иноплеме́нных избавле́ние.

Ра́дуйся, во́инов кре́посте; ра́дуйся, в дни́ бра́ни забра́ло и огражде́ние.

Ра́дуйся, в дни́ ми́ра живоно́сный са́де, увеселя́ющий сердца́ ве́рных; ра́дуйся, ору́жие, его́же трепе́щут де́мони.

Ра́дуйся, спаси́тельный еле́й, умаща́ющий грехо́вныя ра́ны ка́ющихся; ра́дуйся, те́плое на́ше упова́ние.

Ра́дуйся, несумне́нная на́ша Наде́ждо; ра́дуйся, ти́хое и до́брое приста́нище.

Ра́дуйся, Засту́пнице усе́рдная ро́да христиа́нскаго.

Конда́к 11.

Пе́ние хвале́бное и благода́рственное прино́сят Тебе́, Влады́чице, припа́дающе ко ико́не Твое́й и любе́зно лобыза́юще ю́, де́в ли́цы, под держа́вным покро́вом Твои́м ти́хое и ми́рное и́ноческое житие́ провожда́ющии, и возложи́вше на Тя́ все́ упова́ние, ра́достно вопию́т Бо́гу: Аллилу́иа.

И́кос 11.

Я́ко светоприе́мную свещу́, зри́м Твою́ честну́ю ико́ну, Пресвята́я Влады́чице: та́ бо невеще́ственный о́гнь благода́ти Твоея́ восприе́мши, и в подо́биих ея́ но́вы возжига́ет свети́льники, прича́стны тоя́жде си́лы благода́тныя, и озаря́ет чудесы́, наставля́ющи на пу́ть спасе́ния все́х вопию́щих Ти́ си́це:

Ра́дуйся, Неве́сто Неневе́стная; ра́дуйся, Богоизбра́нная Отрокови́це, Ма́ти Де́во.

Ра́дуйся, до́брая Наста́внице непоро́чнаго де́вства; ра́дуйся, Храни́тельнице ревну́ющих о чистоте́.

Ра́дуйся, же́н похвало́; ра́дуйся, де́в велича́ние.

Ра́дуйся, вдо́в заступле́ние; ра́дуйся, сиро́т призре́ние.

Ра́дуйся, ни́щих Пита́тельнице; ра́дуйся, наги́х одея́ние.

Ра́дуйся, печа́льных утеше́ние; ра́дуйся, скорбя́щих весе́лие.

Ра́дуйся, Засту́пнице усе́рдная ро́да христиа́нскаго.

Конда́к 12.

Благода́ть да́ти восхоте́вши почита́ющим Тя́ с любо́вию, Богороди́тельнице, прису́щего Ти́ си́лу благода́тную оста́вила еси́ во святы́х Твои́х ико́нах, и́бо Боже́ственная благода́ть, спребыва́ющи те́м (ико́нам), зна́мения и чудеса́ вы́ну содева́ет и душе́вных и теле́сных неду́г исцеле́ние все́м с ве́рою приходя́щим подае́т Твои́ми Богома́терними непреста́нными к Бо́гу моли́твами о вопию́щих Ему́: Аллилу́иа.

И́кос 12.

Пою́ще Твоя́ чудеса́, бы́вшая в дре́вняя и настоя́щая времена́, хва́лим Тя́, я́ко Живоно́сный Исто́чник благода́ти, я́ко неистощи́мую реку́ чуде́с, я́ко бе́здну ми́лости и щедро́т, и все́ упова́ние по Бо́зе возлага́юще на Тя́ и в се́й и в бу́дущей жи́зни, прославля́юще Тя́, вопие́м:

Ра́дуйся, христиа́н непосты́дное упова́ние; ра́дуйся, ве́рных спаси́тельное прибе́жище.

Ра́дуйся, ненаде́жных наде́яние; ра́дуйся, отча́янных спасе́ние.

Ра́дуйся, ба́не, омыва́ющая со́весть; ра́дуйся, росо́, оживля́ющая ду́ши.

Ра́дуйся, боле́зней врачевство́ ско́рое и безме́здное; ра́дуйся, от все́х бе́д бы́строе избавле́ние.

Ра́дуйся, Уте́шительнице во вся́кой ско́рби; ра́дуйся, из глубины́ поги́бели спаса́ющая.

Ра́дуйся, отра́до в де́нь сме́рти; ра́дуйся, еди́ная Наде́ждо и по сме́рти.

Ра́дуйся, Засту́пнице усе́рдная ро́да христиа́нскаго.

Конда́к 13.

О Всепе́тая Ма́ти, ро́ждшая все́х святы́х Святе́йшее Сло́во, приими́ ны́не ма́лое сие́ моле́ние и, вели́чия ра́ди бла́гости Твоея́ и бе́здны щедро́т Твои́х, не помяни́ мно́жества грехо́в на́ших, но испо́лни во благи́х проше́ния на́ша, подава́ющи те́лу здра́вие, ду́ши спасе́ние, избавля́ющи от вся́кия ну́жды и печа́ли и Ца́рствия Небе́снаго насле́дники сотворя́ющи все́х ве́рно вопию́щих Бо́гу: Аллилу́иа.

Этот конда́к читается трижды, затем икос 1-й и конда́к 1-й.

Моли́тва пе́рвая.

О Пресвята́я Госпоже́ Влады́чице Богоро́дице! Со стра́хом, ве́рою и любо́вию припа́дающе пред честно́ю ико́ною Твое́ю, мо́лим Тя́: не отврати́ лица́ Твоего́ от прибега́ющих к Тебе́, умоли́ милосе́рдая Ма́ти, Сы́на Твоего́ и Бо́га на́шего, Го́спода Иису́са Христа́, да сохрани́т ми́рну страну́ на́шу, Це́рковь Свою́ Святу́ю да незы́блему соблюде́т от неве́рия, ересе́й и раско́ла. Не и́мамы бо ины́я по́мощи, не и́мамы ины́я наде́жды, ра́зве Тебе́, Пречи́стая Де́во: Ты́ еси́ Всеси́льная христиа́н Помо́щница и Засту́пница. Изба́ви все́х с ве́рою Тебе́ моля́щихся от паде́ний грехо́вных, от наве́та злы́х челове́к, от вся́ких искуше́ний, скорбе́й, бе́д и от напра́сныя сме́рти: да́руй на́м ду́х сокруше́ния, смире́ние се́рдца, чистоту́ помышле́ний, исправле́ние грехо́вныя жи́зни и оставле́ние прегреше́ний, да вси́ благода́рне воспева́юще вели́чия Твоя́, сподо́бимся Небе́снаго Ца́рствия и та́мо со все́ми святы́ми просла́вим Пречестно́е и Великоле́пое И́мя Отца́ и Сы́на и Свята́го Ду́ха. Ами́нь.

Моли́тва втора́я.

О, Пресвята́я Влады́чице Богоро́дице, Цари́це Небеси́ и земли́, вы́шшая а́нгел и арха́нгел и всея́ тва́ри честне́йшая, чи́стая Де́во Мари́е, ми́ру блага́я Помо́щнице, и все́м лю́дем утвержде́ние, и во вся́ких ну́ждах избавле́ние! При́зри и ны́не, Госпоже́ Всеми́лостивая, на рабы́ Твоя́, Тебе́ умиле́нною душе́ю и сокруше́нным се́рдцем моля́щияся, со слеза́ми к Тебе́ припа́дающия и покланя́ющияся пречи́стому и цельбоно́сному о́бразу Твоему́, и по́мощи и заступле́ния Твоего́ прося́щия. О, Всеми́лостивая и Премилосе́рдая Де́во Богоро́дице Чи́стая! Воззри́, Госпоже́, на лю́ди Твоя́: мы́ бо гре́шнии не и́мамы ины́я по́мощи, ра́зве Тебе́ и от Тебе́ ро́ждшагося Христа́ Бо́га на́шего. Ты́ еси́ засту́пница и предста́тельница на́ша. Ты́ еси́ оби́димых защище́ние, скорбя́щим ра́дование, си́рым прибе́жище, вдо́вам храни́тельница, де́вам сла́ва, пла́чущим весе́лие, больны́м посеще́ние, немощны́м исцеле́ние, гре́шным спасе́ние, Сего́ ра́ди, о Богома́ти, к Тебе́ прибега́ем, и на Тво́й Пречи́стый о́браз с Предве́чным на руку́ Твое́ю держи́мым Младе́нцем, Го́сподем на́шим Иису́сом Христо́м взира́юще, умиле́нное пе́ние Тебе́ прино́сим и вопие́м: поми́луй на́с, Ма́ти Бо́жия, и проше́ние на́ше испо́лни, вся́ бо су́ть возмо́жна хода́тайству Твоему́: я́ко Тебе́ сла́ва подоба́ет ны́не и при́сно и во ве́ки веко́в. Ами́нь.

Кондак 1

Взбранному воеводе и августалию страны Египетския, царем земным честию превознесенному, последиже от Юлиана злочестиваго мучимому и во главу усеченному, яко зельне страдавшему и победительне вся претерпевшему, от Бога же приявшему нетление и благодать чудотворения, днесь вернии в похвальная возопиим: Радуйся, святый Артемие, преславный Христов великомучениче.

Икос 1

Антиохийстии людие дивишася святей ревности твоей о имени Христове, славне Артемие, не терпя бо зрети мучения святых и хулы слышати на Господа, Юлианом изрыгаемыя; аще и честь ему воздати от Александрии пришел, обаче и обличити того не устрашился еси. Темже, и чина своего воинскаго изверженный за дерзновение свое, осуждение на раны и смерть приял еси. Мы же ныне, аки обстояще ти на позорищи мучимому, вопием ти сице: Радуйся, безславие и мучение от Юлиана претерпевый. Радуйся, в славу и осияние от Бога облеченный. Радуйся, лютая страдания подъявый. Радуйся, величие веры показавый. Радуйся, блистаяйся славою терпения. Радуйся, крепосте наша в скорбех и изнеможении. Радуйся, святый Артемие, преславный Христов великомучениче.

Кондак 2

Буди верен царю, прещаше святый Артемий нечестиваму Юлиану: «Яко суетны твоя начинания и немощна есть гордость твоя истребити христианы: отнележе бо прииде Христос, и водрузися Крест, и воздвижеся на нем Господь — паде злочестивых гордыня и попрана бысть лукаваго крепость, Христова же непобедима и непреодоленна есть сила, еюже ограждающеся, возможем устояти противу козней вражиих, победне вопия Богу: Аллилуиа».

Икос 2

Воинствуя за великаго царя Константина, крепкою силою крестною побеждал еси враги, оружеборче Артемие; тою же силою и мучителя своего Юлиана одолел еси. Видением бо креста овогда на небеси в вере Христовей утвердился, лесть идольскую и почести воинскаго звания презрев, за христианы пред отступником мужественно ратовал еси, и воинов началовождя веры нашея, Господа Христа, себе нарек, живот свой за Того доблественно положил еси. Темже и притяжал еси себе от нас звания таковая: Радуйся, знамена идольская кесаря-отступника отринувый. Радуйся, знамению Креста последовавый. Радуйся, и ныне силы борющихся под стягом веры укрепляяй. Радуйся, упование изнемогающих утверждаяй. Радуйся, добрый Христов оружниче. Радуйся, святыя веры твердый защитниче. Радуйся, святый Артемие, преславный Христов великомучениче.

Кондак 3

«Господи, далече есмь от терпения и незлобия Твоего», — вопиял еси, святе Артемие, первая мучения претерпев, — «Ты бо, Господи, за мене, грешнейшаго, по всему телеси содроблен был еси ранами, от ног до главы не бе в Тебе целости. Молю убо Тя, Владыко, яко Твоими страданьми венчал мя еси, да и совершиши течение мое во исповедании Тебе с песнию: Аллилуиа».

Икос 3

Даде злочестивый царь повеление оруженосцем своим восхитити тя, славнаго воинскаго вождя, Артемие, и сановный пояс твой отъемше, и ризы совлекше, нага истязати. Они же, связавше руце и нозе твои, растягоша тело твое на четверо и бияху воловьими жилами по хребту и чреву толико, яко оскудети силам их. Ты же аки нечувствен пребывал еси, яко всем, окрест стоящим, и самому Юлиану чудитеся зело. Приими убо и от нас похвальная удивления сицевая: Радуйся, в вере непобедимый. Радуйся, в уповании непреодолимый. Радуйся, на камени терпения нозе свои поставивый. Радуйся, мужественне стопы своя исправивый. Радуйся, радовавыйся в страданиях. Радуйся, прославленный в поруганиях. Радуйся, святый Артемие, преславный Христов великомучениче.

Кондак 4

Егда святии исповедницы Евгений и Макарий мучими бяху, тогда и ты, блаженне Артемие, ревностию по Бозе движим, молитву творил еси, да не покажет Бог тебе не точию недостойна страдальческаго начинания, но да исправится пред Ним и твоя исходная песнь: Аллилуиа.

Икос 4

Жилами воловьими биемый и по земле протязаемый ничтоже малодушествовал еси, но радуяся и веселяся, страданьми Христовыми просвещаем, подвиг мученичества до конца совершил еси добре. Темже и достоин явился еси ублажения сицеваго: Радуйся, скудельный сосуд плоти своея сокрушивый. Радуйся, свет веры и силу мужества из него явивый. Радуйся, в егоже немощи сила Господня совершися. Радуйся, егоже терпению мучитель почудися. Радуйся, яко Бог прият твою жертву мучения. Радуйся, яко Благий даде тебе жребий спасения. Радуйся, святый Артемие, преславный Христов великомучениче.

Кондак 5

«За Мене страждеши, Артемие, дерзай и радуйся», — глагола Христос, явився святому в темнице, — «Со Мною будеши во Царствии Моем». Сия слышав мученик, абие от ран исцеле, и душею исполнився Божественнаго утешения, пребываше в темнице, благословляя Бога и поя Ему: Аллилуиа.

Икос 5

И гладом, и жаждею мучиша тя в темнице, блаженне Артемие. Ты же, на щедроты Преблагаго Господа себе возверг, единаго просил еси, да и самую душу твою, яко жертву живую приимет Владыка Христос от тебе с еще оставшеюся кровию твоею. И не вотще бысть рачение твое: заповеда бо Господь Ангелом Своим в темнице питати и сохраняти тя, потом же и Сам явися, укрепляя тебе, нас же возглашати тебе научая: Радуйся, от руки Ангел в темнице питавыйся. Радуйся, хлебом животным с небесе укреплявыйся. Радуйся, от ран Господним посещением во узах исцеливыйся. Радуйся, явлением Христовым утешения исполнивыйся. Радуйся, Господем в темнице обрадованный. Радуйся, восшедый к Нему прияти венец славы тебе уготованный. Радуйся, святый Артемие, преславный Христов великомучениче.

Кондак 6

«Коль многа суть Владыки моего страдания и что более Его претерпех аз, недостойный», — вопияше блаженный Артемий, — «Той ко Кресту пригвожден бысть греха ради моего, Сам не познав греха, ниже лесть во устех содела. Радуюся и веселюся просвещаемый Господа моего страданьми, яже облегчевают ми болезни моя». Тако святый в себе беседуя, чрез всю нощь купно со страдальцами Евгением и Макарием воспеваше Богу: Аллилуиа.

Икос 6

Лютейшим мукам предаде тя, страдальче Артемие, нечестивый царь, егда со стыдом от Аполлона Дафнийскаго возвратися и от тебе посмеяние и проречение погибели своея слышав, зельною яростию распалися. Темже и мы за оныя страдания множайшими ликостоянии ублажаем тя сице: Радуйся, яко тобою Бог, дивный во святых Своих, языком явися. Радуйся, яко тобою сладчайшее имя Христово прославися. Радуйся, ярости мучителевы не устрашивыйся. Радуйся, в Христовем уповании над идолы посмеявыйся. Радуйся, в дусе пророчестем будущих предзрителю. Радуйся, Духа Господня доблий носителю. Радуйся, святый Артемие, преславный Христов великомучениче.

Кондак 7

Многа досаждения творяше нечестивый Юлиан христианом, лжуще на ня, яко сожгоша храм Аполлона Дафнийскаго. Егда же сей лжец пред Артемием множайшия прещения изрекаше на христианы, святый Артемий отвеща: «Богопустный гнев и огнь с небесе пояде идола твоего и капище его сожже; посмеваюся безумию вашему, яко служите бездушному богу, утешаюся о падении его и радуюся о всех сих, яже Христос чудодействова, Емуже достоит пети велегласно: Аллилуиа».

Икос 7

Не терпя слышати праведных слов твоих, святе Артемие, беззаконный Юлиан, разгневався зело, повеле каменосечцем разсещи великий камень, да посреде частей его согнетен будеши. И сему уготованному, падший камень все тело твое сотре, и внутренняя твоя распадошася, и сломишася вся члены твоя. И бе зрети чудо велие, яко в таковом согнетении посреде камней ты жив остася. Мы же Божией силе, укреплявшей тя, удивляяся, вопием: Радуйся, грозде винограда Христова в точиле истоптанная. Радуйся, жертво живая, Господу верху камене кровию возлиянная. Радуйся, мучениче, егоже все тело аки дска согнетеся. Радуйся, скрижале живая, на нейже исповедание веры кровию написася. Радуйся, кровьми своими, аки брением камение смесивый. Радуйся, себе самаго жива в созидание Церкве Христовы положивый. Радуйся, святый Артемие, преславный Христов великомучениче.

Кондак 8

Очи твои от мук искочиша, святе, и лице бе сотрено, душа же еще бе держащися и язык добре вещающ, имже и в согнетении призвал еси Бога, Помощника своего, и во уповании на Него взывал еси: Аллилуиа.

Икос 8

Привидением почте тя царь, егда узре видом страшна и естество человеческое происходяща; обаче и увеща тебе еще поклонитися идолом, да помилуют тя и поне яже во аде мукам не предадят. Ты же, посмеявся царю, отвещал еси: «Яко идоли и сами огня не могут избежати, с нимиже и ты, царю, безконечному огню предан будеши». За еже, яко хульника, царь на смерть осуди тя. Мы же, сшествуя тебе на место усечения, увязаем главу твою похвальными венцы тако: Радуйся, страдальче, посреде камений согнетенный. Радуйся, исповедниче, в крепости веры не одоленный. Радуйся, истину без страха пред цари вещавый. Радуйся, за сие последи всех злостраданий усечение мечное приявый. Радуйся, главу свою священную под меч самовольне подклонивый. Радуйся, терпением своим главы невидимых врагов сокрушивый. Радуйся, святый Артемие, преславный Христов великомучениче.

Кондак 9

Ранами содроблен был еси по всему телеси, яко людем на тя зрети бе страшно: согнетенный аки дска, кости сокрушенны и вся внутренняя испадоша. Таковое злострадание за малую болезнь почитал еси, надеяся у Господа, за Негоже страдал еси, имети покой вечный, научая в злострадании не малодушествовати, но паки возсылати Богу благодарне: Аллилуиа.

Икос 9

«Се язвы Христовы на теле твоем начертаны суть», — глагола к себе святый, — «осталося убо, да и самую душу за Христа отдам с оставшеюся во мне кровию». И на щедроты Господни себе возверг, небоязненно Христа исповедал пред человеки, за Негоже и усечение с радостию приял еси. Сего ради, за превосходящую любовь твою к Богу, похваляем тя сице: Радуйся, Христова Евангелия скорый послушателю. Радуйся, великия заповеди Его готовый исполнителю. Радуйся, крепкую любовь ко Господу Христу показавый. Радуйся, и душу свою с кровию радостно за Того предавый. Радуйся, содроблением своим наше разслабление укрепляяй. Радуйся, язвами своими наша болезни исцеляяй. Радуйся, святый Артемие, преславный Христов великомучениче.

Кондак 10

Твердою верою вооружився, неистовство мучителево презрел еси, и осуждение на усечение мечное с радованием приял еси, и ведомый на смерть, шествовал еси веселыми ногами, вопия Христу Богу: Аллилуиа.

Икос 10

Усечением главы подвиг свой мученический запечатлевый, утверди молитвами твоими и нас, главы своя под иго Христово подклонивших, чрез все житие подвигом добрым подвизатися, любити Господа у тебе поучатися, вопия тебе сице: Радуйся, сильне, на одоление мучителей меч веры при бедре препоясавый. Радуйся, шлемом спасения от Господа защищенный. Радуйся, поясом славы от Него добре украшенный. Радуйся, щитом молитв своих всех прибегающих к тебе охраняяй. Радуйся, за страдальцев Господних во всеоружии ополчаяйся. Радуйся, шествующих узким путем в Царствие Небесное неуклонно провождаяй. Радуйся, святый Артемие, преславный Христов великомучениче.

Кондак 11

Фиал злострадания уготовляяся до конца испити, на месте усечения преклонився до земли, молитвою к Богу дух свой укреплял еси. И слышав глас с неба глаголющ: «Вниди со святыми прияти воздаяние тебе уготованное», — преклонил еси главу под меч, с радостию вознося Богу: Аллилуиа.

Икос 11

Хвалим тя вси, страстотерпче святый, и почитаем честная страдания твоя, яже паче естества человеческаго претерпел еси, и Царствие Небесное притяжал еси. Темже воздвизаемся вопити тебе тако: Радуйся, измождения и членовреждения приявый. Радуйся, высоту духа в муках явивый. Радуйся, щитом упования себе оградивый. Радуйся, твердостию своею дерзость мучителей истощивый. Радуйся, егоже мучению Ангели предстояху со удивлением. Радуйся, егоже страдания людие почитают со умилением. Радуйся, святый Артемие, преславный Христов великомучениче.

Кондак 12

Ценою крови твоея притяжал еси Царствие Небесное, великострадальче Христов Артемие. Управи и нас твоим предстательством во обители небесныя, да, наслаждаяся с тобою части праведных, выну славим с тобою Бога песнию: Аллилуиа.

Икос 12

Чертог небесный отверзе ти Страстоположник Христос и даде ти достойно венец славы: и ныне на небесех со Ангельскими чинми радуешися. Темже и мы, благодарнии людие и любомученицы, песньми вопием ти: Радуйся, воеводо, никимиже в мужестве одоленный. Радуйся, ратоборче за Христа, в силе неоскудеемый. Радуйся, великострадальче, муками твоими естество человеческое удививый. Радуйся, несокрушимость духа в телеснем содроблении явивый. Радуйся, во уповании на Бога Жива не усумневыйся. Радуйся, части праведных на небесех наслаждаяйся. Радуйся, святый Артемие, преславный Христов великомучениче.

Кондак 13

О, преславне великомучениче Христов Артемие! Поем страдания твоя, чтим доблюю кончину твою, с усердным молением к тебе притекающе: укрепи и нас с терпением в подвизе крестоношения пребывати, испытания и злострадания чрез все житие до конца понести не унывающе, но бодренне пребывающе в пении Богу: Аллилуиа.

(Этот кондак читается трижды, затем икос 1 и кондак 1)

Молитва

О, всехвальный великомучениче Артемие, Господень воинственниче и всем нам крепкий поборниче! Скор буди предстательством твоим у Человеколюбца Христа, да даст правоверным людем, почитающим тя и на поклонение мощем твоим приходящим, милость и благих прошений скорое исполнение. Предстояй Престолу Божию в лице мученик, поминай всех нас, бедами, напастьми и скорбьми обстоимых, и в житии сем много страждущих: да твоею помощию и крепким поборством престанут приходящая на нас злая. Мы же, твоими злостраданиями назидаеми, силою благодати Христовы чрез тебе исполняеми, в терпении крестоношения жити начнем, во еже Господу покаянием благоугодити и неизреченная благая наследовати, яже уготована любящим Бога и прославляющим святое имя Его, Отца и Сына и Святаго Духа, ныне и присно, и во веки веков. Аминь.