Кондак 1

Избранный добродетелей подвижниче и учения Христова проповедниче, преподобне отче Аврамие, похвальная восписуем ти по достоянию; ты же, яко имеяй дерзновение ко Христу Богу нашему, способствуй нам твоими молитвами спастися от всяких скорбей и бед и озлоблений, да зовем ти: Радуйся, преподобне отче Аврамие, великий и преславный Ростовский чудотворче.

Икос 1

Яко ангела земнаго, яви тя граду Ростову Царь ангелов: провидев твое от идолослужения к Нему обращение, непостижимым образом призва тя из тьмы в чудный Свой свет; нас же величающих неисповедимую благость Его, научи взывати тебе таковая: Радуйся, от утробы матерней Богом предъизбранный; Радуйся, благоволением Сына Божия от нечестия ко благочестию от юности призванный. Радуйся, пламенную любовь ко Христу явивый; Радуйся, иноческое житие до конца возлюбивый. Радуйся, языческаго нечестия ревностный обличителю; Радуйся, добрый ревнителю христианская веры. Радуйся, преподобне отче Аврамие, великий и преславный Ростовский чудотворче.

Кондак 2

Видяще родители твои тебе, преподобне, на долзе времени в лютом разслаблении суща, недоумеваху; обаче прелестию многобожия зела ослеплени бывше, не возжелеша обратитися к единому истинному Богу, подающему всем страждущим скорое исцеление, и вкупе с тобою воспевати Ему: Аллилуиа.

Икос 2

Разум недоразумеваемый о несозданном Божестве уразумел еси, преподобне, и положил еси в сердце твоем обратитися ко Христу и последовати Его учению. Темже мы, чудящеся о скором твоем на лучшая преложению, дерзаем восхваляти тя таковыми гласы: Радуйся, земле благая, приявшая семя небеснаго учения; Радуйся, свыше удостоивыйся Божественнаго просвещения. Радуйся, ниво, произрастившая класс живыя веры; Радуйся, сосуде, исполненный благодати обильно. Радуйся, крине, возникший посреде терния; Радуйся, звездо, возсиявшая во тме языческаго нечестия. Радуйся, преподобне отче Аврамие, великий и преславный Ростовский чудотворче.

Кондак 3

Сила Вышняго внезапу найде на тя, преподобне, и стягну состав тела твоего. Ты же, восстав от одра твоего, аки николиже болевый, в радости неизглаголанней, благодаря безмезднаго Врача твоего, Его же прежде не ведел еси Иисус Христа, возопил Ему: Аллилуиа.

Икос 3

Имея помышление в сердцы своем еже послужити Христу, даровавшему тебе исцеление, отай изшел еси из дому родителей твоих и прилепился еси ко Христу Господу; тем мы, ублажая благое твое изволение, вопием ти сице: Радуйся, дом и родителей твоих Господа ради оставивый; Радуйся, в неведомей ти стране взысканий спасение. Радуйся, богатство земное ни во чтоже вменивый; Радуйся, нищету паче богатства возлюбивый. Радуйся, образе жизни духовныя; Радуйся, свете, возсиявый из тмы греховныя. Радуйся, преподобне отче Аврамие, великий и преславный Ростовский чудотворче.

Кондак 4

Буря недоумений смущаше тя, преподобне, еще не крещену ти сущу, елее како получити знамение христианския веры. Бог же всякия утехи тайным Своим промышлением приведи тя в обитель иночествующих, да ту возродишися водою и духом, и в чистоте сердца посреде лика иночества воспеваеши Ему: Аллилуиа.

Икос 4

Слышавше братия о пришествии твоем в обитель их, преблаженне, и видевше тя благоприятна и разумна, прияша с радостию и, крестивше во имя Отца и Сына и Святаго Духа, причтоша к лику своему. Мы же, Промыслу Божию, о тебе явленному, чудящеся, восхваляем тя сице: Радуйся, святым крещением в обители иночествующих просвещенный; Радуйся, во святом крещении дарами Духа Святаго исполненный. Радуйся, по крещении образ иноческий на ся приемый; Радуйся, иго благое Господне на рамо твое вземый. Радуйся, яко усердно последовал еси стопам Христовым; Радуйся, яко на вся подвиги иноческие уготовал еси душу твою. Радуйся, преподобне отче Аврамие, великий и преславный Ростовский чудотворче.

Кондак 5

Боготечная звезда явился еси, отче Аврамие, в пределех града Ростова возсиявшая; не терпя бо славы и похваления человеческаго, умыслил еси сокрытися в неведомыя страны; темже пришед в чудский конец, вселился еси близ езера Неро в пусте месте, идеже идол Велес стояше, емуже неразумнии людие покланяхуся, ты же верою крепко воспевал еси Богу: Аллилуиа.

Икос 5

Видевше благоразумнии и богобоязненнии людие града Ростова уединенное и благочестивое по Бозе житие твое, зело возлюбиша тя и попремногу чествоваху. Темже и от нас приими похвалы сицевыя: Радуйся, пустынное житие о Бозе возлюбивый; Радуйся, древним пустынно добрый подражателю жителем. Радуйся, искушений лукаваго врага крепкий борителю; Радуйся, в трудех и подвизех рано Господеви Богу послуживый. Радуйся, яко в посте и молитвах выну пребывав еси; Радуйся, яко с непрестанным бдением и Богохвалением безплотным поревновал еси. Радуйся, преподобне отче Аврамие, великий и преславный Ростовский чудотворче.

Кондак 6

Проповедует радостно град Ростов великие труды твоя и подвиги, блаженне Аврамие, яже подъял еси, егда языческое нечестие разрушаше и в сердцах людей истинную веру и благочестие насаждаше; единем бо того желанием горяше, да всех приведеши ко Христу и научиши вкупе с тобою воспевати Ему: Аллилуиа.

Икос 6

Возсия паче солнца богоугодное житие твое, всехвальне отче Аврамие, и якоже звезды небесныя, озариша добродетели твоя землю Ростовскую, о них же и мы благодаряще Христа Бога, давшаго ти таковую благодать, восхваляем тя сице: Радуйся, звездо, во тме греховней заблуждшим светящая; Радуйся, лествице, возводящая последующих ти по степенем добродетелей от земли на небо. Радуйся, яко равноангельскому житию всех образом жития твоего учиши; Радуйся, яко страсти греховныя подражающих ти побеждати руководиши. Радуйся, образе истиннаго смирения; Радуйся, зерцало истиннаго самоотречения. Радуйся, преподобне отче Аврамие, великий и преславный Ростовский чудотворче.

Кондак 7

Хотя Преблагий Бог утешити тя в скорби твоей и о людех, в зловерии язычестем погибающих, блаженне Аврамие, посла на помощь к тебе возлюбленнаго ученика Своего Иоанна Богослова, яко да укрепит тя к низложению сквернаго идола Велеса, ты же, жезлом от него вооружен и верою утвержден, в дерзновении мнозе возопил еси Богу: Аллилуиа.

Икос 7

Новаго веры ревнителя, якоже Николая Мирликийских святителя, видим тя, богоносе отче Аврамие; яко же бо той, ревностию Божественною распалаем, капище языческо в Ефесе разсыпа до основания, сице и ты богомерзскаго идола Велеса во граде Ростове силою крепкаго сокрушил еси; сего ради по достоянию приими от нас похвалы сицевыя: Радуйся, святому Иоанну Богослову собеседник быти сподобивыйся; Радуйся, благодать и силу с жезлом от него приемый. Радуйся, яко сим жезлом сокрушил еси сквернаго идола Велеса; Радуйся, яко вельми посрамил еси обитавшаго во идоле исконнаго человекоубийцу. Радуйся, яко на сем месте храм и обитель святую во славу истиннаго Бога воздвигл еси; Радуйся, яко зде пристанище благотишное обуреваемым молвами житейскими уготовал еси. Радуйся, преподобне отче Аврамие, великий и преславный Ростовский чудотворче.

Кондак 8

Странное чудо видевше в храмине твоей благовернии Князие, пришедше благословение от тебе по обычаю прияти, егда дым чермн смраден зело изыде от умывальницы твоея, ужасошася. Ты же, уразумев злоковарнаго лукаваго духа действие, поучив Князи опасно блюсти себе от козней вражиих, купно с ними возопил еси Богу: Аллилуиа.

Икос 8

Весь равною ко всем горел еси любовию, достохвальне отче Аврамие, и яко же в животе твоем, тако и ныне всех, верою к тебе прибегающих, молитвами твоими ограждаеши от всякаго зла. Достойне убо приемлеши от всех похвалы сицевыя: Радуйся, теплый молитвенниче к Богу о нас грешных; Радуйся, наставниче, руководяй к небеси верных. Радуйся, бедствующих многомощный помощниче; Радуйся, оскорбляемых крепкий покровителю. Радуйся, посетителю скорый в немощех лежащих; Радуйся, утешителю благий в бедах сущих. Радуйся, преподобне отче Аврамие, великий и преславный Ростовский чудотворче.

Кондак 9

Естество ангельское подражая, не усрамился еси, достоблаженне Аврамие, егда по навету всезлобнаго врага приведен был еси в единей раздранней власянице к Великому Князю Владимиру, но паче самаго того врага смирением и незлобием посрамил еси; чесо ради с великою честию в обитель твою возвращшися и мир и благословение чадом твоим подавая, в радости духовней возопил еси посреде их Богу: Аллилуиа.

Икос 9

Витийствующий язык не может достойно восхвалити тя, преславне отче Аврамие, многие бо и преславные подвиги в животе твоем совершил еси; мы же, к тебе любовию подвизаемии, во смирении сердца дерзаем воспевати тебе таковая: Радуйся, возшедый в горний град Господа Вседержителя; Радуйся, преселивыйся в Царство Небесное. Радуйся, яко святая твоя душа ныне в пресветлом Сионе вселися; Радуйся, яко и тело твое нетлением в обители твоей прославися. Радуйся, теплый о нас предстателю ко Христу Богу; Радуйся, благодать нам от Него обильную молитвами твоими подаваяй. Радуйся, преподобне отче Аврамие, великий и преславный Ростовский чудотворче.

Кондак 10

Спасти хотя душу Гермогена некоего, по действу диаволю в сомнение о тебе впадшаго, досточудне Аврамие, мало неколико дней наказав, за молитвы братии обители твоея паки помиловал еси. Он же, познав свое согрешение, прослави тебе незлобиваго благодетеля своего, и Богу, тобою чудодеющему, возопи: Аллилуиа.

Икос 10

Стена граду Ростову ты еси, чудотворче святый Аврамие, и всем, прибегающим к тебе, надеждо крепкая и заступление. Темже и нас, любовию ублажающих тя, от недугов и нужд свобождай, вопиющих тебе таковая: Радуйся, стено нерушимая града Ростова; Радуйся, забрало собранного тобою стада духовных овец. Радуйся, во правоверии стоящих незыблемое утверждение; Радуйся, во благочестии ходящих крепкое ограждение. Радуйся, поборниче крепкий ведущих брань к духовом злобы поднебесным; Радуйся, вождю премудрый, путь прискорбный и тесный шествующим показуяй. Радуйся, преподобне отче Аврамие, великий и преславный Ростовский чудотворче.

Кондак 11

Пение всякое не довлеет к похвале твоей, преподобне отче Аврамие, кто бо возможет по достоянию прославити многотрудное житие твое или восхвалити подвиги твоя, яже по вся дни и нощи в постех и бдениих, стояниих и коленопреклонениих богоугодне подъял еси, их же ради предстоя ныне Престолу Божию на небесех, со всеми святыми поеши Христу Богу: Аллилуиа.

Икос 11

Светозарное светило, не точию град Ростов озаряющее, но и вся грады и страны Российския просвещающее, зрим тя, светоявленне отче Аврамие; с невещественными бо Ангельскими светы предстоя Троичному несозданному свету, и от него Божественными лучами осияваем, облиставаеши верных, вопиющих ти сице: Радуйся, светильниче, добродетельми светящий; Радуйся, молитвами твоими нас ограждающий. Радуйся, свете, плавающих в житейстем мори освещаяй; Радуйся, светением твоим безбедно преплывати от мира к небеси направляяй. Радуйся, святынею твоею град наш присещаяй; Радуйся, чудесы твоими вся концы озаряяй. Радуйся, преподобне отче Аврамие, великий и преславный Ростовский чудотворче.

Кондак 12

Благодать данную ти от Бога сведуще, и на твое мощное к Нему предстательство уповающе, умильно взываем к тебе, чудотворче святый, моли неисповедимую благость Его, яко да избавит нас, недостойных раб Своих, от искушений вражиих, да прелести его избавльшеся, чистым сердцем и не скверными устнами воспеваем Богу: Аллилуиа.

Икос 12

Поюще твое честное преставление, чтим радостно по долгу память твою, и к твоему цельбоносному гробу припадающе, благодарение приносим, яко и по преставлении твоем нас не оставляеши, но милостивно призираеши, посещаеши и заступаеши; темже слышиши от нас таковая: Радуйся, в мире и радости духовней от обители твоея на небеса преселивыйся; Радуйся, лику избранных тамо приобщивыйся. Радуйся, яко в сонме их предстоиши дивному во святых Богу; Радуйся, яко лицем к лицу зриши неизреченную славу Его. Радуйся, яко тело твое святое нетленно обретеся на земли; Радуйся, яко тем возвеличи Господь обитель твою и град наш. Радуйся, преподобне отче Аврамие, великий и преславный Ростовский чудотворче.

Кондак 13

О, преподобне и преблаженне отче Аврамие, светильниче града Ростова! Нынешнее наше приемый приношение, принеси теплую молитву твою ко Господу, яко страну нашу да избавит от всех врагов видимых и невидимых, от нашествия иноплеменных, от недуга и глада, от всякия скорби и смертоносныя язвы, и будущия изми муки всех вопиющих к Нему: Аллилуиа.

(Этот кондак читается трижды, затем икос 1 и кондак 1)

 

Молитва преподобному Аврамию Ростовскому

О, преподобне отче наш Аврамие! Не забуди нас, но поминай всегда во святых твоих и богоприятных молитвах стадо твое, еже сам собрал еси, и моли за ны, чада твоя, отче священный, яко имеяй дерзновение ко Господу; не мним бо тя мертва суща, аще и преставился еси от нас, пастырю наш добрый. Се мощи твоя святыя пред очима нашима, святая же твоя душа, со ангельскими безплотных лики Престолу всех Царя предстоящи, достойно веселится. Испроси убо нам время на покаяние, яко да возможем невозбранно прейти от земли на небо, и вечныя муки избавившеся, Небеснаго Царствия наследники будем со всеми праведными, от века благоугодившими Господу нашему Иисусу Христу, Емуже подобает всякая слава, честь и поклонение со Отцем и Святым Духом ныне и присно и во веки веков. Аминь.

Кондак 1

Агнице и угоднице Христовой, долготерпеливей преподобномученице Анастасии, скорой помощнице и молитвеннице нашей, усердное пение и поклонение приносим, яко имущей премногое дерзновение ко Господу, еже от всяких напастей, скорбей и болезней освобождати нас, да с умилением и любовию зовем: Радуйся, Анастасие, многострадальная и избранная Невесто Христова!

Икос 1

Ангелом уподобилася еси разумом чистым, познавши Творца Всемогущаго, иже есть всего видимаго и невидимаго вечное начало и единый конец желаний всех боголюбивых, мы же восхваляем дивное воспитание твое от подвижницы игумении Софии, с благоговением великим вопием ти: Радуйся, от дней младенчества вместившая в свое сердце веру Христову; Радуйся, трехлетняя отроковице, избранная и преславная во иночестве. Радуйся, возраставшая в богопознании, при красоте телесней и душевней; Радуйся, в греховном Риме соблюдшая чистоту и благолепие взора и жизни. Радуйся, всегда невидимо охраняемая ангелы Божьими; Радуйся, святою правдою твоею к Жениху Христу приблизившаяся. Радуйся, Анастасие, многострадальная и избранная Невесто Христова!

Кондак 2

Видевше сияние лица твоего, святая преподобномученице Анастасие, знатнии людие града Рима удивляхуся, взирающе на тя, на рост твой и взор веселый и радостный, не видяще красоты души и мыслей твоих. Мы же, поминающи тя, слушающую у ног старицы Софии историю Церкви Вселенския и жизнь Спасителя мира, умными очами восходим от вещей земных во область небесную, взываем с верою: Аллилуиа!

Икос 2

Глубиною разума паче ума мирских мудрецов явилася еси, отроковице непорочная, измлада размышлявшая о Господе нашем Иисусе Христе, Ему же и благоугождати вожделела еси для подвигов духовных. Поминающе твою таковую ревность о спасении для жизни вечныя, сия похвалы тебе от души приносим: Радуйся, образе чистоты и целомудрия; Радуйся, прельщение возраста юнаго победившая. Радуйся, неверных светом веры просвещавшая; Радуйся, в храм Господень на молитву усердно приходившая. Радуйся, дев христианских истинное украшение; Радуйся, верная ко Христу Богу молитвеннице о нашем спасении. Радуйся, Анастасие, многострадальная и избранная Невесто Христова!

Кондак 3

Дивная сила Всевышняго чудесно храняще тя, юнице преподобная. яко сожительницу ангелов и собеседницу их, показала бо еси пред всеми идолослужителями святую веру и молитву твою. Воистину Святый Дух бе глаголяй тобою: «Готово серце мое, готова душа моя умрети за Господа Иисуса». За сие тя величающе, просим усердно: моли спасти и просветити души наша, да славословим с тобою Творца всяческих Бога и поем Ему: Аллилуиа!

Икос 3

Евангелия Христова имуще богоприятную святыню, во дни Декия царя и соправителя его Валериана при игемоне Прове, ты, блаженная дево Анастасие, в посте и подвигах день и нощь во обители малей работала еси Владыце Христу. Много враг завистливый и лукавый своими ухищрениями покушался на тя, Христову невесту, от равноангельскаго жития отвести. Но ты Жениху-Слову, яко дар, принесла еси непорочное твое девство и доблестное страдание. Сего ради умильно вопием ти: Радуйся, первое — поседение, второе же — кровь мученическую, яко алавастр мира, Иисусу Христу принесшая; Радуйся, крепкою волею своею благое иго Христово на себе понесшая. Радуйся, чисте сердце свое от всякия лести беззаконных мучителей дивно сохранившая; Радуйся, пречудная евангельская дево, светлогорящий светильник в себе имущая. Радуйся, достохвальная мученице, приявшая от Спаса Христа венец божественный и нетленный и силу благодатных исцелений; Радуйся, яко в созерцательней душе своей непрестанно имела еси веру, надежду, молитву и терпение. Радуйся, Анастасие, многострадальная и избранная Невесто Христова!

Кондак 4

Злобную бурю ярости своея воздвиже на тя нечестивый мучитель, святая Анастасие, близ двадесяти лет доброзрачну видя зело, и яко пленницу и рабу вменяше тя: ты же, воспоминающе Господа Иисуса Христа, яко вифлиемскаго Богомладенца, Пророка и Отрока Назарета, Мудрость храма Иерусалимскаго, чудо чудес истории мира, Спасителя, Врача душ и телес человеческих, Тому единому угождати вожделела еси, воспевающе песнь хвалебную: Аллилуиа!

Икос 4

Имуще всегда пред светлыми очима своима Господа и Бога и Спаса нашего Иисуса Христа, оклеветана была еси от неверных пред игемоном Провом. Возвестивша бо сему, яко есть такова девица, ея же красота несть подобныя во всем Риме, пребывает та у некиих жен убогих и безмужно живущих, не хощет имети мужа, верует Распятому и посмеивается устремлениям нашим. Ты же из глубины души рекла еси: «Мое богатство — Христос есть. За Него же умрети желанием вожделех». Сей светоносный ответ твой почитающим, богомудрая, просвещение свыше испроси, да взываем ти благоговейно: Радуйся, сердцем своим видевшая Господа Христа, преобразившегося на Фаворе; Радуйся, душею своею содрогавшеюся при мысли о поругании, бичевании, осуждении и распятии Спасителя мира. Радуйся, со слезами молитвенными целовавшая икону Христа в венце терновом; Радуйся, телесное воскресение Христа Жизнодавца проповедавшая усты своими. Радуйся, вознесение Господне на горе Елеонстей ясно запечатлевшая во глубине сознания; Радуйся, непрестанно обращавшаяся ко Иисусу Христу — безконечному свету и жизни, и пристанищу верных. Радуйся, Анастасие, многострадальная и избранная Невесто Христова!

Кондак 5

Фимиамом молитвы и светом боговедения, яко боготечная звезда сияла еси во стране Римстей, святая преподобномученице Анастасие. Егда же игемон Пров посла слуги своя привести тя на суд человеческий и тии, вземше сечива, разсекоша двери монастырския. Тогда игумения София глагола ти словеса великая разума и света: Чадо мое, Анастасие, молись, не устрашайся, ныне бо время подвига есть, се Жених твой, Иисус Христос, хощет венчати тебе, буди верна ему до смерти, благоразумно и непрестанно поя: Аллилуиа!

Икос 5

Иматисма твоя преподобническая, в ней же молилася еси в церкве, святая Анастасие, угодна бе Жениху Небесному, Царю Славы, Иисусу Христу. Верила бо и исповедывала пред мучители, яко Господь Создатель и Спаситель не отступит от тебе. Но введет в небесный чертог Свой, возвав вся ангельския силы и всех святых лики, веселие вечное ти сотворит. Сего ради и мы недостойнии от глубины сердца взываем: Радуйся, исповедавшая миру всесвятое имя Бога твоего; Радуйся, во гласе радования и во псалмех восклицания украшавшая душу свою. Радуйся, дщерь всехвальная вышняго и нетленнаго Иерусалима; Радуйся, пречудная послушнице священных научений блаженныя Софии. Радуйся, возложившая все упование на Сладчайшаго Господа Иисуса Христа; Радуйся, молитвами твоими избавляющая нас ныне от всяких болезней и скорбей. Радуйся, Анастасие, многострадальная и избранная Невесто Христова!

Кондак 6

Кровь богопроповедническая твоих честных страданий, преподобномученице Анастасие, свидетельствует во всем Риме подвиги святой крепости твоей, егда воины римстии возложиша железа на выю твою и поставиша пред игемоном; ты рекла ему: «имя мое — Анастасия, сиречь — воскресение, яко воскреси мя Бог глаголати истину веры пред тобою». Он же, подражая Ироду буесловному, не хотяще уразумети Господа Славы Иисуса Христа и пети Ему с тобою, яко солнцу правды: Аллилуиа!

Икос 6

Лампада возсияла еси чудная среди неверных от твоего исповедническаго подвига, святая Анастасие. Отнюдуже и град наш озаряеши тихим и дивным светом богопознания. Сего ради от всех верных возносятся тебе похвалы сицевыя: Радуйся, прилежно размышлявшая о сохранении в уме и сердце Божественных и животворящих заповедей Божиих; Радуйся, жившая на грешней земли по святому завету и святей правде Евангелия Христова. Радуйся, украсившая свою юную главу разумением сущности конечного основания и цели всего существующаго; Радуйся, яко Жених твой, сладчайший Иисус, даде тебе крепость и премудрость, ей же не возмогоша противитися вси неведущия истины. Радуйся, яко и нас гладных пищею духовною, благодатным и присносущным словом Божиим всегда укрепляеши и радуеши; Радуйся, богатство неистощимое исцелений от скорбей тебе подаде Владыка Господь, Его же душею и сердцем возлюбила еси. Радуйся, Анастасие, многострадальная и избранная Невесто Христова!

Кондак 7

Мира хотящи оставити суету, души благородие свыше добротами безконечными уяснила еси, Анастасие всехвальная, и игемону Прову рекла еси: Жених мой, и богатство мое, и жизнь жизни, и веселие вечное — есть Господь мой, Иисус Христос, от Него же не отвратиши мя лестными твоими словесы, не прельстиши мя, яко же змий Еву, не отлучиши мене и страхом мук от Господа моего, за Него же и стократ, аще бы можно было, умерети есть готова, и Ему со Отцем и Святым Духом, в Троице славимому и поклоняемому Богу, велегласно со всеми святыми пою: Аллилуиа!

Икос 7

Новую показа безчеловечия ярость лютый мучитель, егда тебе, преподобномученице Анастасие, повеле предстоящим бити в лице, и раздирати одежду, и тело обнаженное покрывати ранами, и, к четырем столбам привязаней, огнем со смолою, и серою, и зловонным дымом мучити, и к колеси привязати и терзати. Терпела бо еси дондеже изнемогоша вси биющии. Сие паче естественное мучение твое благоговейно воспоминающе, тебе, великой угоднице Божией, приносим песнь благодарения: Радуйся, яко на икону твою взирающе, тебе самой непорочней и нетленней Невесте Христовой поклоняемся; Радуйся, многообразныя и нестерпимыя муки за Господа Славы, Христа Бога претерпевшая. Радуйся, яко в страшных муках молящися взывала еси: «Господи, Прибежище мое и Защитниче мой, не отступи от мене, изнемогает в болезни душа моя и кости моя сотрошася»; Радуйся, вскоре силою невидимою отрешена была еси от страданий, и телом своим явилася еси цела и здрава, яко вси дивляхуся преславному чудеси тому. Радуйся, пред судищем беззаконных проповедавшая Того, о Ком же апостольский лик яве глаголет и к Кому же пророческий собор выну взирает; Радуйся, поклонявшаяся духом и телом Тому, Кого же сонм мученический боголепно исповедует и преподобных воинство преславное имя славословит. Радуйся, Анастасие, многострадальная и избранная Невесто Христова!

Кондак 8

К сему — древо странное и страшное уготовано бысть тебе, святая Анастасие, от игемона Прова, иже в злобе своей иными муками нача мучити тя: повеле убо, повесивши, строгати ребра и терзати тело твое. Ты же, светоносная и досточудная дево, воспоминая Господа Иисуса Христа, вся сия мужественно терпяше, к единому Богу возводяше очеса своя, глаголаша: Виждь болезнь мою, Женише мой, юже стражду Тебе ради, благоволи ко мне, да приятно Ти будет пролитие крове моея и да не буду отвержена от лика святых мучениц, но да воспою Ти песнь великую, в вышних трегубо песнословимую: Аллилуиа!

Икос 8

Осеняемая сладостию и желанием вечнаго непрестаннаго блаженнаго единения с Богом, ты, святая преподобномученице Анастасие, паки изувечена была от мучителя, иже повеле бритвою отрезати сосцы твоя, из них же изыде множество крове, изнемогла еси зело и просящи воды пити. Некто же от близ тамо стоящих, именем Кирилл, принесе воду и подаде тебе. Ты же, мало напившися, рекла еси к подавшему: Да не лишится воздаяние от Господа по словеси Его: «Иже аще напоит вы чашею студены воды во имя Мое, не погубит награды своея». Поминающе сицевая твоя словеса и доблестныя подвиги твоего исповедничества, умиленно взываем ти: Радуйся, святая Анастасие, богомудрием высоким преисполненная и превознесенная; Радуйся, одеждою твоею имевшая ангельскую невинность, пищею — святую правду Божию и жилищем покоя — блаженство святых. Радуйся, украшенная ранами страданий за имя Господа нашего Иисуса Христа; Радуйся, яко крове твоея капли паче меда и сота угода быша Жениху Безсмертному. Радуйся, двери вечныя жизни отверзающая своим ходатайством всем чтущим твоя болезни и страдания; Радуйся, при излиянии крове святыя твоея молившаяся Тому, Кого же Воинства Небесныя славят, и трепещут Херувимы и Серафимы. Радуйся, Анастасие, многострадальная и избранная Невесто Христова!

Кондак 9

Прияла еси силу от Бога всякое естество скорбящих очищати, дух наш из уныния пробуждати, и умиротворяти сердца всех в бурях житейский ти вопиющих: угоднице Божия, сотвори мне радость молитвами твоими. Приими убо и сие, приносимое тебе почитание благоговейное и трепетное, яко же прияла еси капли воды от напоившаго во время тяжких страданий твоих, тя, Христову мученицу; иже той и пойде ко Господу. Ты же прияла мзду свою. Сподоби и ныне похваляющих тя внити в Чертог Небесный и Божественный, идеже всякая душа праведных радуется и поет благодарным гласом Отцу света, Вседержителю Богу: Аллилуиа!

Икос 9

Разумно витийствующий многовещанный язык не возможет восхвалити страдальческия твоя подвиги по достоянию, святая преподобномученице Анастасие, кто бо рече о болениях твоих, егда ногти от перстов твоих исторгнуты, и руце и нози отсечены были, также и вся зубы твоя избиени быша, и язык клещами отрезан, и река крови исходяще из уст твоих. Ты же молчанием сердечным сице молилася еси: «Не остави мене, Боже, Спасителю мой!» И вси людии от страха возопиша, досаждая и укоряя игемона о таковом свирепом и безчеловечном его терзании агницы и угодницы Христовой. Мы же сицевая, муки твоя точию воспоминая, содрогаемся, и бренными нашими устами похвальная ти вопием: Радуйся, страстем Христовым подражавшая и кровию своею преподобномученическою Царя Славы уневестившаяся; Радуйся, истинная и добрая лозо винограда и Царства Христова. Радуйся, жестоковыйный народ неблагодарный священным своим долготерпением удивившая; Радуйся, яко ты в слезах горячих, взирая на небо, единому Спасителю Богу возсылала свои мысли и мольбы. Радуйся, яко Сам подвигоположник Иисус, Сын Божий, Человеколюбец похвали твоя подвиги и страдания; Радуйся, яко ты можеши по дару от Бога, от тьмы и бед избавляти творящих с любовию всечестную память твою. Радуйся, Анастасие, многострадальная и избранная Невесто Христова!

Кондак 10

Спасти хотя душу свою для неба и Бога, презрела еси мирское неразумие мучителя, иже разъярившися повеле за град извлещи тя, Невесту всенепорочную и достохвальную мученицу, и отсещи мечем честную главу твою. И бысть святое тело твое без погребения оставлено в снедь зверем и птицам, но Божиим покровением от них неприкосновенно хранящееся. Ты же присно созерцая пресветлое лице Христа Бога нашего, радостно душею своею ликуеши со ангелы и мученики и всеми святыми, воспевая песнь хвалебную: Аллилуиа!

Икос 10

Терпением своим великим, святая преподобномученице Анастасие, ты еси стена и твердое прибежище верным. ибо пришедшей нощи явися ангел Господень блаженней старице Софии и повеле взяти посеченное тело твое, в поле за градом Римом лежащее. Она же, вземше плащаницу чисту, изыде из монастыря, и не видяще камо идти, помолися же Богу, пойде и, Богом наставляема, Дойле до места, идеже святое тело твое повержено лежаще, еже со слезами лобзающи, умильно глаголаше: Радуйся, возлюбленная дщи моя, юже аз в безмолвии и трудах воспитах для Бога; Радуйся, дево прекрасная, юже аз в посте и молитве, и в целомудрии храня. Радуйся, доброхвальная мученице, страху Божию и закону Христову научившаяся; Радуйся, досточудная агнице в брачном одеянии непорочного девства явившаяся Иисусу Христу. Радуйся, украсившая кровию честною за Спаса Христа, уже не дщерь, но матерь и госпожа моя; Радуйся, ибо ты мое утверждение и тихая отрада в старости моей. Радуйся, Анастасие, многострадальная и избранная Невесто Христова!

Кондак 11

Гимн хвалебный и высокоторжественный восписуем ти, святая преподобномученице Анастасие, яко девственнице и молитвеннице телом и душею, яко храму Божию, дому Христову и обители Духа Святаго. Ты стояла еси на твердом камени упования небеснаго, его же не сокрушиша стихии мира. Ты пребывала еси в лоне Вселенския Церкви, идеже в Божественной иерархии Сам Христос есть путь в святыне веры и в лице Своем — истина, и в таинствах благодатных, и в существе своем — жизнь безконечная. Ты уразумела еси, яко вне Церкви несть спасения, несть и мученичества; тамо вне Церкви есть борьба, есть страдание, есть несчастие, но несть мученичества. Сие дарование ведает и озаряет святая Церковь Божия, и в ней токмо едиными усты и единым сердцем Троице Единосущней и Нераздельней возсылается боголепная верных молитва: Аллилуиа!

Икос 11

Феникс светоприемный и плодоносный возрасте в Церкви Христовой от твоея праведныя и богоугодныя жизни, святая Анастасие, и по преставлении твоем возсияла еси дивными чудесы. Се бо по смотрению Божию приидоша нецыи два незнаемии мужа честни видением, благою беседою и обретшие старицу Софию над телом твоим плачущуюся, помогоша ей и собравше отсеченныя уды твоя, руце же и нози, яже таможде из града извержени быша, и святую главу с телеси на места своя приложиша и плащаницею обвивше, и певше надгробныя песни, погребоша, славяще Отца, и Сына, и Святаго Духа. Мы же о сем дивящеся, яко Бог хранит и кости преподобных своих, ублажаем тя, молитвенно зовуще: Радуйся, крещенная и освященная в трисвятое имя в предвечнаго Царя веков; Радуйся, яко твое воспитание у игумении Софии бысть восрастание и созидание души по началам Царствия Божия. Радуйся, препоясанная от Бога правдою и истиною о чреслах своих, и чистотою и говением красящаяся; Радуйся, мыслившая о догматах веры, яко тии не развиваются, но раскрываются с новою широтою и большею глубиною. Радуйся, яко ты, Божия голубице и непорочная благоприятная жертво, явилася и преставилася еси Зиждителю и Промыслителю мира; Радуйся, от небеснаго Владыки Господа Иисуса Христа благолепный венец славы и блаженства восприявшая. Радуйся, Анастасие, многострадальная и избранная Невесто Христова!

Кондак 12

Ходатаице благодатная буди пред престолом Всевышняго ко спасению и сохранению от бед чтущих святую память твою, Анастасие преподобномученице. Принеси ныне теплую и святую молитву о нас, грешных, ко Господу сил, яко да презрев вся наша согрешения, в добродетелях преуспевати нас сотворит, да здравы суще телом и духом, хвалебно воспоим вси Творцу и Отцу Небесному, дивному во святых своих: Аллилуиа!

Икос 12

Псалмы Давидовы, сию книгу хваления, воспевала ты часто, святая преподобномученице Анастасие, ибо назидание Псалтири есть такожде богато, яко же богата и разнообразна жизнь нашей души. Любовь бо псалмопению породи обители преславныя, и вси псалмы являют единый глас благодарения и поклонения, и покаяния, и славословия, и неусыпающей молитвы. Тебе же, земней угоднице Божией, доступно бысть и духовное небо — учение Христово, идеже вместо солнца светит Евангелие, вместо луны — Ветхий Завет и вместо звезд — писание отцев. О сем убо радующеся и ведяще тя, скорую помощницу и молитвенницу нашу пред Богом, возглашаем ти сицевая: Радуйся, непрестанно творившая молитву Иисусову, яко дыхание и радование всей жизни; Радуйся, яко имя твое преподобномученическое по всей стране нашей от конца в конец прославляется. Радуйся, яко очко твое чудное, житием света сияющее от Божия Духа, озаряет наши умы и сердца верою древнею и святою; Радуйся, подражавшая Спасителю мира, еже претерпе распятие и смерть, не яко безсилен, но яко долготерпелив и многомилостив. Радуйся, яко ты всем поминающим твоя страдания в час смертный благонадежная предстательнице и утешительнице; Радуйся, яко от образа твоего святаго и благодатнаго являеши нам незримо помощь и силы божественныя. Радуйся, Анастасие, многострадальная и избранная Невесто Христова!

Кондак 13

О, предивная и многострадальная Невесто Христова, Анастасие, нынешнее аще и малое моление приими от нас, почитающих святую память твою. Охраняй нас богоприятными молитвами твоими от всякаго злаго обстояния и скорби, да тихое и мирное житие поживше во юдоли земней, блаженство райское на небеси наследим и купно с тобою сподобимся святых Святейшему Богу вечную и безконечную песнь воспевати: Аллилуиа! Аллилуиа! Аллилуиа!

(Этот кондак читается трижды)

Икос 1

Ангелом уподобилася еси разумом чистым, познавши Творца Всемогущаго, иже есть всего видимаго и невидимаго вечное начало и единый конец желаний всех боголюбивых, мы же восхваляем дивное воспитание твое от подвижницы игумении Софии, с благоговением великим вопием ти: Радуйся, от дней младенчества вместившая в свое сердце веру Христову; Радуйся, трехлетняя отроковице, избранная и преславная во иночестве. Радуйся, возраставшая в богопознании, при красоте телесней и душевней; Радуйся, в греховном Риме соблюдшая чистоту и благолепие взора и жизни. Радуйся, всегда невидимо охраняемая ангелы Божьими; Радуйся, святою правдою твоею к Жениху Христу приблизившаяся. Радуйся, Анастасие, многострадальная и избранная Невесто Христова!

Кондак 1

Агнице и угоднице Христовой, долготерпеливей преподобномученице Анастасии, скорой помощнице и молитвеннице нашей, усердное пение и поклонение приносим, яко имущей премногое дерзновение ко Господу, еже от всяких напастей, скорбей и болезней освобождати нас, да с умилением и любовию зовем: Радуйся, Анастасие, многострадальная и избранная Невесто Христова!

Молитва преподобномученице Анастасие Римляныне

Девственниц похвало и мучениц славо, Анастасие преподобная! К тебе во умилении сердец наших припадаем и твоего заступления у Господа о нас молим. Аще бо чистоте твоей не поревновахом и безбоязненнаго исповедания твоего не приобщихомся, паче же многими прегрешеньми и лютыми паденьми и отступствы гнев Божий привлекохом, но не хощем во гресех наших умрети и, на твоя мужеския подвиги взирающе, паки на одоление страстей наших ополчаемся. Сие же ведуще, яко кроме благодатныя помощи ничто же благое сотворити возможем, тую нам от Господа подати тебе просим. Ты бо, преподобномученице преславная, велие ко Владыце дерзновение стяжала еси, яко прославившая Его в чистой душе твоея и в телеси твоем страдальчестем, зане вся прельщения и прещения мучителя презревши, искоренение же зубов и ногтей истерзание, и сосцев и рук и ног отсечение сладце претерпевши, дерзновенно вопияла еси: “Христос есть богатство мое и похвала”! Темже от того богатства и нашей нищете духовная подаждь дарования и от безмерных прегрешений живот наш соблюди, мир и безмятежие нам испроси, от нужды и уныния нас предстательством твоим огради, друг ко другу нас в послушании и братолюбии настави и ко Господу очи сердец наших всегда возводи, во еже присно славити нам Отца и Сына и Святаго Духа державу, и твое теплое предстательство во веки веков. Аминь.