[spoiler]

Кондак 1

Взбранной Воеводе, Владычице нашей Богородице, благодарственное приносим пение о даровании чудныя Ея иконы Валаамския. Ты же, Всемилостивая Царице, яко имущая державу непобедимую и милосердие неизреченное, от всяких зол и бед свободи страну нашу православную, да зовем Ти:
Радуйся, Владычице, обители Валаамския и страны нашея дивная Заступнице.

Икос 1

Ангелов Царица и всея твари Владычица преславным прославлением иконы Твоея святыя всю страну Российскую благодатию озарила еси. Темже вернии людие с любовию припадающе к дивному образу Твоему Валаамскому, приносят похвалы сия:
Радуйся, спасения нашего Главизно;
Радуйся, Мати Господа Вышняго.
Радуйся, Церкве непоколебимый Столпе;
Радуйся, Царствия Нерушимая Стено.
Радуйся, страну Российскую в жребий и достояние Себе избравшая;
Радуйся, иконы Твоя чудотворныя, яко звезды в ней умножившая.
Радуйся, земли Русския Царице и Владычице;
Радуйся, яко Тобою Русь Православная хранится.
Радуйся, всю вселенную лучами Твоея благодати озаряющая;
Радуйся, светом радости души наша просвещающая.
Радуйся, непобедимая Воеводо царей и воинов православных;
Радуйся, врагов наших видимых и невидимых побеждающая.
Радуйся, Владычице, обители Валаамския и страны нашея дивная Заступнице.

Кондак 2

Ведый благодать и славу места сего, благослови Господь Матерь Свою даровати Покров Ея над островом Валаамом, яко над северным Афоном, да вси спасающиися на нем от лет древних и до ныне взывают непрестанно Спасителю и Богу нашему: Аллилуия.

Икос 2

Разум имеюще Божественный, преподобнии отцы наши Сергий и Герман приидоша в земли севера во еже Господу невозбранно послужити и достигше острова Валаама, обитель иноческую тамо устроиша. Ты же, Пресвятая Дево, яко Игумения святых обителей православных, сохрани всех подвизающихся зде, единем сердцем и едиными усты воспевающих Ти:
Радуйся, от младенчества Богу посвященная;
Радуйся, в храме Иерусалимстем воспитанная.
Радуйся, яко житие Твое при храме прообразом жития монашескаго явися;
Радуйся, иноков чадолюбивая Мати.
Радуйся, остров Валаам, яко место явления благодати Твоея освятившая;
Радуйся, землю Карельскую благоуханием святости исполнившая.
Радуйся, обитель Валаамскую, яко северный Афон, прославившая;
Радуйся, храмы и скиты ея славою чудес Твоих осиявшая.
Радуйся, преподобных Сергия и Германа в молитву с Собою приемшая;
Радуйся, милостию Своею на острове Валааме дивный сад духовный насадившая.
Радуйся, святыя обители Валаамския Всечестная Игумения;
Радуйся, Наставнице иноков на путь Небесныя жизни.
Радуйся, Владычице, обители Валаамския и страны нашея дивная Заступнице.

Кондак 3

Сила Вышняго осени изографа Алексия, егда он, дар художества от Бога имея, во обитель Валаамскую притече и ангельский образ восприя, в честь преподобнаго Алипия Печерскаго, перваго иконописца Святыя Руси. Темже даровася ему благодать святыя иконы писати и храмы обители дивно украшати, воспевая Творцу и Господу: Аллилуия.

Икос 3

Имущи любовь ко обители Твоей избранней, Преблагословенная, сподобила еси отца Алипия создати икону Твою честную, ейже силу чудотворную даровала еси во исцеление и спасение всех с верою и надеждою притекающих к ней, да видяще являемую Тобою милость, вопиют со умилением таковая:
Радуйся, священнаго иконописания Покровительнице;
Радуйся, почитания святых икон освящение.
Радуйся, иконы Твоя на молитвенное общение нам даровавшая;
Радуйся, чрез них благодатную силу источающая.
Радуйся, изографу благоговейному Алипию любовь Твою святую явившая;
Радуйся, в подвизех иноческих его наставлявшая.
Радуйся, в трудех иконописания его укрепившая;
Радуйся, икону Твою дивную создати благословившая.
Радуйся, на иконе сей с Сыном и Богом Твоим изображенная;
Радуйся, многими чудесы ю прославившая.
Радуйся, яко молитвою пред нею приемлем душевное утешение;
Радуйся, яко вкупе с иконою Твоею Сама невидимо среди нас пребываеши.
Радуйся, Владычице, обители Валаамския и страны нашея дивная Заступнице.

Кондак 4

Буря смущения, воздвизаемая врагом спасения, поколеба корабль смирения твоего, отче Алипие, егда покинул еси обитель Валаамскую. Обаче молитвами Пречистыя Богородицы вся козни сопротивнаго попрал еси и весь был еси предан Богу, пощением, молитвами и труды многими сподобился еси в день Ангела своего преселитися во обители Небесныя, идеже с ликом Ангельским поеши Богу: Аллилуия.

Икос 4

Слыша Господь скорбь жены, дванадесять лет обуреваемыя тяжкою болезнию, дарова ей помощь благодатную Богоматере, Яже явися болящей в соннем видении и повеле ей направити стопы своя на Валаам, да прославится тамо икона Ея чудная, дотоле в небрежении пребывавшая, от неяже мнози обретут радость духовную и исцеление, вопиюще Преблагословенней:
Радуйся, молитву сердечную болящей рабы Божией услышавшая;
Радуйся, в соннем видении троекратно ей явившаяся.
Радуйся, недужную старицу со одра болезни воздвигшая;
Радуйся, во обитель Валаамскую ю направившая.
Радуйся, чудотворную силу иконы Твоея открывшая;
Радуйся, икону Твою дивную во обители показавшая.
Радуйся, прославление иконы Твоея исцелением тяжко болящия жены знаменовавшая;
Радуйся, сердца православных неизреченною радостию исполнившая.
Радуйся, в иконе Твоей яко солнце земли севера просиявшая;
Радуйся, сию яко сокровище безценное нам оставившая.
Радуйся, яко пред нею вернии благоговейно покланяются;
Радуйся, яко молящимся пред нею исцеления подаются.
Радуйся, Владычице, обители Валаамския и страны нашея дивная Заступнице.

Кондак 5

Боготечней звезде подобна явися всечестная икона Твоя, Владычице, юже яко дар небесный восприимше, иноцы обители Валаамския поставиша в соборнем храме Преображения Господня, ими созданном, благодарственно взывающе Богу: Аллилуия.

Икос 5

Видевше чудо исцеления болящей от иконы Твоея, Пресвятая Дево, братия обители радости исполнишася и пречистому Твоему образу с любовию и благоговением поклонишася. Мы же, грешнии, зряще и ныне во обители славней изображенную на иконе Матерь Господа, руце к ней простираем и умиленно зовем:
Радуйся, остров Валаам благословением Своим осенившая;
Радуйся, обители Валаамския сокровище неоскудное.
Радуйся, любовь Твою ко обители показавшая;
Радуйся, благое промышление о ней явившая.
Радуйся, обитель сию милостию Своею посетившая;
Радуйся, в залог любве икону Твою чудную ей даровавшая.
Радуйся, во обители древней прославленная;
Радуйся, иноков валаамских Покровительнице.
Радуйся, подвизающимся в ней надежное заступление;
Радуйся, приходящим в ню на поклонение благая Предстательнице.
Радуйся, иноков обители ко служению Господу собирающая;
Радуйся, в служении сем путь показующая.
Радуйся, Владычице, обители Валаамския и страны нашея дивная Заступнице.

Кондак 6

Проповедница благодатныя помощи Владычицы явися исцеленная раба Божия, и о чудеси, на ней бывшем, с радостию и благоговением поведа. Ейже подражающе и мы прославляем милости от иконы изливаемыя, яко грады и веси ограждаеши, обители иноческия защищаеши, недужныя исцеляеши и вся благая ниспосылаеши всем любящим Тя и поющим Сыну Твоему: Аллилуия.

Икос 6

Возсия образ равноангельнаго жития всем ищущим спасения на острове Валааме вдали от суеты мирския под державным Покровом Богоматере, Еяже образ сияет во обители яко знамение попечения Пречистыя о всех нас. Мы же, грешнии, ведуще, яко отцы наши нарекоша Русь Святую Домом Пресвятыя Богородицы, воспоим Ей:
Радуйся, Благодатная, обитель святую осенившая пречистым Твоим образом;
Радуйся, яко паче жемчуга слезами радости икона Твоя украшается.
Радуйся, силу Твою благодатную в сей иконе обильно явившая;
Радуйся, во всем мире источник исцелений от святых икон Твоих подающая.
Радуйся, покланяющимся иконе Твоей в печалех и бедах скоро помогающая;
Радуйся, и нас грешных ко спасению наставляющая.
Радуйся, о всех чтущих образ Твой промышляющая;
Радуйся, чудесы от него веру истинную в людех утверждающая.
Радуйся, Богом дарованная отрадо страждущим;
Радуйся, сокровище благодати неоскудеваемое.
Радуйся, руце Твои к Богу о нас простирающая;
Радуйся, вечною радостию нас одевающая.
Радуйся, Владычице, обители Валаамския и страны нашея дивная Заступнице.

Кондак 7

Хотя благочестивый воин великий князь Николай благодарственная принести Тебе, Богородице, повеле в годину брани всемирныя устроити храм во имя Твое, да вси иноцы обители поминают вождей и воинов за веру, царя и отечество живот свой положивших, во вся дни поюще Богу: Аллилуия.

Икос 7

Новое чудо показа Господь, егда старцу Валаамскому Борису видение бысть: зрит святый старец стоящих у иконы Богоматере преподобных Сергия и Германа в схимах. Мы же, радующеся, вкупе с Пречистою ублажаем вас, угодницы Божии, помозите нам, да молитвами вашими сподобимся достойно воспети Всесвятую Матерь Господа:
Радуйся, обитель нашу вкупе с преподобными Сергием и Германом охраняющая;
Радуйся, старца валаамскаго видений сподобившая.
Радуйся, отечества нашего Печальнице;
Радуйся, державная Покровительнице наша во дни тяжких испытаний.
Радуйся, во дни брани скорая на враги Помощнице;
Радуйся, во дни мира ко благочестию Наставнице.
Радуйся, воинов православных на подвиг ратный укрепляющая;
Радуйся, мужество неодолимое им дарующая.
Радуйся, силу духа их возвышающая;
Радуйся, убиенным на поли брани венцы мученическия уготовляющая.
Радуйся, воинством Ангельским враги наша поражающая;
Радуйся, молитвами Твоими весь мир спасающая.
Радуйся, Владычице, обители Валаамския и страны нашея дивная Заступнице.

Кондак 8

Странное и дивное видение дарова Господь старцу Борису в канун гибели Царствия Российскаго, виде бо праведник Тя, Матерь Божию, пред Сыном Твоим и Господом тепле Его умолявшую со слезами, да отверзет двери милосердия Своего к стране Российстей и людем ея. Темже убо восплачемся и мы о гресех своих и возопиим Богу дивному во святых Своих: Аллилуия.

Икос 8

Вся страна Российская в страх и трепет прииде, егда восхоте враг рода человеческаго веру Христову в ней истребити. Ты же, Всемилостивая, во дни лихолетия сохранила еси землю Русскую от погибели и веру Православную от истребления спасла еси. Помози убо нам, Владычице, с терпением и благодарением всякия скорби и беды претерпевати и взывати Тебе радостно:
Радуйся, избранным Твоим видения небесная открывающая;
Радуйся, дивная знамения иконою Твоею совершающая.
Радуйся, Царства Российскаго благодатное утверждение;
Радуйся, в годину испытаний державною рукою от погибели нас спасшая.
Радуйся, Церковь Русскую во дни гонений и крестных страданий омофором Своим покрывающая;
Радуйся, в страданиих за Христа мучеников и исповедников веры укрепляющая.
Радуйся, воинствующих на Церковь Божию вразумляющая;
Радуйся, злобу и коварство их посрамляющая.
Радуйся, вражду и ненависть миром и любовию побеждающая;
Радуйся, слезы чад Твоих отирающая.
Радуйся, лучами Божественными тьму вражию попаляющая;
Радуйся, во оружие света нас облекающая.
Радуйся, Владычице, обители Валаамския и страны нашея дивная Заступнице.

Кондак 9

Всяческая, яко Мати всех живущих во ограде Церкве Христовы, ограждаеши, тако и людей русских в разсеянии сущих утешила еси иконою Твоею, егда обитель Валаамская от страны Российския отторжена бысть. Тогда же иноцы обители вкупе с верными чады Церкви Православныя к чудотворному образу Владычицы притекающе в единомыслии воспеваху Богу: Аллилуия.

Икос 9

Ветии человечестии недоумеют разумети тайну спасения отечества нашего во дни нашествия вражия, егда смерть и ужас по лицу земли Русския проидоша, плач и стенание ю огласиша. Тогда убо вси на Тя, Пречистая, упование возложившии и от Тебе Единыя спасения чающии, пояху со слезами:
Радуйся, Заступнице наша Усердная;
Радуйся, от всех врагов Избавление.
Радуйся, на подвиги брани воинския и духовныя нас вдохновляющая;
Радуйся, гордых силою Своею со стыдом вспять возвращающая.
Радуйся, яко Тобою милосердие Божие призываем;
Радуйся, яко много может молитва Твоя пред Сыном Твоим и Богом нашим.
Радуйся, икону Твою святую в бедах и испытаниих невредимо сохранившая;
Радуйся, русских людей в разсеянии сущих ею утешавшая.
Радуйся, всех разсеянных воедино собирающая;
Радуйся, раздоры и нестроения умирающая.
Радуйся, Надеждо и Прибежище наше;
Радуйся, Непобедимая Победа.
Радуйся, Владычице, обители Валаамския и страны нашея дивная Заступнице.

Кондак 10

Спасти хотя страждущую страну нашу, явилася еси, Пречистая, в видении старцу Валаамскому Михаилу, яко Предстательница наша пред Богом и Заступница, и в грозный час беды на враги противостала еси, полки иноплеменных вспять обращая, и победу российскому воинству даровала еси, да вси людие страны нашея поют Спасителю Богу: Аллилуия.

Икос 10

Стена необоримая и источник чудес икона Твоя святая явися, Богородице Дево, не токмо обители Валаамстей, но и всей стране Российстей, землю нашу ограждающи и по Руси Святей незримо шествующи. Спаси и помилуй нас, чтущих Твой образ чудотворный, да вси притекающии к нему сподобятся всякаго утешения, воспевающе Тебе:
Радуйся, в сониих и видениих рабов Твоих посещающая;
Радуйся, тайны промышления Божия о стране Российстей им открывающая.
Радуйся, старцу Михаилу знамение Своего милосердия к народу нашему явившая;
Радуйся, державу Российскую паче прежняго славою Своею осиявшая.
Радуйся, пред Господом дерзновенная наша Предстательнице;
Радуйся, гнев Его праведный, на ны движимый, на милость преклоняющая.
Радуйся, противу слуг сатанинских ратоборствующая;
Радуйся, несокрушимый щите воинов российских.
Радуйся, войско врага поразившая;
Радуйся, из пределов земли нашея его отгнавшая.
Радуйся, воином России на поли брани победу даровавшая;
Радуйся, страну нашу от нашествия иноплеменных предивно избавившая.
Радуйся, Владычице, обители Валаамския и страны нашея дивная Заступнице.

Кондак 11

Пение молебное с любовию приносит ныне братия обители Тебе, о Всеблагая Мати, во храме в честь иконы Твоея освященном. Услыши и нас, молящихся пред пречистым образом Твоим, и сохрани жизнь нашу в чистоте, от грехов избавитися помози, утоли болезни и печали, на спасения стези настави и научи воспевати Человеколюбцу Богу Ангельскую песнь: Аллилуия.

Икос 11

Светло сияет дивная икона Твоя, Мати Божия, и Российскую страну нашу благодатию озаряет. Сего ради грядут во обитель Валаамскую на поклонение православных собори, умиленно воспевая из глубины души пред пречистым образом Твоим таковая:
Радуйся, остров Валаам светом святыни озарившая;
Радуйся, обитель Валаамскую благодатию Твоею возродившая.
Радуйся, Домостроительнице, жизнь обители добре устрояющая;
Радуйся, от всея земли Российския во обитель людей православных призывающая.
Радуйся, паломников благочестивых непостыдное упование;
Радуйся, иноков валаамских присное радование.
Радуйся, образом Твоим честным обитель и ныне освящающая;
Радуйся, светом Божественным от иконы Твоея тьму неверия прогоняющая.
Радуйся, Мати Света, души верных просвещающая;
Радуйся, к Свету истины нас возводящая.
Радуйся, Огнь Божества в Себе вместившая;
Радуйся, любве Божественныя светильниче неугасимый.
Радуйся, Владычице, обители Валаамския и страны нашея дивная Заступнице.

Кондак 12

Благодатное утешение даровала еси нам, Пресвятая Дево, прославлением образа Твоего Валаамскаго в знамение милости ко отечеству нашему, в защиту от врагов видимых и невидимых во дни смуты новыя. Даруй Покров Твой, Благодатная, на всех грядущих путех страны нашея, да весь мир узрит, яко с нами Бог, Емуже с любовию поем: Аллилуия.

Икос 12

Поюще Тя, Преблагословенная, преклоняем колена пред чудотворным Твоим образом Валаамским и молящеся пред ним веруем и исповедуем, яко Ты еси воистину Державная Владычице страны нашея и Заступница Усердная рода христианскаго. Темже молим Тя, подаждь державе Российстей мир, тишину, благоустроение, и не остави возлюбленную Тобою землю Русскую и народ ея, во умилении сердец приносящий Ти похвалы сия:
Радуйся, икону Твою Валаамскую всецерковно прославившая;
Радуйся, новое знамение благодати в Церкви Православней тем показавшая.
Радуйся, яко от списков иконы Твоея знамения и чудеса совершаются;
Радуйся, яко сердца благочестивых людей радостию исполняются.
Радуйся, страны Российския несокрушимое Ограждение;
Радуйся, нынешняго скорбнаго века Утешение.
Радуйся, святых печальников земли Российския возрастившая;
Радуйся, изнемогающих под тяжестию креста укрепляющая.
Радуйся, страх и уныние прогоняющая;
Радуйся, скорбь нашу в радость претворяющая.
Радуйся, стояти за веру Православную нас научающая;
Радуйся, двери райския верным отверзающая.
Радуйся, Владычице, обители Валаамския и страны нашея дивная Заступнице.

Кондак 13

О Всепетая Мати, Российския страны дивная Заступнице, милостивно приими сие малое моление, пред чудотворным Твоим образом возносимое. Сохрани отечество наше, веру Православную в людех укрепи, избави нас от всяких бед, скорбей и напастей, и сподоби чистым сердцем зде и в будущем веце воспевати Богу: Аллилуия.

Молитва пред чудотворною иконою Пресвятыя Богородицы Валаамскою, чтомая в Спасо-Преображенском Валаамском монастыре

Пресвятая Госпоже, Владычице Богородице, страны нашея Заступнице, обители Валаамския красото и славо! Взирающе на Пречистый лик Твой, в чудотворней иконе явленный, молим Тя, сохрани от всякаго зла обитель сию, юже преподобнии Сергий и Герман основаша, во братии мир огради и соблюди, осени Покровом Твоим строителей, благотворителей и благоукрасителей ея.
О Всечестная наша Мати, Игумения всех православных обителей и иноческаго жития Покровительнице, пребуди неотступна от обители сия, сущаго достояния Твоего, и всесильными Твоими молитвами покрый и заступи нас, зде подвизающихся, от всяких бед и нужд, помози уставы преподобных отец непоколебимы сохранити, избави от падений греховных, даруй нам дух сокрушения и смирения, настави на исполнение обетов иноческих и всех заповедей Божиих.
Приими смиренное моление наше, согрей нас дыханием любве Твоея и никогда не отступай от нас, да не оскудеет вера в нас грешных, и да сподобимся внити в Царствие Небесное, в немже возвеличим Тя, Матерь нашу Всепетую, и прославим Сына Твоего и Бога нашего со Безначальным Его Отцем и Пресвятым и Животворящим Его Духом, ныне и присно и во веки веков. Аминь.
Молитва пред иконою Пресвятыя Богородицы Валаамскою
О Пресвятая и Преблагословенная Владычице Богородице, Небесе и земли Царице, обители Валаамския Покровительнице! Припадаем и покланяемся Тебе пред чудотворною иконою Твоею, и яко призрела еси милостивно на молитву болящия рабы Твоея и даровала еси ей исцеление, тако и ныне приими наше усердное моление, тебе приносимое.
Спаси и сохрани, Всемилостивая, отечество наше и вся люди православныя, живущия в нем и к Тебе с любовию прибегающия, от нашествия иноплеменных, от глада и мора, и от всякаго зла; управи пути наша, да возсияют в земли Русстей правда и мир, радость и любовь, сохрани в ней до скончания века веру Православную.
Воззри милостивым оком Твоим на обитель Валаамскую и соверши Сама о Господе спасение всех в вере и надежде подвизающихся в ней. Умоли Сына Твоего и Бога нашего, да избавит всех нас от всякия беды, скорби и болезни, да наставит на исполнение заповедей Своих, от вечныя муки избавит и да сподобит Твоим ходатайством вселитися во обителех Небесных и славити тамо Пресвятую Троицу, Отца и Сына и Святаго Духа, ныне и присно и во веки веков. Аминь.

[/spoiler]

[spoiler]

Кондак 1

Избраннии чудотворцы, страстотерпцы Христовы и врачеве премудрии, туне подающии здравие в болезнех сущим, похвальная восписуем вам, заступником нашим и в скорбех помощником: вы бо сосуди благодати суще, исцеляете душевныя и телесныя наша язвы. Темже славяще Бога, дивнаго во святых Своих, вас усердно ублажаем:

Радуйтеся, Космо и Дамиане, святии безсребреницы и преславнии чудотворцы.

Икос 1

Ангельскому жительству поревновавше, вся земная презрели есте и, подвигом мученичества венчавшеся, лицезрения Господа сил сподобилися есте. Молитеся убо за ны прилежно, к помощи вашей притекающих и похвальная вам вопиющих:

Радуйтеся, молитвенницы теплии о чтущих святую память вашу; радуйтеся, оставленных врачами неоскудно исцеляющии.

Радуйтеся, яко дом, имение и вся родителей стяжания ни во чтоже вменили есте; радуйтеся, нищия милосердием вашим препитавшии.

Радуйтеся, страждущия сердоболием утешавшии; радуйтеся, чистотою и святостию Ангелом уподобившиися.

Радуйтеся, светильницы Божественнаго света; радуйтеся, небеснии человецы, земнии Ангели.

Радуйтеся, яко христианом есте прибежище непостыдное; радуйтеся, все житие свое даже до последняго издыхания в служении Господу истощившии.

Радуйтеся, всесветлое благодати приятелище, Духа Святаго сосуди; радуйтеся, всем призывающим вас скории помощницы.

Радуйтеся, Космо и Дамиане, святии безсребреницы и преславнии чудотворцы.

Кондак 2

Видя Господь Бог добрая ваша начинания и велие ко благочестию усердие ваше, яко вся земная и благая мира сего уметы вменивше, в непрестаннем труде любве ради ближняго пребысте и души своя благими нравы украсили есте, преисполни вас Духа Святаго, Егоже лучами озаритися и нам испросите у Христа Бога, да купно с вами поем Ему: Аллилуиа.

Икос 2

Разумом истиннаго богопознания царя нечестиваго научили есте, вразумив того силою словес ваших, имиже дерзновенно Христа проповедасте. Темже дерзновение ваше похваляюще, взываем сице:

Радуйтеся, лестию нечестиваго царя не уловленнии; радуйтеся, истину Христову дерзновенно пред ним исповедавшии.

Радуйтеся, прещения его не убоявшиися; радуйтеся, нечестивых соборища посрамившии.

Радуйтеся, небоязненнии проповедницы истины; радуйтеся, служения идольскаго истребителие.

Радуйтеся, веры православия поборницы; радуйтеся, исповедницы непоколебимии, духа терпения и ревности о славе Божией исполненнии.

Радуйтеся, немолчнии велений Господних провозвестницы; радуйтеся, вернии наставницы богомудрия.

Радуйтеся, Царствия Христова надежнии нам ходатаи; радуйтеся, и по смерти вашей нас не оставляющии.

Радуйтеся, Космо и Дамиане, святии безсребреницы и преславнии чудотворцы.

Кондак 3

Силою Вышняго, данною вам еще во временней жизни, прияли есте власть чудесно исцеляти всякия недуги; по смерти же вашей наипаче прослави вас Бог многими чудотворении, да вси притекаем к вам, молящеся о исцелении от недугов телесных, паче же душевных, и Богу велегласно вопием: Аллилуиа.

Икос 3

Имуще, яко многоценное сокровище, многоцелебныя мощи ваша, радуемся и, любовию воспевающе данную вам от Бога благодать исцелений, благодарно зовем:

Радуйтеся, теплии о нас к Богу предстателие; радуйтеся, еллинская мудрования ни во чтоже вменившии.

Радуйтеся, Рима светильницы всесветлии; радуйтеся, омраченных стран просветителие.

Радуйтеся, мужества и терпения наставницы; радуйтеся, яко неповинне каменное побиение претерпевше, кончину мученическую улучили есте.

Радуйтеся, любве ради Христовы пострадавшии, и нас небесных благ причастники приимите; радуйтеся, раби Божии, от Господа Христа венцы победы приемшии.

Радуйтеся, дивный и прекрасный смирения и кротости образ всем показавшии; радуйтеся, непоколебимое православия основание.

Радуйтеся, светлая страстотерпцев славо; радуйтеся, добрии целебницы, ни от когоже мзды за исцеления вземшии.

Радуйтеся, Космо и Дамиане, святии безсребреницы и преславнии чудотворцы.

Кондак 4

Буря ярости велия царя Карина не возможе поколебати души вашея, и егда вернии в некоей пещере вас скрыша от яти вас ищущих, волею воином предстали есте, вопиюща: нас поимите, мы бо есмы, ихже ищете, неповинных же отпустите. Таже веригами обложени бывше, в Рим отведостеся. Мы же, веру вашу и вериги лобызающе, поем Богу: Аллилуиа.

Икос 4

Слышавше римстии людие велию вашу ко страждущим любовь и чудесное врачевание ваше, отвсюду устремляхуся к вам с верою в целебную благодать Божию, в вас действующую; приемлюще же скорое исцеление, прославляху Бога, вас же, милосердых целителей своих, величаху, воспевая сице:

Радуйтеся, Бога истиннаго непреборимии проповедницы; радуйтеся, оружие Креста Христова добропобедно вземшии.

Радуйтеся, блазии врачеве, страждущим скории помощницы; радуйтеся, вся немощныя туне врачующии.

Радуйтеся, и ныне исцеления обильно источающии; радуйтеся, милостивии утешителие в бедах и скорбех сущим.

Радуйтеся, во всяких обстояниих нас защищающии; радуйтеся, безпомощных спасительное призрение.

Радуйтеся, праведных преславное украшение; радуйтеся, предстательство наше крепкое.

Радуйтеся, прилежнии о нас к Богу молитвенницы; радуйтеся, всем, верою призывающим вас, скории помощницы.

Радуйтеся, Космо и Дамиане, святии безсребреницы и преславнии чудотворцы.

Кондак 5

Боготечным воистину путем шествовасте, раби Христовы, егда во узах в Рим ведоми, за еже идолом не послужисте, Христови же единому поработасте, горькая испытания терпели есте, святии; но вся претерпесте за возлюбльшаго вас Христа. Темже великому терпению и крепцей любви вашей ко Господу дивящеся, купно с вами поем Ему: Аллилуиа.

Икос 5

Видев царь, яко силою Христовою исцеле, хвалу Тому воздаде; мы же, славяще Бога, ублажаем вас, славных угодников Его, вопиюще сице:

Радуйтеся, горняя паче дольних возлюбившии; радуйтеся, ангельскому житию на земли поревновавшии.

Радуйтеся, яко, многобожие отринувше, родительскаго благочестия не отступили есте; радуйтеся, яко вся имения своя, по словеси Господню, нищим раздали есте, да Христа приобрящете.

Радуйтеся, не словом точию, но множае паче делом и непрестанною к Богу молитвою иных поучившии; радуйтеся, неоскудный источник исцелений и ныне являющии.

Радуйтеся, излиянием чудес, данных вам от Бога, нас обогащающии; радуйтеся, в самих себе храм Богу уготовавшии.

Радуйтеся, скорое нищих услышание; радуйтеся, скорбных приятное попечение.

Радуйтеся, ненадежных известное надеяние; радуйтеся, болящих скорое врачевание.

Радуйтеся, Космо и Дамиане, святии безсребреницы и преславнии чудотворцы.

Кондак 6

Проповедницы имене Христова в животе своем бывше, и ныне силу Того свидетельствуете чудесы, от иконы вашея источаемыми, и якоже веры иногда жены некия не презресте, но во сне явльшеся ей, облегчение в недузе даровали есте; сице и наших молений и пений гласы услышите, о святии безсребреницы! Вере же и любви людей ваших внемлите и покров нам свыше даруйте, хвалящим вас и поющим Богу: Аллилуиа.

Икос 6

Возсия, яко свет, правда ваша, егда укоряема на судищи царя, дерзновенно рекосте нему: не волшебною хитростию врачуем болезни, но силою Спаса нашего Иисуса Христа, якоже Той заповеда, глаголя: болящия исцеляйте, прокаженныя очищайте, туне приясте, туне дадите. Темже дерзновению вашему дивящеся, ублажаем вас сими:

Радуйтеся, образ твердости и веры нам показавшии; радуйтеся, райския радости присно наслаждающиися.

Радуйтеся, премудрии сеятелие благочестия; радуйтеся, славнии проповедницы православия.

Радуйтеся, учителие, к Небеси наставляющии; радуйтеся, чистаго и непорочнаго жития неусыпнии хранителие.

Радуйтеся, теплии послушателие молящихся вам; радуйтеся, ко спасению изящнии и вернии путеводителие.

Радуйтеся, благочестно и богоугодно жити хотящим блазии наставницы; радуйтеся, ходатаи благих всем, почитающим память вашу.

Радуйтеся, добре течение свое скончавшии; радуйтеся, венцы правды от Владыки Христа приявшии.

Радуйтеся, Космо и Дамиане, святии безсребреницы и преславнии чудотворцы.

Кондак 7

Хотяще силу Христову злочестивому царю открыти, Духа Святаго исполнени рекосте: буди посрамлен, о Карине, и с богами твоими! И абие ему лице изменися, и выя совратися, и, молящеся к вам, глаголя: се ныне вижду, яко раби есте Истиннаго Бога. Молю убо вас, да якоже иных уврачевасте, сице исцелите и мене, да и аз купно с вами воспою Богу: Аллилуиа.

Икос 7

Дивнии о нас молитвенницы, целителие душ и телес наших и ходатаи спасения вечнаго, благодарным сердцем воспевающе хвалебную песнь Богу, даровавшему нам таковых великих чудотворцев, приносим и вам похвалы сицевыя:

Радуйтеся, Ангелов терпением вашим удивившии; радуйтеся, божественным сиянием чудес своих вся просветившии.

Радуйтеся, скории от всяких болезней и безмезднии врачеве; радуйтеся, заступлением вашим разслабленныя исцеляющии.

Радуйтеся, от неисцельных болезней здравы воздвизающии; радуйтеся, достойне совершившии земный подвиг жития вашего.

Радуйтеся, о нас, обнаженных добрых дел, присно к Богу предстательствующии; радуйтеся, яко сиянием премудрости, от Господа вам данныя, всех верных просвещаете.

Радуйтеся, молитвенницы о нас и заступницы наши предивнии; радуйтеся, доблии страстотерпцы Христовы.

Радуйтеся, кровьми своими землю освятившии; радуйтеся, идольское безумие обличившии.

Радуйтеся, Космо и Дамиане, святии безсребреницы и преславнии чудотворцы.

Кондак 8

Странное мирови житие ваше видяще, устранимся и мы того сует и, ум на небеса преложше, возопиим к вам, святии безсребреницы: утолите болезни, источая благодатная врачевания всем, усердно к помощи вашей притекающим и вопиющим Богу: Аллилуиа.

Икос 8

Все житие ваше на земли любовию к Богу и к ближним исполнивше, святии безсребреницы Космо и Дамиане, скории и ныне помощники являетеся всем, с верою призывающим вас; не точию бо близ притекающим ко святым мощем вашим, но и далече сущим исцеления источаете. Темже приносим вам похвалы сия:

Радуйтеся, Единому Богу, в Троице славимому, верно послужившии; радуйтеся, единое еже на потребу премудро избравшии.

Рядуйтеся, яко в неустанном труде и подвизе дни и нощи ваша без всякаго уныния препроводили есте; радуйтеся, яко сицевым вашим тесным и скорбным житием славу Божию в человецех умножили есте.

Радуйтеся, доблии Христовы последователие; радуйтеся, яко научители и творцы Христовых заповедей явилися есте.

Радуйтеся, яко именами велиих в Царствии Небеснем наречени бысте; радуйтеся, славою Христовою весь мир озарившии.

Радуйтеся, яко страданием вашим безстрастие прияли есте; радуйтеся, яко мученическою смертию безсмертие стяжали есте.

Радуйтеся, яко Ангели, на небеси и на земли прославленнии; радуйтеся, яко Богу ныне венценосни предстоите.

Радуйтеся, Космо и Дамиане, святии безсребреницы и преславнии чудотворцы.

Кондак 9

Всякое естество человеческое удивися сиянию в вас благодати Божией, святии Космo и Дамиане, егда нечестивый царь Карин, узрев чудеса, от имени Господа Иисуса Христа вами творимая, уверова и прослави Бога. Темже и мы, славяще давшаго вам сицевую силу, поем Ему: Аллилуиа.

Икос 9

Вития многовещанная недоумеют довольно изобразити обилие любве вашея, еюже преисполнени бысте, святии угодницы, к человеком о Господе. Сего ради из глубины сердец наших вопием к вам:

Радуйтеся, Господу своему даже до смерти поработавшии; радуйтеся, огнем любве Божия воспаляеми, огнь жертв идольских угасившии.

Радуйтеся, ближняго паче самих себе возлюбившии; радуйтеся, яко болящия и недужныя посещали есте.

Радуйтеся, нужды убогих предварявшии; радуйтеся, печальных утешителие.

Радуйтеся, отчаянных заступницы; радуйтеся, сирых питателие.

Радуйтеся, люте страждущим помощницы; радуйтеся, угнетенных свободителие.

Радуйтеся, яко, добре течение скончавше, ко Христу вознесостеся; радуйтеся, яко в Царствии Его водворяетеся.

Радуйтеся, Космо и Дамиане, святии безсребреницы и преславнии чудотворцы.

Кондак 10

Спасти хотя многия, яви нам Господь вы, чудотворцы Своя: кто бо не умилится, видя ваше безмерное ко всем сострадание; кто ли вы не ублажит, яко не токмо человеки от недуг исцеляете, но и скоты милуете; не отрините убо и наших молитв, но на вся ны неоскудно великия и богатыя ваша милости излейте, да вопием Богу: Аллилуиа.

Икос 10

Стены есте всем, похваляющим чудеса ваша, о безмездницы, и к заступлению вашему прибегающим; стены и забрала есте, ограждающия от всех бед усердно в помощь вас призывающим. Темже убо и нас от нищеты, напастей, недугов и скорбей оградите, молимся и тепле вопием к вам:

Радуйтеся, адамантов крепость в терпении превозшедшии; радуйтеся, неповинно от зависти сребролюбца пострадавшии.

Радуйтеся, славнии в бедах заступницы; радуйтеся, немощных и обидимых укрепление.

Радуйтеся, крепцыи в напастех защитителие; радуйтеся, убогих и нищих всещедрии обогатителие.

Радуйтеся, алчущих милостивии кормителие; радуйтеся, болезньми и тяжкими недуги одержимых премудрии уврачевателие.

Радуйтеся, с верою к вам притекающим от всех скорбных обстояний теплии защитителие; радуйтеся, яко память ваша всеми славима на земли.

Радуйтеся, яко имена ваша написана суть на Небесех; радуйтеся, яко от Бога препрославлени есте.

Радуйтеся, Космо и Дамиане, святии безсребреницы и преславнии чудотворцы.

Кондак 11

Пение всеумиленное, ныне нами приносимое, несть довольно к похвалению преславных подвигов и трудов ваших, яже Христа ради подъяли есте в животе своем; обаче дерзающе просим, усердное моление наше приемше, и нас от бед своими молитвами избавите, да умиленным сердцем воспоим Богу: Аллилуиа.

Икос 11

Светозарный и небесный ум явили есте иногда пред Карином, заблуждение того обличая; ныне же нетлением мощей ваших и множеством чудес православие утверждаете. Темже благодарственно зовем:

Радуйтеся, Ипостасное Слово дерзновенно проповедавшии; радуйтеся, силу идольскую добропобедно упразднившии.

Радуйтеся, яко вами попрася служение бесом; радуйтеся, яко вами поклонение Христу проповедася.

Радуйтеся, учителие премудрии; радуйтеся, всех добродетелей неленостные исполнителие.

Радуйтеся, яко по трудех земных в селениих небесных ликовствуете; радуйтеся, яко и по преставлении своем нас не оставляете.

Радуйтеся, яко всем, с верою призывающим вас, скорую помощь подаете; радуйтеся, святии врачеве, яко болезни наша исцеляете.

Радуйтеся, молитвы верных не отревающии; радуйтеся, и о нас недостойных у Престола Божия ходатайствующии.

Радуйтеся, Космо и Дамиане, святии безсребреницы и преславнии чудотворцы.

Кондак 12

Благодать, юже даде вам Господь Бог, целити вся недуги душевныя же и телесныя, днесь собра нас, да почтим память вашу, святии безсребреницы Космо и Дамиане, благоговейно убо взирающе на честную икону вашу и со умилением сердца к ней припадающе, молим избавитися всем нам от всяких зол и болезней, да воспоем вси Богу: Аллилуиа.

Икос 12

Поюще чудеса ваша, восхваляем труды и подвиги, ублажаем мученическую кончину, почитаем ходатайство и сильное заступление ваше о всех, требующих помощи вашея; величаем подателя всех благ Бога, даровавшаго нам толико дивных молитвенников, и со умилением зовем:

Радуйтеся, Иисуса Господа верно проповедавшии; радуйтеся, истины Его доблии свидетелие.

Радуйтеся, теплии о нас у Престола Его предстатели; радуйтеся, телес наших благосострадательнии врачеве.

Радуйтеся, Царствия Небеснаго и вечных благих наследницы; радуйтеся, по Бозе все наше упование.

Радуйтеся, миро благовонное исцелений источающии; радуйтеся, страстей злосмрадие молитвами своими отревающии.

Радуйтеся, исцелений дателие и чудес источницы; радуйтеся, светоноснии столпи церковнии и забрала недвижимая.

Радуйтеся, винограда истиннаго божественныя лозы; радуйтеся, двоице световидная мудрых безсребреников.

Радуйтеся, Космо и Дамиане, святии безсребреницы и преславнии чудотворцы.

Кондак 13

О предивнии безсребреницы, чудотворцы, целителие и славнии угодницы Божии, Космо и Дамиане, приимите моления сия наша, от сокрушеннаго сердца возносимая; исцелите многообразныя недуги наша и теплым предстательством вашим испросите нам от Христа Бога избавление от всех бед и напастей, прощение прегрешений наших и благую надежду вечнаго спасения, да сподобимся с вами и со всеми святыми в безконечныя веки воспевати Богу, Спасителю нашему: Аллилуиа.

Этот кондак читается трижды, затем икос 1-й «Ангельскому жительству…» и кондак 1-й «Избраннии чудотворцы…».

Молитва первая

Чудотворцы славнии, врачеве безмезднии, Космо и Дамиане! Вы от юности Христа Бога возлюбивше и Того повеления всем сердцем соблюдающе, аще и вдасте себе учению врачебному, но добродетельнаго ради жития и чистоты душевныя, силою Христа Бога, не врачевания токмо искусство, но паче неоскудную благодать исцеления всяких недугов от Бога прияли есте. Отонюдуже любовию и милосердием к недугующим подвизаеми, не токмо людем, но и скотом исцеления болезней подаваете, неисчетным множеством чудес ваших весь мир наполняете, и не телесныя токмо недуги исцеляете, но и верою Христовою души просвещаете, в терпении болезней укрепляете, в тяжких недузех о исправлении жития вразумляете и ко Христу покаянием привлекаете. Темже ныне и нас, припадающих к вам пред честною иконою вашею, скоро услышите, юныя дети, вашей помощи во учении книжном просящия, вашими молитвами наставите, да вашему житию ревнующе, не земное точию научение приобрящут, но паче во благочестии и правой вере выну да преуспеют. На одре болезни лежащим, человеческия помощи отчаянным, к вам же тепле с верою и усердною молитвою прибегающим, исцеление болезней вашим милостивым, чудодейственным посещением даруйте. Многажды в болезни впадающия и от лютых недугов в уныние, малодушие и роптание пришедшия, данною вам от Бога благодатию в терпении утвердите и наставите, да уразумеют волю о них Божию святую и благую и сами себе и живот свой воли Христа Бога предают. В недузех сущих, о исправлении же жития не радящих, во гресех не раскаивающихся, сердцем ожесточенных сокрушите во спасение и к покаянию призовите, да немощни суще телом, здрави пребудут душею, и причастницы соделаются Божия спасительныя благодати. Братию святаго храма сего, вашему святому заступлению от Бога врученную, и всех к вам усердно прибегающих невредимы сохраните от долгонедужия, от болезней лютых и неисцельных, от разслабления тела, от иступления ума, от смертоносныя язвы, от внезапныя смерти, и всемощным ходатайством вашим к Богу соблюдите в правой вере твердых, во благочестии преспевающих, в добрых делах усердных, в молитве к Богу прилежных, да с вами вкупе сподобятся в будущем веце присно воспевати и славити всесвятое и великолепое имя Отца, и Сына, и Святаго Духа, во веки веков. Аминь.

Молитва вторая

К вам, святии безсребреницы и чудотворцы Космо и Дамиане, яко к скорым помощником и теплым молитвенником о спасении нашем, мы, недостойнии, преклоньше колена, прибегаем и, припадающе, усердно вопием: не презрите моления нас, грешных, немощных, во многия беззакония впадших и по вся дни и часы согрешающих. Умолите Господа, да пробавит нам, недостойным рабом Своим, великия и богатыя Своя милости; избавите нас от всякия скорби и болезни, вы бо прияли есте от Господа и Спаса нашего Иисуса Христа неоскудную благодать исцелений, ради твердыя веры, безмезднаго врачевания и мученическия кончины вашея. Услышите нас, молящихся, и благоприятным ходатайством вашим испросите у Христа Бога православным людем на враги победу и одоление. Паки, припадающе, прилежно молим: испросите нам от Господа вся благополезная, яже в животе нашем временнем, наипаче же ко спасению вечному служащая, да сподобимся молитвами вашими улучити кончину христианскую, безболезненну, непостыдну, мирну, и да избавимся от козней диавольских и вечныя муки, безконечнаго же и блаженнаго Царствия Небеснаго наследницы будем. Ей, угодницы Божии, не престайте молящеся за ны, с верою к вам притекающия. Аще бо по множеству грехов наших и несмы достойни милосердия вашего, обаче вы, вернии подражателие человеколюбия Божия суще, сотворите, да принесем плоды достойны покаяния и в вечный покой достигнем, хваляще и благословяще дивнаго во святых Своих Господа и Бога и Спаса нашего Иисуса Христа, и Пречистую Матерь Его, и ваше теплое заступление, всегда, ныне, и присно, и во веки веков. Аминь.

[/spoiler]