[spoiler]

Тропарь Трубчевской иконе Божией Матери, глас 4

[/spoiler]

Кондак 1

   Избра́нней от всех родо́в Пречи́стей Де́ве Влады́чице, источа́ющей неоску́дныя ми́лости всему́ ми́ру и сугу́бо держа́ве на́шей Росси́йстей, чудеса́ми, явле́ниями и чудотво́рными ико́нами гра́ды и ве́си на́ши просла́вившей, похва́льное прино́сим пе́ние. Ты же, о Всечестна́я на́ша Ма́ти и Засту́пнице    Блага́я,    храня́щи    зе́млю Трубче́вскую, не отри́ни на́ших песнопе́ний, но приими́ их и пода́ждь ра́дость нам, зову́щим Ти:

Ра́дуйся, Пресвята́я Богоро́дице Де́во, Трубче́вская Похвало́ и на́ше при́сное Утеше́ние.

Икос 1

   Вся Небе́сныя Си́лы немо́лчно песносло́вят Тя, Всеми́лостивейшую Влады́чицу, Честне́йшую Херуви́м и Сла́внейшую без сравне́ния Серафи́м, су́щую Богоро́дицу: и мы, гре́шнии, на земли́ дивя́щеся ско́рому засту́пничеству Твоему́ чрез чуде́сно явле́нный чудотво́рный о́браз Твой «Трубче́вский» избавля́емся бед и зол. Те́мже в ра́дости серде́чней с любо́вию припа́дающе к пречи́стому Твоему́ о́бразу со умиле́нием прино́сим Ти благохвале́ния сицева́я:

Ра́дуйся, Всечестна́я на́ша Ма́ти.

Ра́дуйся, ди́вная на́ша Засту́пнице.

Ра́дуйся, Наде́ждо на́шего спасе́ния.

Ра́дуйся, наде́ющихся на Тя, Руководи́тельнице.

Ра́дуйся, гра́да Трубче́вска и ве́сей окре́стных Храни́тельнице.

Ра́дуйся, живу́щих зде христиа́н Покрови́тельнице.

Ра́дуйся, ико́ною Свое́ю зна́мения ве́рным явля́ющая.

Ра́дуйся, на моля́щихся усе́рдно пред о́бразом Твои́м о́чи Свои́ обраща́ющая.

Ра́дуйся, Пресвята́я Богоро́дице Де́во, Трубче́вская Похвало́ и на́ше при́сное Уте́шение.

Кондак 2

 

   Си́лою Бо́жиею и Благода́тию Свое́ю зе́млю Трубче́вскую осени́вшая, ви́дящи, Пречи́стая,   усе́рдие   бра́тии   Чо́лнския оби́тели,   егда́   возноша́ху   в   труда́х   и бде́ниях приле́жныя моли́твы с ве́рою и упова́нием на Тя, благоволи́ла о́браз Свой написа́ть и́ноку Евфи́мию. Да  вси  взира́юще  на  о́браз  Твой  честны́й  из глубины́   души́ благодари́м Тя, на́шу ди́вную Засту́пницу,    вопию́ще Бо́гу: Аллилу́иа.

 

Икос 2

   Возсия́ исто́чником чуде́с на Десне́, Свята́я и Пречи́стая ико́на Твоя́, Цари́це и Влады́чице всея́ Тва́ри, со усе́рдием мно́гим притека́ху к Твоему́ о́бразу, прие́мля от него́ да́ры неисче́тных Твои́х щедро́т. Те́мже и мы, недосто́йнии, стезе́ю отце́в на́ших ше́ствуя, с ве́рою и любо́вию припа́даем к Твое́й чудотво́рней ико́не и из глубины́ серде́чныя вопие́м:

Ра́дуйся, ико́ну Твою́ чудеса́ми просла́вившая.

Ра́дуйся, Чо́лнскую оби́тель е́ю же освяти́вшая.

Ра́дуйся, но́вый свой уде́л на Десне́ возлюби́вшая.

Ра́дуйся, гра́ду Трубче́вску и преде́лам его свы́ше насле́дие спаси́тельное дарова́вшая.

Ра́дуйся, покро́вом ми́лости Твоея́ зе́млю Трубче́вскую осеня́ющая.

Ра́дуйся, я́ко в ней ико́ну Твою́ чудотво́рную яви́вшая.

Ра́дуйся, ди́вны и вели́ки чудеса́ от нея́ показа́вшая.

Ра́дуйся, всем прося́щим у Тебя́ исцеле́ния чрез ико́ну Твою́ источа́ющая.

Ра́дуйся, Пресвята́я Богоро́дице Де́во, Трубче́вская Похвало́ и на́ше при́сное Утеше́ние

Кондак 3

           

   Си́лою  Бо́жиею  чудеса́ преди́вныя соверша́хуся от свята́го о́браза Твоего́, Преблагослове́нная Влады́чице, егда́ к нему́ во мно́жестве стеца́хуся наро́д от ма́ла до вели́ка проси́ти исцеле́ния и заступле́ния, и всяк прося́щий по ве́ре от всех неду́гов душе́вных и теле́сных врачева́шеся Благода́тию Твое́ю, Богоро́дице. Те́мже и мы, недосто́йнии, прибега́ем под Твой Покро́в, ча́ющи бога́тыя ми́лости, излива́емыя от чудотво́рныя ико́ны Твоея́, с ве́рою и любо́вию воспева́юще хвале́бную песнь Созда́телю Бо́гу: Аллилу́иа.

 

Икос 3

   Ра́зум челове́ческий не мо́жет пости́гнути си́лу благода́тного засту́пничества честно́ю ико́ною Твое́ю, о Милосе́рдая Ма́ти, чуде́сно явле́ннаго во дни гне́внаго посеще́ния Бо́жия за лю́тыя беззако́ния на́ша, егда́ бо изнесе́нием из гра́да Трубче́вска чудотво́рнаго о́браза Твоего́ с моле́бным пе́нием   на   сто́гны   гра́да   Наровча́та          преста́в земли́ той смертоно́сная па́губа, и мно́жайшая скорбь рабо́в Твои́х в ра́дость ве́лию претвори́ся. Сего́ ра́ди ви́девши Твое́ неизрече́нное благоволе́ние к па́дшему ро́ду челове́ческому в пе́снех возглаша́ем Ти:

Ра́дуйся, скорбя́щих Ра́досте и Покрови́тельнице.

Ра́дуйся, от смертоно́сныя я́звы град Наровча́тский изба́вившая.

Ра́дуйся, от немину́емыя поги́бели христиа́н спаса́ющая.

Ра́дуйся, на стези́ покая́ния прему́дро наставля́ющая.

Ра́дуйся, изнесе́нием честна́го о́браза Твоего́ в земли́ Наровча́тской свире́пствующую холе́ру прекрати́вшая.

Ра́дуйся, плач и се́тование в ра́дость претвори́вшая.

Ра́дуйся, ко исправле́нию грехо́внаго жития́ нас побужда́ющая.

Ра́дуйся, на усе́рдно моля́щихся о́чи Свои́ обраща́ющая.

Ра́дуйся, Пресвята́я Богоро́дице Де́во, Трубче́вская Похвало́ и на́ше при́сное Утеше́ние.

Кондак 4

 

   Бу́ря недоуме́ний смуща́ет ум челове́ческий: ка́ко           воспе́ти недосто́йными    усты́ вели́чие сла́вы Твоея́?  О  Преблагослове́нная  Цари́це, Я́же во ико́не Твое́й святе́й мно́жество чуде́с нам яви́ла еси́, изря́дно подаю́щи по́мощь и защи́ту ро́ду христиа́нскому от враг ви́димых и неви́димых. Сего́ ра́ди со умиле́нием взира́юще на ико́ну Твою́ святу́ю, почерпне́м от исто́чника неоскудева́емаго в ско́рбех на́ших отра́ду, в печа́лех утеше́ние, в неду́зех тя́жких врачевство́ оби́льное и воззове́м благода́рственными гла́сы на ней Изображе́нному вку́пе с То́бою Сы́ну Твоему́ и Бо́гу на́шему: Аллилу́иа.

 

Икос 4

   Слы́шавше о вели́ких чудесе́х, явля́емых от ико́ны Твоея́ в земли́ Ска́новей возра́довася зело́ преосвяще́ннейший Амвро́сий и благослови́ созда́ти храм в честь чудотво́рнаго о́браза Твоего́ «Трубче́вскаго» и па́ки потщи́ся пребы́ти во оби́тель, и освяти́ храм, и та́ко просла́ви о́браз Твой святы́й со бра́тиею и мно́жества наро́да. Мы же, ве́дуще любо́вь Твою́ к нам неизрече́нную в ра́дости серде́чней из глубины́ души́ воспева́ем Ти сицева́я:

Ра́дуйся, Сокро́вище благода́тных исцеле́ний неоску́дное.

Ра́дуйся, христиа́н боголюби́вых Утеше́ние.

Ра́дуйся, в ми́ре благоче́стно живу́щия не лиша́ющая Твоего́ заступле́ния.

Ра́дуйся, в честь ико́ны Твоея́ храм возсозда́ти архиере́я вразуми́вшая.

Ра́дуйся, в ве́ре коле́блющихся зна́меньми чуде́с от ико́ны Твоея́ наста́вившая.

Ра́дуйся, архиере́й с бра́тиею и со мно́жества наро́да о́браз Твой чудотво́рный просла́виша.

Ра́дуйся, уны́ние и отча́яние от душ на́ших отгоня́ющая.

Ра́дуйся, Пресвята́я Богоро́дице Де́во, Трубче́вская Похвало́ и на́ше при́сное Утеше́ние.

Кондак 5

 

   Благода́тная си́ла, ико́не Твое́й дарова́нная, Пресвята́я Госпоже́ Богоро́дице, созыва́ет ве́рных собо́ры пе́сньми духо́вными сла́вити Тя, Честне́йшую Херуви́мов и Серафи́мов, и́бо предстои́ши ны́не пред Престо́лом Триипоста́снаго Божества́, иде́же во́инства го́рния с тре́петом вопию́т: Аллилу́иа.

Икос 5

 

    Ви́деша то́ки чуде́с на ме́сте написа́ния чу́дныя ико́ны Твоея́ на Десне́, Влады́чице Всеми́лостивая, лю́ди ве́рнии вку́пе с насе́льниками Чо́лнския оби́тели со усе́рдием и умиле́нием сле́зным сняли«в ме́ру и подо́бие» спи́сок с о́браза Твоего́ чудотво́рнаго [его́ же Ты, Влады́чице Всеми́лостивая, земли́ Ска́новей во освяще́ние и утеше́ние дарова́ла], спи́сок же той надели́вшая неисче́тными дара́ми Твои́х щедро́т и в зе́млю Трубче́вскую перенести́ повеле́вшая, пред ним же немо́лчно доны́не Тебе́ воспева́ем сицева́я:

Ра́дуйся,    зе́млю    Трубче́вскую    в достоя́ние Себе́ избра́вшая.

Ра́дуйся,  я́коже  ико́на  Твоя́  уде́л Трубче́вский просвети́вшая.

Ра́дуйся, я́ко ико́ну Твою́ все православнове́рующие че́ствуют.

Ра́дуйся, прибега́ющих к Тебе́ Покро́ве и Защи́то.

Ра́дуйся, жи́телей гра́да Трубче́вска в ве́ре утверди́вшая.

Ра́дуйся, свет ти́хий и ра́достный от многочу́днаго Твоего́ ли́ка излива́ющая.

Ра́дуйся, в оби́тели Отца́ Небе́снаго нас вводя́щая.

Ра́дуйся,   моли́твы  на́ша  в  се́рдце Свое́м прие́млющая.

Ра́дуйся, Пресвята́я Богоро́дице Де́во,   Трубче́вская   Похвало́   и на́ше при́сное  Утеше́ние.

 

Кондак 6

    Хотя́щих всех ве́рных с ве́рою пред ико́ною Твое́ю чудотво́рною в мо́литве усе́рдней коле́на своя́ преклони́́ти, прося́ще не помяну́ти мно́жество грехо́в, всех при́сно спаса́еши, Богоро́дице, и от вся́ких бед и напа́стей сла́вящих и́мя Твое́ свято́е свобожда́еши. Та́ко и нас, гре́шных не лиши́ла ма́терняго Твоего́ милосе́рдия и попече́ния, осени́ла и нас благослове́нием Твои́м благоутро́бным, чуде́сно яви́вши о́браз Сво́й во дре́вней земле́ Трубче́вской, иде́же и пи́сан был, изба́ви, мо́лим Тя, от рабо́ты вра́жия и научи́ благоуго́дно пе́ти Триеди́ному Бо́гу: Аллилу́иа.

Икос 6

    Имею́щи тща́ние приле́жное и любо́вь ве́лию к Тебе́, Всеми́лостивая Госпоже́, вси ве́рно чту́щия Тя за ве́лию ми́лость и покрови́тельство гра́ду Трубче́вску и преде́лам его, принесли́ еси́ в дар Ти и чудотво́рному о́бразу Твоему́, из Ска́нова изнесе́нному, ри́зы позлаще́нны, фини́фтию и ка́мениями драги́ми украси́ша пречу́дную ико́ну Твою́, ра́достно воспева́ху Тебе́ песнь. Те́мже и мы велича́юще со благогове́нием поклоня́емся ди́вному о́бразу Твоему́, уми́льно зове́м:

Ра́дуйся, ря́сны златы́ми украше́нная и всю сла́ву внутрь иму́щая.

Ра́дуйся, две́ри ра́йския ве́рным отверза́ющая.

Ра́дуйся, благода́ть исцеле́ний от ико́ны Твоея́ явля́ющая.

Ра́дуйся, я́ко ико́ну Твою́ все мно́жество ве́рующих достоле́пно че́ствуют.

Ра́дуйся, всех ско́рая Помо́щнице во спасе́ние.

Ра́дуйся, всем ве́рным кре́пкое Заступле́ние.

Ра́дуйся, Исполне́ние всех благи́х жела́ния.

Ра́дуйся, призыва́ющих и́мя Твое́ Свято́е с ве́рою от го́рькия рабо́ты вра́жия спаса́ющая.

Ра́дуйся, Пресвята́я Богоро́дице Дево́, Трубче́вская Похвало́ и на́ше при́сное Утеше́ние.

Кондак 7

   Вси ве́рнии с ра́достию и утеше́нием зрят ико́ну Твою́ чудотво́рную и па́ки моля́щеся со благогове́нием, смире́нно коле́на своя́ преклоня́ют пред ди́вным о́бразом Твои́м, уми́льно прося́: уврачу́й, Милосе́рдая Ма́ти, грехо́вныя я́звы душ на́ших, защити́ от вра́жиих наве́тов, покры́й от бед и скорбе́й. Ве́мы я́ко вы́ну хода́тайствуеши за нас гре́шных у Престо́ла Пресвяты́я Тро́ицы, иде́же ли́цы святы́х ра́достно возглаша́ют: Аллилу́иа.

 

Икос 7

   Вети́я многовеща́нныя не довле́ют по достоя́нию благохвали́ти Тя, Пренепоро́чная Ма́ти Де́во, ка́ко ико́ною Твое́ю имену́емыя «Трубче́вская» зна́мения ди́вныя в земли́ Ска́новы сотвори́ша и ве́рныя лю́ди Своя́ от па́губы и сме́рти сохрани́ша. Те́мже за премно́гую любо́вь Твою́ к нам благоче́стно ико́ну Твою́ почита́ем и со умиле́нным се́рдцем, ра́дующеся благода́тному заступле́нию благода́рственную песнь воспева́ем Ти си́це:

Ра́дуйся, в беда́х и напа́стех нас не оста́вившая.

Ра́дуйся, на смире́нныя лю́ди призре́вшая.

Ра́дуйся, Ска́нову пу́стынь возлюби́вшая и о́браз Свой честны́й яви́вшая.

Ра́дуйся, зе́млю Трубче́вскую милостию Свое́ю осеня́ющая.

Ра́дуйся, малове́рныя в и́стине боже́ственней утверди́вшая.

Ра́дуйся, всех в чистоте́ и целому́дрии живу́щих зело́ возлюби́вшая.

Ра́дуйся, ду́ши на́ша от враго́в неви́димых избавля́ющая.

Ра́дуйся, и́ночествующим несумне́нною наде́ждою благ ве́чных ску́дость благ вре́менных восполня́ющая.

Ра́дуйся, Пресвята́я Богоро́дице Де́во, Трубче́вская Похвало́ и на́ше
при́сное Утеше́ние.

Кондак 8

    Я́ко Богосве́тлая звезда́ ико́на Твоя́,Богоро́дице Де́во, зе́млю Трубче́вскую сия́нием мно́гих чуде́с просвети́, неоску́дно источа́я исцеле́ния благода́тныя  всем христиа́ном со усе́рдием к Ней притека́ющим. Те́мже благодари́м Тя, о Госпоже́ Всеми́лостивая, и поклоня́емся чудотво́рному о́бразу Твоему́, приле́жно прося́ще:  Влады́чице,  приими́ моле́ние раб Твои́х и скоро изба́ви ны от вся́кия беды́, напа́сти и печа́ли, междуусо́бныя бра́ни, смертоно́сныя я́звы и напра́сныя сме́рти прославля́ющих Тя и Бо́гу воспева́ющих ве́рно: Аллилу́иа.

Икос 8

   Егда́ же бысть гоне́ния на Це́рковь Христо́ву в годи́ну тя́жкую, безбо́жныя подверго́ша ико́ну святу́ю Твою́ поруга́нию и оскверне́нию. Ты же, Всеми́лостивая, не попусти́ша исхи́тити ю, но повеле́ла рабе́ Свое́й благочести́вей деви́це Мари́и скры́ти о́браз Твой от толп безбо́жных бесну́ющихся. И по ма́ле лет ми́лость дарова́ла еси́, яви́в ико́ну Свою́ честну́ю для поклоне́ния и прославле́ния в ве́си Плю́сково гра́да Трубче́вскаго. Сего́ ра́ди избра́нную из всех родо́в Ма́терь Бо́жию благода́рственно и хвале́бно велича́ем:

Ра́дуйся, о́браз Свой чудотво́рный дарова́вшая.

Ра́дуйся, и́мже зе́млю Трубче́вскую возвели́чившая.

Ра́дуйся, моля́щихся пред ико́ною Твое́ю глад душе́вный утоля́ющая.

Ра́дуйся, в по́двизех на́ших укрепля́ющая.

Ра́дуйся, крест жи́зненный ве́рным нести́ без ро́пота помога́ющая.

Ра́дуйся, благо́е Нача́ло и сла́вный Коне́ц всех подвиза́ющихся.

Ра́дуйся, ру́ку по́мощи всем наде́ющимся на Тя простира́ющая.

Ра́дуйся, ико́ною Твое́ю исцеле́ние и ра́дость духо́вную нам подаю́щая.

Ра́дуйся, Пресвята́я Богоро́дице Де́во, Трубче́вская Похвало́ и на́ше при́сное Утеше́ние.

Кондак 9

    Стра́ннии и прише́льцы есмы́ на земли́ сей, житие́ бо на́ше су́етно и кратковре́менно есть, к Тебе́, Влады́чице, о́чи свои́ вы́ну возво́дим и приле́жно мо́лим: сохрани́ нас от паде́ний грехо́вных и от злых челове́к, да сподо́бимся Твои́м хода́тайством беззако́ниям на́шим получи́ти проще́ние и во гла́се ра́дования воспева́ти Христу́ Бо́гу: Аллилу́иа.

Икос 9

   Все упова́ние на́ше на Тя возлага́ем, Цари́це Небе́сная, в ско́рбех и боле́знех ко чудотво́рному о́бразу Твоему́ «Трубче́вскому» усе́рдно притека́ем, ча́юще получи́ти от Тебе́ благода́тное утеше́ние и вспоможе́ние во оскуде́нии ве́ры на́шей, Милосе́рдая Ма́ти, не возгнуша́йся на́ших недовле́ющих и недосто́йных похва́л и ми́лостивно приклони́ у́хо Твое́ к вопию́щим Тебе́ ве́рно:

Ра́дуйся, в земне́й юдо́ли ско́рбней несумне́нная на́ша Наде́ждо и Уте́шительнице блага́я.

Ра́дуйся, нас си́рых и обремене́нных греха́ми Твое́ю Ма́тернию любо́вию не оставля́ющая.

Ра́дуйся, ско́рбныя воздыха́ния стра́ждущих незри́мо утоля́ющая.

Ра́дуйся, о́браз Твой чудотво́рный во утеше́ние нам дарова́вшая.

Ра́дуйся, гра́ду Трубче́вскому милосе́рдие Твое́ явле́нием ико́ны запечатле́вшая.

Ра́дуйся, в па́мять заступле́ния Твоего́ земли́ Ска́новей храм святы́й благослови́вшая.

Ра́дуйся, в и́ноческих труде́х при́сно помога́ющая.

Ра́дуйся, к го́рнему ми́ру восхожде́ние.

Ра́дуйся, Пресвята́я Богоро́дице Де́во, Трубче́вская Похвало́ и на́ше при́сное Утеше́ние.

Кондак 10

 

   Спасе́ние усе́рдно и́щуще, к Тебе́ прибега́ем, Засту́пнице Преблага́я, ны́не обстоя́ще ико́ну Твою́ чудотво́рную с любо́вию воспомина́ем вся ми́лости Твоя́ и щедро́ты, оби́тели Ска́новей и гра́ду на́шему Трубче́вску явле́нныя. Разумева́ем Боже́ственную любо́вь Твою́ и непреста́нное о ми́ре пред Престо́лом Госпо́дним хода́тайство, да па́ки никто́ же от Тебе́ неуте́шен оты́де. Ве́мы, о Преди́вная Ма́ти, я́ко Тебе́ даде́ся благода́ть всеми́рнаго заступле́ния пред Влады́кою всех, Его́же во́инства Небе́сныя сла́вят и мы, земноро́днии, поклоня́емся, пою́ще: Аллилу́иа.

Икос 10

 

   Стена́ еси́ кре́пкая и всем ве́рным при́сное огражде́ние от бед и зол, Богоневе́стная Де́во, я́ко явля́еши по́мощь ско́рую от Твоея́ ико́ны всем с любо́вию чту́щим ю. Сего́ ра́ди и мы, осеня́емии Твои́м, Богома́ти, заступле́нием, на Твой взира́юще пречи́стый о́браз, усе́рдно мо́лим: очи́сти на́ша сердца́ от вся́кия скве́рны и украси́ ду́ши на́ша целому́дрием и чистото́ю, да невреди́ми пребу́дем от всех искуше́ний ми́ра, пло́ти и диа́вола, да сподо́бимся благода́рне воспева́ти Тебе́, Преблагослове́нней Ма́тери Бо́жией:

Ра́дуйся, оби́тели Ска́новей и гра́да Трубче́вска Стено́ неруши́мая.

Ра́дуйся, Взбра́нная Воево́до непобеди́мая.

Ра́дуйся, всех ве́рных при́сное Ра́дование.

Ра́дуйся, неду́жных ско́рое Исцеле́ние.

Ра́дуйся, хла́дность душе́вную благода́тно согрева́ющая.

Ра́дуйся, серде́чное окамене́ние умягча́ющая.

Ра́дуйся, зной страсте́й на́ших прохлажда́ющая.

Ра́дуйся, изнемога́ющих си́лою свы́ше укрепля́ющая.

Ра́дуйся, Пресвята́я Богоро́дице Де́во, Трубче́вская Похвало́ и на́ше при́сное Уте́шение.

Кондак 11

   Пе́ние хвале́бно благода́рственное всеумиле́нно прино́сим мы,  недосто́йнии, лобза́я ико́ну Твою́, Всеми́лостивая Влады́чице на́ша, от вся́ких зол и бед нас избавля́ющая, и мо́лим приле́жно: приими́ ве́ру и усе́рдие на́ше, я́ко же́ртву благоприя́тну, приноси́мую Тебе́ с се́рдцем сокруше́нным от недосто́йных раб Твои́х, вопию́щих Бо́гу: Аллилу́иа.

 

Икос 11

    Светоно́сная Лампа́да, еле́ем ми́лости к ро́ду челове́ческому преиспо́лненная, яви́лася еси́ в Це́ркви Христо́вой, Госпоже́ Богоро́дице, дарова́в чудотво́рную ико́ну Твою́, да вси, ви́дящи явля́емую Тобо́ю к нам ми́лость, со слеза́ми мо́лятся: помози́, Преблага́я, напо́лни сосу́ды душ на́ших благи́ми дела́ми, па́че же милосе́рдием и смире́нием, да ра́достно вопие́м Ти си́це:

Ра́дуйся, ико́ну Твою́ чудесы́ мно́гими просла́вившая.

Ра́дуйся, Покрови́тельнице на́ша, многокра́ты от бед и напа́стей лю́ди Твоя́ изба́вившая.

Ра́дуйся, оскуде́ние душ на́ших еле́ем ми́лости восполня́ющая.

Ра́дуйся, недосто́йныя моли́твы на́ша прие́млющая.

Ра́дуйся, люби́ти мир и я́же в ми́ре нам воспреща́ющая.

Ра́дуйся, на ки́йждо день, а́ки уже́ на после́дний жития́ на́шего взира́ти нас науча́ющая.

Ра́дуйся, очесе́м на́шим стра́шный час сме́ртный представля́ющая.

Ра́дуйся, беззако́ния на́ша слеза́ми покая́ния омыва́ти на ки́йджо день вразумля́ющая.

Ра́дуйся, Пресвята́я Богоро́дице Де́во, Трубче́вская Похвало́ и на́ше
при́сное Утеше́ние.

Кондак 12

 

   Благода́ть Боже́ственную, покро́в и заступле́ние пода́ждь нам, Влады́чице на́ша и Ма́ти, припа́дающим пред ико́ною «Трубче́вскою», воздви́гни нас от грехо́внаго сна, сохрани́ зе́млю Трубче́вскую  и  нас,  недосто́йных  чад Твои́х, сподо́би жи́тельствовати под Святы́м Омофо́ром Твои́м до конца́ дней   на́ших и прославля́ти Тя и Сы́на Твоего́, Христа́ Бо́га на́шего, поя́ Ему́: Аллилу́иа.

Икос 12

   Пою́ще чуде́са, от ико́ны Твоея́ соверша́емыя, Ма́ти Христа́ Бо́га на́шего, припа́даем Ти и мо́лим Ти ся пред о́бразом Твои́м чудотво́рным, не отврати́ Пречи́стаго ли́ка Твоего́ от гра́да Трубче́вска, преде́лов его́ и от всех ве́рных рабо́в Твои́х. Бу́ди, Влады́чице, нам защище́ние в день кончи́ны на́шея, егда́ и́мамы предста́ти на Суди́ще Стра́шнем пред Го́сподем и Сы́ном Твои́м. Спаси́, Госпоже́ Богоро́дице, от ве́чнаго осужде́ния и муче́ния а́дскаго, да со умиле́нием и тре́петом душе́вным воспое́м Ти такова́я:

Ра́дуйся, пра́ведный гнев Бо́жий от ро́да правосла́внаго отвраща́ющая.

Ра́дуйся, сла́вящих Тя на мыта́рствах возду́шных заступа́ющая.

Ра́дуйся, Сы́на Своего́ и Бога́ на́шего за нас, гре́шных, умоля́ющая.

Ра́дуйся, ублажа́ющим Тя кончи́ну христиа́нскую подаю́щая.

Ра́дуйся, с прираже́ниями страсте́й плотски́х в борьбе́ тя́жкой нам вско́ре помога́ющая.

Ра́дуйся, оби́телей и́́ноческих Блюсти́тельнице неусыпа́ющая.

Ра́дуйся, сосу́ды сме́ртныя, на нас угото́ванныя, сокруша́ющая.

Ра́дуйся, хода́тайством Твои́м честны́м от вся́кия нас ско́рби изыма́ющая.

Ра́дуйся,     Пресвята́я     Богоро́дице Де́во,   Трубче́вская   Похвало́  и на́ше при́сное Утеше́ние.

Кондак 13

   О, Премилосе́рдая Засту́пнице ро́да христиа́нскаго, Честне́йшая Херуви́м и Сла́внейшая без сравне́ния, Серафи́м, Де́во Богоро́дице! Приими́ ми́лостивно моле́бное пе́ние с ве́рою и благогове́нием Тебе́ возноси́мое пред чудотво́рным Твои́м о́бразом. Защити́ от враг ви́димых и неви́димых, сохрани́ от искуше́ний, грехопаде́ний и гряду́щаго пра́веднаго гне́ва Бо́жия за лю́тыя беззако́ния на́ша ми́лостию Твое́ю изба́ви, умоли́ Го́спода Сла́вы изба́вити нас ве́чнаго муче́ния и сме́рти,   да   спасе́ннии   Тобо́ю   с   ли́ки а́нгельскими воспева́ем Бо́гу: Аллилу́иа.

(Этот кондак читается трижды, затем первый икос и первый кондак)

 

                                                                   Молитва

   О, Пречи́стая Госпоже́, ми́ра Засту́пнице, Ма́терь Всепе́тая! Воззри́ ми́лостивно на предстоя́щия со стра́хом лю́ди Твоя́, ве́рою и любо́вию препа́дающих пред чудотво́рною ико́ною Твое́ю. Вонми́ многоболе́зненному воздыха́нию душ на́ших, при́зри с высоты́ святы́я Твоея́ на нас. Се бо грехми́ погружа́емии и скорбми́ обурева́емии, взира́юще на о́браз Твой честны́й, я́ко живе́й Ти су́щей с на́ми, смире́нныя моле́ния из глубины́ ве́рующих серде́ц прино́сим Тебе́, Влады́чице. Мо́лим Тя усе́рдно: не отврати́ лица́ Твоего́ от прибега́ющих к Тебе́, бу́ди Покрови́тельнице и Хода́таице за нас, гре́шных, пред Бо́гом и гнев Его́ пра́ведный за беззако́ния на́ша дви́жимый на ны, ско́ро умягчи́ и отврати́. Я́коже не́когда поми́ловала еси́ прибега́вших к покро́ву Твоему́ люде́й земли́ Ска́новей и изба́вила их от смертоно́сныя   я́звы, и неизрече́нным Твои́м смотре́нием сохрани́ла еси́ уде́л Свой Трубче́вский. Та́ко и нас всех, с ве́рою моля́щихся Тебе́, изба́ви от паде́ний грехо́вных, от наве́та злых челове́к, от собла́знов ми́ра и искуше́ний, скорбе́й и бед, от смертоно́сныя я́звы и от внеза́пныя и напра́сныя сме́рти. Вразуми́ и научи́ ходи́ти без поро́ка по пути́ земна́го сего́ жития́, вложи́ в сердца́ на́ша дух стра́ха Бо́жия, дух благоче́стия, дух кро́тости, смире́ния, терпе́ния, непамятозло́бия, умягчи́ зла́я сердца́ на́ша, низпосли́ ре́вность о душа́х на́ших и о спасе́нии бли́жних. Да́руй всем нам, моля́щимся Тебе́, христиа́нскую кончи́ну жития́ на́шего и до́брый отве́т на Стра́шнем  Суди́ще  Христо́вем.  Вруча́ем бо живо́т свой Твоему́ покро́ву и промышле́нию, да ре́вностно всегда́ пое́м Тебе́ со все́ми святы́ми: ра́дуйся, Благода́тная, ра́дуйся, Обра́дованная, ра́дуйся, Преблагослове́нная, ра́дуйся, Препросла́вленная во ве́ки. Ами́нь.